အကိုးအကားမဲ့ ပြောကြည့်ခြင်း
ငြိမ်းအေးလူ
-
မျက်ကန်းမယားပါ သနပ်ခါးမလိုဘူး
ပန်းပုဆရာသားပါ အစားအစာမလိုဘူး
ဘုန်းကြီးကျောင်းက ခိုတစ်ကောင်ပါ အိမ်မလိုဘူး
မလိုတာတွေကို ဖွင့်ပြောဖူးတဲ့ သောက်ရေအိုးကြီးသိတယ်
လိုတာတွေကို သိမ်းထားခဲ့ဖူးတဲ့ ဒိုင်ယာရီတစ်အုပ်သိတယ်။
-
တိမ်ကရေးတဲ့ ပန်းချီကားချပ်ထဲမှာ
ဘ၀ရဲ့ နေနည်းထိုင်နည်း ရှိတယ်
လရောင်က ငှားတဲ့ အလင်းထဲမှာ မျိုသိပ်မှုတွေရှိတယ်
သစ်ရွက်တွေက လက်ယပ်ခေါ်တဲ့ လေထဲမှာ အမြိုက်တရားရှိတယ်
ပျက်နေတဲ့ အသံချဲ့စက် တစ်လုံးထဲမှာတော့
အမှန်အမှား မရှိဘူး
မနောဓာတ်လေးတိုတို လက်တစ်ဆစ်လောက်ကို
အသက်ရှည်ချင်သေးလို့ မျိုထားရတာကြာပြီ
အလိုဆန္ဒတွေထဲမှာ ဘယ်တော့မှ သမ္မာကျမ်း မရှိဘူး။
-
( ၂၀၀၆ ခုနှစ်၊ နိုဝင်ဘာလထုတ် ရယ်စရာ ရသစုံမဂ္ဂဇင်း အမှတ်-၁၂ မှ)
No comments:
Post a Comment