Wednesday, July 22, 2009

ကျွန်တော်ကြိုက်သော ပုံပြင်များ (၃)


တစ်ခါတုန်းက ရွာတစ်ရွာမှာ တပည့်တပန်းတွေ အများကြီးရှိတဲ့ သိုင်းဆရာကြီး တစ်ယောက်ရှိတယ်။ အဲဒီဆရာကြီးဟာ တပည့်တွေကို သိုင်းပညာသင်ချင်သင် ...၊ မသင်ရင် သူ့ခြံထဲမှာ အမှိုက်ရှင်းလိုက်၊ အမှိုက်တွေကို မီးရှို့လိုက် လုပ်တော့တာပဲ။ အစဉ်သဖြင့် ဂေါ်ပြားကြီးကို ကိုင်ချင်နေတယ်။ မကိုင်ရင် ထွန်ခြစ်ကြီး ဆွဲထားတယ်။ မဆွဲရင် မတ်တတ်တံမြက်စည်းကြီးနဲ့ တံမြက်စည်း လှည်းနေတော့တာပဲ။ အဲဒါတွေ လုပ်စရာမရှိရင်တော့ စူးစောက် တန်ဆာပလာ လက်သမားပစ္စည်းတွေနဲ့ သစ်သားရေစည်ပိုင်း လုပ်နေလေ့ရှိတယ်။ လုပ်ပြီးတဲ့ ရေစည်ပိုင်းလေးတွေကိုလည်း မြို့ကိုပို့ပြီး ရောင်းချလေ့ရှိတယ်။

အဲဒီလို ရောင်းချလို့ရတဲ့ ငွေတွေနဲ့ပဲ တပည့်တွေကို ဆန်ပြုတ်တိုက်တယ်။ အီကြာကွေးကျွေးတယ်။ ဆန်ပြုတ်ပြုတ်တဲ့အခါမှာ လည်း တခြားလူကို အပြုတ်မခိုင်းဘူး။ သူကိုယ်တိုင်ပြုတ်တယ်။ အီကြာကွေးကလည်း ၀ယ်တာမဟုတ်ဘူး။ ဂျုံကို ၀ယ်ပြီး သူ့ဟာသူ အီကြာကွေးလုပ်တာ။ သူ့အီကြာကွေးကလည်း တစ်ခါစားပြီးရင် စွဲသွားအောင်ကို ကောင်းတယ်လို့ဆိုတယ်။ အဲဒီဆရာကြီးဟာ အသက် ၈၀ ရောက်နေပြီ။ တပည့်တွေကို သိုင်းပြနိုင်တုန်း၊ အလုပ်တွေကို လုပ်နေနိုင်တုန်းပဲ။

ဒါပေမယ့် သူ့တပည့်တွေက သူ့ကို သနားနေကြတယ်။ "တို့ဆရာကြီးကွာ၊ အသက် ၈၀ ရောက်နေပြီ၊ တို့ကိုလည်း သိုင်းပညာ သင်ပြရသေးတယ်။ ပြီးတော့လည်း ခြံထဲမှာ တလုပ်လုပ်နဲ့ အလုပ်ရှုပ်နေတော့တာပဲ၊ အဲဒါကို မကြည့်ရက်ဘူးလို့ တစ်ယောက်တစ်လှည့် ပြောကြတယ်။ ပြီးတော့ တပည့်တွေဟာ ဆရာကြီး အလုပ်မလုပ်အောင်ဆိုပြီးတော့ အလုပ်လုပ်တဲ့ပစ္စည်းတွေကို ၀ှက်ထားကြတယ်။ ဂေါ်ပြားတို့၊ ထွန်ခြစ်တို့၊ တံမြက်စည်းတို့ကို ဆရာကြီးမတွေ့အောင် နေရာတွေပြောင်းလိုက်ကြတယ်။ ပြီးတော့ လက်သမားပစ္စည်းတွေ ကိုလည်း ၀ှက်ထားလိုက်ကြပါလေရော။ အဲဒီလို လုပ်လိုက်တော့ ဆရာကြီးခမျာ ရေစည်ပိုင်းအလုပ်လည်း မလုပ်ရတော့ဘူးပေါ့။

အဲဒီအခါမှာ အဘိုးကြီးဟာ ဘာမှ လုပ်စရာမရှိတော့ဘူး၊ အဲဒီတော့ သူ့အိမ်ရှေ့က ကွပ်ပျစ်ပေါ်မှာ ငုတ်တုတ်ကြီး ထိုင်နေတော့တာပဲ။ တပည့်တွေက ထမင်းဟင်းတွေချက်ပြီး သူ့ရှေ့မှာ ထမင်းပွဲပြင်ပေးကြတယ်။ ဒါပေမယ့် အဘိုးကြီးက မစားဘူး။

