ဒီနှစ်ဘောလုံးရာသီမှာတော့ ထူးဆန်းစွာပဲ ဥရောပအမှတ်ပေးပြိုင်ပွဲတွေအားလုံးဟာ အကြိတ်အနယ်ဖြစ်နေတာကို တွေ့ရပါတယ်။ ပျမ်းမျှအားဖြင့် (၇)ပွဲ (၈)ပွဲစီလောက်ပဲ ကျန်တော့တဲ့အချိန်မှာ ဘယ်အသင်း ချန်ပီယံဖြစ်မယ်ဆိုတာကို ဘယ်သူကမှ ဟောကိန်းထုတ်လို့ မရဘူးဖြစ်နေပါတယ်။ အဲဒီအတွက် ဒီနှစ်ဘောလုံးရာသီဟာ ခန့်မှန်းသူတွေနဲ့ ပရိသတ်တွေအတွက် တကယ့်ကို ရင်ခုန်စရာကောင်းလှပါတယ်။
စပိန် လာလီဂါ
စပိန်မှာလည်း လက်ရှိချန်ပီယံ ဘာစီလိုနာက ကြယ်စင်စုရီးရဲလ်မက်ဒရစ်နဲ့ အပြိုင်ဖြစ်နေတယ်။ ဘယ်အသင်းမှ အမှားခံလို့မရတဲ့ အနေအထား။ ဘာစီလိုနာက လက်ရှိချန်ပီယံဆိုတဲ့ ဂုဏ်ပုဒ်ကို ဆက်ထိန်းချင်တယ်။ ရီးရဲလ်မက်ဒရစ်ကတော့ ငွေကြေးတွေအများကြီး အကုန်အကျခံ ပြင်ဆင်ထားတာနဲ့ တန်အောင်ရယ်၊ ချန်ပီယံလိဂ်က ထွက်ခဲ့ရတဲ့အရိပ်မည်းကို ချေဖျက်နိုင်ဖို့အတွက် ကျားနာတစ်ကောင်လိုမျိုး ရှိတဲ့ဖလားကို ခဲတော့မယ်။ ဘာကာနည်းပြ ဂွါဒီယိုလာကိုယ်တိုင်က ဒီနှစ်အမှတ်ပေးချန်ပီယံဆုကို ရီးရဲလ်မက်ဒရစ်ရသွားရင်လည်း သူကျေနပ်မိမှာပါလို့ ဆိုထားပြန်တယ်။ ဟုတ်တော့လည်း ဟုတ်တယ်။ ရီးရဲလ်မှာက ဖိအားဆိုလို့ ဒီအမှတ်ပေးဖလားတစ်ခုပဲ ရှိတော့တယ်။ ဘာကာကတော့ အမှတ်ပေးဖလားရော၊ ချန်ပီယံလိဂ်အတွက်ပါ အာရုံစိုက်နေရတယ်။
အီတလီ စီးရီးအေ
အီတလီကတော့ မော်ရင်ဟိုရဲ့ အင်တာမီလန်ဟာ အခြားအသင်းတွေအပေါ် အမှတ်တွေ အပြတ်ကြီးပြတ်နေရာကနေ ပြီးခဲ့တဲ့ နောက်ဆုံးပွဲစဉ်တွေမှာ ခြေချော်ခဲ့တဲ့အတွက် နောက်ကလိုက်နေတဲ့ ဒါဘီပြိုင်ဘက် အေစီမီလန်နဲ့ ရိုးမားအသင်းတွေရဲ့ ဖိအားပေးခြင်းကို ခံနေရတယ်။ နောက်ပိုင်းပွဲစဉ်တွေမှာ ခြေမှန်လာတဲ့ ရိုးမားဟာ အင်တာမီလန်နဲ့ တစ်မှတ်အကွာအထိ ရောက်လာတာကို တွေ့ရတယ်။ ချက်ချင်းဆိုသလို ခြေပျက်သွားခဲ့ရတဲ့ အေစီမီလန်ကတော့ တစ်ပွဲလျော့အနေအထားမှာ အင်တာနဲ့ (၄)မှတ် ကွာသွားခဲ့ရတယ်။ ဘာပဲဖြစ်ဖြစ် မော်ရင်ဟိုကတော့ ယုံကြည်ဝံ့ကြွားစွာပဲ ဆိုထားပါတယ်။ "အချိန်တန်ရင် သူတို့အင်တာမီလန်အသင်းပဲ အမှတ်ပေးချန်ပီယံ ဖြစ်မှာပါ" တဲ့။ ကဲ... ကြားတဲ့အတိုင်းပဲ။ အခြားနည်းပြဆိုရင်တော့ ရယ်မိမှာဖြစ်ပေမယ့် ပြောတဲ့လူက မော်ရင်ဟိုဖြစ်နေတဲ့အတွက် အဲဒီစကားအပေါ် လေးစားမိတာတော့ အမှန်ပါပဲ။ စောင့်ကြည့်ရုံပဲပေါ့လေ။
ဂျာမန် ဘွန်ဒက်စ်လီဂါ
