ဗီဒီယိုဇာတ်ကားတွေတုန်းကတော့ ရန်ကုန်ကလူတွေထက် အမြဲတမ်း ဦးအောင်ကြည့်ခဲ့ရတာပေါ့။ ဒါပေမယ့် ရုပ်ရှင်ဇာတ်ကားကျတော့ ရန်ကုန်မှာ ကြည့်တဲ့လူကုန်လောက်တော့မှ နယ်တွေက ကြည့်ကြရတယ်။ ဒီနေ့တော့ ကျွန်တော်တို့မြို့လေးမှာ ရုပ်ရှင်ဇာတ်ကားသစ် ရုံတင်ပါတယ်။ နမူနာကြည့်ရကတည်းက ရုံတင်ရင် သေချာပေါက် သွားကြည့်ရမယ့် ဇာတ်ကားအဖြစ် တေးထားလိုက်တာပေါ့။ ရန်ကုန်မှာ ရုံတင်နေတာက ကြာလှပြီ။ ကျွန်တော်တို့နယ်တွေဆီကိုကျ ရောက်နိုင်ခဲလိုက်တာဗျာ။ လူချင်းအတူတူတောင် နေရာဒေသအပေါ်မှာမူတည်ပြီး ရရှိတဲ့အခွင့်အရေးတွေ မတူကြတော့ စိတ်ထဲမှာ တစ်မျိုးဖြစ်မိတယ်။
ဒီနေ့မှ စပြီးရုံတင်တာဆိုတော့ နေရာအတွက်က သိပ်ပြီးစိတ်ချရတာမဟုတ်ဘူး။ အဲဒါကြောင့် နေ့လည်ထမင်းစားပြီးကတည်းက ၀ီရိယစိုက်ပြီး လက်မှတ်သွားဝယ်ထားလိုက်တယ်။ အတူလိုက်ကြည့်ဖို့ အရင်ကတည်းက မဲဆွယ်ထားပြီးသား သူငယ်ချင်းတွေအတွက်ပါ လက်မှတ်ဝယ်ထားလိုက်တယ်။ ထင်တဲ့အတိုင်းပါပဲ။ ကျွန်တော်တို့ကြည့်နေကျနေရာကို မရပါဘူး။ ဘေးအစွန်နားတွေမှာပဲရတယ်။ ကျန်တာတွေက လူပြည့်သွားပြီတဲ့။ အင်းပေါ့လေ… ဘယ်တတ်နိုင်မလဲ။ ကျွန်တော်ကိုက ဒီနေ့ကြည့်ချင်နေတာကိုး။ ရတဲ့နေရာကိုပဲ ၀ယ်လိုက်ပါတယ်။
သြော်… ကျွန်တော်တို့ဆီမှာက တစ်ရက်ကို (၃)ပွဲ ပြပါတယ်။ မနက်တစ်ပွဲ၊ နေ့လည်တစ်ပွဲ၊ ညပိုင်းတစ်ပွဲ ဆိုပါတော့။ ကျွန်တော်တို့က ညပွဲကြည့်ကြတာပါ။
ဇာတ်ကားအမည် - သူငယ်ချင်းယောက္ခမ
စိန်ဌေးရုပ်ရှင်ထုတ်လုပ်ရေး
ဇာတ်လမ်း - သက်ဇော်ကို
ဇာတ်ညွှန်း - ကိုရွှေမိုးသက်
ဒါရိုက်တာ - ကိုဇော် (အရုဏ်ဦး)
သရုပ်ဆောင်များ - လွင်မိုး၊ ကျော်ရဲအောင်၊ စိုးမြတ်သူဇာ၊ မိုးဟေကို၊ ကိုပေါက်၊
ဇာတ်လမ်းအကျဉ်း
သူငယ်ချင်းကို ယောက္ခမတော်ရတဲ့အခါ ဘယ်လိုတွေဖြစ်ရတယ်ဆိုတာကို မြူးမြူးကြွကြွ ရိုက်ကူးတင်ပြထားတာပါ။
ဝေဖန်သုံးသပ်ချက်
