မြင်းထိန်းငတာတွေ သိပ်များတဲ့တိုင်းပြည်

ဒီနေ့ခေတ်က Facebook ခေတ်ဆိုတော့ လူအများစုက သူတို့ရဲ့ အတွေးအမြင်တွေ၊ အတွေ့အကြုံတွေ၊ ခံစားချက်တွေ စသဖြင့် ကိုယ့်စိတ်ကူးရှိရာကို လွတ်လွတ်လပ်လပ်၊ လွယ်လွယ်ကူကူ ရေးသားကြလေ့၊ ပြန်လည်ဝေမျှကြလေ့ ရှိပါတယ်။ ကိုယ့် facebook account မှာ ကိုယ့်ဘာသာကိုယ် ရေးချင်ရာ ရေးတာဟာ ဘာပြဿနာမှ မရှိပါဘူး။ အချို့သူတွေ ပြောတတ်ကြသလို မကောင်းဘူးထင်ရင် မဖတ်နဲ့ပေါ့။ သူ့ wall ပေါ်မှာ သူရေးချင်ရာရေးမှာပေါ့။ ကျွန်တော်လည်း အဲဒီအယူအဆကို လက်ခံပါတယ်။ ကိုယ့်စာမျက်နှာမှာ ကိုယ့်ဘာသာကိုယ် ခံစားရတဲ့အတိုင်း လွတ်လပ်စွာ ရေးခွင့်လေးတော့ ရှိသင့်ပါတယ်။ ဒါပေမယ့် အများနဲ့သက်ဆိုင်တဲ့ အကြောင်းအရာတွေ၊ ပညာရပ်ပိုင်းဆိုင်ရာ အကြောင်းအရာတွေ၊ ဘာသာရေးဆိုင်ရာ အကြောင်းအရာတွေ စတာတွေမှာတော့ ကိုယ်ထင်တိုင်း မပြောသင့်တာတွေ ရှိနေတယ်လို့ မြင်မိပါတယ်။

အခုလည်း ရေးသင့်၊ မရေးသင့် အတော်ကြီးကို စဉ်းစားပြီးမှ ရေးစရာရှိတာကို ရေးပါတယ်။ လူတစ်ဦးရဲ့ ပုဂ္ဂလိကလွတ်လပ်ခွင့်အရ သူ့အတွေး၊ သူ့အမြင်နဲ့ ရေးသားထားတာကို ဝေဖန်ရတာလည်း အားနာပါတယ်။ ဒါပေမယ့် သူ့ဘာသာသူ လူမသိ၊ သူမသိ ရေးခဲ့တာဆိုရင် ကျွန်တော်ဖတ်မိစရာ မရှိသလို၊ ပြောစရာ၊ ဝေဖန်စရာလည်း မရှိပါဘူး။ အခုတော့ မူလရေးသားသူက သူ့ရဲ့ facebook မှာ သူ့ဟာသူရေးထားတာကို အခြားလူတွေက ၀ိုင်းပြီးတော့ အားပေးကြ၊ ပြန်လည်ဝေမျှကြ၊ အချို့ဆိုရင် မူလရေးတဲ့သူမပါတဲ့ ဓာတ်ပုံလေးတွေ ဖြည့်ပြီးတော့တောင် ပြန်လည်မွမ်းမံကြနဲ့ အတော်ကြီးကို မြိုင်မြိုင်ဆိုင်ဆိုင်ကြီး ရှိလာတာမို့ ကျွန်တော့်အမြင်၊ ကျွန်တော့်အတွေးနဲ့ ဝေဖန်ရေးသားရခြင်းဖြစ်ကြောင်းပါ။

