Champions League Quarter-finals ( 2nd leg, April 7)

ချန်ပီယံလိဂ်ကွာတားဖိုင်နယ်လ် - ၃ (ဒုတိယအကျော့)

မန်ချက်စတာယူနိုက်တက် ၃ - ၂ ဘိုင်ယန်မြူးနစ်

အင်္ဂလန်အိုးထရက်ဖို့ဒ်ကွင်းကြီးမှာ သရဲနီတွေ တကယ်ပဲ ပြန်လာနိုင်ခဲ့ပါတယ်။ ပထမအကျော့ ဘိုင်ယန်ကွင်းမှာ ကစားခဲ့တဲ့ မန်ယူအသင်းမှ ဟုတ်ပါလေစလို့ ထင်မှတ်မှားရလောက်အောင် ကစားပြသွားခဲ့ပါတယ်။ ဒီပွဲအတွက် အံ့သြစရာ လူထုတ်ပုံနဲ့ နည်းဗျူဟာချမှတ်ခဲ့တဲ့ ဖာဂူဆန်ကို မလေးစားပဲကို မနေနိုင်ပါဘူး။ ဖာဂူဆန်ရဲ့ ကစားကွက်အောက်မှာ ဘိုင်ယန်တို့ လှုပ်လို့မရအောင်ကို ဖြစ်ခဲ့ရပါတယ်။ သေချာပေါက်လွဲမယ်လို့ သတင်းထွက်နေခဲ့တဲ့ ၀ိန်းရွန်းနီ ပြန်ပါလာတဲ့အတွက် မီဒီယာတို့ အထူးအဆန်း ဖြစ်ခဲ့ရပါတယ်။ ကွင်းထဲမ၀င်မီနဲ့ ကွင်းထဲမှာ တန်းစီတဲ့အချိန်အထိ ၀ိန်းရွန်းနီဟာ ကင်မရာအားလုံးရဲ့ ပစ်မှတ်ဖြစ်နေခဲ့ရပါတယ်။ ဘိုင်ယန်ကစားသမားတွေလည်း ရွန်းနီကို မြင်လိုက်ရတဲ့အတွက် အံ့သြမှု၊ ထိတ်လန့်မှုနဲ့ ကြည့်နေခဲ့ကြတာကို ရုပ်သံထုတ်လွှင့်မှုတွေမှာ အထင်အရှား မြင်ခဲ့ရပါတယ်။ မနေ့ညကပွဲမှာ ရွန်းနီဟာ ထင်သလောက် မကစားနိုင်ခဲ့ပါဘူး။ ဒါပေမယ့် မန်ယူရဲ့ စိတ်ဓာတ်တွေအတွက်တော့ ရွန်းနီဟာ အခရာကျခဲ့ပါတယ်။ ကွင်းထဲမှာ ရွန်းနီရှိနေတယ် ဆိုတဲ့စိတ်ကြောင့် မန်ယူကစားသမားတွေရော၊ တစ်ကမ္ဘာလုံးက မန်ယူပရိသတ်တွေရော ကျေနပ်ခဲ့ကြရ၊ အားတက်ခဲ့ကြရတာ အသေအချာပါ။ ပွဲစပြီး မကြာခင်မှာပဲ ပေါစခိုးလ်လက်သစ်လို့ သတ်မှတ်ထားကြတဲ့ ဂစ်ဘ်ဆင်က အမှတ်မထင် ကန်သွင်းခဲ့တဲ့ဂိုးနဲ့ သရဲနီတို့ရဲ့ တိုက်ပွဲခေါ်သံ စတင်ခဲ့ပါတယ်။ ဘောလုံးကိုင်ကစားပြီး၊ အလယ်တန်းကနေ တောင်ပံတွေကို ဘောလုံးဖြန့်ကစားတတ်တဲ့ ဘိုင်ယန်တို့အတွက် လျင်မြန်မှုနဲ့ ကြံ့ခိုင်မှုအသားပေး မန်ယူအသင်းရဲ့ ကစားကွက်အောက်မှာ ပြုသမျှနုခဲ့ကြရပါတယ်။ အထူးသဖြင့် ဘယ်တောင်ပံက ရီဘာရီနဲ့ ညာတောင်ပံက ရော်ဘင်တို့ဟာ မန်ယူရဲ့ ရာဖေးလ်နဲ့ အီဗရာတို့ကို လုံးဝကို မကျော်ဖြတ်နိုင်ခဲ့ပါဘူး။ ပြောစရာဖြစ်လောက်အောင် ခြေစွမ်းပြသွားနိုင်ခဲ့တာက ညာနောက်ခံလူ ဘရာဇီးလ်လူငယ် ရာဖေးလ်ပါ။ ရီဘာရီကို ထိန်းချုပ်နိုင်ခဲ့တဲ့အပြင် တိုက်စစ်အထိပါ လျင်လျင်မြန်မြန် လိုက်ပါကစားခဲ့တဲ့ သူ့ရဲ့ကစားဟန်ဟာ ဘိုင်ယန်တို့အတွက် ထိတ်ထိတ်ပြာပြာ ဖြစ်စေခဲ့ပါတယ်။ ဒါပေမယ့် အသက်အရွယ်နဲ့ အတွေ့အကြုံ နုနယ်လွန်းသေးတဲ့အတွက် ပရိယာယ်တွေကို သူနားမလည်နိုင်ခဲ့ပါဘူး။ လူငယ်ပီပီ အတင်းဝင်၊ အတင်းဖျက်၊ အတင်းလိုက် ကစားတတ်တဲ့ သူ့ရဲ့ကစားဟန်ဟာ တစ်ဖက်အသင်းအတွက် အကွက်ဆင်လို့ ကောင်းနေတယ်ဆိုတာ ရာဖေးလ် မသိနိုင်ခဲ့ပါဘူး။ အဲဒါကြောင့်လည်း ရာဖေးလ်နဲ့ ဘောလုံးယှဉ်လုပြီဆိုတာနဲ့ ဘိုင်ယန်အသင်းသားတွေဟာ လိုတာထက်ပိုပြီး လဲကျပြ၊ အော်ဟစ်ပြ၊ ပြစ်ဒဏ်တောင်းကြ လုပ်ခဲ့တာကို တွေ့ရပါတယ်။ ရွန်းနီရဲ့ နာနေတဲ့ ညာခြေထောက်ကို တမင်တကာကို သိသိသာသာကြီး ကန်နေခဲ့တဲ့ ဘိုင်ယန်နောက်ခံလူရဲ့ လုပ်ရပ်ကို ရုပ်သံထုတ်လွှင့်မှုတွေမှာ အထင်အရှား မြင်နေရပါလျက် ကွင်းလယ်ဒိုင်လူကြီးအနေနဲ့ အ၀ါကတ်တစ်ခုတောင် မပြခဲ့တာကတော့ စဉ်းစားစရာပါ။ တောင်ပံနှစ်ဖက်က ဗလင်စီယာနဲ့ နာနီတို့ရဲ့ ကစားဟန်ဟာ ပြောစရာမရှိခဲ့ပါဘူး။ တစ်ခါမှ မမြင်ဖူးခဲ့တဲ့ ကစားဟန်တွေနဲ့ ကြိုးစားအားထုတ်ပြီး နှစ်ယောက်စလုံး ကစားသွားခဲ့ကြပါတယ်။ ဗလင်စီယာရဲ့ ဖြတ်တင်ဘောတွေနဲ့ နာနီရဲ့ ကန်သွင်းမှုတွေ ချိန်သားကိုက်ဖြစ်ခဲ့တဲ့အတွက် ပထမပိုင်းမှာတင် နာနီအနေနဲ့ နှစ်ဂိုးသွင်းနိုင်ခဲ့တာ ဖြစ်ပါတယ်။ ဘိုင်ယန်အတွက် အားဖြစ်စေခဲ့တဲ့ ချေပဂိုးကိုတော့ နှစ်ကျော့စလုံးအတွက် မန်ယူတို့ရဲ့ နတ်ဆိုးဖြစ်ခဲ့တဲ့ အိုလစ်က သွင်းယူခဲ့တာပါ။ ဒီဂိုးဟာဆိုရင် ကားရစ်ရဲ့ ဖျက်ထုတ်မှု ညံ့ဖျင်းခြင်းနဲ့ ပေါ့လျော့မှုကနေ ပေးလိုက်ရတာ ဖြစ်ပါတယ်။ ဘာပဲဖြစ်ဖြစ် ပထမပိုင်းတစ်ခုလုံးကို မန်ယူအသင်းက လိုသလိုပုံဖော်ပြီး ကစားသွားခဲ့တာဖြစ်ပါတယ်။ ဘိုင်ယန်တို့ကတော့ မန်ယူရဲ့ ကစားကွက်အောက်မှာ ကြောင်ကြီးလုပ်သမျှ ခံနေရတဲ့ ကြွက်ကလေးပမာ ဖြစ်ခဲ့ရပါတယ်။

