(၁)
စာအုပ်စာပေ လူ့မိတ်ဆွေတဲ့။
မိတ်ဆွေတွေနဲ့ ခင်ဗျားနဲ့ သဘောထားမတူတာတွေ၊ ရန်ဖြစ်တာတွေ ခဏခဏ ဖြစ်မှာပဲနော်လို့ သူငယ်ချင်းတစ်ယောက်က ကတ်သီးကတ်သတ် လာမေးတယ်။
ရယ်လိုက်ရတာဗျာ။
အတော်လည်း တွေးလိုက်ရပါတယ်။
(၂)
အနာမခံလျှင် အသာမစံရတဲ့။
တစ်သက်လုံး အရိုက်ခံလိုက်၊ ထွန်တုံးအတပ်ခံလိုက်၊ လှည်းဆွဲလိုက်၊ စပါးနယ်လိုက် လုပ်နေရတဲ့ နွားတစ်ကောင်အတွက် ကောက်ရိုးတစ်ထုံး၊ မြက်တစ်ကျုံးဟာ သူ့အတွက် နိဗ္ဗာန်တော့ ဟုတ်ဟန်မတူဘူးလို့ တွေးနေမိတယ်။
ဒါဆို ကျွန်တော်တို့တွေရော...???
(၃)
မှန်မှန်မှားမှား ခေါင်းငုံ့ထား
မှားသော်လည်းမရှုံး လူတို့ ပြုံး၏။
မဟုတ်မခံ ခွန်းတုံ့ပြန်
မှန်သော်လည်းရှုံး လူတို့မုန်း၏ တဲ့။
တက္ကသိုလ်မှာတုန်းက ဆရာတစ်ယောက်က တွေးတွေးဆဆနဲ့ ပြောခဲ့ဖူးတဲ့ စကားတစ်ခွန်းပါ။
အဲဒီစကားကို ဆိုကရေးတီးစ်သာ ကြားမိခဲ့ရင် ဘယ်လိုနေမယ်မသိဘူးလို့ တွေးနေမိတယ်။
(၄)
ဖြစ်သမျှအကြောင်း အကောင်းချည်းပဲတဲ့။
ဘယ်သူက ပြောခဲ့သလဲ မသိဘူး။
အကောင်းနဲ့ အဆိုးဆိုတာ ခွဲမရအောင် ချွတ်စွတ်တူတဲ့ အမြွှာညီအစ်ကိုတွေဆိုတာ အဲဒီလူကို လက်တို့ပြီး ပြောပြချင်နေမိတယ်။
(၅)
အချစ်ဆိုတာ အိုမင်းတယ် မရှိဘူးတဲ့။
ဟုတ်ပါရဲ့။ ချစ်တဲ့လူတွေကသာ အိုမင်းသွားကြတာကလား။
(၆)
လူကို လူလို မြင်တတ်စမ်းပါတဲ့။
ဟုတ်ကဲ့... လူလို မသိတတ်တဲ့ လူတွေကိုရော လူလိုမြင်ရမှာလားဆိုတော့ အကုန်လုံးက ကျွန်တော့်ကို လူသားဆန်တဲ့ မျက်လုံးတွေနဲ့ ၀ိုင်းကြည့်တယ်။
(၇)
နံနက်အရုဏ်ဦး နေထွက်စအချိန်နဲ့ ညနေဆည်းဆာ နေ၀င်ချိန်ဟာ လှပသာယာမှု အရှိဆုံးတဲ့။
မှန်လိုက်လေဗျာ။
မူကြိုကျောင်းနဲ့ သင်္ချိုင်းတွေဟာ ကျွန်တော်တို့အတွက် ပျော်ရွှင်ငြိမ်းချမ်းမှု အပေးနိုင်ဆုံး နေရာတွေပေါ့။
(၈)
ချီးကျူးထိုက်သူကို ချီးကျူးရမယ်၊ ချီးမြောက်ထိုက်သူကို အားပေးချီးမြှောက်ရမယ်တဲ့။
လူတွေပြောတတ်ကြတာပဲ။
မသိချင်ယောင် ဆောင်နေတဲ့လူတစ်ယောက်ကို မေးကြည့်မိတော့ သူကပြန်ပြောတယ်။
"လက်ခုပ်တီးချင်ပေမယ့် ကျွန်တော် လက်နာနေလို့ပါ"တဲ့။
ကိုဉာဏ် (ပန်းလောင်မြေ)
၂၀၁၀ ပြည့်နှစ် မတ်လ ၁ ရက်၊ တနင်္လာနေ့။
နံနက် ၁၀ နာရီ ၂၄ မိနစ်တွင်ပြီး၏။
No comments:
Post a Comment