လုပ်ချင်တဲ့အလုပ်ကို လုပ်ချင်စိတ်ပေါ်တဲ့အချိန်မှာ လုပ်ခွင့်မရှိခြင်းဟာလည်း ဆင်းရဲခြင်းတစ်မျိုးဆိုတာ တွေးမိတယ်။ အခုရက်ပိုင်း အချိန်အခက်အခဲကြောင့် တင်ချင်တဲ့ပို့စ်တွေ မတင်နိုင်ဘူး၊ စာတွေဖတ်ပြီး သဘောကျတဲ့ဟာတွေ ပြန်ဝေမျှချင်တာ အခွင့်မသာခဲ့ဘူး၊ ရေးချင်တဲ့စာတွေ မရေးနိုင်ခဲ့ဘူး။ စိတ်သွားတိုင်း ကိုယ်မပါနိုင်ဘူးဆိုတာ ဒါမျိုးထင်ပါရဲ့။ ဖြစ်ချင်တော့ အခုရက်ပိုင်းအတွင်း ဖြစ်ပျက်ခဲ့တဲ့ အဖြစ်အပျက်တွေကလည်း များမှများ။ အခုရေးမယ့် အကြောင်းအရာတွေကလည်း အထူးအဆန်းတော့ မဟုတ်ပါလေ။ မိတ်ဆွေတွေအားလုံး သိပြီးကြားပြီး နိုင်ငံတကာသတင်းတွေရယ်ပါ။ ကျွန်တော့်အနေနဲ့ မှတ်တမ်းတစ်ခုအနေနဲ့ ပြန်လည်ရေးသားလိုရင်းက အဓိကပါ။
အက်(ဒ်)၀ပ်စနိုဒန် (သို့မဟုတ်) အိုဘားမားကို မျက်နှာပျက်စေခဲ့သူ
အမေရိကန်ထောက်လှမ်းရေးအဖွဲ့အစည်းတွေရဲ့ လုပ်ငန်းဆိုင်ရာ လျှို့ဝှက်ချက်တွေကို ဖွင့်ထုတ်ခဲ့တဲ့ စနိုဒန်ဆိုတဲ့ လူငယ်တစ်ဦးအကြောင်းက အခုအချိန်ထိ ပြောမဆုံးပေါင် ဖြစ်နေရတုန်းပါပဲ။ တစ်ချိန်က အမေရိကန် အမျိုးသားလုံခြုံရေးအေဂျင်စီ(NSA)ရဲ့ ကန်ထရိုက်တာနဲ့ စီအိုင်အေ၀န်ထမ်းအဖြစ် တာဝန်ထမ်းဆောင်ခဲ့ဖူးတဲ့ စနိုဒန်က အမေရိကန်အစိုးရရဲ့ လျှို့ဝှက်ထောက်လှမ်းရေး အစီအစဉ်တွေနဲ့ ပတ်သက်ပြီး ဖော်ထုတ်ခဲ့တာမို့ အိုဘားမားအစိုးရအတွက် မျက်နှာပျက်စရာ ဖြစ်ခဲ့ရပါတယ်။ အမေရိကန်နိုင်ငံသားတွေ အပါအ၀င် ပြည်ပနိုင်ငံသားတွေရဲ့ ဖုန်းပြောဆိုမှုတွေ၊ အင်တာနက်အသုံးပြုမှုတွေကို တိတ်တဆိတ် ကြားဖြတ်ခိုးယူပြီး အချက်အလက်တွေ စုဆောင်းခဲ့တဲ့ အမေရိကန်အစိုးရရဲ့ လုပ်ရပ်ဟာ စနိုဒန်ကြောင့် ဘူးပေါ်သလို ပေါ်သွားခဲ့ရပါတယ်။ တာဝန်ရှိသူတွေကတော့ အဲဒီလို လျှို့ဝှက်ထောက်လှမ်းခဲ့တဲ့ အစီအစဉ်တွေကြောင့် အကြမ်းဖက်မှု အချို့ကို ကြိုတင်တားဆီးနိုင်ခဲ့တယ်လို့ အကြောင်းပြခဲ့ပါတယ်။ ဒါပေမယ့် ဝေဖန်သူတွေနဲ့ ကန့်ကွက်သူတွေကတော့ အဲဒီလို