ဂျာမန်ဘွန်ဒက်စ်လီဂါမှာလည်း ရှော်လ်ကေးနဲ့ ဘိုင်ယန်မြူးနစ်ရဲ့ ပြိုင်ဆိုင်မှုက ပြင်းထန်နေတယ်။ ဦးဆောင်နေသူ ဘိုင်ယန်အသင်းက ဒီအပတ်ပွဲစဉ်မှာ ရှုံးနိမ့်သွားတဲ့အတွက် ရှော်ကေးလ်က နှစ်မှတ်အသာနဲ့ ကျော်တက်တာကို ခံလိုက်ရတယ်။ ချန်ပီယံလိဂ်ကွာတားပွဲအဖြစ် သမိုင်းဝင်ပြိုင်ဘက် မန်ယူနဲ့ တွေ့ဖို့ရှိတာကြောင့် ဘိုင်ယန်တို့ ကစားအားကို ချန်ကစားသွားသလားဆိုတာတော့ မန်ယူနဲ့တွေ့တဲ့အချိန်မှာ ဘယ်လိုကန်သလဲ ဆိုတာကိုကြည့်ပြီး ဆုံးဖြတ်ရတော့မှာပဲ။
အင်္ဂလန် ပရီမီးယားလိဂ်
ဥရောပအမှတ်ပေးပြိုင်ပွဲတွေမှာ ပြိုင်ဆိုင်မှုအပြင်းထန်ဆုံးက အင်္ဂလန်ပရီးမီးယားလိဂ် ဖြစ်နေတယ်။ မန်ယူ၊ ချဲလ်ဆီးနဲ့ အာဆင်နယ် ထိပ်ဆုံး(၃)သင်းက ချန်ပီယံဆုအတွက် အကြိတ်အနယ် အလျှော့မပေးဘဲ ရေကုန်ရေခန်း ပြိုင်ဆိုင်နေကြသလို ချန်ပီယံလိဂ်ဝင်ခွင့်ဖြစ်တဲ့ နံပါတ် (၄) နေရာအတွက် ပြိုင်ဆိုင်မှုကလည်း အင်မတန်မှကို ပြင်းထန်လှတယ်။ အခုလို ဖြစ်သွားရခြင်းရဲ့ အဓိကအကြောင်းကတော့ ဒီနှစ်မှာ လီဗာပူးလ်အသင်းရဲ့ အံ့သြဖွယ်ရာ ခြေစွမ်းမတည်ငြိမ်မှုနဲ့အတူ ငွေကြေးအလုံးအရင်းနဲ့ တည်ဆောက်လာတဲ့ မန်စီးတီးရဲ့ ပြိုင်ဆိုင်မှု၊ နည်းပြရက်နပ်(ပ)ရဲ့အောက်မှာ အံ့သြလောက်အောင် ခြေမှန်လာနေတဲ့ စပါးအသင်းတို့ရဲ့ အားထုတ်မှု၊ အသင်းကြီးတွေကို ဒုက္ခပေးပြီး ခြေစွမ်းပြနေတဲ့ အက်စ်တွန်ဗီလာတို့ကြောင့် ဖြစ်တယ်။ အခုအချိန်အထိတော့ ချန်ပီယံလိဂ်ဝင်ခွင့် နံပါတ် (၄)နေရာအတွက် အခြေအနေအကောင်းဆုံးက တော့တင်ဟမ်ဟော့စပါး ဖြစ်နေပြီး ရက်နပ်(ပ)ကလည်း အမှားမခံဘဲ ပြိုင်ဆိုင်နေတာကို တွေ့ရတယ်။ လီဗာပူးလ်တို့အတွက်တော့ ဒီနှစ်ဟာ မန်ယူအသင်း ဗိုလ်မစွဲပါစေနဲ့လို့ ဆုတောင်းရင်းနဲ့ လက်ကျန်ပွဲတွေကို အကောင်းဆုံးဖြစ်အောင် ယှဉ်ပြိုင်ဖို့နဲ့ အသင်းကထွက်သွားနိုင်တဲ့ နာမည်ကြီးကစားသမားတွေကို ထိန်းသိမ်းဖို့ပဲ အာရုံစိုက်ရတော့မယ်။
ဘာပဲဖြစ်ဖြစ် အမှတ်ပေးပြိုင်ပွဲ အသီးသီးမှာ အခုလိုမျိုး ရင်ခုန်စရာကောင်းတဲ့ ဘောလုံးရာသီမျိုးဆိုတာ အင်မတန်မှ ကြုံတောင့်ကြုံခဲပါ။ အရင်နှစ်တွေကဆိုရင် ဘယ်အသင်းဗိုလ်စွဲမယ်ဆိုတာကို ဒီလိုအချိန်မျိုးမှာ အတပ်ပြောနိုင်နေပြီ။ အခုတော့ ဘာမှသေချာပြောလို့မရတဲ့ ဘောလုံးရာသီတစ်ခုနဲ့ ကြုံနေကြရတယ်။ တစ်ချက်မှားတာနဲ့ ဇယားနေရာတွေက အပြောင်းအလဲဖြစ်တာ သိပ်မြန်လွန်းတယ်။ အရင်အပတ်က ဦးဆောင်နေပေမယ့် နောက်တစ်ပတ်မှာ အောက်ဆင်းသွားချင်လည်း သွားနိုင်တဲ့အနေအထားမျိုး ဖြစ်နေတယ်။
ဘောလုံးဝါသနာအိုးတွေအတွက်တော့ စိတ်ကျေနပ်စရာကောင်းမယ့် အချိန်ကာလတွေ ဖြစ်နေမယ်ဆိုတာ အသေအချာပါ။
ကိုဉာဏ် (ပန်းလောင်မြေ)
၂၀၁၀ ပြည့်နှစ်၊ မတ်လ ၂၈ ရက်၊ တနင်္ဂနွေနေ့။
ညနေ ၅ နာရီ ၄၃ မိနစ်တွင်ပြီး၏။
No comments:
Post a Comment