ပြုပြင်ပြောင်းလဲရေး လုပ်ကြရအောင်

စာအုပ်တွေထဲမှာ ဖတ်ရတာတွေအရ ပြုပြင်ပြောင်းလဲရေးဆိုတဲ့ စကားလုံးကို ဆိုဗီယက်ခေတ်မှာ ပြောလွန်းတယ်လို့ ထင်ခဲ့မိတာ အခုမှ မှားမှန်း သိတော့တယ်။ အခုအချိန်မှာ မြန်မာတွေလောက် အဲဒီစကားကို ပြောတဲ့လူ ရှိမှရှိပါ့မလားလို့တောင် ထင်နေမိတယ်။ ဘယ်နေရာမှာပဲဖြစ်ဖြစ် ပြင်ရမယ်၊ ပြောင်းရမယ် ဆိုတဲ့အသံတွေချည်းပဲ လွှမ်းမိုးနေတယ်။ မကောင်းတာကို ကောင်းတာတွေနဲ့ ပြင်ဆင်ပြောင်းလဲချင်တာ၊ အသစ်အသစ်တွေကို လိုချင်ကြတာ အပြစ် ပြောစရာ မရှိပါ။ သို့သော် သို့သော်.....။

အစိုးရရဲ့ စီမံခန့်ခွဲမှု ညံ့ဖျင်းလွန်းတယ်။ ပြုပြင်ပြောင်းလဲမှုတွေ လုပ်ရမယ်။

ဟုတ်တယ်.... အစိုးရရဲ့ အုပ်ချုပ်ရေးစနစ်၊ စီမံခန့်ခွဲရေးစနစ်မှာ အားနည်းချက်တွေရှိတယ်။

အစိုးရအဖွဲ့ဝင် တာဝန်ရှိသူတွေမှာ အားနည်းချက်တွေရှိတယ်။ သူတို့ရဲ့ mind-sets တွေ ပြောင်းပစ်ရမယ်။

ဟုတ်တယ် ပြောင်းလဲပစ်ရမယ်။

လွှတ်တော်တွေမှာ အားနည်းချက်တွေ၊ လွဲနေတာတွေရှိတယ်။

ဟုတ်တယ် ရှိတယ်။ ပြုပြင်ပြောင်းလဲပစ်ရမယ်။

တရားစီရင်ရေးမဏ္ဍိုင်က ယုံကြည်စရာမရှိဘူး။ အားနည်းချက်တွေနဲ့ ပြောစရာဖြစ်နေတယ်။

ဟုတ်တယ်... ပြောချင်စရာမရှိလောက်အောင် အားနည်းချက်တွေနဲ့မို့ ပြောင်းလဲမှုတွေ လုပ်ရမယ်။

 

ဒါဆို.. ကျွန်တော်တို့တွေမှာရော အားနည်းချက်တွေ၊ လိုအပ်ချက်တွေ၊ မကောင်းတဲ့အချက်တွေ မရှိဘူးလား။ ပြင်ဖို့ မလိုအပ်ဘူးလား။

အတိုက်အခံတွေမှာရော ပြုပြင်ပြောင်းလဲရမယ့် မကောင်းတဲ့အချက်တွေ မရှိဘူးလား။

အရပ်ဘက် လူ့အဖွဲ့အစည်းတွေမှာရော ပြုပြင်ပြောင်းလဲရမယ့်ဟာတွေ မရှိဘူးလား။

မီဒီယာတွေမှာရော အားနည်းချက်တွေ၊ ပြုပြင်ရမယ့် အချက်တွေ မရှိဘူးလား။

သူများကိုတော့ ကောင်းစေချင်တယ်၊ ပြင်စေချင်တယ်။ ကိုယ်ကိုယ်တိုင်ကျတော့ နေချင်သလိုနေမယ် ဆိုတဲ့စိတ်တွေနဲ့ ပြုပြင်ပြောင်းလဲရေးကို တောင်းဆိုနေကြတာလား။

ကိုယ်တိုင်က ပြည်သူကောင်းတစ်ယောက်၊ နိုင်ငံသားကောင်းတစ်ယောက်ဖြစ်အောင် ကြိုးစားနေပြီလား။

ကိုယ်တိုင်က မီဒီယာသမားကောင်းတစ်ယောက်၊ သတင်းထောက်ကောင်းတစ်ယောက်၊ တရားမျှတစွာ အသိဉာဏ်ပေးတတ်တဲ့ စာရေးဆရာတစ်ယောက်ဖြစ်အောင် ကြိုးစားနေပြီလား။

ကိုယ်တိုင်က အသပြာဆရာဝန်မဟုတ်ဘဲ အများပြည်သူအတွက် မရှိမဖြစ် အားကိုးရတဲ့ ဆေးပညာရှင် တစ်ယောက်ဖြစ်အောင် ကြိုးစားနေပြီလား။

ကိုယ်တိုင်က မခိုမကပ်နဲ့ ကြိုးစားဆောင်ရွက်တတ်တဲ့ အလုပ်သမားကောင်းတစ်ယောက်ဖြစ်အောင် ကြိုးစားနေပြီလား။

ကိုယ်တိုင်က ခရီးသွားပြည်သူတွေ အဆင်ပြေချောမွေ့ရေးကို အစဉ်ဦးထိပ်ထားတဲ့ ယာဉ်မောင်းကောင်းတစ်ယောက်၊ ယာဉ်နောက်လိုက်ကောင်း တစ်ယောက်ဖြစ်အောင် ကြိုးစားနေပြီလား။

ကိုယ်တိုင်က ပညာရှာ ပမာသူဖုန်းစားဆိုတဲ့အတိုင်း အပတ်တကုတ် သင်ယူအားထုတ်နေတဲ့ ကျောင်းသူကျောင်းသားကောင်း တစ်ယောက်ဖြစ်အောင် ကြိုးစားနေပြီလား။

ကိုယ်တိုင်က စားသုံးသူတွေကို အဆင်ပြေပါစေ၊ စိတ်ချမ်းသာပါစေ ဆိုတဲ့စိတ်နဲ့ စေတနာရှေ့ထားပြီး ဆောင်ရွက်နေတဲ့ ဈေးသည်ကောင်း တစ်ယောက်ဖြစ်အောင် ကြိုးစားနေပြီလား။

ကိုယ်တိုင်က လမ်းပေါ်မှာ တွေ့ရာနေရာ ကွမ်းတံတွေး မထွေးတတ်တဲ့၊ တွေ့တဲ့နေရာ အမှိုက်မပစ်တတ်တဲ့ မြို့တော်သူ မြို့တော်သားကောင်း တစ်ယောက်ဖြစ်အောင် ကြိုးစားနေပြီလား။

ကိုယ်တိုင်က..................။

ကိုယ်တိုင်က........................။

ကိုယ်တိုင်က..............................။

ကိုယ်တိုင်က.....................................။

ကိုယ်တိုင်က............................................။

ကိုယ်တိုင်က...................................................။

ကဲ... ကျွန်တော်တို့ ပြုပြင်ပြောင်းလဲရေး လုပ်ကြရအောင်။

အမှတ်တရ

ကိုဉာဏ် (ပန်းလောင်မြေ)

၂၀၁၄ ခုနှစ်၊ ဇန်န၀ါရီလ ၂၃ ရက်၊ ကြာသပတေးနေ့။

မွန်းလွဲ ၃ နာရီ ၂၂ မိနစ်တွင်ပြီး၏။