ဝန်ကြီးအပြောင်းအလဲများနှင့် ကျွန်တော့်အတွေးများ

(က) 

ဝန်ကြီးအပြောင်းအလဲတွေ လုပ်မယ်ဆိုပြီး အချိန်အကြာကြီးကတည်းက သတင်းတွေ၊ ကောလာဟလတွေ ထွက်နေခဲ့ပေမယ့် အခုမှပဲ အဲဒီသတင်းဟာ အမှန်ဆိုတာ သေချာသွားခဲ့ပါတယ်။ ကျွန်တော်ရေးခဲ့ဖူးသလိုပါပဲ။ ဒီလိုမျိုး အပြောင်းအလဲတွေ ရှိလာနိုင်တဲ့အကြောင်း The VOICE က ရေးကတည်းက ဒီသတင်းဟာ ဘယ်ကမှ ထွက်တာမဟုတ်ဘူး။ ဒီရပ်ဝန်းကပဲ၊ ဒီအသိုင်းအ၀န်းကပဲ ထွက်တာဆိုတာကိုပေါ့။ ကိုယ့်တာ ကိုယ်လုံအောင် မကာနိုင်ဘဲ ထွက်လာတဲ့ သတင်းကို လိုက်ပိတ်နေတာမျိုးကတော့ သိပ်တော့ မဟန်ဘူးထင်ပါတယ်ဗျာ။ ထားပါတော့.... အဲဒါကလည်း ပြီးသွားပြီပဲ။ ကျွန်တော်ကတော့ အခုအချိန်မှာ အလုပ်ချင်ဆုံး အလုပ်တစ်ခုကို ပြောပါဆိုရင် The VOICE ဂျာနယ်ရုံးခန်းထဲမှာ သွားထိုင်ပြီး အယ်ဒီတာတွေ၊ သတင်းထောက်တွေရဲ့ မျက်နှာတွေကို ထိုင်ကြည့်ချင်တာပါဗျာ။ ကဲ... လိုရင်းက ဒါမဟုတ်တော့ ဒီမှာပဲ ရပ်ပါမယ်။ ပြည်ထောင်စုဝန်ကြီးတွေကိုလည်း ၀န်ကြီးဌာနတွေ ပြောင်းလဲပြီး တာဝန်တွေ ပေးလိုက်ပြီပဲ။ သူတို့တွေ ဘယ်လိုဆက်လုပ်ကြမလဲဆိုတာ စောင့်ကြည့်ကြရမှာပေါ့။

(ခ)

