မြန်မာနိုင်ငံတွင် မကြာသေးမီ နှစ်သစ်ကူးကာလများအတွင်း အကြမ်းဖက်တိုက်ခိုက်မှုများသည် နိုင်ငံနှင့် လူမျိုးအတွက် များစွာအရုပ်ဆိုး အကျည်းတန်စေခဲ့သည်သာမက နောက်ထပ် လာလတ္တံ့သော အန္တရာယ်များစွာကိုလည်း ညွှန်ပြလျက် ရှိပေသည်။
အဆိုပါ ဗုံးဖောက်ခွဲများ၏ ရည်ရွယ်ချက်ကိုကြည့်လျှင်
- ရွေးကောက်ပွဲသည်သာ တစ်ခုတည်းသော ရွေးချယ်စရာနည်းလမ်းဖြစ်ကြောင်း ပြောဆိုနေမှုများကို အခြားနည်းလမ်းများ ရှိသေးကြောင်း သက်သေထူရန်၊
- ရွေးကောက်ပွဲများကို ကျင်းပမည်ဆိုပါက ပြည်သူလူထု၏ အသက်အိုးအိမ်စည်းစိမ်ကို အမှုမထားဘဲ တိုက်ခိုက်မည်ဖြစ်ကြောင်း ပြသရန်၊
- အစိုးရနှင့် တိုင်းရင်းသားလူမျိုးများအကြား ဖြစ်နိုင်ခြေရှိသော ပြဿနာမှန်သမျှကို မီးထိုးပေးရန်၊
- အစိုးရနှင့် အိမ်နီးချင်းနိုင်ငံအကြား တင်းမာမှုများ ဖန်တီးပေးရန်
ဆိုလိုသည်မှာ မြန်မာနိုင်ငံတွင်းသို့ လာရောက်၍ ဖောက်ခွဲခဲ့ကြသည့် ကြေးစားတရားခံများ၏ နောက်ကွယ်တွင် ရှိနေသော ဘင်လာဒင်ကဲ့သို့သော အိုင်ဒီယော်လော်ဂျီ ခေါင်းဆောင်များရှိပါက ၎င်းတို့ကို ရှာဖွေတွေ့ရှိနိုင်ရေး လွန်စွာအရေးကြီးသည်ဆိုသော အချက်ဖြစ်သည်။ အထက်တွင် ဖော်ပြထားသော ရည်ရွယ်ချက်များကိုကြည့်လျှင် ယခုကဲ့သို့သော အကြမ်းဖက်မှုများကို စီစဉ်ဆောင်ရွက်ခဲ့သူများသည် မြေအောက်လုပ်ငန်းများနှင့် နှစ်ပေါင်းများစွာ ယဉ်ပါးခဲ့သူများဖြစ်ကြောင်း ခန့်မှန်းနိုင်ပါလိမ့်မည်။ အထူးအရေးကြီးသည်မှာ မြန်မာ့လူ့အဖွဲ့အစည်းကို စစ်အစိုးရဆန့်ကျင်ရေး အကြောင်းပြချက်ဖြင့် အကြမ်းဖက်ဝါဒလမ်းကြောင်းပေါ်သို့ တွန်းပို့နေသူများ ရှိခဲ့ပါက အသိမဲ့ လိုက်ပါဆောင်ရွက်မိသူများ ပေါ်ထွက်မလာစေရေးသည် လူ့အဖွဲ့အစည်းတစ်ရပ်လုံးတွင် တာဝန်ရှိသည်ဆိုသော အချက်ဖြစ်သည်။
နောက်ထပ် ဆက်လက်စဉ်းစားသင့်သည်မှာ အဆိုပါရယ်ဒီကယ်များသည် မီဒီယာများတွင် ရွေးကောက်ပွဲဆန့်ကျင်ရေးအသံများ သက်သက်ထွက်ပေါ်အောင် နောက်ကွယ်မှ ပြုလုပ်ခဲ့သူများ ဟုတ်၊ မဟုတ် ဆိုသော အချက်ဖြစ်သည်။ အကယ်၍ မီဒီယာများပေါ်တွင် ပြုလုပ်ခဲ့သော ရွေးကောက်ပွဲ ဆန့်ကျင်ရေးလှုပ်ရှားမှု၊ ရွေးကောက်ပွဲလက်ခံသူများအား ပုဂ္ဂိုလ်ရေးတိုက်ခိုက်သည့် လှုပ်ရှားမှု စသည်များကို နောက်ကွယ်မှ စနစ်တကျ ပေါ်ပေါက်စေသူများနှင့် ယခုအကြမ်းဖက်မှု ဆက်စပ်မှုရှိခဲ့ပါလျှင် ၎င်းတို့၏ အန္တရာယ်မှာ များစွာကြီးမားသည်ဟု ဆိုချင်ပါသည်။
မဟာဗျူဟာရှုထောင့်မှကြည့်လျှင် မြန်မာနိုင်ငံတွင် ယခုတလော ဖြစ်ပေါ်သွားခဲ့သော အဖြစ်အပျက် များစွာတို့သည် Conductor ခေါ် နောက်ကွယ်က ဆရာတင်ယောင်ပြုပြီး မသိမသာပါးနပ်စွာ အသုံးချသွားသော ကြိုးကိုင်သူ လူတစ်ဦးစ နှစ်ဦးစ၏ Orchastrated ခေါ် ပါးနပ်စွာ အခြေအနေပေါ် အခွင့်ကောင်းယူတတ်မှုနှင့် အသိမဲ့ ပူးပေါင်းပါဝင်သူများ၏ ပေါင်းစည်းသွားသော လှုပ်ရှားမှုဖြစ်ပေသည်။ ပြည်သူလူထု အချို့သည်ပင် ၎င်းတို့ကို ရုတ်တရက် ပြစ်တင်စွပ်စွဲမှု မပြုရဲလောက်အောင် ပြုလုပ်ထားနိုင်စွမ်း ရှိသည်ကိုကြည့်လျှင် ၎င်းတို့သည် လူထုဆက်သွယ်ရေး နည်းလမ်းများကို မည်မျှပိုင်နိုင်ကြောင်း ထင်ရှားပါသည်။
ထိုသို့သော အကြမ်းဖက်တိုက်ခိုက်မှုများ နောင်တွင် မဖြစ်ပေါ်စေရေးအတွက် မြန်မာနိုင်ငံပြင်ပတွင် ရှိနေသော မြန်မာများကို နိုင်ငံတည်ဆောက်ရေးတွင် ပါဝင်လိုသူများနှင့် အာဏာရရှိရေးသက်သက် စိတ်ဝင်စားသူများ ခွဲခြားသည့်နည်းလမ်း တစ်ခုခုဖြင့် ခွဲခြားခြင်းကို အမြန်ဆုံး ပြုလုပ်သင့်ပြီ ဖြစ်သည်။
အယ်ဒီတာ (၁၉-၄-၂၀၁၀)
The Voice Weekly Journal
အတွဲ (၆) အမှတ် (၂၄)
Monday, April 26 - May 2, 2010
အယ်ဒီတာ့အာဘော်
စာမျက်နှာ - ၄
The Voice Weekly Journal
အတွဲ (၆) အမှတ် (၂၄)
Monday, April 26 - May 2, 2010
အယ်ဒီတာ့အာဘော်
စာမျက်နှာ - ၄
No comments:
Post a Comment