Monday, August 31, 2009

နိုင်ငံရေးအခန်းကဏ္ဍတွင် - ကိုဝမ်း


နိုင်ငံတစ်နိုင်ငံ၏ နိုင်ငံရေးအခန်းကဏ္ဍတွင် ပြည်သူသည်သာ အဓိကကျသည်။ ပြည်သူ၏ ဆုံးဖြတ်မှုသည်သာ အဓိကဖြစ်သည်။ ပြည်သူ၏ ကဏ္ဍကလွဲ၍ မည်သူမှမရှိ။ ပြည်သူ၏အပေါ်တွင် မည်သူမှ မရှိစေရ။ နိုင်ငံတစ်နိုင်ငံကို ပြည်သူနှင့် ဖွဲ့စည်းထားသည်။ တစ်ခါတုန်းကတော့ လုပ်သားပြည်သူဟု ခေါ်ဝေါ်ခဲ့ဖူးသည်။ လုပ်သားပြည်သူခေါ်ခေါ် ပြည်သူဟုပဲခေါ်ခေါ် လူထုလို့ပဲသုံးသုံး ဒီနိုင်ငံ၏ ရေမြေပေါ်တွင် မှီတင်းနေထိုင်ကြသူများသာ ဖြစ်သည်။

ယင်းပြည်သူဆိုရာတွင် တောင်သူလယ်သမား၊ အလုပ်သမား၊ အစိုးရ၀န်ထမ်း (၀ါ) နိုင်ငံ့ဝန်ထမ်း၊ အသိပညာရှင်၊ အတတ်ပညာရှင်၊ ကျောင်းသူကျောင်းသား၊ လက်လုပ်လက်စား၊ ခေါင်းရွက်ဗျပ်ထိုးဈေးသည်အားလုံး ပါဝင်သည်။ အားလုံးသည် ဒီနိုင်ငံအတွက် အလုပ်လုပ်နေကြသူများ ဖြစ်သည်။ လယ်သမားအား ကိုယ့်လယ်ကိုယ်ထွန်၊ ကိုယ့်စပါး ကိုယ်စိုက်၊ စပါးရောင်းရတဲ့ငွေ ခင်ဗျားပဲရတာပဲဟု ပြော၍မရ၊ လယ်သမား စပါးမစိုက်လျှင် တစ်နိုင်ငံလုံး ငတ်သွားမည်။ အလားတူ ခေါင်းရွက်ဗျပ်ထိုးဈေးသည်အား ကိုယ့်ပိုက်ဆံနှင့်ကိုယ် ရင်းနှီးပြီးရောင်း၊ အမြတ်ရတော့ ခင်ဗျားပဲဟု ပြော၍မရ။ ဈေးသည်ဈေးရောင်းနေခြင်းသည် နိုင်ငံ၏ လိုအပ်ချက်တစ်ခုကို လုပ်ကိုင်နေခြင်းဖြစ်သည်။ ရုံးတွေ၊ အဆောက်အအုံတွေ စောင့်တဲ့လုံခြုံရေး၊ စာတွေလိုက်ပို့ရတဲ့ စာပို့လုလင်၊ ရုံးတွင်းတောက်တိုမယ်ရလုပ်ရတဲ့ ရုံးလုလင်ခေါ် မင်းစေကအစ မလိုအပ်ဘဲ ထားနေသည်မဟုတ်။ လုပ်ငန်းလိုအပ်ချက်အရသာ ခန့်ထားကြခြင်းဖြစ်သည်။ လူတိုင်းလူတိုင်းသည် နိုင်ငံအတွက် အရေးပါသည်။ လူတိုင်းလူတိုင်း ကျရာတာဝန်ထမ်းရွက်နေခြင်း ဖြစ်သည်။