လူတစ်ယောက်နဲ့တစ်ယောက်ဟာ ခံယူချက်ချင်း၊ မူဝါဒချင်း၊ အတွေးအမြင်ချင်း၊ သဘောထားချင်း မတူဘူးဆိုတာ အားလုံးအသိ ဖြစ်ပါတယ်။ သူများတွေကို မကြည့်ပါနဲ့။ ကိုယ့်ဘာသာကိုယ်ပဲ ကျွန်တော်တို့တွေ ပြန်မေးကြည့်ရအောင်ပါ။ မနေ့က ဒီလိုတွေးပေမယ့် ဒီနေ့တော့ ဟိုလိုတွေးမိချင် တွေးမိနိုင်တာမျိုးကိုး။ ကိုယ့်ဘာသာကိုယ်တောင် အချိန်နဲ့အမျှ ပြောင်းလဲနေတာ ဖြစ်တဲ့အတွက် သူများတွေလည်း ထို့အတူပဲဆိုတာ ဗေဒင်မေးစရာ မလိုပါဘူးဗျာ။ ကျွန်တော်ပြောချင်တာက ပြည်ထောင်စုဝန်ကြီးတွေ အပြောင်းအလဲဆိုတာဟာ အဲဒီဝန်ကြီးဆိုတဲ့ လူတွေပြောင်းလဲသွားခြင်း သက်သက်သာ မဟုတ်ဘူးဆိုတာကိုပါ။ လူတွေပြောင်းသွားတာ ဖြစ်တဲ့အတွက် မူတွေလည်း လိုက်ပြောင်းတော့မယ်။ သဘောထားတွေလည်း ပြောင်းတော့မယ်။ လုပ်နည်းလုပ်ဟန်တွေလည်း ပြောင်းတော့မယ်။ ဘေးကနေ ရပ်ကြည့်နေတဲ့ ကျွန်တော်တို့လို သာမန်ပွဲကြည့် ပရိသတ်တွေအတွက် သိသိသာသာကြီး အကျိုးသက်ရောက်မှု ရှိချင်မှ ရှိပါလိမ့်မယ်။ ၀န်ကြီးဌာနတွေ၊ အဲဒီလူတွေနဲ့ ထိတွေ့ဆက်ဆံ အလုပ်လုပ်နေတဲ့ လူတွေအဖို့တော့ တကယ့်ကို စိတ်ဝင်စားစရာ၊ စိတ်လှုပ်ရှားစရာပေါ့ဗျာ။ ကျွန်တော်တို့မှာ ဒီမိုကရေစီခေတ်ကိုသာ ရောက်နေပြီလို့ ဆိုရတယ်။ ၀န်ကြီးတစ်ပါးရဲ့ ပါးစပ်ကထွက်တဲ့ စကားတစ်ခွန်းကလည်း လူနေမှုဘ၀တွေကို ပြောင်းလဲစေနိုင်တာမျိုး ဖြစ်နေသေးတာကိုး။ ဒီဝန်ကြီးဌာနနဲ့ ပတ်သက်ဆက်ဆံပြီး ဒီအလုပ်လုပ်ချင်ရင် ဒီလိုတွေ၊ ဒီလိုတွေ လုပ်ရတယ်ဆိုတဲ့ ပုံသေကားချ သမားရိုးကျ လုပ်ငန်းစဉ်ကိုသာ လုပ်ရမယ်ဆိုရင်တော့ ဘယ်သူပဲ ၀န်ကြီးတက်လုပ်လုပ် ဘာအရေးတုန်းဗျ။ အခုဟာက ၀န်ကြီးတစ်ပါးက ဒီမူဆိုရင် အခြားတစ်ယောက်က အခြားမူ ရှိနေသေးတာကိုး။ ဒီဝန်ကြီးတုန်းက ဒီလိုလုပ်ဖို့ လိုပါတယ်ဆိုတဲ့ မူကလည်း နောက်ဝန်ကြီးကျရင် လိုချင်မှ လိုတော့တာကိုးဗျ။ တစ်နည်းအားဖြင့် ပြည်ထောင်စုဝန်ကြီးတွေရဲ့ အပြောင်းအလဲဟာ နိုင်ငံအတွက်၊ အတိုင်းအတာ တစ်ခုအထိသော ပြည်သူတွေအတွက်လည်း အထိုက်အလျောက်တော့ သက်ဆိုင်နေတာ အမှန်ပါပဲ။ အခုပြောင်းလဲလိုက်တဲ့ ၀န်ကြီးဌာနနဲ့ ၀န်ကြီးတွေဆိုရင်လည်း ပြည်သူတွေအတွက် တကယ့်ကို အရေးပါတဲ့ ၀န်ကြီးဌာနတွေ အများကြီးပါနေပါတယ်။ အဲဒီတော့ လူတွေတော့ ပြောင်းပြီ၊ မူတွေရော ဘယ်လို ပြောင်းမလဲဆိုတာသာ ကျွန်တော်တို့ စောင့်ကြည့်ရမှာပေါ့ဗျာ။

( ဂ)

ပြည်ထောင်စုဝန်ကြီးတွေ အပြောင်းအလဲအရ ဖြစ်ပေါ်လာတာတွေထဲမှာ လတ်တလော စိတ်ဝင်စားစရာ အကောင်းဆုံးကတော့ သမ္မတရုံးဝန်ကြီးဌာနပါပဲ။ ဘာကြောင့်တွေ၊ ဘာတွေဆိုတာ မပြောခင် အခုဖြစ်သွားတဲ့ သမ္မတရုံးဝန်ကြီးဌာနရဲ့ ပြည်ထောင်စုဝန်ကြီးတွေကို ကြည့်ရအောင်ပါ။

