တော်လှန်ရေးအစိုးရခေတ်

ထို့ကြောင့် အရပ်ရပ် အခြေအနေကို ထိန်းသိမ်း၍ ပြိုကွဲအံ့ဆဲဆဲ ပြည်ထောင်စုကို ပြည်လည်ထိန်းအုပ်ရန် ၁၃၂၄ ခုနှစ် (၁၉၆၂ ခုနှစ်၊ မတ်လ ၂ ရက်နေ့) တွင် တော်လှန်ရေးကောင်စီက နိုင်ငံအုပ်ချုပ်ရေးတာဝန်ကို လွှဲယူ၍ နိုင်ငံကို ထိန်းသိမ်းလိုက်ရလေသည်။ ဗိုလ်ချုပ်အောင်ဆန်းသည် လွတ်လပ်ရေးကို အရယူပြီးလျှင် ဆိုရှယ်လစ်နိုင်ငံ အဖြစ်သို့ရောက်အောင် ထူထောင်ရန် ဆိုရန်တိုဗီလာ စီမံကိန်းများကိုပင် ရေးဆွဲခဲ့ပေသည်။ ဗိုလ်ချုပ်အောင်ဆန်း ကျဆုံးပြီးနောက် ဆိုရှယ်လစ် စီးပွားရေးစနစ်ကိုပင် ဦးတည်ခဲ့သော်လည်း လက်တွေ့အားဖြင့် အကောင်အထည် ပေါ်မလာခဲ့ပေ။ ထို့ကြောင့် တော်လှန်ရေးကောင်စီက ထိန်းသိမ်းခဲ့ပြီးနောက် ဗိုလ်ချုပ်အောင်ဆန်း၏ လမ်းစဉ်အတိုင်း မြန်မာ့ဆိုရှယ်လစ်လမ်းစဉ်ကို ဦးတည်သော တော်လှန်ရေးကောင်စီ၏ ၀ါဒသဘောထား ကြေညာချက်ကို ထိုနှစ် (ဧပြီလ ၃၀ ရက်နေ့) တွင် ထုတ်ပြန်ကြေညာခဲ့လေသည်။

နိုင်ငံလွတ်လပ်ပြီးသော်လည်း စီးပွားရေးနှင့် လူမှုရေးကို ထူထောင်ရန် လိုအပ်နေပေသေးရာ မြန်မာ့ဆိုရှယ်လစ် လမ်းစဉ်ပါတီသည် လုပ်သားပြည်သူ တစ်ရပ်လုံး၏ ပါတီအဖြစ်သို့ စည်းရုံးချီတက်လျက်ရှိသည်။ တော်လှန်ရေးအစိုးရသည် ဆိုရှယ်လစ် စီးပွားရေးစနစ်ကို အောင်မြင်စွာ ထူထောင်နိုင်ရန်အတွက် ဆိုရှယ်လစ် ဒီမိုကရေစီ နိုင်ငံတော်ကို ဖွဲ့စည်းတည်ဆောက်လျက် ရှိပေသည်။ ၁၃၂၅ ခုနှစ်၊ စစ်ကိုင်းခရိုင် အုန်းတောရွာ၌လည်းကောင်း၊ ၁၃၂၆ ခုနှစ်တွင် ဟင်္သာတခရိုင် ဒူးယားကျေးရွာ၌လည်းကောင်း တောင်သူလယ်သမား နှီးနှောဖလှယ်ပွဲများ ကျင်းပ၍ (၁၉၆၃ ခုနှစ်၊ မတ်လ ၂၅ ရက်) တောင်သူလယ်သမား အခွင့်အရေး ကာကွယ်သည့်ဥပဒေ၊ သီးစားချထားရေးဥပဒေနှင့် နည်းဥပဒေတို့ကို ထုတ်ပြန်ခြင်း၊ ပြည်တွင်းငြိမ်းချမ်းရေးအတွက် စေ့စပ်ဆွေးနွေးခြင်း၊ ဉာဏလုပ်သားဖြစ်သော ဂီတ၊ သဘင်၊ ရုပ်ရှင်လုပ်သားများ၏ စည်းရုံးမှုကို အားပေးခြင်း၊ အမျိုးသား စည်းရုံးညီညွတ်ရေးကို ကာကွယ်သည့်ဥပဒေ (၁၉၆၄ ခုနှစ်၊ မတ်လ ၂၈ ရက်) ကို ထုတ်ပြန်ခြင်း၊ ဆိုရှယ်လစ် စီးပွားရေးတည်ဆောက်မှု ကော်မတီကို ဖွဲ့စည်းခြင်း စသည်အားဖြင့် ဆောင်ရွက်ခဲ့လေသည်။ ပညာရေး၊ လူမှုရေး၊ စီးပွားရေး အဖက်ဖက်တွင် ဆောင်ရွက်ချက်များလည်း အများအပြားပင် ရှိလေသည်။ ပြည်သူ့ဒီမိုကရေစီကို စနစ်ကျနစွာ ကျင့်သုံးရန်နှင့် အုပ်ချုပ်ရေးအာဏာကို ပြည်သူလူထုမှ ဆင်းသက်စေရန် မြန်မာ့ဆိုရှယ်လစ် လမ်းစဉ်ပါတီကိုလည်း (၁၉၆၂ ခုနှစ်၊ ဇူလိုင်လ ၄ ရက်) နေ့တွင် တည်ထောင်ခဲ့လေသည်။

