(၁)
ဇာတ်ကားအမည် - တွေ့မယ်
ဝတ္ထု - ခင်ဦးခင်ခင် (ကန္တာရပင်လယ်ရဲ့ချစ်သူ)
ဇာတ်ညွှန်းနှင့်ဒါရိုက်တာ - ကိုပေါက်
သရုပ်ဆောင်များ - ကျော်ရဲအောင်၊ စိုးမြတ်နန္ဒာ၊ ဖိုးတာ၊ အရိုင်း၊ ဦးအောင်လွင်၊ ညောင်ညောင်၊ ကြူကြူသင်း၊ နှိုင်းယှဉ်မြင့်မိုရ်၊ ငှက်ပျော်ကြော်၊ ဧရာ၊ အောင်ဇော်၊ Kညိုဦး
ဇာတ်လမ်းအကျဉ်း
ကံပေါ်ဆိုတဲ့ သူဌေးသားလူပျိုကြီးက ဖခင်နဲ့စိတ်ဆိုးပြီး အိမ်ပေါ်ကဆင်းလာတယ်။ ကုမ္ပဏီတစ်ခုမှာ အလုပ်လာလျှောက်ရာက သူ့လိုပဲ အလုပ်လာလျှောက်တဲ့ လှအုန်းမယ်ဆိုတဲ့ အမျိုးသမီးတစ်ယောက်နဲ့ ဆုံတွေ့ခဲ့တယ်။ အလုပ်မှာ အတူတူလုပ်ကြရင်း ချစ်ကြိုက်သွားကြတဲ့ ဇာတ်လမ်းပါ။
ဝေဖန်သုံးသပ်ချက်
ဝတ္ထုကို မဖတ်ဖူးတဲ့အတွက် ဘယ်လိုနေမယ်မသိပါဘူး။ အခုဒီဇာတ်ကားကို ကြည့်ရတာတော့ ဘာကို ပေးချင်မှန်းကို မသိရဘူး။ ဇာတ်ကားနာမည် "တွေ့မယ်" ဆိုတာကြီးကလည်း ဘာမှလည်းမဆိုင်ဘူး။ ဒါရိုက်တာပေးချင်တာ ဘာလဲဆိုတာ သေချာကို မသိလိုက်ရဘူး။ မြင်တာတွေ ပြောမယ်။
စစချင်းအခန်းမှာကိုပဲ လှအုန်းမယ် (စိုးမြတ်နန္ဒာ)က အလုပ်လာလျှောက်တယ်။ အခန်းအ၀င်ပေါက်မှာ စဉ်းစားတာကလည်း ကြည့်ပါဦး - "အင်တာနက် ခေါ်ထားတယ်လဲပြောတယ်၊ လူလည်းဘယ်သူမှ မတွေ့ပါလား" တဲ့။ ကဲကောင်းရော။ အင်တာဗျူးနဲ့ အင်တာနက်ဆိုတဲ့ စကားလုံးကို မှားပြောထားတယ်။ အဲဒါကို ဒါရိုက်တာရော၊ တည်းဖြတ်ရော မသိကြဘူးလား။ ပြန်မကြည့်ကြဘူးလား။ အံ့ရော… အံ့ရော။
အလုပ်လာလျှောက်တာကလည်း ကံပေါ်(ကျော်ရဲအောင်) နဲ့ လှအုန်းမယ်(စိုးမြတ်နန္ဒာ) နှစ်ယောက်တည်း။ ဟော…. ပြီးတော့ အလုပ်ရသွားတော့လည်း သူတို့နှစ်ယောက်ပဲ။ ဒါဆိုရင် ဘာကိစ္စ အင်တာဗျူးဖြေနေသေးသလဲ။ အစကတည်းက လာလျှောက်သမျှလူကို ခန့်လိုက်ရင်ပြီးရော။ ပြီးတော့ အလုပ်ခေါ်တဲ့ကုမ္ပဏီကလည်း နိုင်ငံခြားသားတွေနဲ့ အလုပ်လုပ်ရတဲ့ ခရီးသွားဧည့်လမ်းညွှန်ကုမ္ပဏီလို့ ထင်တာပဲ။ လုံးဝကို အဓိပ္ပါယ်မရှိဘူး။
