Thursday, April 29, 2010

ချန်ပီယံလိဂ် ဗိုလ်လုပွဲသို့ သွားရာလမ်း


ချန်ပီယံလိဂ် အကြိုဗိုလ်လုပွဲ (ဒုတိယအကျော့) ပွဲစဉ်တွေ ယှဉ်ပြိုင်ကစားပြီးသွားပြီ ဖြစ်တဲ့အတွက် ဗိုလ်လုမယ့်အသင်း (၂) သင်း ပေါ်ထွက်လာခဲ့ပြီ ဖြစ်ပါတယ်။ ရီးရဲလ်မက်ဒရစ်အသင်းရဲ့ ဘာနေဗျူးကစားကွင်းကြီးထဲမှာ ဘယ်အသင်းက အကောင်းဆုံးအသင်းလဲ ဆိုတဲ့အဖြေကို မကြာခင်မှာပဲ ကျွန်တော်တို့တွေ သိခွင့်၊ မြင်ခွင့် ရတော့မှာပါ။ အဲဒီလိုယှဉ်ပြိုင်ကြမယ့် အသင်းနှစ်သင်းရဲ့ နောက်ဆုံးခြေလှမ်းတွေကို ပြန်ကြည့်လိုက်တဲ့အခါ.....

လိုင်ယွန် - ဘိုင်ယန်မြူးနစ်
အားလုံးက လိုင်ယွန်အသင်း မထင်မှတ်တာတွေ လုပ်ပြမယ်လို့ ထင်ခဲ့ကြတယ်။ ဒါပေမယ့် တကယ်လုပ်ပြသွားတာက ဘိုင်ယန်အသင်း ဖြစ်နေပြန်တယ်။ ရီးရဲလ်မက်ဒရစ်နဲ့တုန်းက ယှဉ်ပြိုင်ကစားခဲ့တဲ့ ခြေစွမ်းတွေ ဘယ်လောက်ကုန်သလဲလို့ မေးချင်လောက်အောင် လိုင်ယွန်အသင်းဟာ အားနည်းခဲ့ပါတယ်။ ဘိုင်ယန်မြူးနစ်အသင်းကို အဘက်ဘက်ကနေ မယှဉ်နိုင်ခဲ့ဘူး။ အထူးသဖြင့် အလယ်တန်းမှာ ကစားကွက်ဖော်ပေးမယ့်လူ မရှိတဲ့အတွက် ဘွန်းမဲလ်ဦးဆောင်တဲ့ ဘိုင်ယန်အလယ်တန်းရဲ့ ဖန်တီးသမျှကို ခံခဲ့ကြရတယ်။

ပထမပိုင်းမှာ ဘိုင်ယန်မြူးနစ်အသင်းက အိုလစ်က ထင်မှတ်မထားတဲ့ အနေအထားနဲ့ လှည့်ကန်ပြီး အဖိုးတန်အဝေးကွင်းဂိုးကို သွင်းယူခဲ့တယ်။ အဲဒီဂိုးပေးလိုက်ရခြင်းဟာ အသင်းနှစ်သင်းလုံးအတွက် အများကြီး အကျိုးသက်ရောက်စေခဲ့တယ်။ ဘိုင်ယန်မြူးနစ်အတွက် စိတ်အေးလက်အေး ကစားသွားနိုင်တဲ့အချိန်မှာ အိမ်ရှင်အသင်းကတော့ မဖြစ်မနေ (၃)ဂိုးသွင်းနိုင်ပါမှ နောက်တစ်ဆင့် တက်နိုင်မှာမို့ ဖိအားဝင်သွားခဲ့ရတယ်။