(၁) ဦးသိန်းညွန့်

(၂) ဦးစိုးမောင်

(၃) ဦးစိုးသိန်း

(၄) ဦးအောင်မင်း

(၅) ဦးလှထွန်း

(၆) ဦးတင်နိုင်သိန်း

ကဲ... အဲဒီ ၆ ဦးဟာ သမ္မတရုံးဝန်ကြီးဌာန ပြည်ထောင်စုဝန်ကြီးတွေ ဖြစ်ကြပါတယ်ဗျာ။ သမ္မတရုံးဟာ ၀န်ကြီး ၆ ဦးခန့်ရလောက်အောင် လိုအပ်သလားဆိုတာ စဉ်းစားစရာပါ။ လွှတ်တော်တွေက အဲဒီအချက်ကို မေးခွန်း မေးမြန်းသင့်ပါတယ်။ ဒါက ပထမအချက်ပါ။ ဒုတိယအချက်က သမ္မတရုံးဝန်ကြီးဌာနဟာ ၀န်ကြီးများဒုက္ခသည်စခန်းလား ဆိုတဲ့အချက်ပါ။ ကျွန်တော်သိသလောက်ကတော့ သမ္မတရုံးဝန်ကြီးဌာနအတွက် ၀န်ကြီး ၂ ဦးဆိုရင် လုံလောက်ပါတယ်။ သမ္မတကြီးရဲ့ သွားနေတဲ့ မူဝါဒတွေနဲ့ မကိုက်ညီသူတွေ၊ ကိုယ့်သဘောနဲ့ကိုယ် ထင်ရာစိုင်းနေတဲ့ ပြည်ထောင်စုဝန်ကြီးတွေကို တာဝန်ကနေ ရပ်စဲပြီး အနားယူခိုင်းဖို့အတွက် သူတို့ရဲ့ ဂုဏ်သိက္ခာကိုငဲ့ပြီး၊ မျက်နှာတွေကိုထောက်ပြီး သမ္မတရုံးဝန်ကြီးဌာနကို ဒုက္ခသည်စခန်း ဖွင့်လိုက်တယ်လို့ပဲ ကျွန်တော်ကမြင်ပါတယ်။ အကြောင်းပြချက်ကတော့ ယခင်စက်မှုဝန်ကြီး ဦးကျော်စွာခိုင်ကိုလည်း ကျန်းမာရေးအရ အနားမယူခင် ၀န်ကြီးအဖြစ်က မထုတ်ပယ်ချင်တဲ့အတွက် သမ္မတရုံးဝန်ကြီးဌာန ပြည်ထောင်စုဝန်ကြီးအဖြစ် ခန့်အပ်ခဲ့ဖူးလို့ပါ။ ဦးကျော်စွာခိုင်ဟာ သမ္မတရုံးနဲ့ ပတ်သက်တဲ့အလုပ် ဘာတွေများ လုပ်ခဲ့သလဲဆိုတာ သိတဲ့လူတွေက ဖြေပေးစေချင်ပါတယ်။ ကျွန်တော်ကတော့ ဘာမျှလုပ်ခဲ့တယ်လို့ မကြားမသိမိပါဘူး။ လူတွေအများစုက ဦးစိုးသိန်းတို့၊ ဦးအောင်မင်းတို့ကို ပြုပြင်ပြောင်းလဲရေး သမားကြီးတွေလို့ တံဆိပ်ကပ်ကြပါတယ်။ အခြားအကြောင်းတွေ ကျွန်တော်မသိပါ။ မဝေဖန်လိုပါ။ သို့သော် ရန်ကုန်မြို့သို့ရောက်တိုင်း အဆိုပါဝန်ကြီးနှစ်ပါးကို မေတ္တာတွေ အခါခါပို့မိတာတော့ အမှန်ပါပဲ။ သူတို့ရိုက်ချက် ဘယ်လောက်ပြင်းတယ်ဆိုတာ ရန်ကုန်မှာနေတဲ့လူတွေက ပိုသိပါတယ်။ အဲလောက်ပဲ ပြောချင်ပါတယ်။ ဦးစိုးသိန်းအကြောင်း သိချင်ရင်တော့ စက်မှုဝန်ကြီးဌာနက ၀န်ထမ်းတွေကိုသာ နီးစပ်ရာအချင်းချင်း လက်တို့ပြီး မေးကြည့်စေချင်ပါတယ်။ မဆိုးတော့လည်း မဆိုးပါဘူး။ သမ္မတရုံးဝန်ကြီးရာထူး ပေးထားပြီး ငြိမ်းချမ်းရေးကိစ္စတွေမှာ ဟိုစပ်စပ် ဒီစပ်စပ် လုပ်ခိုင်းလိုက်ရင်လည်း အလုပ်လက်မဲ့တော့ မဖြစ်ပါဘူး။ ဒါမှမဟုတ် ပြည်တွင်းငြိမ်းချမ်းရေးနှင့် ဖွံ့ဖြိုးတိုးတက်ရေးဝန်ကြီးဌာနဆိုပြီး ၀န်ကြီးဌာနအသစ်တစ်ခု ဖွဲ့ပေးပြီး သူတို့ကို တာဝန်ပေးရင်လည်း အဆင်ပြေမယ်ထင်ပါတယ်။ လိုရင်းကိုပြောရရင် သမ္မတရုံးဝန်ကြီးဌာနမှာ ပြည်ထောင်စုဝန်ကြီး ၆ ဦးခန့်ထားတာကို ကျွန်တော်ကိုဉာဏ် လုံးဝ (လုံးဝ) ကန့်ကွက်ပါတယ်။ နောက်လူတွေအတွက် အတုယူမှားစေမယ့် အစဉ်အလာတွေကို အစမပျိုးခဲ့ပါနဲ့ သမ္မတကြီးခင်ဗျား။ သမ္မတကြီးရဲ့ သွားနေတဲ့လမ်းကြောင်းမှာ ကန့်လန့်ခံနေတဲ့ လူတွေကို ကားပေါ်ဆွဲမတင်ပါနဲ့။ ရဲရဲဝံ့ဝံ့ပဲ လမ်းဘေးကို ကန်ချခဲ့ပါ။ ကန့်လန့်ခံနေတဲ့ လူတိုင်းကိုသာ ကားပေါ်ဆွဲတင်ပြီး ခရီးဆက်နေရင်တော့ ၀န်လေးပြီး ခရီးတွင်မှာ မဟုတ်ပါဘူး လေးစားအပ်တဲ့ သမ္မတကြီးခင်ဗျား။