- ဟက်ဟက်ပက်ပက် ရယ်မောလိုက်ရတဲ့အတွက် ကြည့်ပြီးတဲ့အချိန်မှာ ပေါ့ပါးလန်းဆန်းသွားပါတယ်။ ဘာသောကမှ ရှိမနေဘဲ ပျော်ရွှင်တဲ့စိတ်ကလေးက ရင်ကိုလွှမ်းမိုးထားပါတယ်။
- ရယ်ရတာလည်း မပြောနဲ့လေ။ တကယ့်အတွဲတွေ စုမိနေတဲ့ဇာတ်ကား ဆိုပါတော့။ ပထမအတွဲက ကိုရွှေမိုးသက်နဲ့ ကိုဇော်(အရုဏ်ဦး)၊ ဒုတိယအတွဲက ကျော်ရဲအောင် နဲ့ လွင်မိုး၊ တတိယအတွဲက စိုးမြတ်သူဇာ နဲ့ မိုးဟေကို
- ဒီမင်းသားတွေကို ဘာကြောင့် သရုပ်ဆောင်ခ ရာဂဏန်းချီပြီး ပေးရသလဲဆိုတာကို ဒီကားက မီးမောင်းထိုးပြသွားသလိုပါပဲ။
- ဇာတ်ကားတစ်ခုလုံးရဲ့ ၈၀ ရာခိုင်နှုန်းဟာ ဘယ်သူမှ မပါဘဲ လွင်မိုး၊ ကျော်ရဲအောင်၊ စိုးမြတ်သူဇာ၊ မိုးဟေကို တို့လေးယောက်တည်းနဲ့ ဇာတ်တည်ထားတာပါ။ ဒါပေမယ့် စောစောကပြောသလို ဒီလေးယောက်တည်းနဲ့ပဲ ဇာတ်ကားတစ်ခုလုံးကို ထိန်းသွားတာဟာ သူတို့ရဲ့ အရည်အချင်းပါ။
- ဇာတ်လမ်းရေးတဲ့လူကို ချီးကျူးမိပါတယ်။ အပြင်မှာ တကယ်ရှိတာ၊ မရှိတာထက် ပရိသတ်တွေ စိတ်ဝင်စားအကြိုက်တွေ့စေမယ့် ခပ်ဆန်းဆန်း ဇာတ်လမ်းတစ်ခုကို ဖန်တီးနိုင်ခဲ့တာနဲ့တင် ချီးကျူးသင့်ပါတယ်။
- ကိုရွှေမိုးသက်နဲ့ ကိုဇော်(အရုဏ်ဦး) အတွဲကတော့ ဗီဒီယိုဇာတ်ကားတွေမှာကတည်းက ကျွန်တော်ကြိုက်ပြီးသားမို့ အထူးအထွေ ချီးကျူးမနေတော့ပါဘူး။ သူတို့နှစ်ယောက်တွဲရင် ဇာတ်ကားတွေ ကောင်းတတ်ပါတယ်။ တကယ့်ဇာတ်အိမ်ခိုင်ခိုင်မှလည်း သူတို့နှစ်ယောက် တွဲရိုက်တတ်တာကိုလည်း သတိထားမိပါတယ်။
- ဒီဇာတ်ကားရဲ့ အဓိကသရုပ်ဆောင် (၄)ယောက်ကို ဘယ်လိုပြောရမှန်းကို မသိတော့ပါဘူး။ သူတို့ပြောသမျှ လုပ်သမျှကို ပရိသတ်က လိုက်ရီနေရတာ နားကိုမနားရပါဘူး။
- မိုးဟေကိုတစ်ယောက်တော့ တကယ့်ဒိတ်ဒိတ်ကျဲတွေကြားမှာ ငုပ်ဦးမှာပဲလို့ တွေးခဲ့မိတာ တက်တက်စင်အောင် လွဲသွားတယ်။ ဒီဇာတ်ကားထဲက မိုးဟေကိုရဲ့ သရုပ်ဆောင်မှုတွေကိုကြည့်ပြီး သူ့ခရေဇီတွေကတော့ ရင်တွေခုန်ကြဦးမှာပါပဲ။ စိုးမြတ်သူဇာလို ရုပ်ရှင်ကဝေနဲ့အပြိုင် သူ့ဇာတ်ရုပ်ကိုသူ နိုင်အောင်ကသွားတဲ့ မိုးဟေကိုအတွက် ဒီဇာတ်ကားမှာတော့ အမှတ်ပြည့်ပေးမိပါတယ်။
