Thursday, November 11, 2010

ရေးမိရေးရာ တွေးမိတွေးရာ


(၁)
ပထမဆုံး နှုတ်ခွန်းဆက်ရမှာပါပဲ။ နေ့တိုင်းပို့စ်တွေ တက်နေပေမယ့်
အဲဒီပို့စ်တွေက အလိုအလျောက် တင်ပေးခဲ့တာတွေမို့ ကျွန်တော့်စိတ်ထဲမှာ
စာဖတ်သူတွေကို အားနာနေမိတယ်။ မြန်မာ့သွေးကို လာဖတ်တဲ့ စာဖတ်သူတွေနဲ့
ကျွန်တော် စိမ်းသွားသလို ခံစားရတယ်။ ပြီးတော့ ဘယ်လိုကြီးမှန်းလည်း
မသိဘူး။ တစ်ရက်ကို ပို့စ်တစ်ခုနှုန်း ပုံမှန်တက်အောင် ပြင်ဆင်ပေးခဲ့ပေမယ့်
အဖြစ်ပဲ လုပ်ပေးခဲ့ရသလို ဖြစ်နေတာကို စိတ်မကောင်းဘူး။ ဒါက
ကျွန်တော့်ခံစားချက်။ ဒါပေမယ့် မြန်မာ့သွေးကို လာတဲ့အချိန်မှာ ဟင်...
ဘာမှလည်း ဖတ်စရာအသစ် မရှိဘူးဆိုပြီး စိတ်ပျက်လက်ပျက်နဲ့
ပြန်သွားရမှာနဲ့စာရင်း ဖတ်စရာတစ်ခုခု ရှိတာက ပိုကောင်းမယ်လို့
ယုံကြည်တဲ့အတွက် ပြင်ဆင်ထားခဲ့တာပါ။ အဲဒီလို ပြင်ဆင်ခဲ့တာတွေကလည်း
တိုက်တိုက်ဆိုင်ဆိုင်ဆိုသလို မနေ့က နိုဝင်ဘာ ၁၀ ရက်နေ့အထိ
ကုန်သွားခဲ့ပြီ။ ကဲ... စကားတွေ ရှည်မနေတော့ပါဘူး။ အားလုံးပဲ
မင်္ဂလာပါခင်ဗျာ။

(၂)
မြန်မာ့သွေးဘလော့ဂ်ကို ပုံမှန်လာဖတ်သူ အရေအတွက်ဟာ ပြည်တွင်းအင်တာနက်
အခက်အခဲတွေကြောင့် အနည်းငယ် လျော့သွားတာ မှန်ပေမယ့် ပြည်ပက
စာဖတ်သူတွေကတော့ ပုံမှန် လာဖတ်ကြတာကို တွေ့ရပါတယ်။ အဲဒီအတွက်လည်း
ကျေးဇူးတင်ပါတယ်။

(၃)
အခု အင်တာနက်လာသုံးတဲ့အခါ မြန်မာ့သွေးဘလော့ဂ်ကို မြင်လိုက်ရတဲ့အချိန်မှာ
ခံစားရတဲ့ ကျွန်တော့်ပီတိကို ဘယ်လိုပြောပြရမလဲ မသိဘူးဗျ။ တစ်မျိုးကြီးပဲ။
ပထမဆုံး ကျွန်တော့်ဘလော့ဂ်ကို အချိန်သိပ်မကြာဘဲ ဖွင့်လို့ရတဲ့အတွက်
ဝမ်းသာရတယ်။ ပြီးတော့ တင်ထားတဲ့ပို့စ်တွေကို ဖတ်ရတဲ့အတွက်
(ကိုယ်တင်ထားတဲ့စာကို ကိုယ်ဖတ်ပြီး ကြည်နူးရတာ တစ်မျိုးတော့ဖြစ်တယ်ဗျး)
) ကြည်နူးရတယ်။ ကွန်းမန့်တွေ၊ စီဘောက်က အော်သံတွေကို ဖတ်ရတော့ အားလုံး
ပြီးပြည့်စုံသွားတယ်။ တကယ့်ကို ပျော်ရွှင်ဖွယ်ရာ အခိုက်အတန့်ပါဗျာ။