ကြိုတင်တားဆီးနိုင်ခဲ့တယ်ဆိုတာ ပြောပလောက်တဲ့ ပမာဏမဟုတ်သလို၊ အချက်အလက် ခိုင်မာမှုလည်း မရှိဘူးလို့ ပြောဆိုကြပါတယ်။ စနိုဒန် နောက်ဆုံးမွှေးခဲ့တဲ့ မီးပွားကတော့ အမေရိကန်အစိုးရအနေနဲ့ ဥရောပသမဂ္ဂဌာနချုပ်နဲ့ အမေရိကန် ပြည်ထောင်စုမှာရှိတဲ့ ဥရောပသမဂ္ဂရုံးတွေကို ပစ်မှတ်ထားပြီး အချက်အလက်တွေ လျှို့ဝှက်စုဆောင်းတာ လုပ်ခဲ့တယ်ဆိုတာပါပဲ။ အဲဒီဖွင့်ထုတ်မှုကြောင့် အမေရိကန်နဲ့ အီးယူနိုင်ငံတွေအကြား ဆက်ဆံရေးအက်ကြောင်း ဖြစ်ခဲ့ရပါတယ်။ အိုဘားမားအနေနဲ့လည်း အီးယူခေါင်းဆောင်တွေရဲ့ ယုံကြည်မှုကို ဆုံးရှုံးခဲ့ရပါတယ်။ စနိုဒန်အနေနဲ့ သူ့ရဲ့ဖွင့်ထုတ်မှုတွေကို ဂါးဒီးယန်းသတင်းစာမှာ ဖော်ပြခြင်းမပြုမီ မေလကတည်းက ဟောင်ကောင်ကို ထွက်ခွာသွားခဲ့ပါတယ်။ နောက်တော့ ဟောင်ကောင်ကနေ ရုရှားနိုင်ငံကို လေကြောင်းခရီးနဲ့ ထွက်ခွာခဲ့ပြီး မော်စကိုမြို့က လေဆိပ်တစ်ခုရဲ့ transit ဧရိယာမှာ သောင်တင်နေခဲ့ပါတယ်။ အဲဒီနောက် စနိုဒန်အနေနဲ့ နိုင်ငံပေါင်း ၂၀ ကျော်ထံကို နိုင်ငံရေးခိုလှုံခွင့်ပေးဖို့ တောင်းဆိုခဲ့ပါတယ်။ အချို့နိုင်ငံတွေက ပြတ်ပြတ်သားသား ငြင်းဆန်ခဲ့ကြသလို အချို့ကလည်း စဉ်းစားမှုတွေ ပြုလုပ်လျက်ရှိကြပါတယ်။ ရုရှားသမ္မတ ဗလာဒီမာပူတင်ကတော့ စနိုဒန်အနေနဲ့ လျှို့ဝှက်အချက်အလက်တွေ ဖွင့်ထုတ်တာကို ရပ်ဆိုင်းမယ်ဆိုရင် ရုရှားနိုင်ငံမှာ ဆန္ဒရှိသရွေ့ နေနိုင်ကြောင်း ပြောကြားခဲ့ပါတယ်။ အခုနောက်ဆုံး ဗင်နီဇွဲလားနိုင်ငံကလည်း စနိုဒန်ကို နိုင်ငံရေးခိုလှုံခွင့်ပေးဖို့ ဆုံးဖြတ်ခဲ့ပါတယ်။ စနိုဒန်အနေနဲ့ အမေရိကန်အစိုးရရဲ့ ဘယ်လိုလျှို့ဝှက်ချက်တွေကို ဆက်လက်ဖွင့်ချသွားမလဲဆိုတာ စိတ်ဝင်စားစရာပါ။ အမေရိကန်အနေနဲ့လည်း စနိုဒန်အရေးကို ဘယ်လိုကိုင်တွယ်မလဲဆိုတာ စောင့်ကြည့်ရမှာပါ။ အခုလောလောဆယ်တော့ အက်(ဒ်)၀ပ်စနိုဒန်ဟာ ပေါ်ပြူလာအဖြစ်ဆုံး သတင်းလူသား ဖြစ်နေဆဲပါပဲ။ စနိုဒန်ဆိုတဲ့ ငှက်ကလေး ဘယ်နိုင်ငံမှာ ခိုနားမလဲ ဆိုတာကတော့.......။