ဆက်ပြောရဦးမယ်။ တော်ကြာ ကြည့်တဲ့လူတွေက နုံနုံအအနဲ့ ဘာမှမသိဘူး ထင်နေမှာစိုးလို့။ စိုးမြတ်နန္ဒာဆီကို အလုပ်ခေါ်စာပို့တယ်။ အဲဒါကို လာပေးတာက လှအုန်းမယ်တို့ လမ်းထဲကတစ်ယောက် ဖြစ်ပုံရပါတယ်။ ထားပါတော့။ လမ်းထိပ်မှာ စာပို့သမားက လူကြုံပေးသွားလို့တဲ့။ သေရော…။ စာတိုက်က၀န်ထမ်းတွေကိုပါ စော်ကားလိုက်သေးတယ်။ အဆိုးဆုံးက အလုပ်ခန့်စာကို တကူးတကဖြဲစရာ၊ ဖောက်စရာမလိုဘဲ စိုးမြတ်နန္ဒာက အလွယ်တကူပဲ အသစ်အတိုင်းရှိနေတဲ့ စာအိတ်ဖြူလေးထဲက အသာလေးထုတ်ဖတ်လိုက်တာပါပဲ။ ဆိုးဝါးလိုက်တာဗျာ။ အဲဒီလောက်ထိတော့ ပြီးစလွယ်မနိုင်သင့်ပါဘူး။ စာအိတ်တစ်လုံးကို တစ်ရာကျပ်မပေးရပါဘူး။
ရုံးမှာအတူအလုပ်လုပ်ကြရင်း ကံပေါ်နဲ့ လှအုန်းမယ် ရန်ဖြစ်ကြတာတွေကို ရိုက်ပြတာတွေကလည်း ဘာတွေမှန်းကိုမသိဘူး။ လုံးဝကို အဓိပ္ပါယ်မရှိတဲ့ဟာတွေ။
ဇာတ်ရံတွေက အများကြီးပဲဆိုပြီး အားပါးတရကြည့်ရလိမ့်မယ်လို့ မထင်နဲ့ဦး။ တစ်ယောက်ကို နှစ်ခန်းသုံးခန်းလောက်နဲ့ ပြီးသွားတဲ့လူတွေချည်းပဲ။
ကျော်ရဲအောင်ကို အသုံးချပြီး ဇာတ်ကားကို ပိုက်ဆံရအောင် လုပ်ထားသလို ဖြစ်နေတယ်။ ကျွန်တော်လည်း ကျော်ရဲအောင်ကားဆိုပြီး ကောင်းမယ်ထင်လို့ ငှားကြည့်မိတာ။ မှားပါတယ်ဗျာ လို့ပဲ တလိုက်ချင်တယ်။
ကိုပေါက်ရိုက်သမျှ ဇာတ်ကားတွေထဲမှာ အဆိုးဆုံးပါပဲ။ ကိုပေါက်ဆိုရင် မဆိုးဘူး၊ ရိုက်ချက်တွေလည်း ဆန်းတယ်၊ တင်ပြပုံလည်း သူများနဲ့မတူဘူးဆိုပြီး မှတ်ထားသမျှလေးတွေ ဒီဇာတ်ကားနဲ့မှ လစ်တော့တာပါပဲ။ တကယ့်ကို ဆိုးဝါးလွန်းတဲ့ အသုံးမကျတဲ့ဇာတ်ကားပါ။ ရယ်ရတာလည်းမဟုတ်၊ ရသလည်းမပေး၊ အီလည်လည်နဲ့ ဘာကြီးမှန်းကို မသိတဲ့ဇာတ်လမ်းပါ။
ကျွန်တော့်လို့ အချိန်လည်းကုန်၊ ပိုက်ဆံလည်းပေးရ မဖြစ်ရအောင် တိုက်တွန်းရရင်တော့ "တွေ့မယ်" ဆိုတဲ့ ဇာတ်ကားကို ……………………..။
(၂)
ဇာတ်ကားအမည် - အချစ်ကြီး၍...
