လူတစ်ယောက် သင့်အိမ်ပြင်ဖို့ အလုပ်အပ်မယ်။
အိမ်ပြင်ဖို့လာတဲ့ လက်သမားမှာ လက်သမား ကိရိယာထည့်တဲ့ သေတ္တာတစ်လုံးပါတယ်။
"ဘာတွေလဲ"
"တူတွေ"
လက်သမားဆရာဟာ သူ့ရဲ့ သေတ္တာထဲကနေ တူဆိုက်မျိုးစုံကို ထုတ်ပြတယ်။
"တူပဲပါတယ်ဆိုရင် ခင်ဗျား ဘာလုပ်မလဲ" သင်မေးမှာပေါ့။
ဒါဆိုရင် လက်သမားက ဖြေမယ်။
"ကျွန်တော် သံပဲ ရိုက်တတ်တယ်"
သံကောင်းကောင်းရိုက်တတ်တဲ့ လက်သမားပါ။ သူဟာ ဘယ်နံရံကို ဘာတူသုံးပြီး ရိုက်ရမယ်ဆိုတာကို ကောင်းကောင်းသိတယ်။
သင် သူ့ကို ဆက်ခိုင်းမလား၊ ပြန်လွှတ်မလား။
"ပြန်လွှတ်မယ်"
အများက ဒီအတိုင်းပဲ ဖြေကြမှာပေါ့။
အိမ်ပြင်ဖို့အတွက် တူရိုက်ရုံနဲ့ မဖြစ်ဘူး။ လွှဖြတ်တတ်ရမယ်။ ရွေဘော်ထိုးတတ်ရမယ်။
ခုခေတ်လက်သမားတွေမှာ လျှပ်စစ်ဓာတ်နဲ့ သုံးတဲ့ လွှတို့၊ ရွေဘော်တို့၊ သံရိုက်တဲ့တူတို့ ရှိတယ်။ ရေချိန်၊ ချိန်သီးတွေလည်း လိုမယ်။ ဒါတွေ မတတ်ရင် သင်ခိုင်းဖို့ စဉ်းစားမှာ မဟုတ်ဘူး။ မကြာမီ ရွေးကောက်ပွဲ လုပ်တော့မယ်တဲ့။ ဘယ်သူတွေ ၀င်ရွေးမှာလဲ။ တူကောင်းကောင်းသုံး၊ သံကောင်းကောင်း ရိုက်တတ်တဲ့ သူလား။ ဒါတစ်ခုပဲ လုပ်တတ်သူဆိုရင်တော့ ခွအကျသား။ ဘယ်တော့မှ အိမ်ကို ပြန်လို့ပြီးမှာ မဟုတ်ဘူး။
"သူက ရိုးသားတယ်ဗျာ၊ ဒါကိုပဲ တတ်တယ်။ ဒါကိုပဲ သူလုပ်မယ်တဲ့"
ဒါပဲ လုပ်တတ်ရင်တော့ သူ့ကို ကျွန်တော်တို့ ဘယ်လို ယုံကြည်စိတ်ချရမှာလဲ။ ဒါမှမဟုတ် အိမ်ကောင်းကောင်း ပြင်တတ်တဲ့ လူဟုတ်မဟုတ် ကျွန်တော်တို့ ဘယ်လိုသိမှာလဲ။ သူက အိမ်ကိုပြင်တတ်အောင် ကြိုးစားသူဖြစ်ရဲ့လား။ ခက်တယ်။ …..
တချို့ လာပြောတယ်။
"ကိုအောင်ဝင်းကိုပဲ မဲထည့်ပါ"
"ဘာဖြစ်လို့လဲ"
"သူက တို့ ဘီလူးကျွန်းသား"
နောက်တစ်ယောက်က ပြောတယ်။
"ကိုကြည်မြင့်ကို ထည့်ဗျ"
"ဘာဖြစ်လို့လဲ၊ သူက သထုံသားမဟုတ်လား"
"တို့ကို မှာထားတယ်။ သူ့ကိုပဲ ထည့်ပါလို့ ပြောပါတဲ့"
ကျွန်တော် ငယ်စဉ်က ကြုံခဲ့၊ ကြားခဲ့ရသော ရွေးကောက်ပွဲမတိုင်မီ စကားများဖြစ်သည်။
ကျွန်တော် စဉ်းစားတယ်။
သထုံသား ကိုကြည်မြင့်။ ဘီလူးကျွန်းသား ကိုအောင်ဝင်း၊ မော်လမြိုင်မှ ကိုခင်မောင်လွင်၊ မုဒုံမှ ကိုခင်မြင့်၊ သူတို့ရဲ့ လုပ်ဆောင်မှုတွေဟာ ဘာလဲ။
သို့သော် ဘယ်ကမို့လို့ ထည့်ပါဟု ပြောသည်တော့ မကောင်းပါ။ သူ ကူညီတတ်တယ်။ သူ လူမှုရေးတွေ လုပ်တယ်။ အများအကျိုး ရွက်ဆောင်တယ်။ သူတို့ ဒါတွေလုပ်ကြတာကို ကျွန်တော်တို့ သိပါတယ်။ ပိုပြီး ရှင်းရန်သာ လိုတယ်။ "သူ့ကို မဲထည့်ဖို့ တို့ကို ပြောထားလို့" ဆိုတာတွေကတော့ ရွေးကောက်ပွဲအတွက် များစွာ အထောက်အကူပြုသော အကြောင်းအရာမျိုး မဖြစ်နိုင်ပါ။ မဖြစ်သင့်ပါ။ မကြာမီ ရောက်လာမယ့် ရွေးကောက်ပွဲတွင် သင့်ကို ဒီလိုလာပြောကြမယ်ဆိုရင် သင်ဘာလုပ်မလဲ။
…..