(၄)
အင်တာနက်မသုံးဖြစ်တဲ့ အချိန်တွေမှာ ကျွန်တော်တော့ စိတ်ညစ်နေမှာပဲနော်လို့
သူငယ်ချင်းတွေနဲ့ ဖုန်းရတဲ့အခါ မေးတတ်ကြတယ်။ ကျွန်တော်ပြန်ဖြေလိုက်ပါတယ်။
လုံးဝ စိတ်မညစ်ပါဘူးလို့။ တကယ့်ကို ကျွန်တော် ခံစားရတဲ့အတိုင်း
ဖြေလိုက်တာပါ။ ဘာကြောင့်လဲဆိုတော့ အင်တာနက်ကို စိတ်ကြိုက်သုံးပြီး
ကျွန်တော့်မှာ အခွင့်အရေးတွေ ရှိခဲ့စဉ်တုန်းက ကျွန်တော်လုပ်ချင်တာတွေကို
လုပ်နိုင်ခဲ့တယ်လေ။ ပြန်တွေးတိုင်း ၀မ်းသာကြည်နူးရတာချည်းပဲ။
မြန်မာ့သွေးဘလော့ဂ်နဲ့ မြန်မာ့သွေးဂရု(ပ်)ဟာ ကျွန်တော့်အတွက် တကယ့်ကို
မှတ်တိုင်တွေပါပဲ။ အဲဒါတွေအတွက် ကျွန်တော်အမြဲတမ်း ဂုဏ်ယူနေမှာပါ။
အခုလည်း ဂုဏ်ယူနေပါတယ်။ အဲဒီတော့ လုပ်ခွင့်ရတဲ့အချိန်တုန်းက
ကျွန်တော်လုပ်ချင်တာတွေကို လုပ်ခွင့်ရခဲ့တာမို့ အခုအချိန်မှာ
ကျွန်တော်စိတ်ညစ်မနေပါဘူး။ တစ်ခုတော့ စိတ်မကောင်းဖြစ်ရတာပေါ့လေ။
ကျွန်တော်ဖတ်ထားတဲ့၊ ကျွန်တော်သိထားတဲ့ အသိတွေ၊ အတွေးအမြင်တွေ၊
အတွေ့အကြုံတွေကို အရင်လို စိတ်သွားတိုင်းကိုယ်ပါ မဝေမျှနိုင်တော့၊
မပြောပြနိုင်တော့တာကိုပါ။ အဲဒီအတွက်ဆိုရင်တော့ အင်တာနက် သုံးခွင့်မရတဲ့
အခုအခြေအနေကို နည်းနည်းတော့ စိတ်ညစ်မိတာ အမှန်ပါပဲ။

(၅)
ကျွန်တော်ရောက်နေတဲ့ဒေသဟာ လျှပ်စစ်မီး မရပါဘူး။ ညပိုင်းမှာ (၃)နာရီပဲ
မီးစက်ကပေးတဲ့မီးကို ရပါတယ်။ အဲဒီအချိန်လေးမှာ ဓာတ်ခဲအားသွင်းဖို့၊ LED
မီးအိမ်ကို အားသွင်းဖို့၊ စာရေးစရာရှိတာတွေ ရေးဖို့၊ စသည်ဖြင့်
လုပ်ရပါတယ်။ ည ၁၀ နာရီဆိုရင် လျှပ်စစ်မီး မရတော့ပါဘူး။ အားသွင်းထားတဲ့
မီးအိမ်အားကိုးနဲ့ စာဖတ်ရတာ အလွန်ဆုံး ၁ နာရီပါပဲ။ ဖယောင်းတိုင်နဲ့
ဆက်ဖတ်ရင် ရပေမယ့် အများကြီး သုံးရဦးမှာဖြစ်တဲ့
ကျွန်တော့်မျက်လုံးတွေကို သနားတဲ့အတွက် ဖယောင်းတိုင်နဲ့ စာမဖတ်ပါဘူး။
အဲဒီအတွက် အကျိုးရလဒ်ကတော့ ကျွန်တော်တစ်ခါမှ အိပ်ရာမ၀င်ဖူးတဲ့ ည ၁၁
နာရီဝန်းကျင်ဆိုရင် အိပ်ရာထဲမှာ လူးလှိမ့်ပြီး အိပ်ပျော်အောင်
ကြိုးစားရတာပါပဲ။ ဒါတွေကို စိတ်ညစ်သလားဆိုတော့ နည်းနည်းတော့
စိတ်ညစ်တာပေါ့ဗျာ။ ကိုယ်က အိပ်ရမှာကို အင်မတန် မုန်းတီးတဲ့လူ။ အဲဒီလိုလူက
တစ်နေ့တစ်နေ့ကို အိပ်ချင်သည်ဖြစ်စေ၊ မအိပ်ချင်သည်ဖြစ်စေ ၇ နာရီလောက်
အိပ်နေရတာ ဘယ်လောက်များ စိတ်ညစ်ဖို့ ကောင်းလိုက်သလဲ။ အခြေအနေနဲ့
အချိန်အခါဆိုတာကို တော်တော်ကြီးကို သဘောပေါက်သွားတယ်။ အခုတော့ LED
မီးအိမ် ၃-၄ ခု ၀ယ်ထားဖို့ ဆုံးဖြတ်လိုက်တယ်။ မအိပ်ချင်ဘဲ အိပ်ရတာ
အင်မတန် ပင်ပန်းတယ်ဗျ။ အိပ်စက်တယ်ဆိုတာ အနားယူပါတယ်ဆိုမှ အိပ်ရာပေါ်မှာ
ပင်ပန်းရတာကြီးကတော့ မနိပ်လှဘူးလေဗျာ။၏