အဲဒီလို မစားဘဲနေလာလိုက်တာ ၃ ရက်တောင်ရှိသွားတယ်။ အဲဒီတော့ အဘိုးကြီးဟာ ဘုန်းဘုန်းကြီး လဲတော့တာပေါ့။ ဆေးဆရာတွေ ဘာတွေခေါ်ပြီးတော့ ပြသတယ်။ ဆေးဆရာပေးတဲ့ ဆေးတွေကိုတော့ သောက်တယ်။ အစာတော့ မစားဘူး။ အဲဒီအခါမှာ တပည့်တွေက ၀ှက်ထားတဲ့ ပစ္စည်းတွေကို အဘိုးကြီးကို ပြန်ပြီးထုတ်ပေးကြတယ်။

"ဟောဒီမှာ မတ်တတ်တံမြက်စည်း၊ ဟောဒီမှာ ထွန်ခြစ်၊ ဟောဒီမှာ ဂေါ်ပြား"ဆိုပြီး သူ့ရှေ့မှာ ပြန်ချပေးကြတယ်။ "ဟောဒီမှာ လက်သမားပစ္စည်းတွေ"ဆိုပြီး စူးဆောက် တန်ဆာပလာတွေကိုလည်း ပြန်ချပေးကြတယ်။ အဲဒီတော့မှ အဘိုးကြီးက "ငါ အလုပ်လုပ်ခွင့်ရပြီ" လို့ပြောပြီး အားယူပြီး ထရှာတယ်။ ပြီးတော့ ခြံထဲဆင်းပြီး မတ်တတ်တံမြက်စည်းကြီးနဲ့ တံမြက်စည်းလှဲတယ်။ အမှိုက်တွေကောက်တယ်။ ထွန်ခြစ်ကြီးနဲ့ အမှိုက်တွေကို ဆွဲထုတ်တယ်။ အဲဒီလို လုပ်နေတဲ့အချိန်မှာပဲ သူဟာ ဆန်ပြုတ်အိုးလေး တည်ထားတယ်။ အီကြာကွေးလည်းကြော်ထားတယ်။ ပြီးတော့ အလုပ်လည်းနားရော ဆန်ပြုတ်နဲ့ အီကြာကွေးကို မြိန်ရေယှက်ရေ စားသောက်တော့တာပဲ။

အဲဒီလိုနဲ့ပဲ အဘိုးကြီးဟာ ပြန်ပြီးကျန်းမာသွားတယ်။ အဲဒီတော့ တပည့်တွေက အဘိုးကြီးကို "ဘယ်လိုဖြစ်တာလဲ" မေးကြတယ်။ အဲဒီအခါမှာ အဘိုးကြီးက ..

"ဒီလိုကွ ... ငါဟာ ဆင်းရဲတဲ့မိသားစုက ပေါက်ဖွားလာတာဖြစ်တယ်။ ငါကိုယ်တိုင်လည်း ဆင်းရဲတယ်။ အဲဒီတော့ ဆင်းရဲတွင်းက တက်ဖို့ နည်းလမ်းဟာ အလုပ်လုပ်တဲ့ နည်းလမ်းပဲ ရှိတယ်ဆိုတာ ငါနားလည်တယ်။ ဒါကြောင့် အလုပ်လုပ်ဖို့ အမြဲကြိုးစားတယ်။ နောက်တစ်ခုက ငါ့ဟာငါ သစ္စာဆိုထားတယ်။ "ဘာမှ မလုပ်ရတဲ့နေ့ဟာ ဘာမှမစားတဲ့နေ့ပဲ" လို့ သစ္စာဆိုထားတယ်ကွ။ မင်းတို့က ငါ့ကို အလုပ်လုပ်တာကို သနားကြတယ်။ အဲဒါကြောင့် အလုပ်မလုပ်နိုင်အောင် ပစ္စည်းတွေ ၀ှက်ထားကြတယ်။ အဲဒီနေရာမှာ သနားရာမရောက်ဘဲနဲ့ အစာငတ်အောင် လုပ်သလိုဖြစ်သွားတာကွ.."လို့ ရှင်းပြလိုက်တဲ့အခါ တပည့်အားလုံးဟာ စိတ်မကောင်းဖြစ်ကြရတယ်။

နောက်နောင် အလုပ်လုပ်တာကို မကန့်ကွက်ပါဘူးလို့လည်း ကတိပြုကြတယ်။ အဲဒီအခါမှာ ဆရာလုပ်တဲ့လူက "မင်းတို့လည်း အဲဒီသစ္စာမျိုး ပြုထားသင့်တယ်"လို့ အကြံပေးတယ်။ အဲဒါကြောင့် တပည့်အားလုံးဟာ "ဘာမှမလုပ်ရင် ဘာမှမစားပါဘူး ဘုရား"လို့ ဘုရားရှေ့မှာ သစ္စာပြုကြတယ်။ အဲဒီအချိန်ကစလို့ အဘိုးကြီးရဲ့ တပည့်တွေဟာ တစ်ခုမဟုတ်တစ်ခု အလုပ်လုပ်နေကြတော့လေသတည်း။

No comments:

Post a Comment

 
Web Statistics