Thursday, February 10, 2011

နိုင်ငံရေးသူငယ်နာတွေ ပျောက်သင့်ပြီ


ဒီအပတ်ထုတ် (ဖေဖော်ဝါရီ ၁၀-၁၆၊ ၂၀၁၁) ရက်စွဲနဲ့ ထုတ်ဝေခဲ့တဲ့ ရန်ကုန်တိုင်းမ်ဂျာနယ် အတွဲ(၇)၊ အမှတ်(၆) မှာ ဖော်ပြပါရှိတဲ့ ဆောင်းပါးတစ်ပုဒ်ကို ဖတ်နေရင်းနဲ့ ပြောချင်လာတာလေးတွေကို မျှဝေပါရစေ။ ကျွန်တော့်အမြင်သက်သက် ဖြစ်တဲ့အတွက် မှန်တယ်/မှားတယ် ဆိုတာကို ကျွန်တော် မပြောလိုပါဘူး။ စာဖတ်သူက သင့်သလိုသာ ဆင်ခြင်ကြပါကုန်။

အစိုးရသစ်နှင့် ထွန်းသစ်စ ပါလီမန်ဒီမိုကရေစီ ဆိုတဲ့ မျက်နှာဖုံးဆောင်းပါးကို အတော်လေး သဘောကျမိတယ်။ လက်ရှိလွှတ်တော်မြင်ကွင်းကို အပြည့်စုံဆုံး မဟုတ်ပေမယ့် အတော်အတန် ပြည့်စုံအောင် ရေးသားတင်ပြထားတာ တွေ့ရတယ်။ အဲဒီအတွက် ချီးကျူးလိုက်ပါတယ်။ ဆောင်းပါးရေးသူတွေကတော့ နာမည်ရေးထားပုံအရဆိုလျှင် ဇော်ကိုသက် နဲ့ ဝေမာသိမ့် ဖြစ်မယ်ထင်ပါတယ်။

အဲဒီဆောင်းပါးမှာပါတဲ့ အမျိုးသားဒီမိုကရေစီအင်အားစုက အမျိုးသားလွှတ်တော်ကိုယ်စားလှယ် ဦးဖုန်းမြင့်အောင် ပြောတဲ့ စကားတစ်ခွန်းကို သဘောမကျဘူး။ ဖတ်ကြည့်ပါဦး။

"............။ ဒုတိယဥက္ကဋ္ဌမှာ ကြံ့ခိုင်ရေးနှင့် ဖွံ့ဖြိုးရေးအသင်းက ဦးမြငြိမ်းကို တင်တယ်။ ........." ဆိုတဲ့ စကားပါ။ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီကို အတိုကောက်အနေနဲ့ အမျိုးမျိုး သုံးကြပါတယ်။ ကြံ့ခိုင်ရေး (သို့) ပြည်ခိုင်ဖြိုး စသည်ဖြင့် ပြောကြဆိုကြတာ ဖတ်ဖူး၊ ကြားဖူးပါတယ်။ ဒါပေမယ့် အခုလိုမျိုး ကြံ့ခိုင်ရေးနှင့် ဖွံ့ဖြိုးရေးအသင်းဆိုပြီး ပါတီ နဲ့ အသင်း ဆိုတဲ့ စကားလုံးတွေကို မှားယွင်းသုံးစွဲတာကတော့ ချွတ်ချော်ပေါ့လျော့လွန်းတယ်လို့  မြင်မိပါတယ်။ ပြောတဲ့လူ၊ ရေးတဲ့လူတွေက အမှတ်မဲ့မို့ သတိမထားမိဘဲ ပါသွားတယ်ပဲထား၊ အယ်ဒီတာတွေက ဖတ်ရှုပြီး ပြင်ဆင်ပေးသင့်ပါတယ်။ နောက် နာမည်ကလည်း လွဲနေသေးတယ်။ သတင်းစာတွေမှာလည်း ဖော်ပြပါရှိနေတဲ့ သတင်းတွေမှာ အဲဒီနာမည် ပါနေပါတယ်။ မသိရအောင်လည်း လျှို့ဝှက်ကိစ္စ မဟုတ်ပါဘူး။ ဦးမြငြိမ်း ဆိုပြီး စာလုံးပေါင်းထားပါတယ်။ အမှန်က ဦးမြညိမ်း ဖြစ်ပါတယ်။ ဒါလေးများဆိုပြီး မတွေးစေချင်ပါဘူး။ လူတစ်ယောက်ရဲ့ နာမည်ဖြစ်ပါတယ်။ လုံးဝမှားလို့မရတဲ့ အရေးကိစ္စ ဖြစ်ပါတယ်။ အဲဒီဆောင်းပါးမှာပဲ တဆက်တည်း ဆက်ရေးထားတာကျတော့ စာလုံးပေါင်း အမှန်ဖြစ်သွားပြန်ပါရော။ ဘယ်လိုနားလည်ရမလဲ ကျွန်တော်ကိုဉာဏ် မသိပါ။