အာရပ်နွေဦး တိမ်ဖုံးချိန်
အီဂျစ်နိုင်ငံမှာ သမ္မတမော်စီကို ရာထူးကဖယ်ရှားလိုက်ပြီး စစ်တပ်က အာဏာသိမ်းခဲ့ပါတယ်။ သမ္မတမော်စီအစိုးရနဲ့ မွတ်စလင်ဘရားသားဟုဒ်ကို မကျေနပ်တဲ့ ဆန္ဒပြမှုတွေ တိုးပွားလာမှုအပေါ် ပြေလည်အောင် ဖြေရှင်းဖို့အတွက် စစ်တပ်က သမ္မတမော်စီကို ၄၈ နာရီ အချိန်ရမယ်လို့ ရာဇသံပေးခဲ့တာပါ။ အဲဒီရာဇသံကို မော်စီက လက်မခံဘဲ ပယ်ချခဲ့ပြီး နိုင်ငံတွင်းအခြေအနေတွေကို သူ့နည်းသူဟန်နဲ့သူ ဖြေရှင်းမယ်လို့ တုံ့ပြန်ခဲ့ပါတယ်။ ဒါပေမယ့် နိုင်ငံအတွင်း ဆန္ဒပြမှုတွေကတော့ လျော့မသွားခဲ့ပါဘူး။ အီဂျစ်စစ်တပ်ကလည်း သူတို့ပေးထားတဲ့ အချိန်ပြည့်တဲ့ရက်မှာပဲ မော်စီကို ရာထူးကနေဖယ်ရှားပြီး ဖွဲ့စည်းပုံအခြေခံဥပဒေဆိုင်ရာ တရားရုံးရဲ့ အကြီးအကဲကို ကြားဖြတ်သမ္မတအဖြစ် ခန့်အပ်ခဲ့ပါတယ်။ သမ္မတမော်စီနဲ့ အစိုးရခေါင်းဆောင် အချို့ကိုတော့ ဖမ်းဆီးထိန်းသိမ်းခဲ့ပါတယ်။ ဘန်ကီမွန်းအပါအ၀င် နိုင်ငံတကာခေါင်းဆောင်တွေက အီဂျစ်မှာ စစ်တပ်က အာဏာသိမ်းမှု ပြုလုပ်ခဲ့တာနဲ့ ပတ်သက်ပြီး စိုးရိမ်စကား ပြောကြားခဲ့ကြပါတယ်။ မိုဟာမက်မော်စီဟာ အီဂျစ်ပြည်သူတွေက ဒီမိုကရေစီနည်းကျ ရွေးကောက်တင်မြှောက်ထားတဲ့ ပထမဆုံး ရွေးကောက်ခံသမ္မတ ဖြစ်တဲ့အကြောင်း အဓိကထား ပြောဆိုကြပါတယ်။ ဒါပေမယ့် ဘယ်နိုင်ငံကမျှ အီဂျစ်စစ်တပ်ရဲ့ အာဏာသိမ်းမှုဟာ မှားယွင်းကြောင်း ပြစ်တင်ဝေဖန်မှု မပြုကြပါဘူး။ မော်စီကို သမ္မတရာထူးက ဖြုတ်ချပြီး စစ်တပ်က အာဏာသိမ်းခဲ့တဲ့နေ့မှာ အီဂျစ်နိုင်ငံတစ်ဝန်း အောင်ပွဲခံမှုတွေ ပြုလုပ်ခဲ့ပါတယ်။ ယခုအခါ မော်စီကို စစ်တန်းလျားတစ်ခုမှာ ဖမ်းဆီးထိန်းသိမ်းထားတယ်လို့ သိရပါတယ်။ မော်စီနဲ့ မွတ်စလင်ဘရားသားဟုဒ်ကို ထောက်ခံသူတွေနဲ့ ဆန့်ကျင်ကန့်ကွက်သူတွေအကြား အပြန်အလှန် တိုက်ခိုက်မှုတွေ ဖြစ်ပွားနေပါတယ်။ ရွေးကောက်ခံ သမ္မတတစ်ဦးကို ရာထူးကဖယ်ရှားပြီး စစ်တပ်က အာဏာသိမ်းတာဟာ ဒီမိုကရေစီ ရှုထောင့်အရ၊ စံနှုန်းအရဆိုရင်တော့ မကောင်းဘူးပေါ့ဗျာ။ သို့သော် အီဂျစ်နိုင်ငံတွင်းမှာ ဖြစ်ပွားနေတဲ့ အခြေအနေတွေဟာ သာမန်ကောက်ချက်ချရုံနဲ့ မလုံလောက်ပါဘူး၊ အပေါ်ယံသုံးသပ်ရုံနဲ့ နားမလည်နိုင်ပါဘူး။ အီဂျစ်စစ်တပ်ဟာ သမိုင်းစဉ်တစ်လျှောက်လုံး အီဂျစ်နိုင်ငံရေးမှာ ပါလာခဲ့တယ်ဆိုတာ ပြန်လေ့လာကြစေလိုပါတယ်။ အခုဖြစ်စဉ်မှာလည်း စစ်တပ်က အာဏာသိမ်းတာထက် မော်စီဆက်ရှိနေရင် ဖြစ်ပေါ်လာမယ့် ပဋိပက္ခနဲ့ မီးပွားက ပိုကြီးနေပြီး စိုးရိမ်စရာ ကောင်းနေတာမို့ ရှုထောင့်နှစ်ခုကြား အားပြိုင်နေကြဆဲပါ။ နိုင်ငံ့အနာဂတ်နဲ့ ဒီမိုကရေစီစံနှုန်း နှစ်ခုအနက် အီဂျစ်စစ်တပ် ရွေးချယ်သွားခဲ့တာက အမှန်တရားလား ဆိုတာကတော့ စောင့်ကြည့်ဖို့လိုပါဦးမယ်...။
ဗုဒ္ဓဂယာနှင့် ခေတ်သစ်မာရ်နတ်များ
ဗုဒ္ဓဘာသာဝင်တို့ အထွတ်အမြတ်ထားရာ၊ အလေးအမြတ်ပြုရာ နေရာတစ်ခုဖြစ်တဲ့၊ ကမ္ဘာ့အမွေအနှစ် နေရာအဖြစ် အသိအမှတ်ပြုထားတဲ့ ဗုဒ္ဓဂယာမှာ ဇူလိုင်လ ၇ ရက်နေ့က ဖြစ်ပွားခဲ့တဲ့ ဗုံးပေါက်ကွဲမှုတွေကြောင့် လူအများအကြား ပြောစရာဖြစ်ခဲ့ရပါတယ်။ ဘာသာရေးတွေကို ဘေးဖယ်ထားပြီး ယဉ်ကျေးမှုအမွေအနှစ် နေရာတစ်ခု၊ သမိုင်းအမွေအနှစ် နေရာတစ်ခုအနေနဲ့ စဉ်းစားမယ်ဆိုရင်တောင် မလုပ်သင့်တဲ့ အလုပ်ဖြစ်ပါတယ်။ ကျွန်တော်က ဗုဒ္ဓဘာသာဝင်မို့ ဒီလိုပြောနေတာ မဟုတ်ပါဘူး။ ဂျေရုစလင်က အခြားဘာသာတွေရဲ့ ဘာသာရေးဆိုင်ရာ အထွတ်အမြတ်နေရာ၊ မက္ကာက ဘာသာရေးအထွတ်အမြတ်နေရာ စတဲ့စတဲ့ အခြားဘာသာတွေရဲ့ နေရာတွေမှာ အကြမ်းဖက်မှု လုပ်မယ်ဆိုရင်လည်း ဒီလိုပဲ ပြောမှာဖြစ်ပါတယ်။ အခုတော့ ဗုဒ္ဓဂယာမှာရှိတဲ့ မဟာဗောဓိညောင်ပင်တော်နဲ့ အနီးတစ်ဝိုက်မှာ ဖြစ်ပွားခဲ့တဲ့ ဗုံးပေါက်ကွဲမှုတွေကြောင့် ဗုဒ္ဓဘာသာ နိုင်ငံတွေနဲ့ အိန္ဒိယနိုင်ငံအကြား မျက်နှာပျက်စရာ ဖြစ်ခဲ့ရပါတယ်။ ဗုံးခွဲမှုနဲ့ပတ်သက်ပြီး သံသယရှိသူတွေကို ဖမ်းဆီးထားတယ် ဆိုပေမယ့် သူတို့တွေကို ဖမ်းဆီးရုံ၊ အပြစ်ပေးရုံနဲ့ အကြမ်းဖက်မှုတွေ ပပျောက်သွားမှာ မဟုတ်ပါဘူး။ ဘာသာအားလုံးက ငြိမ်းချမ်းရေးကို မျက်မှောက်ပြုနိုင်ပါမှ၊ မေတ္တာတရားကို လက်ကိုင်ထားနိုင်ပါမှ ဒီလို ဖြစ်ရပ်တွေက ကင်းလွတ်နိုင်မှာပါ။