*************** စာအုပ် မှတ်တမ်း ***************
လှသမိန်
မြန်မာရာဇ၀င်အကျဉ်း
(တကောင်းခေတ်မှ တော်လှန်ရေးအစိုးရခေတ်အထိ)
စာမူခွင့်ပြုချက်အမှတ် - ၃၁၀၀၄၈၀၆၀၉
စိတ်ကူးချိုချိုစာပေ
ဒုတိယအကြိမ်၊ ၂၀၀၉၊ သြဂုတ်လ။
စာမျက်နှာ ၁၂၆ မျက်နှာ၊ ၁၁.၂ စင်တီ x ၁၈.၃ စင်တီ
စောင်ရေ - ၅၀၀
တန်ဖိုး - ၉၀၀ ကျပ်
********************************************************

မြန်မာရာဇ၀င်အကျဉ်းစာအုပ်ကို ကျွန်တော်ပြန်လည် ကူးယူတင်ပေးခြင်းလုပ်ငန်း ဤတွင်ပြီးဆုံးသွားပါပြီ။ ဤဘလော့ဂ်တွင် တင်ပေးသမျှ ပို့စ်အားလုံးသည် ကျွန်တော်သဘောကျသောကြောင့်သာ တင်ပေးခဲ့ခြင်း ဖြစ်ပါသည်။ ထိုပို့စ်များအနက် မြန်မာရာဇ၀င်အကျဉ်းစာအုပ်ကို ပြန်တင်ပေးခြင်းမှာ အနည်းငယ်ထူးခြားပါသည်။ စိတ်ဝင်စားစရာမကောင်းဘူးဟု ဝေဖန်အကြံပြုသူ များလှသလို၊ ပို့စ်တက်ရင်ပြီးရော တင်ပေးနေတာပဲဟု ထောပနာပြုသူများလည်း မနည်းလှပါ။ အားလုံး၏ ဝေဖန်အကြံပြုချက်များကို လေးစားသော်လည်း ကျွန်တော့်ယုံကြည်ချက်နှင့်ကျွန်တော် ခိုင်မာနေပြီးသားဖြစ်သည့်အတွက် ပြီးဆုံးသည်အထိ တင်ပေးနိုင်ခဲ့ခြင်းကို ယခုအချိန်တွင် ပီတိဖြစ်ရပါသည်။ Brief History of Myanmar ဟူသော သီးသန့်ကဏ္ဍတစ်ခုဖြင့် တင်ပေးခဲ့သော ပို့စ်များအားလုံးသည် မြန်မာလူမျိုးတစ်ဦးအတွက် တစ်ချိန်မဟုတ်တစ်ချိန်တွင် မလွဲမသွေ လိုအပ်လာမည့် အကြောင်းအရာများဖြစ်ပါသည်။ ထိုသို့သော အချိန်မျိုးတွင် ကျွန်တော်တင်ပေးခဲ့သော ပို့စ်များသည် အပြည့်အစုံမဟုတ်သော်လည်း အထိုက်အလျောက် အထောက်အကူပြုမည်၊ အသုံးဝင်မည်မှာ သေချာကြောင်း ကျွန်တော်ယုံကြည်ပါသည်။ အဘယ်ကြောင့်ဆိုသော် ကျွန်တော့်ဘလော့ဂ်သို့ search engine များမှတစ်ဆင့် နေ့စဉ်ရောက်လာကြသော ဘလော့ဂ်ဖတ်သူ အများစုသည် ပုဂံ၊ သီပေါမင်း၊ အနော်ရထာ၊ ဘုရင့်နောင်၊ လွတ်လပ်ရေးခေတ်၊ စသည့်စသည့် သမိုင်းစကားလုံးများကို ရှာဖွေရင်း ရောက်လာနေကြသောကြောင့် ဖြစ်ပါသည်။ သူတို့လိုချင်သည့် အကြောင်းအရာများကို အနည်းငယ်မျှဖြစ်စေ ကျွန်တော့်ဘလော့ဂ်တွင် ဖတ်သွားကြရသည်ဆိုသည့်အသိဖြင့် ကျွန်တော်မည်မျှ ပီတိဖြစ်ရမည်ကို စာဖတ်သူကိုယ်တိုင်ပင် ခံစားကြည့်စေချင်ပါသည်။ ......................... [ကိုဉာဏ်]