မူလရေးသားသူရဲ့ Facebook စာမျက်နှာပါ။ သူရေးထားတဲ့ စတေးတပ်က ဒီလိုပါ -

လွှတ်တော်ကို နေ့တစ်ပိုင်းလာက် လေ့လာမိတာနဲ့ ဆဝါးမိတာလေး ဝေမျှ ပေးလိုက်ပါတယ်။ ဒေါ်စုကလွဲလို့ ကျန်တဲ့ လွှတ်တော် ကိုယ်စားလှယ်တွေက အေးဆေးပါ။ ဒေါ်စုကတော့ လွှတ်တော် ကျင်းပနေစဉ် breakပေးတဲ့ အချိန်မှာ ထမင်းစားရပါတယ်တဲ့။ နေ့လည် ထမင်းစားချိန်မှာ နိုင်ငံခြား သံတမန်တွေ ဧည့်သည်တွေနဲ့ တွေ့ရပါတယ်။ ကော်မတီ အစည်းအဝေးတွေ ရှိသလို NLDအမတ်တွေနဲ့လည်း အစည်းအဝေးက မပြတ်ပြုလုပ်လေ့ ရှိပါတယ်တဲ။ တာဝန်သိတော့ တာဝန်ရှိတော့ တာပေါ့။ တာဝန်ရှိတော့ မနားရတော့ဘူးပေါ့။ အသက်အရွယ်နဲ့ မလိုက် တက်တက်ကြွကြွ ဖြတ်ဖြတ်လတ်လတ်နဲ့ ဆောင်ရွက်နေတာ တွေ့ရတော့ ဒီလို ခေါင်းဆောင်မျိုး ရှိတဲ့ မြန်မာပြည် တိုးတာလာမှာ ဧကန်မလွဲပါဗျာ။ လွှတ်တော် ဝန်ထမ်းတွေကလည်း အံတီ အံတီနဲ့ အတော်လေး ကရုစိုက်ကြ တာကို တွေ့ရပါတယ်။ စိတ်ဝင်စား စရာ မကောင်းတဲ့ မေးခွန်းနဲ့ အဖြေတွေ ပြုလုပ် နေကြစဉ် တစ်ခြား လွှတ်တော် ကိုယ်စားလှယ်တွေ အိပ်ငိုက် နေကြချိန်မှာ ဒေါ်စုကတော့ လေ့လာစရာ ရှိတဲ့ စာအုပ် စာတန်းတွေကို ဖတ်မှတ်လေ့လာ နေတာကို တွေ့ရပါတယ်။ ဒေါ်စုကို ဘာဖြစ်လို့ အထင်ကြီး လေးစား အားကိုး ကြတယ်ဆိုတာကို ဖြတ်ကနဲ လေ့လာလိုက် တာနဲ့ကို သိရှိလိုက် ရပါတယ် ခင်ဗျာ။

နည်းနည်းလေး ထပ်ကညော့ပြီး သိဒ္ဓိတင်ပေးထားတာလေး နောက်တစ်ခုလောက် ဖတ်ချင်ရင်တော့ ဒီနေရာမှာ သွားဖတ်ပါ။

နောက်ထပ်တစ်ခုအနေနဲ့ ယနေ့အကြိုက်ဆုံး သတင်းဓာတ်ပုံဆိုပြီး MyanmarDaily.Net က တင်ထားတဲ့ စာသားတွေနဲ့ ဓာတ်ပုံကလည်း စိတ်ဝင်စားစရာပါပဲ။ စာရော၊ ဓာတ်ပုံရောကို ဒီနေရာမှာ ပြန်ဖော်ပြပါရစေ။

ယနေ့အကြိုက်ဆုံး သတင်းဓါတ်ပုံ=================

လွှတ်တော်ကို နေ့တစ်ပိုင်းလောက် လေ့လာမိတာနဲ့ ဆဝါးမိတာလေး ဝေမျှ ပေးလိုက်ပါတယ်။

ဒေါ်စုကလွဲလို့ ကျန်တဲ့ လွှတ်တော် ကိုယ်စားလှယ်တွေက အေးဆေးပါ။ ဒေါ်စုကတော့ လွှတ်တော် ကျင်းပနေစဉ် breakပေးတဲ့ အချိန်မှာ ထမင်းစားရပါတယ်တဲ့။ နေ့လည် ထမင်းစားချိန်မှာ နိုင်ငံခြား သံတမန်တွေ ဧည့်သည်တွေနဲ့ တွေ့ရပါတယ်။ ကော်မတီ အစည်းအဝေးတွေ ရှိသလို NLDအမတ်တွေနဲ့လည်း အစည်းအဝေးက မပြတ်ပြုလုပ်လေ့ ရှိပါတယ်တဲ့။