(ဃ)

ပြည်ထောင်စုဝန်ကြီးတွေကို ဌာနတွေ ပြောင်းလဲတာဝန်ပေးလိုက်ပြီးဆိုတဲ့ သတင်းကို ဖတ်ရတဲ့အချိန်မှာ ကျွန်တော်ကိုဉာဏ် လုပ်ရတဲ့ အလုပ်တစ်ခုကတော့ ၀န်ကြီးဌာနတွေကို ပြန်စဉ်ပြီး စိစစ်ရတာပါပဲ။ ဘယ်သူတွေက ဘယ်ကိုချိန်းတယ်၊ ဘယ်သူတွေက ဘယ်ကိုရောက်တယ် စသဖြင့် စိစစ်ပြီးတဲ့အချိန်မှာတော့  ပြည်ထောင်စုဝန်ကြီးတွေ မရှိတဲ့ ၀န်ကြီးဌာနတွေ အောက်ပါအတိုင်း ထွက်လာပါတယ်ခင်ဗျာ -

(၁) ဘဏ္ဍာရေးနှင့်အခွန်ဝန်ကြီးဌာန

(၂) အမျိုးသားစီမံကိန်းနှင့်စီပွားရေးဖွံ့ဖြိုးတိုးတက်မှုဝန်ကြီးဌာန

(၃) လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန

(၄) အလုပ်သမားဝန်ကြီးဌာန

(၅) ဟိုတယ်နှင့်ခရီးသွားလာရေးဝန်ကြီးဌာန

(၆) ရထားပို့ဆောင်ရေးဝန်ကြီးဌာန

(၇) ယဉ်ကျေးမှုဝန်ကြီးဌာန

(၈) သိပ္ပံနှင့်နည်းပညာဝန်ကြီးဌာန

(င)