နောက် ဦးဖုန်းမြင့်အောင် ဆက်ပြောထားတာကို ဖတ်ကြည့်ပါဦး။
"မဲခွဲဆုံးဖြတ်တော့ ပြည်ခိုင်ဖြိုး၊ တပ်ကိုယ်စားလှယ်တွေက တစ်ဖက်၊ ဒီမိုကရေစီ အင်အားစုတွေက တစ်ဖက် မဲ ၁၉၀၊ မဲ ၃၀ နဲ့ ဦးမြညိမ်း က ရသွားတယ်" တဲ့။ ကျွန်တော်ဖြင့် ဘာပြောရမှန်း မသိအောင်ကို စိတ်ညစ်သွားတယ်။ သူဘာပြောချင်တာလဲ တွေးလို့မရဘူး။ စိတ်တိုနေတာလား၊ ခံပြင်းနေတာလား၊ လိုအင်မပြည့်ဖြစ်နေတာလား။ သေချာတာတစ်ခုကတော့ ဦးဖုန်းမြင့်အောင်ဟာ လွှတ်တော်မှာ ဘယ်ပါတီက ကိုယ်စားလှယ် ဘယ်နှဦးပါတယ်၊ တပ်မတော်သား လွှတ်တော်ကိုယ်စားလှယ် ဘယ်နှဦးရှိတယ်ဆိုတာကို သိပုံမရတာပါပဲ။ သူပြောသလိုဆိုရင် ပြည်ခိုင်ဖြိုးပါတီနဲ့ တပ်မတော်သားကိုယ်စားလှယ်တွေ နှစ်ခုပေါင်းအင်အားဟာ ၁၉၀ ဦး ရှိနေတဲ့အဓိပ္ပါယ်ပါ။

ပထမတစ်ချက် ဒီမိုကရေစီအင်အားစုတွေဆိုတာ ဘာကိုပြောတာလဲ။ လွှတ်တော်ထဲကို ရောက်လာကြတဲ့ ကိုယ်စားလှယ်တွေအားလုံးဟာ ဖွဲ့စည်းပုံအခြေခံဥပဒေနဲ့အညီ ရွေးကောက်တင်မြှောက်ခံရပြီး ဒီမိုကရေစီနည်းကျ ရောက်လာကြတာ မဟုတ်ဘူးလား။ ကဲ... ထားပါတော့ဗျာ။ တပ်မတော်သား ကိုယ်စားလှယ်တွေဆိုတာက ခန့်အပ်ခံရသူတွေဖြစ်လို့ သူတို့ကို သီးခြားရေတွက်တယ်ပဲ ဆိုပါတော့။ ပြည်ခိုင်ဖြိုးပါတီဟာ ဒီမိုကရေစီနည်းလမ်းနဲ့အညီ ၂၀၁၀ ရွေးကောက်ပွဲမှာ အခြားပါတီတွေနဲ့အတူ မဲဆန္ဒနယ်အသီးသီးမှာ ယှဉ်ပြိုင်အရွေးခံခဲ့တာ မဟုတ်ဘူးလား။ သူနိုင်ကိုယ်နိုင် ယှဉ်ပြိုင်အရွေးခံခဲ့တဲ့ အဲဒီလိုပါတီကိုမှ ဒီမိုကရေစီပါတီလို့ မသတ်မှတ်ဘူးဆိုရင်တော့ ပြောစရာက တစ်ခုပဲ ရှိတော့တယ်။

"ဦးဖုန်းမြင့်အောင်ရေ... လူကြီးမင်းဟာ ရန်/ငါ သူငယ်နာ မစင်သေးတဲ့ ကလေးဆိုးကြီးပဲ" လို့ ကျွန်တော်ကိုဉာဏ်က ပြောပါရစေခင်ဗျာ။

အဲဒီဆောင်းပါးကို ဖတ်လာတာ နောက်ဆုံးဆောင်းပါးနိဂုံးရောက်မှပဲ သဘောကျပြီး ပြုံးမိတော့တယ်။ ကျွန်တော်က ဝေ့ကာဝိုက်ကာနဲ့ မိတ်ဆက်မနေတော့ပါဘူး။ မူရင်းအတိုင်း ဖတ်ကြည့်ကြပါတော့ခင်ဗျား။

- - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - -
တစ်ကိုယ်တော်နိုင်ငံရေးသမားကြီး ဦးသိန်းညွန့် က "အခု လွှတ်တော်မှာ ဒီမိုကရေစီ အငွေ့အသက်တွေ ပျံ့နှံ့နေပါပြီ။ ဒီမိုကရေစီ အငွေ့အသက်လေးတွေ ပဏာမ လွှမ်းခြုံနေပါပြီ။ လွှတ်တော်မှာ အများလက်ခံတာကို လက်မခံရင် ဒီမိုကရေစီလမ်းကြောင်းကို မသွားနဲ့ပေါ့။ အများဆန္ဒကို လက်ခံကြိုဆိုရမှာပဲ ဖြစ်ပါတယ်" ဟု လက်ရှိ ဒီမိုကရေစီနိုင်ငံတော် အပြောင်းအလဲကာလနှင့်ယှဉ်ကာ သုံးသပ်ချပြသွားခဲ့သည်။
- - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - -

ဟုတ်ကဲ့ လေးစားပါတယ် ဦးသိန်းညွန့် ခင်ဗျား။

တွေးဆ ဆင်ခြင်နိုင်ကြပါစေဟု....

အမှတ်တရ
ကိုဉာဏ် (ပန်းလောင်မြေ)
၂၀၁၁ ခုနှစ်၊ ဖေဖော်ဝါရီလ ၁၀ ရက် (ကြာသပတေးနေ့)
နံနက် ၁၀ နာရီ ၄၅ မိနစ်တွင်ပြီး၏။

1 comment:

  1. Anonymous12:14 PM

    သိပ်ကြိုက်ဒယ်ဗျာ

    ReplyDelete

 
Web Statistics