Ref : Kaung Naing

အခြားသော ပြန်လည်မျှဝေသူတွေကတော့ ဒီသတင်းတွေကို အခြေခံပြီး အချို့သော စကားလုံးလေးတွေ ထပ်ဖြည့်စွက်တာ၊ ချဲ့ကားတာတွေသာ လုပ်ကြတာမို့ အထူးအထွေလုပ်ပြီး ပြန်မဖော်ပြတော့ပါဘူး။

မူလရေးသားတဲ့ ကိုကောင်းနိုင် ဆိုသူရဲ့ အရေးအသားတွေကနေ စပြောပါရစေ။ သူရေးသမျှဟာ လွှတ်တော်ကို နေ့တစ်ပိုင်းလောက် လေ့လာမိတာနဲ့ ဆ၀ါးမိတာလေးကို ရေးထားတာဆိုတော့ အံ့သြစရာ ကောင်းလွန်းမနေဘူးလား။ နေ့တစ်ပိုင်းလောက် လွှတ်တော်ကို လေ့လာရုံနဲ့ လွှတ်တော်ထဲက အခြေအနေတွေ အားလုံးနီးပါးကို သိနားလည်သွားတဲ့ သူ့ရဲ့ပါရမီဉာဏ် ရင့်သန်မှုကို မလေးစားဘဲ၊ အားမကျဘဲ မနေနိုင်အောင် ဖြစ်ရပါတယ်။ တကယ်ပြောတာပါ။ ကျွန်တော်ကိုဉာဏ်ဆိုရင် လွှတ်တော် ဆိုတာကြီးကို တစ်လလောက် လေ့လာတာတောင် သေသေချာချာ နားလည်လောက်မယ် မထင်ပါဘူး။ အဲဒါကြောင့်လည်း အခုလိုမျိုး သူများကို ဝေဖန်တာလောက်ပဲ လုပ်နိုင်တာလား မသိပါဘူး။ သူများကို ဝေဖန်တယ်ဆိုတာ ဘာပညာမှ မလိုဘူးမဟုတ်လား။ ကိုယ့်စိတ်နဲ့မတွေ့ရင်၊ ကိုယ်နဲ့သဘောထား မတူရင် မကောင်းဘူးပြောလိုက်ရုံပေါ့ မဟုတ်ဘူးလား။ :D

လွှတ်တော်ကို နေ့တစ်ပိုင်းလောက် အပေါ်ထပ်ကနေ ထိုင်ကြည့်ဖူးရုံနဲ့ ဒေါ်စုကလွဲရင် လွှတ်တော်ထဲက ကျန်တဲ့ကိုယ်စားလှယ်တွေ အကုန်လုံးက အေးဆေးပါပဲဆိုတော့ ကျွန်တော်ဘယ်လို နားလည်ရမလဲ။ တကယ်မသိလို့ မေးတာပါ။ အေးဆေးပါဆိုတာ ဘာပြောတာတုန်း။ ဒေါ်စုက မအေးဆေးဘူးဆိုတော့ ဘာဖြစ်လို့လဲ။ လွှတ်တော်နာယကကြီးနဲ့ ဥက္ကဋ္ဌတွေက ဒေါ်စုကို လွှတ်တော်အဆောက်အအုံကို ပတ်ပြီးတော့ လမ်းလျှောက်ခိုင်းထားလို့လား၊ ဒါမှမဟုတ် ဘယ်မှမသွားနဲ့ ကိုယ့်နေရာမှာပဲ ကိုယ်ထိုင်နေလို့ တုံးထုပြီး ဆုံးဖြတ်ထားလို့လား။ ခက်ပြီရောဗျာ... ကျုပ်ကလည်း SkyNet က လာတဲ့လွှတ်တော်ကိုသာ သိတာကိုး။ သူ့လိုလည်း လွှတ်တော်ထဲကို နေ့ဝက်လောက်အသာထား၊ နာရီဝက်လောက်တောင် ရောက်ဖူးတာမဟုတ်ချေတော့ ဘာကိုပြောချင်မှန်း နားမလည်ဘူးဗျ။