ဒုတိယပိုင်းမှာလည်း လိုင်ယွန်အသင်း ထိထိရောက်ရောက် မထိုးဖောက်နိုင်ခဲ့ပါဘူး။ ရှေ့တန်းတိုက်စစ်မှူးတွေ ဂိုးသွင်းခြေမရှိတာ၊ နောက်တန်းတွေကို မကျော်ဖြတ်နိုင်တာ၊ အလယ်ကနေ မပံ့ပိုးပေးနိုင်တာကြောင့် ဘိုင်ယန်မြူးနစ်အဖို့ အေးအေးသက်သာပဲ ကစားနေခဲ့တယ်။ လိုင်ယွန်အသင်းက အသင်းခေါင်းဆောင် ဖျက်ထုတ်မှုကြမ်းတဲ့အတွက် အနီကတ် အပြခံလိုက်ရချိန်မှာတော့ ပွဲအခြေအနေဟာ အားလုံးပြီးသလောက် ဖြစ်သွားခဲ့ပါပြီ။ ဘိုင်ယန်မြူးနစ်အဖို့ နောက်တစ်ဆင့်တက်ဖို့ သေချာနေပြီဆိုတာ သိပေမယ့်လည်း ကစားကွက်မိနေပြီဖြစ်တဲ့အတွက် ကစားအားမချပစ်ဘဲ ဖိကစားခဲ့တယ်။ အဲဒါကြောင့်လည်း ခရိုအေးရှားတိုက်စစ်မှူး အိုလစ်အတွက် နောက်ထပ်ဂိုးနှစ်ဂိုး ထပ်သွင်းနိုင်ခဲ့ပြီး Hat-trick ရခဲ့တာပဲ ဖြစ်ပါတယ်။

အိုလစ်ဟာ စုစုပေါင်း သွင်းဂိုး (၇)ဂိုး သွင်းယူထားပြီး ဖြစ်တဲ့အတွက် ရီးရဲလ်မက်ဒရစ်အသင်းက စီရော်နယ်လ်ဒိုနဲ့ ဂိုးအရေအတွက် တူသွားခဲ့ပြီ ဖြစ်ပါတယ်။ သူ့အထက်မှာ (၈)ဂိုးသွင်းယူထားတဲ့ မက်ဆီ (ဘာစီလိုနာ) တစ်ဦးတည်းပဲ ရှိတော့တယ်။ ဗိုလ်လုပွဲမှာသာ အိုလစ်ဂိုးသွင်းနိုင်ခဲ့မယ်ဆိုရင် ချန်ပီယံလိဂ်ရဲ့ ရွှေဖိနပ်ဆုကို ဆွတ်ခူးရရှိမှာ ဖြစ်ပါတယ်။ တစ်ဂိုးသွင်းရင် မက်ဆီနဲ့ ပူးတွဲရမယ်။ နှစ်ဂိုးနဲ့အထက် သွင်းခဲ့ရင်တော့ တစ်ဦးတည်း လွတ်လွတ်ကျွတ်ကျွတ် ရရှိမှာပါ။

ပြောရရင်တော့ ဘိုင်ယန်မြူးနစ်အတွက် ဗိုလ်လုပွဲကို တက်ရောက်ရာလမ်းဟာ ထင်သလောက် မကြမ်းတမ်းခဲ့ဘူးလို့ ဆိုရမှာပါပဲ။

ဘာစီလိုနာ - အင်တာမီလန်
တစ်ကမ္ဘာလုံးက ဘောလုံးပရိသတ်တွေက ဘာစီလိုနာရဲ့ ခြေစွမ်းကို ယုံကြည်မှု လွန်ကဲနေကြတယ်။ အဝေးကွင်းမှာ ဂိုးပြတ်ရှုံးနိမ့်ခဲ့ရတာတောင် ပူပန်စိတ် မရှိခဲ့ကြဘူး။ အိမ်ကွင်းနူးကမ့်မှာ ဘာစီလိုနာက အင်တာမီလန်ကို ချေမှုန်းပြလိမ့်မယ်ဆိုပြီး ထင်မှတ်ယုံကြည်ခဲ့ကြတယ်။ အဲ... စိုးရိမ်ခဲ့ရသူတွေလည်း ရှိခဲ့ပါတယ်။ သူတို့ကတော့ မော်ရင်ဟိုကို ကြောက်ကြတဲ့သူတွေပေါ့။ မော်ရင်ဟိုဟာ သူလိုချင်တဲ့ ရလဒ်တစ်ခုကို မဖြစ်မနေ ဘယ်လိုရယူရမယ်ဆိုတာ ပိုင်ပိုင်နိုင်နိုင်သိတဲ့ နည်းပြတစ်ဦး မဟုတ်ပါလား။

မက်ဆီကို မျှော်လင့်ခဲ့ကြတယ်။ ဇာဗီက အငိုက်ဖမ်းပြီး အပိုင်ကစ်မယ်လို့ ထင်ခဲ့ကြတယ်။ အေဗရာဟင်မိုဘစ်ခ်ျက သူ့အသင်းဟောင်းကို အသည်းခွဲမယ်လို့ ပြောသူတွေက ပြောကြတယ်။ ဘာကာရဲ့တိုက်စစ်ကို ဘယ်သူမှ ရပ်တန့်နိုင်မှာ မဟုတ်ဘူးလို့ ဆိုသူတွေက ဆိုကြပြန်တယ်။ အားလုံးက ဘာစီလိုနာ ဘာလုပ်ပြမလဲဆိုတာကို စိတ်ဝင်စားနေကြတယ်။

