ကမ္ဘာကြီးပူနွေးလာနေပြီ ဆိုတဲ့သတင်းတွေ နားထောင်ရတယ်၊ ဂျာနယ်တွေထဲမှာ ဖတ်ရတယ်၊ ပညာရှင်တွေကလည်း ပြောကြတယ်။ ဒါပေမယ့် ကျွန်တော်သေသေချာချာ မသိပါဘူး။ အဲ... တစ်ခုတော့ သေချာသိတယ်။ ဘာလဲဆိုတော့ ကျွန်တော်အခုနေရတဲ့ ဒေသလေးမှာ အရင်ကထက် ပိုပူလာတယ်ဆိုတာပါပဲ။ ဘယ်လောက်ပဲနေပူပူ ချွေးမထွက်တဲ့ ဒေသဟာ အခုတော့ နည်းနည်းလေးလှုပ်ရှားလိုက်တာနဲ့၊ အပြင်ထွက်လိုက်တာနဲ့ ချွေးလေးတစို့စို့ ဖြစ်နေရပြီ။
ရေခဲပြင်တွေ အရည်ပျော်ကုန်ပြီ၊ ပင်လယ်ရေမျက်နှာပြင်တွေ မြင့်တက်လာနေပြီ စတဲ့စတဲ့ သတင်းတွေကို ကြားရ၊ ဖတ်ရပါတယ်။ ကိုယ်တိုင်မကြုံဖူးတော့ သေသေချာချာ မသိပါဘူး။ ဒါပေမယ့် သေသေချာချာသိတာ တစ်ခုတော့ရှိတယ်။ ကျွန်တော်တို့အညာမှာရှိတဲ့ ချောင်းတွေ၊ မြစ်တွေထဲမှာ ရေတွေမရှိတော့ဘူး၊ သဲသောင်တွေကိုပဲ မြင်နေရတယ်။ ဧရာဝတီမြစ်ကြီးရဲ့ပုံကိုလည်း ဂျာနယ်ထဲမှာ ကြည့်လိုက်ရတယ်။ အရင်လို ၀၀တုတ်တုတ်၊ ပြည့်ပြည့်ဖြိုးဖြိုး၊ လှလှပပ မဟုတ်တော့ဘူး၊ ဟိုနားက သဲသောင်၊ ဒီနားက ရေတိမ်နဲ့ ပွေးကွက်တွေ၊ ၀ဲကွက်တွေနဲ့ ရုပ်ပျက်ဆင်းပျက် ဖြစ်နေရှာပြီ။ စီးစရာ ရေမရှိတော့လို့ ကောရာကနေ ပျောက်ကွယ်သွားပြီဖြစ်တဲ့ ချောင်းငယ်၊ မြောင်းငယ်တွေ ဘယ်လောက်များနေခဲ့ပြီလဲ?
ကမ္ဘာပေါ်မှာ တစ်နှစ်တစ်နှစ်ကို သစ်တောဧရိယာ ဟက်တာဘယ်လောက်၊ ဧကဘယ်လောက် ပြုန်းတီးနေသလဲဆိုတာ ကျွန်တော်သေသေချာချာ မသိဘူး။ ဒါပေမယ့် ကျွန်တော်တို့ဆီမှာတော့ သစ်ပင်သစ်တောတွေ နည်းပါးလာတာ အမှန်ပဲ။ အရင်တုန်းက ကြည့်လေရာ စိမ်းနေတဲ့ဒေသတွေဟာ အခုတော့ လွင်တီးခေါင်ပြင်တွေဖြစ်၊ အဆောက်အဦးတွေ ထိုးထိုးထောင်ထောင်ဖြစ်နဲ့ နေရောင်အောက်မှာ ကြည့်ရတာ မျက်စိစူးလိုက်တာ။ လူတစ်သိန်းနေတဲ့ မြို့တစ်ခုမှာ သစ်ပင်တစ်သိန်း ရှိပါ့မလားဆိုတာကို သုတေသနလုပ်ရရင် အတော်စိတ်ဝင်စားဖို့ကောင်းမယ်။ ကတ်သီးကတ်သတ်နဲ့ ဂေါက်ကွင်းထဲက မြက်ပင်တွေကိုတော့ လိုက်မရေခိုင်းနဲ့ပေ့ါဗျာ။
ကဲပါ... စကားတွေရှည်နေမိတော့ စိတ်ငြိုငြင်မှာလည်း စိုးရသေးတယ်။ ဒီပို့စ်ရဲ့ အဓိကရည်ရွယ်ချက်က ရာသီဥတုနဲ့ဆိုင်တဲ့ ကာတွန်းလေးတွေကို ကြည့်စေချင်တာပါ။ ကိုယ်တိုင် ဘာမှမလုပ်နိုင်ရင်တောင် သိထားနိုင်၊ အတွေးပွားနိုင်၊ အခြားလူတွေကို ပြန်ပြောပြနိုင်မယ်ဆိုရင် တစ်နည်းနည်းနဲ့ လုပ်ဆောင်တာပဲလို့ ယုံကြည်ပါတယ်။ အဲဒီအတွက် လက်လှမ်းမီရာ ကျွန်တော်ကြည့်မိသမျှတွေထဲက သဘောကျတဲ့ ကာတွန်းလေးတွေကို တင်ပေးလိုက်ပါတယ်။
အစကတော့ ကာတွန်းတစ်ကွက်ချင်းကို ကျွန်တော့်အမြင်လေးတွေနဲ့ တင်ပေးမလို့ပါ။ ဒါပေမယ့် မူရင်းကာတွန်းရေးသူရဲ့ အာဘော်ကို လွတ်သွားမှာစိုးတာနဲ့ စာဖတ်သူတွေကို မိချောင်းမင်းရေခင်းပြ မဖြစ်ရအောင်အတွက် ကိုယ်တိုင်ပဲ တွေးကြစေချင်လို့ ကျွန်တော့်စိတ်ကူးကို ရေမျှောလိုက်ပါတယ်။ ကိုယ်တိုင်ခံစား ကြည့်ရှု၊ တွေးတောလိုက်ကြပါဦး။
ကွန်နက်ရှင်းအမြန်နှုန်းနှေးတဲ့သူတွေကို အားနာတဲ့အတွက် ပုံတွေကို အများကြီးမတင်ပေးဘဲ နည်းနည်းပဲ တင်ပေးလိုက်ပါတယ်။
(၂)
(၃)
(၄)
(၅)
ကိုဉာဏ် (ပန်းလောင်မြေ)
၂၀၁၀ ပြည့်နှစ် မတ်လ ၂၆ ရက်၊ သောကြာနေ့။
နေ့လည် ၃ နာရီ ၁၁ မိနစ်တွင်ပြီး၏။
No comments:
Post a Comment