ဒေါ်စုက လွှတ်တော် break ပေးတဲ့အချိန်မှာ ထမင်းစားရတယ်ဆိုတော့ ကျန်တဲ့ ကိုယ်စားလှယ်တွေက ဘယ်အချိန် စားကြတုန်းဗျ။ တကယ်မသိလို့ပါဗျ။ ကြည့်ရတာ ဒေါ်စုတစ်ယောက်ပဲ break ပေးတဲ့အချိန်မှာ ထမင်းစားပြီး ကျန်တဲ့ကိုယ်စားလှယ်တွေက ကိုယ့်ဘာသာကိုယ် ဗိုက်ဆာတဲ့အချိန် အဆင်ပြေသလို ထွက်စားကြတယ် ထင်ပါရဲ့ဗျာ။ ဒါနဲ့များ ဂျာနယ်တွေထဲမှာ လွှတ်တော်ကိုယ်စားလှယ်တွေပြောတဲ့ တစ်ခါတလေ ထမင်းစားချိန်က နေ့လည် ၁ နာရီ၊ ၂ နာရီတွေ ဖြစ်သွားလို့ အသက်ကြီးတဲ့လူတွေ ဒုက္ခရောက်ကြရတယ်ဆိုတာ အလကားပေါ့ဗျ။ ကျုပ်ဆိုတဲ့ကောင်က တကယ်တွေမှတ်ပြီး ကိုယ်စားလှယ်ကြီးတွေကို သနားလိုက်ရတာ။ သူတို့ခမျာ တိုင်းရေးပြည်ရေးအတွက် ထမင်းစားချိန်မမှန်၊ ရေသောက်ချိန်မမှန်၊ အပေါ့သွားချိန်မမှန်နဲ့ အတော်ပင်ပန်းကြရှာတာပဲပေါ့။ အခုမှပဲ သိတော့တယ်။ ဒင်းတို့က စားချင်တဲ့အချိန် ထမင်းစားနေတာကိုး။

နိုင်ငံခြားသံတမန်တွေ၊ ဧည့်သည်တွေနဲ့ ထမင်းစားချိန်မှာ တွေ့ရတယ်ဆိုတာကို နားမလည်ဘူး။ ဘာကိုပြောပြန်တာလဲဗျာ။ ဒေါ်စုက ထမင်းစားရင်းနဲ့ ဧည့်သည်တွေနဲ့ စကားပြောတာကို ပြောတာလား။ ဒါမှမဟုတ် သူတို့နဲ့အတူတူ ထမင်းစားတာလား။ မရှင်းလင်းဘူးဗျာ။

ကော်မတီအစည်းအဝေးတွေ ရှိသလို၊ NLD အမတ်တွေနဲ့လည်း အစည်းအဝေးက မပြတ်ပြုလုပ်တယ်တဲ့။ ကော်မတီအစည်းအဝေးက ဒေါ်စုတစ်ယောက်တည်း လုပ်ရတာလား။ ကျွန်တော်သိသလောက်ကတော့ လွှတ်တော် နှစ်ရပ်ပေါင်းမှာ ကော်မတီပေါင်းက ၄၀ နီးပါးလောက်ရှိတယ်။ အဲဒီကော်မတီတွေထဲက ဒေါ်စု ဥက္ကဋ္ဌအဖြစ် ဆောင်ရွက်တဲ့ တရားဥပဒေစိုးမိုးရေး ကော်မတီတစ်ခုပဲ အစည်းအဝေးလုပ်သလား။ လက်စသတ်တော့ အခြားကော်မတီတွေက ဖွဲ့သာဖွဲ့ထားပြီး ဘာအလုပ်မျှ မလုပ်ကြတဲ့သူတွေကိုးဗျ။ ဒါနဲ့များ SkyNet က ကျွန်တော်တို့ကို လိမ်စဉ်ကြီး လွှင့်ပြနေသေးတယ်။ ဘာတဲ့... ဘာရေးရာကော်မတီ အစည်းအဝေးတို့၊ ဘာကော်မရှင် အစည်းအဝေးတို့ဆိုပြီး တစ်နိုင်ငံလုံးကို ပြနေလိုက်သေးတယ်။ အခုမှ အကုန်ဗူးပေါ်သလို ပေါ်တော့တယ်။

