ယနေ့ ၂၀၁၀ ပြည့်နှစ် မတ်လ ၂၇ ရက်နေ့သည် (၆၅) နှစ်မြောက် တပ်မတော်နေ့ ဖြစ်ပါသည်။
တစ်ချိန်တစ်ခါက မြန်မာနိုင်ငံသည် အကြောင်းအမျိုးမျိုးကြောင့် သူ့ကျွန်ဘ၀သို့ ကျရောက်ခဲ့ရပါသည်။ မိုင်ပေါင်းများစွာ ဝေးကွာလှသော ကျွန်းနိုင်ငံငယ်လေးတစ်ခုက မိမိတို့နိုင်ငံကို အလွယ်တကူသိမ်းပိုက်သွားသည်မှာ တွေးမိတိုင်း ရင်နင့်စရာကောင်းလှပါသည်။ နိုင်ငံတစ်ခုကို တိုက်ခိုက်သိမ်းပိုက်ရသည်နှင့် မတူအောင်ပင် လွယ်လွန်းခဲ့သည်ဟု မြင်မိပါသည်။ ထိုကာလက ကျွန်ုပ်တို့၏ ဘိုးဘေးဘီဘင်အဆက်ဆက်သည် အသက်ကိုနှင်း၊ သွေးကိုရင်း၍ သူ့ကျွန်ဘ၀မှ လွတ်မြောက်ရေးအတွက် တွန်းလှန်တိုက်ခိုက်ခဲ့၊ တိုက်ပွဲဝင်ခဲ့ကြသည်ကိုလည်း အားလုံးအသိဖြစ်ပါသည်။ ကိုယ့်ထီး၊ ကိုယ့်နန်း၊ ကိုယ့်ကြငှာန်းဘ၀ကို ပြန်လည်ရရှိရန်အတွက် ရရာလက်နက်စွဲ၊ တွေ့ရာနေရာမှ တော်လှန်ပုန်ကန်ခဲ့ကြပါသည်။ သူတို့၏ မျိုးချစ်စိတ်၊ တိုင်းပြည်အတွက် အသက်ပေးဝံ့သည့်စိတ်၊ သူ့ကျွန်မခံစိတ်တို့သည် ချီးကျူးဂုဏ်ယူဖွယ်အတိ ဖြစ်ပါသည်။ အင်အားချင်းမမျှ၊ လက်နက်ချင်းမတူသည့် နယ်ချဲ့အင်္ဂလိပ်တို့ကို ရရာလက်နက် ဓား၊ လှံ၊ လေးမြားတို့ဖြင့် ဆန့်ကျင့်ဝံ့ခြင်းသည် တော်ရုံသတ္တိ၊ တော်ရုံမျိုးချစ်စိတ် မဟုတ်ပါ။ သို့သော် စနစ်တကျ ဖွဲ့စည်းထားသည့် နယ်ချဲ့တပ်မတော်တစ်ခုကို ဆန့်ကျင်တော်လှန်ရာတွင် ခေါင်းဆောင်မည့်သူမရှိ၊ စည်းကမ်းစနစ်တကျမရှိ၊ စည်းလုံးမှုမရှိသည့်အတွက် မအောင်မမြင်ဖြစ်ခဲ့ရသည်ကတော့ ငြင်းမရသည့်အချက် ဖြစ်ပါသည်။
မြန်မာတို့သည် တိုင်းပြည်လွတ်လပ်ရေးအတွက် အသက်စွန့်ဝံ့သည်လည်းမှန်သည်၊ ရရာလက်နက်ဖြင့်လည်း တွန်းလှန်တိုက်ခိုက်သည်လည်း အမှန်ပင်ဖြစ်သည်။ သို့သော် အဘယ့်ကြောင့် နှစ်ပေါင်း တစ်ရာခန့် သူ့ကျွန်ဘ၀တွင်နေရသနည်းဆိုသည့် အဓိကအကြောင်းရင်းကို စဉ်းစားဖို့အတွက် မည်သူကမျှ စိတ်မ၀င်စားခဲ့။ စိတ်ဝင်စားသူတို့ ပေါ်ပေါက်လာသောအခါ နယ်ချဲ့ရန်ကို တွန်းလှန်တိုက်ခိုက်နိုင်ရန်အတွက် တပ်မတော်တစ်ရပ် မဖြစ်မနေ လိုအပ်ကြောင်း သိရှိလာခဲ့သည်။ ထို့ကြောင့်လည်း တပ်မတော်တစ်ရပ် ထူထောင်ရန်အတွက် မဖြစ်မနေလိုအပ်သည်ကို သိရှိနားလည်သော ဗိုလ်ချုပ်အောင်ဆန်းဦးဆောင်သည့် ရဲဘော်သုံးကျိပ်တို့က ထိုင်းနိုင်ငံ၊ ဘန်ကောက်မြို့တွင် ဗမာ့လွတ်လပ်ရေးတပ်မတော်ကို စတင်ဖွဲ့စည်းခဲ့ခြင်း ဖြစ်ပေသည်။
ဗမာ့လွတ်လပ်ရေးတပ်မတော်သည် ဂျပန်နှင့်ပူးပေါင်း၍ အင်္ဂလိပ်နယ်ချဲ့ကို တိုက်ထုတ်ခဲ့ကြသည်။ အင်္ဂလိပ်နယ်ချဲ့ကို တိုက်ထုတ်ရန်အတွက် ဂျပန်ကိုပေါင်းခဲ့ခြင်းဖြစ်သော်လည်း တကယ်တမ်းကျတော့ ကျားထက်ဆိုးသည့် ရှင်ကြီးဖက်ဆစ် ဖြစ်နေခဲ့ပြန်ပါသည်။ အင်္ဂလိပ်ကို တိုက်ထုတ်လို့မှ မပြီးသေးခင် ဂျပန်တို့၏ ရက်စက်ယုတ်မာမှုများကိုပါ မြန်မာတို့ ခံခဲ့ကြရသည်။ အဖြစ်ဆိုးလှပါပေသည်။ သို့သော် ဤတစ်ကြိမ်တွင်မူ ယခင်အင်္ဂလိပ်ကို တွန်းလှန်ပုန်ကန်သကဲ့သို့ ဟိုတစ်နေရာ၊ ဒီတစ်စု တော်လှန်ခြင်းမျိုး မဟုတ်တော့။ မြန်မာတို့တွင် ဗမာ့လွတ်လပ်ရေးတပ်မတော်ဟူ၍ တပ်မတော်တစ်ရပ် ရှိနေပြီဖြစ်သည်။ ဗိုလ်ချုပ်အောင်ဆန်းဦးဆောင် ဗမာ့လွတ်လပ်ရေးတပ်မတော်သည် ဖက်ဆစ်ဂျပန်လက်အောက်မှ လွတ်မြောက်ရေးအတွက် နည်းလမ်းရှာဖွေခဲ့ကြသည်။
မြန်မာ့လွတ်လပ်ရေးအတွက် ကြီးစွာသော အလှည့်အပြောင်းဖြစ်စေမည့် အချိန်အခါသမယသည် ၁၉၄၅ ခုနှစ် မတ်လ ၂၇ ရက်နေ့တွင် ရောက်ရှိခဲ့ပေသည်။ ဗမာ့လွတ်လပ်ရေးတပ်မတော်၏ ဦးဆောင်မှုနှင့်အတူ တစ်ပြည်လုံးတွင် ဖက်ဆစ်ဂျပန်ကို တော်လှန်တိုက်ခိုက်ခဲ့ကြလေသည်။ ဗိုလ်ချုပ်အောင်ဆန်းဦးဆောင်သည့် ဗမာ့တပ်မတော်၏ ပရိယာယ်ကို မရိပ်မိခဲ့သဖြင့် ဂျပန်တို့အနေဖြင့် အထိနာခဲ့ကြသည်။ ဗမာ့တပ်မတော်၏ အစွမ်းအစကို ပြသခွင့်ရလိုက်သည့်ပွဲဟု ဆိုရမည်ဖြစ်ပေသည်။
ထို့ကြောင့်လည်း မြန်မာ့သမိုင်းအတွက် အရေးပါထူးမြတ်လှသည့် ထို မတ်လ ၂၇ ရက်နေ့ကို ဖက်ဆစ်တော်လှန်ရေးနေ့ဟု သတ်မှတ်ဂုဏ်ပြုခဲ့ခြင်း ဖြစ်ပါသည်။ သို့သော် အကြောင်းကြောင်းကြောင့် နောင်အခါတွင် တော်လှန်ရေးနေ့အစား တပ်မတော်နေ့ဟူ၍ ပြောင်းလဲသတ်မှတ်ခဲ့သည်။ မြန်မာ့လွတ်လပ်ရေးအတွက် စွမ်းစွမ်းတမံ ကြိုးပမ်းစွမ်းဆောင်ခဲ့သည့် ဗိုလ်ချုပ်အောင်ဆန်း ဦးဆောင်သည့် တပ်မတော်ကြီးကို ဂုဏ်ပြုခြင်းဖြစ်ပေရာ တပ်မတော်နေ့ဟူသည်လည်း သင့်တော်လှပေသည်။ မြန်မာနိုင်ငံကို ကာကွယ်ဖို့အတွက် တပ်မတော်တစ်ရပ် ခိုင်ခိုင်မာမာရှိကြောင်း ကမ္ဘာသိအောင် ကြွေးကြော်နိုင်သကဲ့သို့ပင် ဖြစ်စေသည်ဟု မြင်မိပါသည်။
ကမ္ဘာ့နိုင်ငံအသီးသီးတွင် မိမိတို့နိုင်ငံကို ကာကွယ်ရန်အတွက် တပ်မတော်များ ဖွဲ့စည်းထူထောင်ထားကြပါသည်။ ယနေ့ခေတ်ကာလတွင် ကျူးကျော်စစ်ကြီးများ ဖြစ်ပွားခြင်းမရှိသလောက် ဖြစ်သော်လည်း နိုင်ငံတစ်ခုအတွက် တပ်မတော်ဟူသည် မရှိမဖြစ်လိုအပ်သည့် အရာတစ်ခုဖြစ်နေဆဲ ဆိုသည်ကတော့ မငြင်းနိုင်သည့်အချက် ဖြစ်ပါသည်။ နိုင်ငံအသီးသီးသည် မိမိတို့တပ်မတော်များကို အင်အားကြီးထွားအောင်၊ ခေတ်မီနေအောင် တည်ဆောက်ပြုပြင်လျက် ရှိနေသည်မှာလည်း အားလုံးအသိပင် ဖြစ်ပါသည်။ ခေတ်မီပြီး စွမ်းရည်ပြည့်ဝသည့် တပ်မတော်တစ်ရပ် ရှိခြင်းသည် နိုင်ငံတိုင်းအတွက် ဂုဏ်ယူဝံ့ကြွားစရာ ဖြစ်ပါသည်။ ထို့ကြောင့်လည်း နိုင်ငံအသီးသီးတို့က စစ်ရေးအသုံးစရိတ်များ မြောက်မြားစွာ အကုန်အကျခံ၍ မိမိတို့တပ်မတော်များကို ခေတ်မီတိုးတက်အောင် ဆောင်ရွက်နေကြခြင်း ဖြစ်ပါသည်။
မြန်မာ့တပ်မတော်သည် လွတ်လပ်ရေးကြိုးပမ်းမှုနှင့်ယှဉ်၍ ပေါ်ပေါက်လာခဲ့ခြင်း ဖြစ်ပါသည်။ နယ်ချဲ့ဆန့်ကျင်ရေးတွင်လည်း တပ်မတော်ပါခဲ့သည်။ ဖက်ဆစ်ဂျပန်ကိုလည်း တပ်မတော်ကဦးဆောင်၍ တိုက်ထုတ်ခဲ့သည်။ လွတ်လပ်ရေးရပြီးနောက် နိုင်ငံတည်ငြိမ် အေးချမ်းရေးအတွက်လည်း ပါဝင်ပတ်သက်ခဲ့ရသည်။ ပြည်တွင်းစစ်မီးကိုလည်း တပ်မတော်က ဦးဆောင်၍ ငြိမ်းသတ်နေခဲ့ရသည်။ လွတ်လပ်ရေးရပြီးမှ ကြုံခဲ့ရသည့် ပြည်ပကျူးကျော်မှုများကိုလည်း တပ်မတော်ကပင် ကာကွယ်တိုက်ထုတ်ခဲ့ရသည်။ ၁၉၈၈ ခုနှစ်တွင်လည်း တိုင်းပြည်ပျက်တော့မည့် အန္တရာယ်ကို တပ်မတော်ကပင် ၀င်ရောက်တာဝန်ယူ ကယ်တင်ခဲ့ရသည်။ သူတစ်လူငါတစ်မင်း အုပ်ချုပ်ရေးစနစ်ပျက်ပြားကာ မင်းမဲ့စရိုက်များ လွှမ်းမိုးနေခဲ့သည့် ထိုကာလတွင် မြန်မာနိုင်ငံကို မည်သူကမျှ တာဝန်မယူနိုင်ခဲ့။ မည်သူကမျှ ငြိမ်သက်အောင် မလုပ်ဆောင်နိုင်ခဲ့။ ဆူပူအောင်သာ ဖန်တီးနိုင်ခဲ့ကြသည်။ အေးချမ်းအောင် မည်သူကမျှ မဖန်တီးနိုင်ကြတော့။ ထိုကဲ့သို့ အခြေအနေတွင် တပ်မတော်မှတစ်ပါး မည်သူကမျှ တာဝန်မယူနိုင်သဖြင့် အခြေအနေအရပ်ရပ်အရ တပ်မတော်သည် ၀င်ရောက်တာဝန်ယူခဲ့ရပေသည်။ တပ်မတော်က တာဝန်ယူအုပ်ချုပ်ခဲ့သည်ကို မကျေနပ်ဟုဆိုသူများ ရှိကြပါသည်။ ထိုသူများကို ထိုအချိန်ကသာ တပ်မတော်က တာဝန်မယူလျှင် ဒီလောက်ဆူပူသောင်းကျန်းနေသည့် တိုင်းပြည်ကို မည်သူက တာဝန်ယူမှာလဲ မေးလိုက်တိုင်း ဂဃနဏအဖြေပြန်မဖြေနိုင်ကြပါ။
ယနေ့အချိန်ကာလတွင် တပ်မတော်အစိုးရသည် ချမှတ်ထားသည့် လမ်းညွှန်မြေပုံခုနစ်ရပ်အတိုင်း တစ်လှမ်းချင်း ချီတက်လျက် ရှိပါသည်။ ပြည်သူလူထုက မျှော်မှန်းတောင့်တနေသည့် ခေတ်မီဖွံ့ဖြိုးတိုးတက်သည့် ဒီမိုကရေစီနိုင်ငံတော်ကြီး ဖြစ်ပေါ်လာစေရေးအတွက် စနစ်တကျ အကောင်အထည်ဖော်လျက် ရှိပါသည်။
၂၀၁၀ ပြည့်နှစ်သည် မြန်မာနိုင်ငံအတွက် အလှည့်အပြောင်းနှစ် တစ်ခု ဖြစ်ပါသည်။ ရွေးကောက်ပွဲများကို တပ်မတော်အစိုးရက ဦးဆောင်၍ ကျင်းပပေးတော့မည့် ယခုလို အချိန်အခါမျိုးတွင် ကျရောက်သော "တပ်မတော်နေ့" အခမ်းအနားသည် ထူးခြားလှသည်ဟု ဆိုချင်ပါသည်။ ကြိုက်သည်ဖြစ်စေ၊ မကြိုက်သည်ဖြစ်စေ နိုင်ငံတိုင်းအတွက် တပ်မတော်ဟူသည် မရှိမဖြစ်လိုအပ်ပါသည်။ ထို့ကြောင့် မြန်မာ့တပ်မတော်သည်လည်း ယနေ့ကျရောက်သည့် (၆၅)နှစ်မြောက်မှသည် နောင်ကမ္ဘာတည်သရွေ့ ဆက်လက်တည်တံ့နေပါစေကြောင်းနှင့် နိုင်ငံတော်၏ အချုပ်အခြာအာဏာ တည်တံ့ခိုင်မြဲစေရေးအတွက် မြန်မာနိုင်ငံတော်ကြီးကို ကာကွယ်စောင့်ရှောက်နိုင်ပါစေကြောင်း ဆုမွန်ကောင်းတောင်းအပ်ပါသည်။
ကိုဉာဏ် (ပန်းလောင်မြေ)
၂၀၁၀ ပြည့်နှစ် မတ်လ ၂၇ ရက်၊ စနေနေ့။
(၆၅) နှစ်မြောက် တပ်မတော်နေ့။
ည ၁၀ နာရီ ၀၅ မိနစ်တွင်ပြီး၏။
No comments:
Post a Comment