ဘားရက် အိုဘားမားဟာ အမေရိကန်နိုင်ငံက ပထမဦးဆုံး လူမည်းသမ္မတဖြစ်တယ်။ သူဟာ သမ္မတလောင်း ရွေးချယ်ပွဲအတွက် ဒီမိုကရက်တစ်ပါတီအတွင်း ကလင်တန်နှင့် ယှဉ်ပြိုင်ရတယ်။ ကလင်တန်ဆိုတာကတော့ အတော်လေး ထက်မြက်သူပါ။ ခင်ပွန်းက သမ္မတ ဖြစ်ခဲ့တယ်။ နှစ်ယောက်အားနှင့် ယှဉ်သလို ဖြစ်တယ်။ သို့သော် ဒါတွေကို ကျော်ဖြတ်ပြီး အိုဘားမား ပထမအဆင့် တက်လာတယ်။ သူ ဒုတိယအဆင့် သမ္မတရွေးပွဲမှာလည်း နိုင်တယ်။ ငယ်တယ်။ မည်းတယ်။ သူသမ္မတ မဖြစ်ချင်လည်း ရပါတယ်။ သို့သော် သူတော်တာပဲ။ သူက မဲထည့်သူများကို ဒီမိုကရေစီထိုက်တန်မှုကိုသာ ပြောတယ်။ သူက မဲထည့်သူများ၏ ဒီမိုကရေစီဆန်မှုကို လက်ကမ်းတာပါပဲ။
ဥပမာ သူပြောသွားသော အင်မတန်နှစ်ခြိုက်စရာကောင်းသည့် စကားတစ်ခုကို တင်ပြလိုသည်။ သူ့ကို နိုဘယ်ဆုရွေးချယ်ရေးကော်မတီက ၂၀၀၉ ခုနှစ်အတွက် ငြိမ်းချမ်းရေးနိုဘယ်လ်ဆုအတွက် ရွေးချယ်ကြောင်း ကြေညာတော့ သူအတော် အံ့အားသင့်သွားတယ်။ သတင်းထောက်တွေက သူ့ကို လာမေးတယ်။
"သမ္မတကြီးခင်ဗျား၊ သမ္မတကြီးကို နိုဘယ်လ်ဆုပေးလိုက်တာ ကြားပါသလား"
"ကြားပါတယ်၊ ၀မ်းလည်းသာပါတယ်"
"ဟုတ်ကဲ့၊ အခု အမေရိကန်တွေက ပြောနေကြတယ်။ တချို့ကလည်း ရွေးချယ်မှုဟာ မှန်ကန်တယ်တဲ့။ တချို့ကတော့လည်း ရွေးချယ်မှုဟာ မမှန်ဘူး။ တချို့ကတော့ စောလွန်းတယ်တဲ့"
"ဟုတ်ကဲ့"
"အဲဒါ သမ္မတကြီးရဲ့ ယူဆချက်ကို ပြောပြပါ"
သင်သာ ဘားရက်အိုဘားမားနေရာမှာ နေရရင် ဘာပြောမလဲ။ အိုဘားမားက ချက်ချင်း တုံ့ပြန်ပြောဆိုခဲ့ပါတယ်။
"ဒီလို ဝေဖန်သုံးသပ်တာကိုက အမေရိကန်လူမျိုးတွေရဲ့ လွတ်လပ်စွာ စဉ်းစားတတ်တာကို ဖော်ထုတ်လိုက်တာပါ။ ကျွန်တော် ချီးကျူးပါတယ်။ ဒီမိုကရေစီနဲ့ ထိုက်တန်တဲ့လူမျိုးပါပဲ" တဲ့။
ဘားရက်အိုဘားမားရဲ့ လုပ်ဆောင်ချက်တွေကို တစ်ကမ္ဘာလုံးက ကြိုဆိုနေကြပါတယ်။ ဘာကြောင့်လဲ။ သူဟာ တူတစ်မျိုးတည်းနဲ့ ပြဿနာဖြေရှင်းသူ မဟုတ်လို့ပါပဲ။
၂၀၁၀ ရွေးကောက်ပွဲမှာ နိုင်ငံရေးခေါင်းဆောင်များ အရည်အသွေး မြင့်ကြပါစေ။
7Day News Jouranl
အတွဲ (၈) အမှတ် (၄၉)
Thursday, February 18, 2010
No comments:
Post a Comment