NLD အမတ်တွေနဲ့ အစည်းအဝေးမပြတ်လုပ်ရတယ်တဲ့။ အခြားပါတီတွေကရော မစည်းမဝေးကြဘူးလားဟ။ အတော်ခက်တဲ့လူတွေပဲ။ အစည်းအဝေးတွေဘာတွေ မလုပ်ဘဲနဲ့ အချင်းချင်း ဘယ်လိုများ တိုင်ပင်ကြ၊ ဆွေးနွေးကြသလဲ မသိဘူးနော်။ လွှတ်တော်ထဲမှာ ဆုံးဖြတ်ရင် ကိုယ်ထင်ရာကိုယ် ဆုံးဖြတ်နေကြတယ် ထင်ပါရဲ့ဗျာ။ တကယ်ဆိုရင် အမေစုလို လုပ်ရမှာပေါ့။ ဒီနေ့ဘယ်အဆိုကိုတော့ ကန့်ကွက်၊ ဘယ်အဆိုကိုတော့ ထောက်ခံ၊ ဘယ်သူတင်ရင်တော့ ကြားနေလိုက် စသဖြင့်ပေါ့။ မဟုတ်ဘူးလား။ မနက်က အဲဒီကိစ္စကိုဝေဖန်ရင်း ကျွန်တော့်သူငယ်ချင်းတစ်ယောက် ပြောတာလေးကို ထပ်ဖြည့်စွက်ပြီး ပြောပါရစေဦး။ ဒေါ်စုက လွှတ်တော်ကျမှ အစည်းအဝေး လုပ်ရတာပေါ့ကွ။ သူက သူ့ပါတီဝင်တွေနဲ့ အတူတူနေတာမှ မဟုတ်တာတဲ့။ သူ့ဟာသူ သီးခြားနေတာဆိုတော့ သူတို့တွေ့လို့ရတာ လွှတ်တော်မှာပဲ ရှိတာပေါ့တဲ့။ အခြားပါတီတွေက တည်းခိုတဲ့နေရာမှာ တစ်နေရာတည်းတွေမှာ နေကြတာ များတယ်တဲ့။ အစည်းအဝေးကိုလည်း ညပိုင်းတွေမှာ စုဝေးပြီး လုပ်ကြတာတဲ့။ ဟုတ်မဟုတ် ကျွန်တော်မသိပါ။ စဉ်းစားစရာမို့ ပြန်ပြောပြရတာပါ။

လွှတ်တော်ဝန်ထမ်းတွေကလည်း အံတီ အံတီနဲ့ အတော်လေး ဂရုစိုက်ကြတာကို တွေ့ရပါတယ်တဲ့။ ဟားဟားဟား အခြားပါတီခေါင်းဆောင်တစ်ယောက်ကို လွှတ်တော်ဝန်ထမ်းတွေက အဲဒီလိုမျိုး အန်ကယ်၊ အန်ကယ်တို့၊ အဘ၊ အဘတို့ဆိုပြီး ဂရုစိုက်ကြရင် အဲဒီလူ ဘာပြောမလဲလို့ ကျုပ်ကိုဉာဏ်ဖြင့် အရမ်းကို သိချင်မိတာပါပဲဗျာ။ တကယ်ပါပဲ.... :D :D :D