ဇာတ်လမ်းနှင့် ဇာတ်ညွှန်း - မြမြင့်မိုရ်
ဒါရိုက်တာ - ဟိန်းစိုး
သရုပ်ဆောင် - သူထူးစံ၊ ဖြိုးငွေစိုး၊ မိုးဟေကို၊ အေးဝတ်ရည်သောင်း၊ ဇော်ဝမ်း၊ ဦးခိုင်တင်၊ ငှက်ပျော်ကြော်၊ ကိုပေါက်
ဇာတ်လမ်းအကျဉ်း
ကိုယ်ယုံကြည်အားကိုးရတဲ့လူ၊ အချစ်ကြီးချစ်ရတဲ့လူတွေက ကိုယ့်အပေါ်ကို လိမ်လည်လှည့်ဖြားအကောက်ကြံပြီး ဘ၀ပျက်အောင် လုပ်ကြတဲ့အခါ အချစ်ကြီးတဲ့လူတစ်ယောက်အနေနဲ့ ဘယ်လိုတွေ ပြန်လည်တုံ့ပြန်မလဲဆိုတာကို တင်ပြထားတဲ့ဇာတ်လမ်းပါ။ သစ္စာပိုင်စိုး (သူထူးစံ)၊ မိုးဒေ၀ါ (မိုးဟေကို)နဲ့
ဝေဖန်သုံးသပ်ချက်
ကြိုက်တာတွေ အရင်ပြောမယ်…
- ဇာတ်လမ်းက သမားရိုးကျမဟုတ်တဲ့ စိတ်ဝင်စားစရာဇာတ်လမ်း ဖြစ်တဲ့အပြင် ဇာတ်လမ်းပြီးတဲ့အထိ စိတ်ဝင်စားမှုမလျော့အောင် ဆွဲခေါ်သွားနိုင်တယ်။
- မိုးဟေကို ဘာလုပ်လုပ် ခံစားချက်အပြည့်နဲ့ အားပေးကြသူတွေအတွက်ကတော့ တကယ့်ကို ကျေနပ်စရာဇာတ်ကားပါ။ မိုးဟေကိုရဲ့ ချစ်စဖွယ်ဟန်ပန်တွေ၊ အညုအတုအခရာလေးတွေကို ကြည့်ပြီး ကိုယ့်ဘေးမှာ မိုးဟေကိုကိုယ်တိုင် ရောက်နေသလားလို့တောင် မှတ်ထင်သွားနိုင်ပါတယ်။ မိုးဟေကို ကို အားပါးတရပြစ်မှားနိုင်ကြမယ့် ဇာတ်ကားဆိုပါတော့။
- သူထူးစံနဲ့ မိုးဟေကိုတို့နှစ်ယောက်ရဲ့ လင်မယားအသွင်သရုပ်ဆောင်မှုက တကယ်လားလို့ ထင်မှတ်မှားရအောင် ပီပြင်လွန်းနေတာလည်း ဒီဇာတ်ကားရဲ့ ထူးခြားချက် ဖြစ်လိမ့်မယ်ထင်ပါတယ်။ တကယ်နမ်းတာကွ၊ တကယ်မနမ်းဘူးဆိုပြီး ကျွန်တော်တို့တစ်တွေမှာ ပြန်ပြန်ပြီး ရစ်ကြည့်နေရတာက အမောပါပဲ။ ရက်ရောလိုက်ပါပေ့လို့သာ အော်ရမလိုပါပဲ။
- ပေးချင်တဲ့ message ကို ကြည့်နေတဲ့လူရင်ထဲရောက်အောင် ထည့်ပေးသွားနိုင်တာကလည်း ဒါရိုက်တာဟိန်းစိုးရဲ့ အရည်အချင်းပဲ ထင်ပါရဲ့ဗျာ။
မကြိုက်တာတွေ ပြောမယ်…
- ဇာတ်ကားစစချင်းမှာ စာတန်းတစ်ခုထိုးပါတယ်။ "ကျေးဇူးရှင်မိဘနှစ်ပါးနှင့် ဆရာသမားများအား ရှစ်ခိုးဦးခိုက် ပူဇော်ပါ၏" တဲ့။ ကဲမှတ်ကရော… "ရှစ်ခိုး"လိုက်တယ်ဗျာ။ အဖွင့်မှာကတည်းက ဗေထိဆိုတာနဲ့ ကွဲပြီးသားဆိုသလို ဖြစ်သွားတယ်။ မိဘနဲ့ဆရာတွေကို "ရှိခိုး"တာတောင် အဓိပ္ပါယ်ပြောင်းသွားတယ်။
- တမင်လုပ်တာပဲဖြစ်ဖြစ်၊ ဇာတ်လမ်းဆင်တာပဲဖြစ်ဖြစ် လူသတ်တရားခံလို့ သံသယရှိတဲ့လူတစ်ယောက်ကို ရုံးချိန်းခေါ်လာတဲ့နေရာမှာ တက္ကစီကားကြီးနဲ့ ခေါ်လာတာ၊ ဘာလက်ထိပ်မှ ခတ်မထားတာ၊ ရဲသုံးယောက်ပဲ ပါလာတာကတော့ အငြင်းပွားဖွယ်ရာ ဖြစ်နေသလားလို့ပါ။
