Friday, July 31, 2009

မိုးကြိုးပစ်ခြင်း


အခုတလော ဂျာနယ်၊ သတင်းစာတွေမှာ မိုးကြိုးပစ်ခံရတဲ့အကြောင်းတွေ အတော်လေးများတာ တွေ့ရတယ်။ တစ်ချို့က လယ်စိုက်နေရင်း၊ တစ်ချို့က လမ်းလျှောက်နေရင်း၊ တစ်ချို့က စက်ဘီးစီးနေရင်း မိုးကြိုးပစ်ခံရလို့ သေသွားကြတာကို တွေ့ရတယ်။ အဲဒါကြောင့် မိုးကြိုးနဲ့ပတ်သက်တဲ့ အကြောင်းအရာတစ်ခုကို ဝေငှလိုက်ပါတယ်။ ဘယ်စာအုပ်ထဲက ပြန်ကူးရေးပေးထားတာလဲလို့ မေးလာရင် ဖြေရမှာ နည်းနည်းခက်ပါတယ်။ မသိလို့မဟုတ်ပါဘူး။ မဖြေချင်လို့ပါ။ ဘာကြောင့်မဖြေချင်ရတာလဲဆိုတော့ တရုတ်ပြည် ကလေးလူငယ်ထုတ်ဝေရေးဌာနမှ ထုတ်ဝေတဲ့ SHI WAN GE WEISHENME စာအုပ်မှ ဘာသာပြန်ဆိုထားတဲ့ ကြည်ကြည်မာ ရဲ့ အဘယ်ကြောင့် တစ်သိန်း စာအုပ်က ပြန်ကူးပေးထာတာမို့ပါ။ တရုတ်ပြည်က ကလေးတွေအတွက် ထုတ်ထားတဲ့စာအုပ်ကို မြန်မာပြည်အတွက် ဘာသာပြန်ထားတာကို မြန်မာကလေးတွေဖတ်မဖတ်တော့ မသိပါဘူး။ အဘယ်ကြောင့်တစ်သိန်း စာအုပ်ထဲမှာ ကျွန်တော်ကိုယ်တိုင် သိသလိုလို မသိသလိုလို ဖြစ်နေတဲ့အကြောင်းအရာက ၁၀ ပုံ ၁ ပုံလောက် ပါနေတဲ့အတွက် တရုတ်ပြည်က ကလေးတွေကများ ငါ့ထက် ပိုသိနေကြသလားမသိဘူးဆိုပြီး မျက်နှာရော၊ နားရွက်ပါ ပူသွားပါတယ်။ နောက်တစ်ဆက်တည်း ငါ့ထက်ပိုသိတဲ့ ကလေးတွေ တရုတ်ပြည်မှာ ဘယ်လောက်တောင်များနေပြီလဲဆိုတဲ့ အတွေးက ကျွန်တော့်ကို ပူစပ်ပူလောင်ဖြစ်စေခဲ့ပါတယ်။

 

အဘယ်ကြောင့် မိုးကြိုးပစ်တဲ့အခါမှာ အထီးတည်းဖြစ်ပြီး မြင့်မားတဲ့အရာဝတ္ထုကို ထိမှန်တတ်တာလဲ

 

မိုးရွာ မိုးကြိုးပစ်မယ့် တိမ်ရဲ့အောက်ပိုင်းမှာ လျှပ်စစ်ဓာတ်ပါလာတယ်။ အဲဒီလျှပ်စစ်ဓာတ်ဟာ မြေပြင်ကို တုံ့ပြန်အောင် ဆွဲဆောင်နိုင်တယ်။ မြေပြင်ကို တိမ်အောက်ပိုင်းရှိ လျှပ်စစ်ဓာတ်နဲ့ သဘောချင်းမတူတဲ့ လျှပ်စစ်ဓာတ် ဖြစ်ပေါ်လာစေတယ်။ တိမ်အောက်ပိုင်းမှာ ဓာတ်ဖိုဆောင်ရင် မြေပြင်က ဓာတ်မ ဆောင်မယ်။ တိမ်အောက်ပိုင်းက ဓာတ်မဆောင်ရင် မြေပြင်က ဓာတ်ဖိုဆောင်မယ်။ အဲဒီလို မြေပြင်ကဆောင်တဲ့ လျှပ်စစ်ဓာတ်ကို တုံ့ပြန်လျှပ်စစ်ဓာတ်လို့ ခေါ်တယ်။