- ဒီဇာတ်ကားတစ်ခုလုံးမှာ ကျွန်တော်သဘောအကျဆုံးက ကျော်ရဲအောင်နဲ့ စိုးမြတ်သူဇာပါ။ ဘယ်သူပြောပြော ရယ်နေရတာမှန်ပေမယ့် သူတို့နှစ်ယောက်ကတော့ သဘာဝကျလွန်း၊ သရုပ်ဆောင်တတ်လွန်းလှပါတယ်ဗျာ။ အထူးသဖြင့် စိုးမြတ်သူဇာရဲ့ မျက်နှာအမူအရာ၊ လေယူလေသိမ်းတွေဟာ တကယ့်ကို သတိမထားမိဘဲ မနေနိုင်အောင်ဖြစ်စေမယ့် သရုပ်ဆောင်မှုတွေပါပဲ။
- အတင်းကာရော ပရိသတ်ကို ကလိထိုးတဲ့ဟာသတွေမပါ၊ ခါးအောက်ပိုင်းပြက်လုံးတွေမပါဘဲ တစ်ကားလုံး ရယ်မောပျော်ရွှင်ရအောင် တင်ပြပေးသွားနိုင်တာကိုက ဒီဇာတ်ကားရဲ့ ထူးခြားချက်ပါ။
- ဟာသကားအများစုက တစ်ကားလုံး တအုံးအုံးရယ်မောခိုင်းပြီး ဇာတ်သိမ်းကျတော့မှ ပြီးစလွယ် သိမ်းတတ်ကြပါတယ်။ တစ်ကားလုံးကောင်းလာပြီးကာမှ ဇာတ်သိမ်းကြောင့် အောင့်သက်သက်ဖြစ်ခဲ့ရတဲ့ ဇာတ်ကားအတော်များများကို ကြုံခဲ့ရဖူးပါတယ်။ ဒီဇာတ်ကားမှာတော့ ဇာတ်သိမ်းခန်းအထိ ဇာတ်ရှိန်ကို မချဘဲ အမြင့်ဆုံးအနေအထားနဲ့ ဆွဲခေါ်သွားနိုင်ခဲ့၊ ဇာတ်သိမ်းသွားနိုင်ခဲ့တယ်လို့ ဆိုချင်ပါတယ်။
(ဟေ့ကောင်… ဖေဖေ၊ မင်းမညစ်ပတ်နဲ့ကွာ...)
(ငါ့…များ…လား) ဆိုတဲ့ စကားလုံးတွေကတော့ ရုပ်ရှင်ရုံအပြင်ရောက်တဲ့အထိ ပြန်ပြောပြီး ရယ်နေကြရဦးမှာ အသေအချာပါပဲ။
ပေးလိုက်ရတဲ့အချိန်၊ ကုန်ကျရတဲ့ငွေကြေးနဲ့ ထိုက်တန်တဲ့ ရသတစ်ခုခု ရလိုက်တဲ့ သူငယ်ချင်းယောက္ခမ ဆိုတဲ့ ဇာတ်ကားကို အပြေးသာသွားကြည့်လိုက်ဖို့ တိုက်တွန်းလိုက်ပါရစေ။ ကြည့်နေစဉ်ခဏ စိတ်နွမ်းနယ်မှုတွေ၊ သောကတွေ ကင်းဝေးပြီး ရယ်မောပျော်ရွှင်နေရမယ်ဆိုတာကို ဒါရိုက်တာကိုယ်စား၊ ရုပ်ရှင်ထုတ်လုပ်ရေးကိုယ်စား ကျွန်တော်ကပဲ ကြားက၀င် ကိုယ့်ထမင်းကိုယ်စားပြီး အခမဲ့ ကြော်ငြာမောင်း ခတ်လိုက်ရကြောင်းပါ။
ကိုဉာဏ် (ပန်းလောင်မြေ)
၂၀၀၉ ခုနှစ် နိုဝင်ဘာလ ၂၇ ရက်၊ သောကြာနေ့။
ည ၁၁ နာရီ ၄၇ မိနစ်တွင် ပြီး၏။
No comments:
Post a Comment