ဝန်ကြီးမရှိတဲ့ ဌာနတွေအတွက် ပြည်ထောင်စုဝန်ကြီးအသစ်တွေ ခန့်အပ်ဖို့အတွက် သမ္မတဟာ ပြည်ထောင်စုလွှတ်တော်ကို အမည်စာရင်း ပေးပို့ပါလိမ့်မယ်။ လက်ရှိဝန်ကြီးတွေကို ၀န်ကြီးဌာနတွေ ပြောင်းလဲပြီးပြီ ဖြစ်တဲ့အတွက် သေချာတာကတော့ အခုခန့်မယ့် ၀န်ကြီးတွေဟာ ပြည်ထောင်စုဝန်ကြီး အသစ်စက်စက်တွေပါ။ ဆိုလိုတာက လက်ရှိဝန်ကြီးတွေထဲကနေ လွတ်နေတဲ့ ၀န်ကြီးဌာနတွေမှာ တာဝန်ယူရမယ့်လူ မရှိတော့ဘူးဆိုတာပါ။ သမ္မတက ပြည်ထောင်စုလွှတ်တော်ကို အမည်စာရင်းပေးပို့ပြီး လွှတ်တော်က ကန့်ကွက်စရာ မရှိရင် ၀န်ကြီးတွေအဖြစ် ခန့်အပ်ပါလိမ့်မယ်။ ဘယ်သူတွေ ဖြစ်လာနိုင်တယ်ဆိုတာ စိတ်ဝင်စားစရာပါ။ ဘာကြောင့်လဲဆိုတဲ့ ကျွန်တော့်အတွေးတွေကို အောက်မှာ ဖော်ပြထားပါတယ်။

(စ)

ကျွန်တော်စိတ်အ၀င်စားဆုံးကတော့ အခု ပြန်ကြားရေးဝန်ကြီးအဖြစ် တာဝန်ယူနေရပြီဖြစ်တဲ့ ဦးအောင်ကြည် ယခင်က တာဝန်ယူခဲ့ရတဲ့ အလုပ်သမားဝန်ကြီးဌာနနဲ့ လူ/ကယ်/ပြန် ၀န်ကြီးဌာန နှစ်ခုတွဲပြီး တာဝန်ယူရတဲ့ ရာထူးနေရာပါ။ ကျွန်တော့်အတွေးအရဆိုရင် အဲဒီနေရာကို ခန့်အပ်ဖို့အတွက် အသင့်လျော်ဆုံး ပုဂ္ဂိုလ်ကတော့ ဒေါ်အောင်ဆန်းစုကြည်ပါပဲ။ ဒါမှလည်း သူဘယ်လောက် အလုပ်လုပ်နိုင်သလဲဆိုတာ ကျွန်တော်တို့ သိခွင့်ရမှာ ဖြစ်ပါတယ်။ ပြီးတော့ သူလုပ်ရင်လုပ်သလောက် မြန်မာပြည်သူတွေ အကျိုးခံစားရမယ့် ရာထူးနေရာဖြစ်ပါတယ်။ နိုင်ငံတကာနဲ့ ဆက်ဆံပြီး အလုပ်လုပ်ရတဲ့ နေရာလည်း ဖြစ်နေပါတယ်။ အတော်ကြီးကို စိတ်ဝင်စားဖို့ကောင်းတဲ့ ရာထူးနေရာပါပဲဗျာ။ ပြည်ထောင်စုဝန်ကြီးအတွက် ပြည့်စုံရမယ့် အရည်အချင်းတွေကို ဖတ်ကြည့်တော့လည်း ဒေါ်အောင်ဆန်းစုကြည်အတွက် ငြိလောက်တဲ့အချက် မတွေ့ရပါဘူး။ နိုင်ငံတကာကလည်း လုပ်စေချင်၊ နိုင်ငံအတွက်လည်း မျက်နှာပန်းလှစေမယ့် ကိစ္စမို့ ကျွန်တော်ကတော့ ကိုယ့်ဘာသာကိုယ် တွေးရင်းနဲ့တောင် ပြုံးနေမိပါသေးသဗျာ။ စာဖတ်သူတွေကလည်း ကျွန်တော်ကိုဉာဏ်ကို မပြုံးကြပါနဲ့ဗျ။ ဘယ်လိုဖြစ်တာလဲလို့လည်း အငေါ်မတူးကြပါနဲ့။ သမ္မတကြီးက ပြောထားတယ်မဟုတ်လား။ မတူတာတွေ ဘေးဖယ်ထားပြီး တူတာတွေမှာ လက်တွဲလုပ်ရမယ်တဲ့။ အခုအချိန်မှာ အရေးအကြီးဆုံးက ကျွန်တော်တို့ရဲ့ စိတ်ခံစားချက်တွေ၊ အတ္တတွေမဟုတ်ဘူးခင်ဗျ၊ နိုင်ငံအမြန်ဆုံး ဖွံ့ဖြိုးတိုးတက်ဖို့၊ အလုပ်အကိုင် အခွင့်အလမ်းတွေ ပေါများလာဖို့၊ နိုင်ငံမှာ အလုပ်လက်မဲ့ဦးရေ အနည်းဆုံး ဖြစ်စေဖို့၊ လူတိုင်း သင့်တင့်တဲ့ ၀င်ငွေရရှိစေဖို့၊ စတဲ့စတဲ့ အချက်တွေဖြစ်တယ်ဗျာ။ ကျွန်တော်တို့နိုင်ငံကို ဒုက္ခသည်နိုင်ငံတစ်ခုလို ကမ္ဘာက ဆက်ဆံနေကြတာကို မြင်တွေ့ကြားသိနေရတိုင်း ကျွန်တော် မခံစားနိုင်ဘူးဗျ။ အဲဒါကြောင့်ပါ။

