ပညာဧ၀၊ ဓနဘုရင်။
ယူ၍မခန်း၊ သုံးမခန်းပင်၊
တန်းဘိုးမှတ်၊ မပြတ်အပ်သည်ပင်။
အမွေခွဲ၍၊ ယူလေ့မလာ၊
သူခိုးမိုက်တို့၊ ခိုးဖို့ဝေးစွာ။
သင်ကြားပေးကမ်း၊ ရေစမ်းပမာ၊
ပညာမြတ်၊ သင်အပ်ကြသည်သာ။
အရွယ်ရုပ်ဆင်း၊ ပြည့်တင်းကြေးငွေ၊
အမျိုးကြီး၌၊ ဖြစ်ကြိုက်ပစေ။
ပညာလင့်က၊ မတင့်သရေ၊
ပေါက်ပွင့်ဆန်း၊ ပန်းနှင့်တူလှပေ။
သူတော်မဟုတ်၊ သူယုတ်ပယ်ခွာ၊
သူတော်ကောင်းနှင့်၊ ပေါင်းကြကုန်ပါ။
သူယုတ်ငရဲ၊ ခေါ်ဆွဲသည်သာ၊
သူတော်ကောင်း၊ ရောက်ကြောင်းထက်နတ်ရွာ။
ရောဂါကင်းရှင်း၊ စောင့်ခြင်းသီလာ၊
ပညာရှိတို့၊ ဆုံးမလိုက်နာ။
သုတရှာဘိ၊ ဒုစ္စရိခွာ၊
မပျင်းရိ၊ မှတ်သိအင်ခြောက်ဖြာ။
အင်္ဂါခြောက်ဝ၊ ပြည့်ကြသူမှာ၊
လောကီလောကုတ်၊ မဆုတ်ယုတ်ပါ။
ကြီးပွားလမ်းဟု၊ ခွဲခြမ်းပြကာ
မြတ်ဘုရား၊ ဟောကြားဒေသနာ။
ကိစ္စဟူက၊ လုံးဝဥဿုံ၊
ကိုယ်တိုင်ထကြွ၊ ပြုမှပြည့်စုံ။
သူများအားကိုး၊ ကိုယ်ကျိုးယုတ်ပုံ၊
ဉာဏ်ဖြင့်ကြည့်၊ များ၏ဤလူ့ဘုံ။
ထကြွသိမ်းဆည်း၊ သုံးစွဲချွေတာ၊
မိတ်ဆွေကောင်းနှင့်၊ ပေါင်းသင်းကြပါ။
အင်္ဂါလေးပါး၊ ပြည့်ငြားသူမှာ၊
ဤဘ၀မုချ ချမ်းသာရာ။
No comments:
Post a Comment