စိတ်ဝင်စားစရာမကောင်းတဲ့ မေးခွန်းနဲ့အဖြေတွေ ပြုလုပ်နေကြစဉ် တခြားလွှတ်တော်ကိုယ်စားလှယ်တွေ အိပ်ငိုက်နေကြချိန်မှာ ဒေါ်စုကတော့ လေ့လာစရာရှိတဲ့ စာအုပ်စာတမ်းတွေကို ဖတ်မှတ်လေ့လာနေတာကို တွေ့ရပါတယ်တဲ့။ သေလိုက်ပါတော့ လွှတ်တော်ထဲက ကိုယ်စားလှယ်တွေရယ်။ စိတ်ဝင်စားစရာမကောင်းတဲ့ မေးခွန်းနဲ့ အဖြေတွေဆိုတာ ဘာတွေများလဲလို့ သိချင်မိပါရဲ့။ အရေးအသားကတော့ ၀တ္ထုရေးလို့ ရလောက်တယ်။ တကယ်ပဲ... မင်းသားကလွဲရင် ကျန်တဲ့လူတွေအကုန်လုံးက အရက်သမား၊ ဖဲသမား၊ ဘိန်းစား၊ လူမိုက်တွေချည်းပဲ။ :D လွှတ်တော်လုပ်နေတဲ့အချိန်မှာ ကိုယ်ဖတ်ချင်ရာစာအုပ် ဖတ်နေလို့ ရမရဆိုတာ ကျွန်တော်မသိဘူးဗျ။ အဲဒါနဲ့ ပတ်သက်ပြီး တစ်ခါက ဂျာနယ်တွေထဲမှာ ဖတ်မိတာကတော့ လွှတ်တော်ဥက္ကဋ္ဌကြီး ဦးခင်အောင်မြင့်က လွှတ်တော်အစည်းအဝေးချိန်မှာ ဂျာနယ်တွေ၊ မဂ္ဂဇင်းတွေ၊ မသက်ဆိုင်တဲ့ စာအုပ်တွေ ဖတ်နေတာဟာ လွှတ်တော်ကို စော်ကားရာရောက်တယ်၊ မထီမဲ့မြင်ပြုရာ ရောက်တယ်လို့ ပြောဖူးတယ် ဆိုသလားလို့ပါ။ ရုံးတွေ၊ ဌာနတွေမှာ အစည်းအဝေးလုပ်လို့ ကိုယ်နဲ့မဆိုင်တာတွေ ပြောနေတဲ့အချိန်မှာ ကာတွန်းစာအုပ် ဖတ်နေတာ၊ ဖုန်းကလိနေတာ၊ ကိုယ်ရေးကိုယ်တာ ရေးစရာရှိတာ ရေးနေတာတွေဟာ အပြစ်ကင်းသလားဗျ။ အဲဒီမူလရေးသားသူဟာ အဖွဲ့အစည်းတစ်ခုခု၊ အစည်းအရုံးတစ်ခုခု၊ ဌာနတစ်ခုခုရဲ့ အကြီးအကဲအဖြစ် ဦးစီးဦးဆောင်လုပ်ပြီး အစည်းအဝေး လုပ်ဖူးပုံ မရဘူးဗျ။ :D

ဒေါ်စုကို ဘာဖြစ်လို့ အထင်ကြီး အားကိုး လေးစားကြသလဲဆိုတာကို ဖြတ်ခနဲ လေ့လာလိုက်တာနဲ့ကို သိရှိလိုက်ရပါတယ် တဲ့။ ခစ်ခစ်ခစ် :D :D :D တကယ့် ဟာသပါပဲဗျာ။ ကိုယ့်ဘာသာကိုယ် ဒေါ်စုကို သဘောကျတယ်ဆို သဘောကျတယ်ပေါ့၊ ဒေါ်စုကို လေးစားတယ်ဆို လေးစားတယ်ပေါ့။ ဘာဖြစ်လဲဗျ။ လျှောက်ပြီးတော့ ပြောနေစရာ မလိုပါဘူး။ ကိုယ့်ဘာသာကိုယ် လူပုဂ္ဂိုလ်တစ်ဦးကို လေးစားတာ၊ အားကျတာ၊ အတုယူတာ၊ သဘောကျတာ ဘယ်သူ့ကို ဂရုစိုက်ရမလဲဗျ။ မဟုတ်ဘူးလား။ ဘယ်နှယ်ဗျာ အခုတော့ ဖြတ်ခနဲ လေ့လာလိုက်တာနဲ့တောင် ဒေါ်စုကို ဘာကြောင့် အထင်ကြီး အားကိုး လေးစားကြသလဲ ဆိုတာကို သိရှိလိုက်ရပါတယ်တဲ့။ သေလိုက်ပါ့လားကွာ... အတော်နောက်တဲ့လူကြီး... တကယ်ပဲ။ အဟုတ်မှတ်လို့ ဖတ်လိုက်ရတာ။ နောက်ဆုံးကျတော့မှ ပေါ်တင်ကြီးကို ဒေါ်စုကို ကြော်ငြာသွားတာကိုး။

ကိုယ့်ဝေါပေါ်မှာ ကိုယ့်ဘာသာကိုယ် ရေးတာပဲဗျာ။ ရေးစမ်းပါလေ့။ ဒေါ်စုကို ကျွန်တော်လေးစားတယ်၊ ဒေါ်စုကို ကျွန်တော်အထင်ကြီးတယ်၊ ဒေါ်စုကို ကျွန်တော်အားကိုးတယ်။ စသဖြင့်ပေါ့။ ဒီထက်ပိုပြီးတော့ စကားလုံးတွေ အမွှမ်းတင်တတ်သေးရင် တခြားသူတွေလိုမျိုး ရေးပါလေ့။ ဘာတဲ့... ဂန္ထ၀င်မေမေတို့၊ အနှိုင်းမဲ့မေမေတို့၊ အမေစုတို့၊ အမေတို့၊ တို့မေမေတို့၊ သားတို့မေမေတို့၊ သံမဏိမေမေတို့ စသဖြင့်ပေါ့။ အခုဟာက လွှတ်တော်အတွေ့အကြုံ ရေးတာလိုလို၊ လွှတ်တော်ကိုယ်စားလှယ်တွေကို တိုက်ခိုက်တာလိုလိုနဲ့ ဒေါ်စုကို ဘလိုင်းကြီး လော်ဘီလုပ်သွားတာပဲ။ အခြားလူတစ်ယောက်ယောက်ကများ အဲဒီလိုမျိုး အသုံးအနှုန်းတွေနဲ့ ဦးသိန်းညွန့်တို့၊ ဒေါ်ဒွဲဘူတို့၊ ဦးလှဆွေတို့ကို ရေးကြည့်စမ်းပါလား။ ဟားဟားဟား ဖေ့စ်ဘုတ်တစ်ခွင်လုံး သောသောညံသွားမှာပေါ့။

စာဖတ်သူမိတ်ဆွေများခင်ဗျား၊ ကျွန်တော်အမေရိကန် မရောက်ဖူးပါ၊ စင်ကာပူ ခြေမဆန့်ဖူးပါ၊ သြစတြေးလျ တစ်ကြိမ်တစ်ခါမျှ မရောက်ခဲ့ဖူးပါ။ ဆိုပါစို့.. အဲဒီနိုင်ငံတွေကို ကျွန်တော်ဆိုတဲ့ ငတိက တစ်ပတ်စီလောက် လေ့လာရေးခရီးသွားပြီး အမေရိကန်ဆိုတာ ဘယ်လိုနိုင်ငံကွ၊ စင်ကာပူကတော့ ဘယ်လိုပါကွာ၊ သြစတြေးလျက ဒီလိုကွဆိုပြီး ပြောနေရင် အဆင်ပြေပါ့မလား။ အဲဒီထက်ပိုပြီး အမေရိကန်ရဲ့ လူနေမှုပုံစံက ဘယ်လိုကွာ၊ နိုင်ငံသားတွေကတော့ သိပ်မဟန်ပါဘူးကွာ၊ စင်ကာပူက ကောင်တွေကတော့ မကောင်းတဲ့ကောင်တွေချည်းပဲကွ၊ သြစတြေးလျက ထင်သလောက် မစွံပါဘူးကွာ၊ နိုင်ငံရေးစနစ်ကလည်းမကောင်း၊ လူတွေကလည်း ပျင်းကြတယ် စသဖြင့် ဝေဖန်မယ်၊ မှတ်ချက်ပြုမယ်ဆိုရင် အများလက်ခံစရာ ဖြစ်ပါ့မလား။ မနေ့တစ်နေ့ကမှ အင်တာနက်သုံးတဲ့လူက လဘက်ရည်ဆိုင်ထိုင်ပြီး ဖေ့စ်ဘုတ်ဆိုတာ မကောင်းပါဘူးကွာတို့၊ ဘလော့ဂ်ရေးတယ်ဆိုတာ အလကားအလုပ်ပါ၊ စာရိုက်တတ်ရင် ကလေးတောင် လုပ်လို့ရပါတယ်တို့ စသဖြင့် ပြောမယ်ဆိုရင် လူရယ်စရာ ဖြစ်မနေဘူးလား။ နိုင်ငံသားတွေအားလုံး လိုက်နာကျင့်သုံးရမယ့် ဥပဒေတွေကို ပြဋ္ဌာန်းပေးနေတဲ့ လွှတ်တော်တစ်ရပ်ကို  နေ့ဝက်လောက် လေ့လာပြီး ပြောချင်ရာတွေ ပြောသွားတာကတော့ တစ်ဆိတ်ဖြင့် လွန်တယ်လို့ မထင်မိဘူးလား။