အခြားတစ်ဖက်မှာတော့ မော်ရင်ဟို ဘယ်လိုနည်းဗျူဟာတွေနဲ့ ဉာဏ်ကစားဦးမလဲဆိုတာကို စိတ်ဝင်စားသူတွေရှိတယ်။ ဘာကာရဲ့ တိုက်စစ်နဲ့ အီတလီကလပ်ရဲ့ ခံစစ် ဘယ်သူက ပိုကောင်းသလဲဆိုတာကို စောင့်ကြည့်ချင်သူတွေက တစ်ပုံတစ်ပင်။ အီတူးရော သူ့အသင်းဟောင်းကို ဂိုးသွင်းဦးမှာလားလို့ ဒွိဟဖြစ်နေရသူတွေကလည်း ရှိသေးရဲ့။ ပထမအကျော့တုန်းက မက်ဆီကို ထိန်းသွားတဲ့ နောက်တန်းတွေကလည်း ဒီပွဲမှာရော ထိန်းချုပ်နိုင်ဦးမလား စတဲ့စတဲ့ မေးခွန်းတွေနဲ့ စိတ်ဝင်စားလို့ နေပြန်ပါရော။

အားလုံးရဲ့ တူညီသော အတွေးကတော့ ဘာစီလိုနာနဲ့ အင်တာမီလန်ပွဲဟာ ဗိုလ်လုပွဲပမာ ကစားကြမှာလို့ ယုံကြည်ကြတာပါပဲ။

တကယ်ကစားတော့ ဘာစီလိုနာက သူ့ရဲ့ဟန်အတိုင်းပဲ ဘောလုံးပိုင်ဆိုင်မှုအသာ၊ ကစားကွက်အသာနဲ့ တစ်ချိန်လုံး ဖိကစားတယ်။ ဒါပေမယ့် မော်ရင်ဟိုက အဲဒီလိုဖိကစားတာကိုပဲ ကျေနပ်နေတယ်။ လုံးဝကို စိုးရိမ်စိတ်ဖြစ်ဟန် မတွေ့ရဘူး။ တစ်ချက်တစ်ချက် တန်ပြန်တိုက်စစ်ကနေ ဘာစီလိုနာကို ခြိမ်းခြောက်ဖို့ပဲ အလေးထားခဲ့တယ်။ သူတို့သာ တစ်ဂိုးရခဲ့မယ်ဆိုရင် ပွဲကပြီးသွားပြီလေ။

ဒါပေမယ့် ပထမပိုင်းမှာပဲ အင်တာမီလန်က မော့တားကို ဒိုင်လူကြီးက အနီကတ်ပြထုတ်ပယ်လိုက်တယ်။ ပွဲချိန်က မိနစ် (၃၀) ၀န်းကျင်ပဲ ရှိသေးတယ်။ လက်ကျန်အချိန် မိနစ် (၆၀)လောက်ကို အင်တာမီလန် ဘယ်လိုရင်ဆိုင်ကျော်ဖြတ်မလဲ။ တစ်ချိန်လုံးအဖိခံနေရတာ ဖြစ်တဲ့အတွက် တစ်ချိန်မဟုတ် တစ်ချိန်မှာ ဂိုးပေးရတော့မယ်။ ဘာကာလိုအသင်းကို (၁၀)ယောက်တည်းနဲ့ ရင်ဆိုင်ဖို့ဆိုတာ လပေါ်မှာ ရေရှာရသလိုပဲ ဘယ်လောက်ခက်ခဲမယ်ဆိုတာ အားလုံးသိနေကြတယ်။ မော်ရင်ဟိုနဲ့ အင်တာမီလန်အတွက် စိတ်မကောင်းဖြစ်ကုန်ကြတယ်။ မော်ရင်ဟိုတော့ ချန်ပီယံလိဂ်ကို လက်ပြနှုတ်ဆက်ပါပြီပေါ့။ ဒါပေမယ့် မော်ရင်ဟိုကတော့ အပြုံးတောင်မပျက်ဘူး။ ဒိုင်လူကြီးရဲ့ ဆုံးဖြတ်ချက်အတွက် ရယ်ရယ်မောမောနဲ့တောင် အရွဲ့တိုက်နေလိုက်သေးတယ်။