အထွေထွေ
တူရကီမှာ ဆန္ဒပြသူတွေကို ရဲတပ်ဖွဲ့က နှိမ်နင်းတာနဲ့ပတ်သက်ပြီး မကျေလည်မှုတွေ ရှိနေဆဲ။ သြစတြေးလျဝန်ကြီးချုပ်အဖြစ် ဂျူလီယာဂီးလက်အစား ကီဗင်ရုဒ် ဖြစ်လာတယ်။ အိမ်နီးချင်း ထိုင်းနိုင်ငံမှာလည်း ရင်လပ်ရှင်နာဝပ်က ပထမဆုံးသော အမျိုးသမီး ကာကွယ်ရေးဝန်ကြီး ဖြစ်လာခဲ့တယ်။ အိုဘားမားက အာဖရိကတိုက်ခရီးစဉ် သွားခဲ့တယ်။ ထင်သလောက် မအောင်မြင်ဘူး။ ကန့်ကွက်ဆန္ဒပြမှုတွေနဲ့ ရင်ဆိုင်ခဲ့ရတယ်။ တောင်အာဖရိကခေါင်းဆောင်ဟောင်း နယ်(လ်)ဆင်မင်ဒဲလား ကျန်းမာရေးအခြေအနေ မကောင်းလှဘူး။ အိုဘားမားက သူ့ခရီးစဉ်အတွင်း မင်ဒဲလားကို ထိန်းသိမ်းထားခဲ့ဖူးတဲ့ အကျဉ်းထောင်ကို သွားရောက်လည်ပတ် ကြည့်ရှုခဲ့တယ်။ ဘရာဇီးလ်မှာ တိုက်ကြီးများ ဖလားနဲ့အပြိုင် ဆန္ဒပြပွဲတွေ ဖြစ်ပွားခဲ့တယ်။ နိုင်ဂျီးရီးယားက သတင်းက ပြန်ပြောချင်စရာတောင် မရှိဘူး။ စာသင်ကျောင်းကိုဝင်စီး၊ ကလေးသူငယ်တွေကို အရှင်လတ်လတ် မီးရှို့သတ်တဲ့ကောင်တွေ ဘ၀တိုင်း မငြိမ်းချမ်းကြပါစေနဲ့။ လူပြန်မဖြစ်ကြပါစေနဲ့။
ဘန်ကီမွန်းခမျာလည်း အီဂျစ်ကို စိတ်ပူကြောင်းပြောရ၊ မာလီအတွက် စိတ်ပူရ၊ ယူဂန်ဒါအတွက် အားပေးရ၊ ကိုရီးယားကျွန်းဆွယ်အတွက် ရတက်မအေးရ၊ အာရပ်-အစ္စရေးအတွက်လည်း မျှော်ကြည့်ရနဲ့ အတော်သနားစရာ ကောင်းပါတယ်။ ကမ္ဘာ့သတင်းတွေဖတ်ပြီး ပျော်ရွှင်ရတာမရှိဘဲ တောက်တခတ်ခတ်၊ လက်သီးတဆုပ်ဆုပ် ဖြစ်ရတဲ့ ကျွန်တော်ကိုဉာဏ်ကတော့ မနေနိုင်မထိုင်နိုင် ဟိုရေးဒီရေးနဲ့ အိပ်ရေးတွေ ပျက်ရတာ သာလို့တောင် သနားစရာကောင်းသေးတော့တယ်။
အမှတ်တရ
ကိုဉာဏ် (ပန်းလောင်မြေ)
၂၀၁၃ ခုနှစ်၊ ဇူလိုင်လ ၁၂ ရက်၊ သောကြာနေ့။
နံနက် ၀၀ နာရီ ၂၅ မိနစ်တွင်ပြီး၏။
No comments:
Post a Comment