ကံကြမ္မာနှစ်မျိုး
နိုင်ငံရေးခေါင်းဆောင်တို့တွင် ကံကြမ္မာနှစ်မျိုး ကြုံတွေ့ရတတ်သည်။ ပထမကံကြမ္မာသည် အတွေးအခေါ် အိုင်ဒီယာအသစ်တို့ကို မစဉ်းစားနိုင်သော အခြေအနေဖြစ်သည်။ ပကတိအခြေအနေနှင့် ဆက်စပ်သည့် အတွေးအခေါ်တို့ကို တီထွင်ကြံဆမှုမပြုနိုင်ဘဲ တရားသေ အတွေးအဟောင်းတို့နှင့် ပိတ်မိနေခြင်းဖြစ်သည်။ အယူအဆဟောင်းတို့မှ ရုန်းမထွက်နိုင်ခြင်းဖြစ်သည်။ ဒုတိယကံကြမ္မာသည် မိမိ၌ အကောင်းမမြင်နိုင်သော ဦးနှောက်ရှိနေခြင်းဖြစ်သည်။ မိမိဦးနှောက်သည် Total Negative လုံးလျားအဆိုးမြင်ဝါဒဖြင့် ပိတ်ဆို့ခံနေရခြင်း ဖြစ်သည်။
ထို့ကြောင့် ၂၀၁၀ ပြည့်နှစ်၌ ကျင်းပပြုလုပ်မည့် ရွေးကောက်ပွဲအပေါ် အဆိုးမြင်သည့် ကြိုတင်အစွဲအလမ်းဖြင့် ရွေးကောက်ပွဲကို ဆန့်ကျင်ရန်ဟောသည်။ ဒီမိုကရေစီ အရိပ်အယောင် ထွန်းတောက်ပေါ်လာသောအခါ၌ သဘာဝအတိုင်း တောတွင်းလက်နက်ကိုင် လမ်းစဉ်သည် ဆွဲဆောင်မှုမရှိနိုင်တော့ပေ။ တောတွင်းလက်နက်ကိုင်လမ်းစဉ်သည် ဒီမိုကရေစီ၏ အရိပ်အာဝါသ၌ ပြိုလဲသွားတော့မည်။ လက်နက်ကိုင်လမ်းစဉ်သည် ရွေးချယ်စရာမဟုတ်ပြီ။
လုပ်စား
ဒီမိုကရေစီအရိပ်အာဝါသ၌ နိုင်ငံရေးအင်အားစု အားလုံးသည် အလုပ်,လုပ်ကိုင်ကြမှသာ ဒီမိုကရေစီရှင်သန်မည်။ ထို့အပြင် ဒီမိုကရေစီမှအပ၊ အထူးသဖြင့် ရွေးကောက်ပွဲမှအပ အခြားလမ်းစဉ်တို့ဖြင့် ဒီမိုကရေစီအကြောင်း ပြောနေခြင်းသည် အဓိပ္ပါယ်မဲ့လွန်းရာရောက်သည်။ ရွေးကောက်ပွဲနည်းလမ်းမှအပ အခြားနည်းလမ်းတို့ကို ရွေးချယ်စဉ်းစားလိုခြင်းသည် ဦးနှောက်ချွတ်ခြုံရာ ကျရောက်သည်။ နိုင်ငံရေးအဓိပ္ပါယ်မရှိတော့ဘဲ "လုပ်စား"သည့်သဘော သက်ရောက်မည်။
မျိုရမခက်ပြီ
၂၀၁၀ ပြည့်နှစ်ရွေးကောက်ပွဲသည် ဧကန်တရားဖြစ်ပြီး ပြည်ထောင်စုနေ့ သ၀ဏ်လွှာ၌ နိုင်ငံတော်အေးချမ်းသာယာရေးနှင့် ဖွံ့ဖြိုးရေးကောင်စီဥက္ကဋ္ဌက "… နိုင်ငံသားတို့၏ ကောင်းမွန်သောအနာဂတ်ကို ဖော်ဆောင်နိုင်မည့် လွှတ်တော်ကိုယ်စားလှယ်လောင်း အသီးသီးတို့အား ရွေးကောက်ရန်အများဆန္ဒဖြင့် ဆုံးဖြတ်ကြရမည် ဖြစ်ပေသည်" ဟု ဖော်ပြထားသည်ကို ထောက်ချင့်လျှင် ရွေးကောက်ပွဲသည် ဧကန်ဖြစ်တော့မည်။ သံသယဖြစ်စရာအကြောင်း လုံးဝမရှိပြီ။
ဤဧကန်တရားကို "န"ငယ် အမြီးတိုသည်၊ ရှည်သည်။ "န"ငယ် ၀သည်၊ ပိန်သည်လောက်ကိုသာ ပြောဆိုနေသည်။ ကျင်းပမည့် ရွေးကောက်ပွဲသည် တပ်မတော်စပွန်ဆာဖြင့် ကျင်းပပြုလုပ်ခြင်းဖြစ်၍ မျိုရခက်စရာ အကြောင်းလည်း မပေါ်ပေါက်တော့ပေ။ အဘယ်ကြောင့်ဆိုသော် အခြားရွေးချယ်စရာနည်းလမ်းတို့သည် ဖြစ်နိုင်ချေ မရှိသောကြောင့်ဖြစ်သည်။
စိတ်တွက်
ထို့ကြောင့် ရွေးကောက်ပွဲဥပဒေသ၊ ပါတီများဥပဒေတို့ ထုတ်ပြန်လာသည်အထိ စောင့်ကြည့်ဦးမည်။ တရားသည်၊ မတရားသည်ကို စောင့်ကြည့်အကဲခတ်မည်ဟူ၍ အိုက်တင်ခံခြင်းသည် နိုင်ငံရေးအိုက်တင်မဟုတ်ပေ။ နိုင်ငံရေးတွင် အချိန်သည် အရေးကြီးသည်။ ရနိုင်သည့်အချိန်မှစ၍ ရွေးကောက်ပွဲအတွက် စိတ်ထဲမှ ပြင်ဆင်ကြလိမ့်မည်။ စိတ်တွက် တွက်ကြရလိမ့်မည်။ ဤသို့ စိတ်တွက် Mental Calculation ကို စတင်လုပ်နေကြပြီဟူ၍လည်း မှန်းဆလို့ရသည်။
ဤစိတ်တွက်သည် ပလေယာတို့၏ နေရာအထားအသို သို့မဟုတ် နေရာယူပုံ Positioning ကိုလည်းကောင်း၊ မည်သည့်အကြောင်းအရာက ရွေးကောက်ပွဲကို မည်သို့ ဆုပ်ကိုင်မလဲဟူသော အကြောင်းအရာကိုလည်းကောင်း မူတည်ရလိမ့်မည်ဟုထင်သည်။
အညွှန်း - ကြေးမုံ
အတွဲ (၆) အမှတ် (၁၆)
Monday, February 22-28, 2010
စာမျက်နှာ - ၁၆
No comments:
Post a Comment