တစ်ယောက်လျော့သွားတဲ့အတွက် ကစားကွက်ကတော့ ချက်ချင်းပြောင်းသွားတယ်။ တန်ပြန်တိုက်စစ်တွေနဲ့ ကစားရာကနေ ဇုန်အလိုက် ခံစစ်သက်သက် ကစားတဲ့ပုံစံကို ပြောင်းပစ်လိုက်တယ်။ တကယ်လို့သာ (၁၁)ယောက်ချင်း ကစားရမယ်ဆိုရင် ဘာစီလိုနာ အနိုင်ရပြီး နောက်တစ်ဆင့်ကိုတောင် တက်နိုင်လိမ့်မယ်လို့ ကျွန်တော်တွေးနေမိတယ်။ အခုတော့ တစ်ယောက်အထုတ်ခံလိုက်ရတာဟာ မော်ရင်ဟိုအတွက် အနှောင့်အယှက်မဖြစ်စေဘဲ ခွန်အားဖြစ်သွားစေခဲ့တယ်။ တန်ပြန်တိုက်စစ်အတွက် လုံးဝကို စိတ်မကူးတော့ဘဲ အဆင့်ဆင့်ခံစစ်နဲ့ ခပ်မာမာတုံ့ပြန်ပြီး ကစားသွားခဲ့တယ်။ လေးယောက်တန်းတစ်တန်း၊ ငါးယောက်တန်းတစ်တန်းထားပြီး ဇုန်အလိုက် ကစားကွက်ဖျက်ပြီး ခံစစ်ကစားတဲ့ပုံစံဟာ အင်တာအတွက် အများကြီးအသုံးတည့်သွားတယ်။

အင်တာမီလန်အသင်းရဲ့ ကွင်းတစ်ခြမ်းထဲမှာပဲ လူ (၂၀)က ဘောလုံးကစားရတဲ့အခါ ကစားကွက်ဖော်တာတွေ၊ ဂိုးသွင်းခွင့်တွေ ရှားပါးသွားတာ မထူးဆန်းပါဘူး။ ဒါကလည်း မော်ရင်ဟို လိုချင်တဲ့ပုံစံပဲ ဖြစ်ပါတယ်။ ဘာစီလိုနာက နောက်တန်းကစားသမားတွေပါ ရှေ့တန်းတက်လာပြီး ဖိကစားလေ ကစားကွက်ကျပ်ပြီး ဘောလုံးကန်ဖို့ခက်လေ ဖြစ်သွားတာကို ဂွာဒီယိုလာ မပြင်နိုင်ခဲ့ဘူး။ တကယ်ဆိုရင် တစ်သင်းလုံး အင်တာမီလန်အသင်းဘက်ခြမ်းမှာ ဖိကစားမယ့်အစား ကစားကွက်အကျဲနဲ့ ဖြန့်ကစားပြီး တောင်ပံတွေကနေ ထိုးဖောက်သင့်တယ်။ အခုတော့ ခံစစ်တံတိုင်းနှစ်ထပ် ကာထားတဲ့ အလယ်ကိုပဲ ၀င်တိုးပြီး ကစားခဲ့တဲ့အတွက် တစ်ဆင့်ကိုကျော်ပြီး နောက်တစ်ဆင့်ကို မကျော်နိုင်ဖြစ်ခဲ့ရတယ်။