ကျွန်တော် ဒေါ်စုကို ဝေဖန်နေတာမဟုတ်ပါ။ ဒီလိုကိစ္စတွေကိုလည်း ဒေါ်စုသိနိုင်မည်မဟုတ်ပါ။ အလကားနေရင် ဒေါ်စုကို သိဒ္ဓိတင်ပေးနေသော၊ မျက်စိနောက်အောင် အမွှမ်းတင်နေကြသော လူများကိုသာ ဝေဖန်ခြင်းဖြစ်ပါသည်။

ကျွန်တော်တို့နိုင်ငံဟာ မြင်းထိန်းငတာတွေ သိပ်များတဲ့တိုင်းပြည်ဆိုတာ တစ်နေ့တစ်ခြား ကျွန်တော်သိလာရသည်။ ၀မ်းနည်းရမှာလား... ၀မ်းသာရမှာလား မိသိန်းကြည်....။

အမှတ်တရ

ကိုဉာဏ် (ပန်းလောင်မြေ)

၂၀၁၃ ခုနှစ်၊ သြဂုတ်လ ၁၃ ရက်၊ အင်္ဂါနေ့။

ည ၁၀ နာရီ ၂၁ မိနစ်တွင်ပြီး၏။

စာကြွင်း။ ဘာမျှမရေးချင်ပါဘူးဟု အတန်တန်ပြောပါလျက် ရေးပါကွ၊ ရေးပါကွ၊ မဖတ်ရတာကြာပြီကွဟု မြောက်ပေးသော မိတ်ဆွေအပေါင်းခင်ဗျား၊ အခုရေးခဲ့သောစာသည် ဖတ်လို့ ကောင်းလျှင် ကောင်းနေပါလိမ့်မည်။ မိတ်ဆွေတို့အတွက် သဘောခွေ့စရာ ဖြစ်ကောင်းဖြစ်နေပါလိမ့်မည်။ သို့တည်းမဟုတ် ခံပြင်းဒေါသထွက်စရာ ဖြစ်ကောင်း ဖြစ်နေနိုင်ပါသည်။ ကျွန်တော့်အတွက်တော့ စိတ်ထဲမှာ တအုံ့နွေးနွေး ရှိနေပါသော်လည်း မရေးချင်ဘဲ ရေးခဲ့ရသည့် စာတစ်ပုဒ်ရယ်ပါ။ သူတစ်ပါးကို ပုတ်ခတ်ဝေဖန်တဲ့စာ၊ ဖတ်တဲ့သူကို ဒေါသထွက်စေမယ့်စာတွေ မရေးနဲ့ဟု အမြဲမပြတ် ဆုံးမတတ်သော ကျွန်တော့်ဆရာတွေရဲ့ စကားကို ယနေ့အထိ နားမထောင်မိသေးသည့် ကိုယ့်ကိုယ်ကိုယ်လည်း ဒေါသဖြစ်မိပါသည်။ ဘယ်အချိန်ကျမှ ဆရာတွေရဲ့စကားကို နားထောင်လိုက်နာနိုင်မလဲဆိုတာ ကျွန်တော်မသိသေးပါခင်ဗျား။