မကြာသေးခင်ကာလအတွင်း နိုင်ငံပိုင်လုပ်ငန်းအချို့ကို ပုဂ္ဂလိကကဏ္ဍသို့ လွှဲပြောင်းလုပ်ကိုင်ခွင့် ပေးခဲ့ခြင်းသည် ဈေးကွက်စီးပွားရေး၏ အခြေခံကျသော အချက်တစ်ချက်ဖြစ်ပါသည်။
စီးပွားရေးအကြပ်အတည်းကာလကြီးနှင့် ကြုံတွေ့နေရသော ယနေ့ကာလမျိုးတွင် ကမ္ဘာ့နိုင်ငံအသီးသီးသည်လည်း ထိုအကျပ်အတည်းမှ ရုန်းထွက်နိုင်ရန် အသီးအသကအသက ကြံစည်လုပ်ဆောင်လျက် ရှိကြပါသည်။ အမေရိကန်ပြည်ထောင်စုကဲ့သို့ ကမ္ဘာ့စီးပွားရေး ဦးဆောင်နိုင်ငံကြီးလည်းဖြစ်၊ လက်ရှိစီးပွားရေးအကျပ်အတည်း စတင်ရာ နေရာလည်းဖြစ်သည့် နိုင်ငံမျိုးတွင် ကမ္ဘာကျော် ဘောဂဗေဒပညာရှင် ဂျွန်မေးနတ်ကိန်းစ်၏ သီအိုရီအယူအဆအတိုင်း အစိုးရကဏ္ဍမှနေ၍ ငွေလုံးငွေရင်းများ ပုံအောသုံးစွဲကာ ဈေးကွက်ကို ကယ်တင်ရန် ကြိုးစားလာပါသည်။
၁၉၃၀ ပြည့်လွန်နှစ်များက ဖြစ်ပွားခဲ့သည့် မဟာစီးပွားပျက်ကပ် ကျရောက်စဉ်ကလည်း ကိန်းစ်၏ နည်းနာအတိုင်း ဈေးကွက်ကို ကယ်တင်ခဲ့သည့် သာဓကရှိခဲ့ပြီး ဖြစ်ပါသည်။ ကိန်းစ်၏နည်းနာမှာ အလွယ်ပြောရလျှင် ဈေးကွက်ကို အစိုးရက များများစွက်ဖက်ထိန်းကျောင်းပေးခြင်း ဖြစ်ပါသည်။
သို့သော် ၁၉၈၀ ပြည့်လွန်နှစ်များတွင်မူ ကိန်းစ်နှင့်ခေတ်ပြိုင် အင်ဂလို-သြစတြေးလျန်း ဘောဂဗေဒပညာရှင် ဖရိုက်ဒရစ်ဗွန်ဟေးယက်က နိုင်ငံပိုင်လုပ်ငန်းအများစုကို ပုဂ္ဂလိကသို့ လွှဲနိုင်သမျှလွှဲအပ်ကာ အစိုးရစွက်ဖက်မှုကင်းကင်းဖြင့် ဈေးကွက်သဘောအတိုင်း လွှတ်ပေးထားရန် တစ်နည်းအားဖြင့် အဒမ်စမစ်၏ ကိုယ်ပျောက်လက်သဘောကို အဓိကဇောင်းပေးပါသည်။ ပြောရမည်ဆိုလျှင် ကမ္ဘာ့စီးပွားရေးသည် ခေတ်ကာလ အခြေအနေများအရ ထိုပညာရှင်နှစ်ဦး၏ အယူအဆ အကောက်အယူနှစ်ခုကို တစ်လှည့်စီ အသုံးချနေခြင်းဖြစ်ရာ တစ်ခုချို့ယွင်းသွားလျှင် နောက်တစ်ခုဖြင့် အစားထိုးလာခဲ့သည်ဟု ဆိုရမည်ဖြစ်ပါသည်။
ယနေ့စနစ်တစ်ခုသို့ ပြောင်းရန်တာစူနေပြီဖြစ်သော မြန်မာနိုင်ငံသည်လည်း ဈေးကွက်စီးပွားရေး၏ အခြေခံစရိုက်လက္ခဏာများနှင့် လျော်ညီသော ပြုပြင်ပြောင်းလဲမှုများ ဖော်ဆောင်လျက်ရှိသည်ကို တွေ့ရပါသည်။ မြန်မာနိုင်ငံ၏ အားသာချက်မှာ ရှေ့တွင်သွားနှင့်ပြီးဖြစ်သော နိုင်ငံများစွာတို့ထံမှ သင်ခန်းစာယူစရာ သာဓကများစွာ ရှိနေခြင်းဖြစ်သည်။ အထူးသဖြင့် အချိန်တိုတိုအတွင်း စီးပွားရေးထောင်မတ်လိုသော ရုရှားနှင့် ပိုလန်နိုင်ငံတို့တွင် ဖော်ဆောင်ပြောင်းလဲခဲ့သော ဈေးကွက်ရှော့ခ်ရိုက် ကုထုံးနည်းနာများ၊ ထိုနိုင်ငံတို့ ကြုံတွေ့ခဲ့၊ ကြုံတွေ့ဆဲ အခြေအနေများကို ထောက်ချင့်၍ ဆောင်ရန်ရှောင်ရန်များ အလွယ်တကူ တွေ့ရှိနိုင်ပါသည်။
ဆေးပညာသဘောတွင် လူနာ၏အခြေအနေပေါ်မူတည်ကာ ရေတိုရှော့ခ်ရိုက်ကုထုံးနည်း သုံးမည်လော၊ ရှေရှည်တစ်ဆင့်ပြီးတစ်ဆင့် ကုသသောကုထုံးကို သုံးမည်လော ဆုံးဖြတ်ကြရသည်။ စီးပွားရေးဖွံ့ဖြိုးတိုးတက်ရေး နည်းနာများတွင်လည်း ထိုသို့ပင် ဖြစ်ပါသည်။ နှစ်ပေါင်းများစွာ ရောဂါဘယမျိုးစုံ ၀င်ရောက်နေခဲ့ပြီး နာတာရှည်လူမမာကဲ့သို့ ချည့်နဲ့နေသော ဈေးကွက်မျိုးကိုမူ ရှော့ခ်ရိုက်ကုထုံးနှင့် ကုသရန်ကြိုးစားပါက မလိုလားအပ်သော နောက်ဆက်တွဲ ပြဿနာ အခက်အခဲများစွာ ကြုံရနိုင်ကြောင်း တစ်နည်းအားဖြင့် "ဆေးအတွက်လေး"သွားတတ်သည့် သဘောကို ပြောလိုရင်း ဖြစ်ပါသည်။
ခေတ်ကာလ အခြေအနေများအရ တစ်လှည့်စီ ကျင့်သုံးလာခဲ့သော ဆိုခဲ့ပါ ဈေးကွက်ဖော်ဆောင်ရေး နည်းနာနှစ်ရပ်လုံး အမောဖောက် ဟန်ချက်ပျက်မသွားစေရေး၊ သုံးသင့်သည်ထက် အလွန်အကျွံဖြစ်မသွားစေရေးတို့မှာ Comprehensive ခေါ် တစ်ခုလုံးသဘော လွှမ်းခြုံစဉ်းစားထားသည့် Institution ခေါ် အဖွဲ့အစည်းမူဘောင်များ ခိုင်ခိုင်မာမာ ရှိနေရေးပင် ဖြစ်ပါကြောင်း။
The Voice Weekly Journal
အတွဲ (၆) အမှတ် (၁၆)
Monday, February 22-28, 2010
စာမျက်နှာ - ၄
No comments:
Post a Comment