ဘာစီလိုနာအသင်း ဘောလုံးရတာ၊ ကစားကွက်ဖော်တာ၊ အပေးအယူလုပ်တာတွေကို အင်တာမီလန် ကစားသမားတွေက စိတ်ရှည်လက်ရှည်နဲ့ ကစားခဲ့ကြတယ်။ သူတို့တွေပေးချင်သလောက်ပေး ဂရုမစိုက်ရေးချမစိုက်၊ ကစားကွက်ဖော်ချင်သလောက်ဖော် မကြောက်ရေးချမကြောက်ပဲ။ အဲ... ဒါပေမယ့် ဘောလုံးနဲ့အတူ (၁၈)ကိုက်စည်းထဲ ရောက်လာတဲ့သူ မှန်သမျှကတော့ သူတို့ရဲ့ ရန်သူတော်တွေပဲ။ ၁၈ ကိုက်ထိပ်စည်းအနားထိ ဘာမှမလုပ်သေးဘူး၊ ၁၈ ကိုက်စည်းထဲကို ၀င်လာပြီဆိုတာနဲ့ အလွတ်မပေးစတမ်း ခပ်ကြမ်းကြမ်း ဖျက်ထုတ်ကြတယ်။ အဲဒီနည်းဗျူဟာ အလွန်ထိရောက်ခဲ့ပြီး ဘာစီလိုနာတို့ စိတ်ညစ်ခဲ့ရ၊ ဒေါသဖြစ်ခဲ့ရတယ်။ ဒါကြောင့်လည်း မလိုအပ်ဘဲ ၁၈ ကိုက်ထိပ်ကနေ လှမ်းကန်ပြီး ကန်သွင်းကြပေမယ့် ဂိုးပေါက်ကို ခြိမ်းခြောက်နိုင်ခဲ့ခြင်း မရှိဘူး။

မက်ဆီဟာ ဘာစီလိုနာရဲ့ အသက်ဆိုတာ မော်ရင်ဟို ကောင်းကောင်းသိတာပေါ့။ မက်ဆီလွတ်သွားတာနဲ့ အမျိုးမျိုးဖြစ်နိုင်တယ်ဆိုတာကိုလည်း သိတာပါပဲ။ ဒါပေမယ့် မော်ရင်ဟိုရဲ့ နည်းစနစ်ဟာ အံ့သြစရာ ကောင်းလွန်းတယ်။ မက်ဆီကို လူကပ်ကစားစေခြင်း မရှိဘူး။ အဲဒီအတွက် မက်ဆီအဖို့ လွတ်လွတ်လပ်လပ် သူကစားချင်သလို ကစားခွင့်ရနေတယ်လို့ ထင်စရာရှိတယ်။ အဲလိုလည်း မဟုတ်ပြန်ဘူး။ မက်ဆီကို လူအသေကပ်ပြီး မကစားပေမယ့် သူ့ဘေးဝန်းကျင်မှာ ကစားသမားနှစ်ယောက် အမြဲတမ်းရှိတယ်။ အဲဒီနှစ်ယောက်ကလည်း တစ်နေရာတည်းမှာ မနေကြဘူး။ မက်ဆီရဲ့ ရှေ့နဲ့နောက်တွေမှာ ဖြစ်တယ်။ မက်ဆီဘောလုံးရလို့ တစ်ကိုယ်တော်ဆွဲပြေးမယ်ဆိုပြီး လိမ်ခေါက်တာနဲ့ တစ်ယောက်ကိုသာလွတ်မယ်၊ နောက်တစ်ယောက်ကို မလွတ်စေရဘူး။ ဘယ်တော့မှ နှစ်ယောက်လုံးတစ်ပြိုင်နက် မက်ဆီရဲ့ခြေထောက်ထဲက ဘောလုံးကို ၀င်မလုဘူး။ ပထမတစ်ယောက်က ၀င်လုပြီး မက်ဆီ skill ပြတာကို ကျေကျေနပ်နပ်ခံတယ်။ အဲ... နောက်တစ်ယောက်ကတော့ ထွက်လာတဲ့မက်ဆီကို ဘောလုံးရောလူပါ မလွတ်စေရဘဲ ဖျက်ထုတ်ကစားတယ်။ အဲဒီဗျူဟာကြောင့်ပဲ မက်ဆီဟာ သူ့ရဲ့တစ်ကိုယ်တော် အစွမ်းတွေကို မပြသလိုက်ရဘူး။ ပထမပိုင်းမှာ ဂိုးရလုနီးနီး တစ်ကြိမ်ကန်ခွင့် ရခဲ့တာကလွဲရင် တစ်ပွဲလုံးမှာ သူ့ခြေထောက်ထဲကို ဘောလုံးအရောက်မခံခဲ့ကြဘူး။