(ဆ)

နောက်ထပ်တစ်ခုကတော့ လစ်လပ်နေတဲ့ ၀န်ကြီးဌာနတွေနေရာမှာ ပညာရှင်တွေ ၀င်လာမယ်လို့ ကျွန်တော်တွေးနေမိတာပါပဲ။ ဥပမာအားဖြင့် အမျိုးသားစီမံကိန်းနှင့် စီးပွားရေးဖွံ့ဖြိုးတိုးတက်မှုဝန်ကြီးဌာနတို့၊ ဘဏ္ဍာရေးနှင့်အခွန်ဝန်ကြီးဌာနတို့၊ သိပ္ပံနှင့်နည်းပညာ ၀န်ကြီးဌာနတို့ဟာ တကယ့်ပညာရှင်တွေကို ခန့်အပ်တာဝန်ပေးပြီး ဆောင်ရွက်စေသင့်တဲ့ ဌာနတွေဖြစ်ပါတယ်။ လူတော်တွေ အဲဒီဌာနတွေကို ရောက်လာပါစေလို့ပဲ ဆန္ဒပြုမိပါတယ်။ စောင့်ကြည့်ကြတာပေါ့ခင်ဗျာ။

(ဇ)

လူတွေကတော့ ပြောင်းလဲခဲ့ပါပြီ။ တိုင်းပြည်အတွက်၊ လူထုအတွက်၊ သမိုင်းအတွက် ကောင်းမွန်မှုတွေ ဖန်တီးနိုင်ဖို့၊ အမွေပေးခဲ့နိုင်ဖို့ မူတွေလည်း ပြောင်းကြစေချင်ပါတယ်။ အခုအပြောင်းအလဲဟာ တိုင်းပြည်အတွက် ပိုမိုအဖိုးတန်တဲ့ နေရာတစ်ခုကိုရောက်အောင် တွန်းတင်ပေးနိုင်တဲ့ အားအင်တစ်ခု ဖြစ်ပါစေလို့ပဲ ဆန္ဒပြုရင်း .................။

အမှတ်တရ

ကိုဉာဏ် (ပန်းလောင်မြေ)

၂၀၁၂ ခုနှစ်၊ သြဂုတ်လ ၂၈ ရက်၊ အင်္ဂါနေ့။

မွန်းလွဲ ၁ နာရီ ၃၁ မိနစ်တွင်ပြီး၏။