အဲဒီ တုံ့ပြန်လျှပ်စစ်ဓာတ်ဟာ အ၀န်းအ၀ိုင်းသေးသေးမှာဆိုရင် မြေပြင်ကဟာနဲ့ သဘောအတူတူပဲ။ ဥပမာ - အားလုံး ဓာတ်ဖိုချည်း သို့မဟုတ် အားလုံး ဓာတ်မချည်းပဲ။ သဘောတစ်ခုတည်း ဆောင်တဲ့ဓာတ်ဟာ အပြန်အလှန် တွန်းဖယ်တယ်။ ရလဒ်က လျှပ်စစ်ဓာတ်ကို မြေပြင်ပေါ်မှာ အသစ်တစ်ဖန် ပြန်လည်ဖြန့်ကျက်စေတယ်။ အဲဒီ တွန်းဖယ်အားဟာ မြေပြင် ဦးတည်ချက်အရ အကွေ့အကောက်ကြီးတဲ့ မြေပြင်ဟာ ညီညာတဲ့ မြေပြင်ထက်ငယ်တယ်။ ဒါကြောင့် လျှပ်စစ်ဓာတ်အားဟာ မြေပြင်အကွေ့အကောက်များတဲ့နေရာကို ရောက်တာများတယ်။ ဒီတော့ မြေပြင်အကွေ့အကောက်များတဲ့ နေရာမှာ တုံ့ပြန်လျှပ်စစ်ဓာတ် ပိုများမယ်။ ပိုစိပ်မယ်။

မြင့်မားတဲ့ အရာဝတ္ထုဟာ ၎င်းကိုယ်နှိုက်မှာ မြေပြင်ရဲ့ တစ်စိတ်တစ်ပိုင်းဖြစ်တယ်။ ၎င်းက မြေပြင်ပေါ် ချွန်ထွက်နေတဲ့အတွက် ၎င်းဟာ မြေပြင်ပေါ်က အကွေ့အကောက်ဆုံးအပိုင်း ဖြစ်နေတယ်။ ဒါကြောင့် မြေပြင်ကို မိုးရွာ၊ မိုးကြိုးပစ်မယ့် တိမ်က ဆွဲဆောင်မှုကြောင့် လျှပ်စစ်ဓာတ် ဖြစ်ပေါ်လာတဲ့အခါမှာ ချွန်ထွက်နေတဲ့ အရာဝတ္ထုပေါ်မှာ တုံ့ပြန်လျှပ်စစ်ဓာတ်တွေ စုနေတယ်။

ချွန်ထွက်နေတဲ့ အရာဝတ္ထုဆောင်တဲ့ လျှပ်စစ်ဓာတ်ဟာ မြေပြင်ထက်များတဲ့အတွက် လျှပ်စီးကို ဆွဲဆောင်နိုင်အား ကြီးတယ်။ ဒါကြောင့် လျှပ်စီးကို အလွယ်တကူ ဆွဲယူလို့ရတယ်။

ဒါကြောင့် မိုးကြီးလေကြီး ကျတဲ့အခါမှာ မြင့်မားချွန်ထွက်နေတဲ့အရာဖြစ်တဲ့ အလံတိုင်၊ အပင်မြင့်၊ မျှော်စင်၊ မီးခိုးခေါင်တိုင်၊ ဓာတ်တိုင်တွေအောက်မှာ သွားမပုန်းရဘူး။ အဲဒီနေရာတွေဟာ လျှပ်စီးက အလည်လာချင်ဆုံးနေရာတွေ ဖြစ်လို့ပဲ။

ဒါပေမယ့် လူတွေဟာ မြင့်မားတဲ့ အရာဝတ္ထုတွေရဲ့ အဲဒီထူးခြားချက်ကို အသုံးပြုပြီး အဆောက်အအုံတွေကို မိုးကြီးမပစ်အောင် ကာကွယ်တယ်။ အဲဒါ မိုးကြိုးလွှဲပဲ။

မိုးကြိုးလွှဲဆိုတာ ထိပ်ပိုင်းက အဆောက်အအုံထက် မြင့်ပြီး အောက်ပိုင်းက မြေကြီးနဲ့ဆက်နေတဲ့ သတ္ထုပြားဖြစ်တယ်။ ၎င်းက ၎င်းအနီးဝန်းကျင်ရှိ အောက်ကိုဆင်းတဲ့ လျှပ်စီးကို မိမိဆီ ဆွဲယူတယ်။ မိမိကိုယ်ကို လျှပ်စီးသွားလမ်းကြောင်းလုပ်ပြီး လျှပ်စီးကို  ၎င်းကတစ်ဆင့် မြေထဲဝင်သွားစေတယ်။ ဒီတော့ မူလက အဆောက်အအုံကို ပစ်မယ့် မိုးကြိုးဟာ လမ်းခုလတ်မှာကွေ့သွားတော့ အဆောက်အအုံကို မထိတော့ဘူးပေါ့။

(၀မ်ဖုံဖေး)

No comments:

Post a Comment

 
Web Statistics