ရှေ့တန်းတိုက်စစ်မှူးတွေ ဂိုးပေါက်ပျောက်နေတဲ့အတွက် နောက်တန်းခံစစ်မှူး ပီကေးက ရှေ့တန်းအထိ တက်ကစားတယ်။ အဲဒါကြောင့်လည်း အဖိုးတန်ချေပဂိုးတစ်ဂိုးကို လှလှပပ သွင်းယူနိုင်ခဲ့တယ်။ ဒါပေမယ့် အဲဒီတစ်ဂိုးဟာ ဘာစီလိုနာအတွက် နောက်တစ်ဆင့်တက်ဖို့ရာ လုံလောက်ခြင်းတော့ မရှိခဲ့ဘူး။ ပွဲချိန်တစ်လျှောက်လုံး ဖိကစားနေတာကို ပျာယာခတ်ခြင်းမရှိဘဲ အေးအေးဆေးဆေး၊ အကွက်ကျကျ ဖျက်ထုတ်ကစားသွားတဲ့ အင်တာမီလန် အသင်းသားတွေအတွက် ဗိုလ်လုပွဲသွားဖို့ ထိုက်တန်ခဲ့ပါတယ်။

ဒီပွဲအတွက် ပြောစရာဖြစ်ခဲ့တာတွေ အများကြီးရှိခဲ့တယ်။
  • ဘာစီလိုနာကွင်းက ဘောလုံးကောက်တဲ့ကလေးတွေရဲ့ ဘောလုံးအမြန်ကောက်ပေး စနစ်ကြောင့် အင်တာမီလန်ဂိုးသမား အ၀ါကတ် အပြခံရတဲ့အထိ ဖိအားဝင်ခဲ့ရတာတွေ၊
  • ဘာစီလိုနာဂိုးသမားဟာ ကွင်းလယ်စက်ဝိုင်းအထိတက်ပြီး ကစားခဲ့ရတဲ့အထိ ဘာစီလိုနာက ဖိကစားခဲ့တာတွေ၊
  • အင်တာမီလန်အသင်းရဲ့ ကွင်းတစ်ခြမ်းထဲမှာပဲ (ဘောလုံးကွင်းရဲ့ လေးပုံတစ်ပုံမှာပဲ) မိနစ် (၇၀)လောက် ကစားခဲ့တာတွေ၊
  • အင်တာမီလန်အသင်း ဘောလုံးရခဲ့ရင် တိုက်စစ်မှူးမီလီတိုဟာ လူကျွံဘောအဖြစ်ခံပြီး တစ်ဖက်ဂိုးစည်းထိပ်အထိ သွားရပ်နေခဲ့ကာ ဘောလုံးကို တစ်ဖက်ခြမ်းမှာ သွားတည်ပြီး အချိန်ကြာရအောင် လုပ်ခဲ့တာတွေ၊
  • အာဂျင်တီးနားကစားသမား မက်ဆီဟာ တစ်ဖက်နောက်တန်းကြောင့် သူ့စိတ်တိုင်းကျ ကစားခွင့်မရတဲ့အတွက် စိတ်ဓာတ်ကျဆင်းနေခဲ့တာ၊ ဒေါသထွက်နေခဲ့တာကို တီဗီဖန်သားပြင်မှာ အထင်းသားမြင်တွေ့ခဲ့ရတာတွေ၊
  • ကစားသမား တစ်ယောက်လျော့အနေအထားနဲ့ ဘောလုံးပိုင်ဆိုင်မှု (၁၄ % ) ကျော်ကျော်ပဲ ရှိခဲ့ပေမယ့် ပေးဂိုးတစ်ဂိုးပဲ ပေးရအောင် ကြံ့ကြံ့ခံကစားသွားနိုင်ခဲ့တဲ့ မော်ရင်ဟိုရဲ့ ခံစစ်နည်းဗျူဟာတွေ၊
  • ပွဲအပြီးမှာ အောင်ပွဲခံနေတဲ့ မော်ရင်ဟိုကို ဘာစီလိုနာဂိုးသမားက သွားရောက်ရန်ပြုခဲ့တာတွေ၊
စသည်ဖြင့်ပေါ့လေ။

ဘာပဲပြောပြော အင်တာမီလန်အသင်းကတော့ ဘိုင်ယန်မြူးနစ်နဲ့အတူ ဗိုလ်လုပွဲဆင်နွှဲဖို့ ဘာနေဗျူးဆီကို ချီတက်သွားခဲ့ပါပြီ။
အမှတ်တရ
ကိုဉာဏ် (ပန်းလောင်မြေ)
၂၀၁၀ ပြည့်နှစ်၊ ဧပြီလ ၂၉ ရက်၊ ကြာသပတေးနေ့။
ညနေ ၃ နာရီ ၀၁ မိနစ်တွင်ပြီး၏။

No comments:

Post a Comment

 
Web Statistics