- တရားခံကိုခေါ်လာတဲ့လမ်းကလည်း ဘာမှမဆိုင်တဲ့လမ်းကြီးများ ဖြစ်နေသလားလို့ပါ။ ကျွန်တော်နားလည်တာက တရားခံကို ခေါ်လာတယ်ဆိုတာ ရဲစခန်းအချုပ်ခန်းကနေ တရားရုံးရှိတဲ့နေရာကိုပေါ့။ အခုတော့ မဆီမဆိုင် ဘယ်လိုဖြစ်ပြီး လူမရှိသူမရှိ အရပ်ကို ရောက်သွားရတာတုန်း။
- လွတ်ပြေးသွားတဲ့ပုံစံမျိုး တမင်ဖန်တီးထားတာဆိုရင် ဘယ်သူမှမရှိတဲ့နေရာမှာ ဘာကိစ္စ လွတ်ပြေးသွားတဲ့တရားခံကို လိုက်ဖမ်းချင်ယောင် ဆောင်နေရသေးသလဲ။
- သူထူးစံကို ဖြိုးငွေစိုးက သေနတ်နဲ့ချိန်တယ်။ မျက်နှာတည့်တည့်၊ ရင်ဘတ်တည့်တည့်ကို ချိန်ပြီးပစ်လိုက်တယ်။ သူထူးစံက ဗိုက်ကိုထိသွားတယ်။ အံ့သြစရာကြီးနော်။ ပြီးတော့ ပစ်လိုက်တာက တကယ့်ကို အနီးကပ်ကြီး။ လက်တစ်ကမ်းအကွာကြီးမှာ။
- မြန်မာပြည်မှာ သေနတ်ကို ကိုင်ချင်သလို ကိုင်လို့ရနေသလား အောက်မေ့ရတယ်။ ပြီးတော့ ပစ်တာကလည်း တကယ့်ကို ပန်းခြံကြီးထဲမှာ။ အံ့သြကုန်နိုင်ဖွယ်ပါပဲ။
- ဖြိုးငွေစိုးက နယ်ကိုခြေရာဖျောက်ပြီး ရောက်သွားတဲ့အခါ အဲဒီမြို့မှာ ဧည့်ခံပွဲလုပ်တယ်။ အဲဒီဧည့်ခံပွဲကို ဖိတ်ဖို့အတွက် သူ့သူငယ်ချင်းတွေကို ပြောတာက "ဒီမြို့မှာရှိတဲ့ လူကြီးလူကောင်းတွေကိုပဲဖိတ်၊ ပွင့်ပွင့်လင်းလင်းပြောရရင် ငါ့စီးပွားရေးကို အထောက်အကူပြုမယ့် လူတွေကိုပဲ ရွေးဖိတ်" တဲ့။ ပြီးတော့ ဧည့်ခံပွဲကို ပြတဲ့အခါ ကောင်မလေးငယ်ငယ်လေးတွေချည်းပဲ။ မိန်းမကြီးတွေကို ပြရင်တောင် ဘာမှမပြောလိုဘူး။ ပညာရှိသတိဖြစ်ခဲ ဖြစ်သွားတယ်လို့ပဲ မြင်ပါတယ်။
ဘာပဲဖြစ်ဖြစ် သာမန်ချစ်ကွဲညား ဇာတ်လမ်းတွေနဲ့စာရင်တော့ စိတ်ဝင်စားဖို့ကောင်းတဲ့ ဇာတ်လမ်းပါ။ ကြည့်ပျော်တယ်လို့ ဆိုရပါလိမ့်မယ်။ ကြည့်တဲ့လူရဲ့ အမြင်အပေါ်မှာ မူတည်ပြီးတော့လည်း အတွေးတွေ ပေးပါလိမ့်ဦးမယ်။ အချစ်ကားလားလို့ မေးရင် ဟုတ်တယ်လို့ဖြေမယ်၊ အိမ်ထောင်ရေးဇာတ်လမ်းလားဆိုရင်လည်း ဟုတ်တယ်လို့ ဖြေရမှာပဲ၊ ပညာပေးဇာတ်ကားလားဆိုတော့လည်း ဟုတ်တယ်လို့ ဖြေရမှာပါပဲ။ ကျွန်တော်ပြောပြီးပါပကော။ ကြည့်ရှုခံစားတဲ့ ရှုထောင့်ပေါ်မှာ မူတည်ပြီး ကြိုက်သလိုတွေးနိုင်တဲ့ ဇာတ်ကားပါလို့။ ကြည့်သင့်တဲ့ဇာတ်ကားလို့ ညွှန်းပါရစေ။
၂၀၀၉ ခုနှစ် နိုဝင်ဘာလ ၂၅ ရက်၊ ဗုဒ္ဓဟူးနေ့။
နေ့လည် ၂ နာရီ ၂၇ မိနစ်တွင်ပြီး၏။
No comments:
Post a Comment