ဤကဲ့သို့ လုပ်ငန်းအလွှာအသီးသီးရှိ လူပုဂ္ဂိုလ်အသီးသီးတို့သည် မိမိတို့၏ ကျရာတာဝန်ထမ်းနေခိုက် နိုင်ငံရဲ့ နိုင်ငံရေးအခန်းကဏ္ဍ၀ယ် ဤအဖွဲ့အစည်းက မပါ၍မရ။ အဓိကကျသည်။ ဟိုအဖွဲ့အစည်းက မပါ၍မရ။ အဓိကကျသည် ဆိုသော အသုံးအနှုန်းမျိုးကို သုံးစွဲခြင်း မပြုစေလိုပါ။ တစ်ဖွဲ့တစ်စည်းကိုရည်ညွှန်း မီးမောင်းထိုးပေးခြင်းသည် ကျန်ကဏ္ဍအသီးသီး လူ့အဖွဲ့အစည်းတွေအား မှေးမှိန်အောင် ပြုလုပ်လိုက်ခြင်းသာဖြစ်သည်။ သေးသိမ်အောင် ပြုလုပ်လိုက်ခြင်းသာဖြစ်သည်။

ထိုသူတွေပြောသည့် နိုင်ငံရေးအခန်းကဏ္ဍဆိုသည်က နိုင်ငံရေးဦးဆောင်အခန်းကဏ္ဍကို ပြောခြင်းဖြစ်သည်။ ထို့ကြောင့် နိုင်ငံရေးဆိုသောစကားကစ၍ ရှင်းလိုပါသည်။ နိုင်ငံရေးဆိုတာ ပြည်သူ့အရေးဖြစ်သည်။ ဖွဲ့စည်းပုံတွေ၊ တစ်ပါတီတွေ၊ ပါတီစုံတွေ၊ ရွေးကောက်ပွဲတွေ၊ ပါလီမန်တွေ ဒါတွေက နည်းဗျူဟာသာဖြစ်သည်။ မဟာဗျူဟာသည် ပြည်သူလူထု၏ လူမှုဘ၀မြင့်မားရေးဖြစ်သည်။ မည်သည့်ဖွဲ့စည်းပုံကိုမဆို ပြည်သူလူထုက အတည်ပြုပေးရသည်။ ပြည်သူလူထု အတည်ပြုပေးမှ တရားဝင်သည်။ သို့မဟုတ် ပြည်သူက ရွေးကောက်ပွဲနှင့် ရွေးချယ်တာဝန်ပေးထားသော လွှတ်တော်ကိုယ်စားလှယ် (ပါလီမန်အမတ်)တွေနှင့် ဖွဲ့စည်းထားသည့် ပါလီမန်က အတည်ပြုပေးရသည်။ သို့မှတရားဝင် ဖြစ်သည်။

တစ်ပါတီစနစ်ကျင့်သုံးသော နိုင်ငံဖွဲ့စည်းပုံပဲကြည့်ကြည့်၊ ပါတီစုံစနစ်ကို ကျင့်သုံးသော နိုင်ငံပိုင် ဖွဲ့စည်းပုံပဲကြည့်ကြည့်၊ နိုင်ငံတော်အာဏာသည် ပြည်သူ့ကိုယ်စားလှယ်များနှင့် ဖွဲ့စည်းသောပါလီမန် သို့မဟုတ် လွှတ်တော်မှာ အခြေစိုက်သည်။ ၁၉၁၇ ခုနှစ်မှသည် ၁၉၉၁ ခုနှစ်အထိ တည်တံ့ခဲ့သော ဆိုဗီယက်ယူနီယံမှာပဲကြည့်ကြည့်၊ ယခင်နှင့်ယခု တစ်ပါတီစနစ်ကို ကျင့်သုံးသော တရုတ်ပြည်နှင့် ဗီယက်နမ်မှာပဲကြည့်ကြည့်၊ ကမ္ဘာ့အကြီးဆုံး ဒီမိုကရေစီနိုင်ငံ အိန္ဒိယနှင့် အခြားပါတီစုံစနစ် ကျင့်သုံးသည့် နိုင်ငံတွေမှာပဲကြည့်ကြည့်၊ အစ္စလာမ်မစ်ဒီမိုကရေစီနိုင်ငံမှာပဲကြည့်ကြည့် ပြည်သူက မဲပေးရွေးချယ်လိုက်သော ကိုယ်စားလှယ်တွေနှင့် ဖွဲ့စည်းထားသည့် လွှတ်တော် (၀ါ) ပါလီမန်သည် နိုင်ငံ၏ နိုင်ငံရေးအခန်းကဏ္ဍကို ဦးဆောင်ဆုံးဖြတ်သည်။ ပြည်သူ့လွှတ်တော် ကိုယ်စားလှယ်ဆိုသော နိုင်ငံရေးသမားများသည်သာ ယင်းနိုင်ငံကို ဦးဆောင်သည်။ မသက်ဆိုင်သောကဏ္ဍက ပုဂ္ဂိုလ်တွေမပါဝင်။ ဒါက ပြည်သူ၏ ဆုံးဖြတ်ချက်ဖြစ်သည်။