(၆)
စာအုပ်စာတမ်းတွေ ဈေးကြီးတယ်။ စာအုပ်စာတမ်းရယ်မှ မဟုတ်ပါဘူး။
ကျန်တဲ့ပစ္စည်းတွေလည်း ဈေးကြီးတာပါပဲ။ အစားအသောက်တော့ ပေါတယ်။
တော်တော်ကိုပေါတယ်။ မနက်စာအတွက် ပိုက်ဆံ ၅၀၀ ကျပ် အကုန်ခံလိုက်ရင်
နေ့လည်စာ စားတဲ့အချိန်အထိ ဗိုက်ပြည့်နေအောင်ကို စားရတယ်။ ပြီးတော့
မြန်မာအစားအစာမျိုးစုံ ရနိုင်တာကို ကျွန်တော်သိပ်သဘောကျတယ်။
ပြင်ဦးလွင်မှာတုန်းက မစားခဲ့ရတဲ့ မြန်မာမုန့်မျိုးစုံကို နေ့တိုင်း
အားပါးတရ စားဖြစ်တယ်။ ငယ်ငယ်ကလေးတုန်းက စားခဲ့ရတဲ့ မုန့်ပေါင်းကိုတောင်
စားရသေးတယ်။ ဘယ်လောက်များ ကံကောင်းလိုက်တဲ့ ကျွန်တော်လဲ။

(၇)
ဂျာနယ်တွေ အကုန်မတင်ဘူး။ လူအဖတ်များတာပဲ တင်တယ်။ ပြည်သူ့ခေတ်ကို မတင်လို့
အတင်းမှာခိုင်းရတယ်။ ကျွန်တော်တစ်ယောက်ပဲ ယူတယ်။ တစ်စောင်ပဲ မှာပေးတယ်။
ရောက်ရောက်ချင်းအပတ်က ကျွန်တော်မှာလို့ သူတို့ဆိုင်မှာ ၅ စောင်တင်တာ
ကျန်တဲ့ ၄ စောင်မှာ ၁ စောင်ပဲ ရောင်းရတယ်တဲ့။ ၃ စောင်က ဘယ်သူမှ
မ၀ယ်ဘူးတဲ့။ ဘာပြောရမှန်းမသိအောင် ဖြစ်ရတယ်။ အဲဒါကြောင့်လည်း....
အင်း.... အဲဒါကြောင့်လည်းပေါ့ဗျာ..........။

(၈)
ဂျာနယ်တစ်စောင်ရဲ့ ပျမ်းမျှဈေးနှုန်းက ၇၀၀ ကျပ်ပဲ။ အဲဒါ အနည်းဆုံးဈေးဗျ။
ကျွန်တော်ဖတ်တဲ့ ဂျာနယ်အများစုက ၈၀၀ ကျပ်ချည်းပဲ။ Weekly Eleven, Bi
Weekly Eleven, Yangon Times, Voice, True News, Myanmar Times, First
Eleven, Premier Eleven, လျှပ်တစ်ပြက်၊ 7 Day News အဲဒီဂျာနယ်တွေကို
ကျွန်တော်ဖတ်ခွင့်ရတယ်။ Northern Star နဲ့ Myanmar Post ကိုတော့
မှာလို့လည်း မရဘူး။ မန္တလေးအရုဏ်ဦးလည်း မဖတ်ရတော့ဘူး။ ဘာပဲဖြစ်ဖြစ်
ထိုက်သင့်သလောက် ဖတ်ခွင့်ရတဲ့အတွက် ဈေးကြီးပေးရပေမယ့် တန်ပါတယ်။
အဲဒီဂျာနယ်တွေက လေယာဉ်စီးပြီး လာကြတာကိုး။ အဲလောက်တော့ ပေးရမှာပေါ့။
ဟုတ်ဘူးလား။

(၉)
ကဲ... အင်တာနက် အမြန်နှုန်းကြောင့် ဂျီမေးလ်ဝင်ဖို့ကိုလည်း
အကြာကြီးစောင့်ရတယ်။ ပြီးတော့ Standard View နဲ့လည်း သုံးလို့မရဘူး။ ရတဲ့
HTML View နဲ့ပဲ သုံးရတယ်။ အဲဒီတော့ အခုတင်တဲ့ပို့စ်ဟာ စာကြောင်းတွေ
မညီမညာနဲ့ မြက်ခင်းကို နွားစားထားသလိုဖြစ်နေရင် နားလည်ပေးကြပါဦးဗျာ။
ခင်ဗျားတို့မှာလည်း မြန်မာ့သွေးကိုလာတိုင်း နားလည်ပေးရတာတွေ
များနေရင်လည်း ထပ်ပြီးတော့ နားလည်ပေးကြပါဦးလို့။

အမှတ်တရ
ကိုဥာဏ် (ပန်းလောင်မြေ)
၂၀၁၀ ပြည့်နှစ် နိုဝင်ဘာလ ၁၁ ရက်၊ ကြာသပတေးနေ့။
နံနက် ၁၀ နာရီ ၄၅ မိနစ်တွင်ပြီး၏။

1 comment:

  1. ဟုတ်ကဲ့ ထပ်ပြီးနားလည်ပေးပါတယ်.... ငါးဆယ်ပြန်ပေးပါ။ ဂွီ

    ReplyDelete

 
Web Statistics