ပါတီစုံနိုင်ငံရေးတွင် လခစားနိုင်ငံ့ဝန်ထမ်း (၀ါ) အစိုးရအမှုထမ်းသည် နိုင်ငံရေးပါတီများနှင့် ကင်းရှင်းအောင်နေရသည်။ ပါဝင်ပတ်သက်ခြင်း မရှိရ။ သူ၏အလုပ်က မိမိ၏တာဝန်ကို သန့်ရှင်းကျေပွန်စွာ ထမ်းဆောင်ရေးသာဖြစ်သည်။ မဲပေးရန် ကြုံလာသော် နိုင်ငံသားအခွင့်အရေးနှင့်အညီ လွတ်လပ်စွာ ဆုံးဖြတ်၍ မဲပေးခွင့်ရှိသည်။ မဲမပေးခွင့်ရှိသည်။ မဲပေးပါက မိမိကြိုက်နှစ်သက်ရာပါတီကို ပေးခွင့်ရှိသည်။ သူ့အား မဲမပေးမနေရဟူ၍လည်းကောင်း၊ မဲမပေးရဟူ၍လည်းကောင်း၊ ထောက်ခံမဲပေးပါဟူ၍လည်းကောင်း၊ မည်သူတစ်ဦးတစ်ယောက်ကမှ တိုက်တွန်းဖိအားပေး အကျပ်ကိုင်ခွင့်မရှိ။ အကယ်၍ ဤသို့ပြုသူသည် နိုင်ငံသားတစ်ဦး၏ အခွင့်အရေးကို ချိုးဖောက်သူဖြစ်သည်။ ပြစ်မှုမြောက်သည်။

အစိုးရအဖွဲ့ကို ပြည်သူက ရွေးချယ်သော လွှတ်တော်ကိုယ်စားလှယ်များနှင့် ဖွဲ့စည်းထားသော ပါလီမန်က ဖွဲ့စည်းပေးခြင်း ဖြစ်သည်။ နီသောအစိုးရ၊ ဖြူသောအစိုးရ၊ ၀ါသောအစိုးရဟူသည် နိုင်ငံ့ဝန်ထမ်းလခစားနှင့် သက်ဆိုင်ခြင်းမရှိပါ။ ပြည်သူ၏ ဆန္ဒနှင့်အညီ ဖွဲ့စည်းထားသော မည်သည့်အစိုးရမဆို၏အောက်တွင် မိမိ၏တာဝန်ကို ကျေပွန်စွာ ထမ်းဆောင်ရန်သည် လခစားနိုင်ငံ့ဝန်ထမ်း၏ အလုပ်ဖြစ်သည်။

( The Voice Weekly ဂျာနယ် အတွဲ ၅၊ အမှတ် ၄၃ မှ ပြန်လည်ကူးယူဖော်ပြပါသည် )

No comments:

Post a Comment

 
Web Statistics