ဒုတိယပိုင်းအစမှာ မန်ယူကပဲ ကစားကွက်စိုးမိုးအောင် ကြိုးစားကစားခဲ့ပါတယ်။ ဘိုင်ယန်တို့အနေနဲ့ သူတို့ရဲ့ ကစားကွက်တည်မိအောင် ကြိုးစားလို့မရ ဖြစ်နေခဲ့ရပါတယ်။ ဒါပေမယ့်လည်း မန်ယူက ရာဖေးလ်ရဲ့ အတွေ့အကြုံနုနယ်မှုနဲ့ ဘိုင်ယန်က ရီဘာရီရဲ့ ပရိယာယ်ကြားမှာ ဒိုင်လူကြီးရဲ့ အ၀ါကတ်တစ်ခုကြောင့် ပြိုင်ပွဲရဲ့ရသ ပျက်သုဉ်းသွားခဲ့ရပါတယ်။ ရာဖေးလ်ရဲ့အနီကတ်ဟာ သူ့ကိုသာမဟုတ်ဘဲ မန်ယူအသင်းကိုပါ ချန်ပီယံလိဂ်ကနေ ထုတ်ပယ်လိုက်တဲ့ အနီကတ်ဖြစ်သွားခဲ့ရပါတယ်။ ၁၀ ယောက်ဖြစ်သွားရတဲ့ မန်ယူအသင်း ကစားပုံပျက်သွားခဲ့ပြီး ပွဲဟာလည်း ပထမပိုင်းနဲ့ လုံးဝဆန့်ကျင်စွာပဲ ဘာဘောလုံးရသမှ မပေးနိုင်တော့တဲ့ ပွဲစဉ်တစ်ခု ဖြစ်သွားခဲ့ရပါတယ်။ တကယ်ဆိုရင် ရာဖေးလ်ဟာ အ၀ါတစ်ကတ် ရထားပြီးဖြစ်တဲ့အတွက် ဒိုင်လူကြီးအနေနဲ့ နောက်ဆုံးသတိပေးခြင်းသာ ပြုလုပ်သင့်ပါတယ်။ ရာဖေးလ်ရဲ့ လုပ်ရပ်ဟာ ပြစ်ဒဏ်ဘောဖြစ်တယ်ဆိုတာ လက်ခံလို့ရပေမယ့် အ၀ါကတ်ပြလောက်တဲ့အထိတော့ မပြင်းထန်ဘူးလို့ ထင်မိပါတယ်။ ခြေထောက်ကို ဖျက်ထုတ်တာလည်းမဟုတ်၊ ဂိုးသွင်းခါနီးမှာ နောက်ဆုံးခံစစ်မှူးအနေနဲ့ ပြစ်ဒဏ်လုပ်တာလည်း မဟုတ်ပါဘူး။ ဒါပေမယ့် ရီဘာရီရဲ့ ကတ်ပြဖို့ တောင်းဆိုဖိအားပေးမှုကို ဒိုင်လူကြီးက လိုက်လျောခဲ့ပါတယ်။ အရေးကြီးတဲ့အချိန်မှာ ကစားပုံအရမ်းကောင်းနေတဲ့ အဓိက ကစားသမားတစ်ယောက် လျော့သွားတဲ့အတွက် မန်ယူအတွက် ကြီးမားတဲ့ ထိုးနှက်ချက်ပဲ ဖြစ်ပါတယ်။ အဲဒါကြောင့်လည်း ဘိုင်ယန်မြူးနစ်အသင်းက ကစားကွက်ပြန်စီးလာခဲ့ပြီး မန်ယူတို့ကတော့ တန်ပြန်တိုက်စစ်နဲ့သာ ကစားနေခဲ့ရပါတယ်။ ရသမျှ အခွင့်အရေးတွေကိုသာ မန်ယူအသင်းက အသုံးချနိုင်ခဲ့မယ်ဆိုရင် ၁၀ ယောက်ကျန်နေတဲ့ အချိန်မှာတောင် အနိုင်ဂိုးတွေ ထပ်ရနိုင်ခဲ့တာကို တွေ့ရပါတယ်။ ဒါပေမယ့် နာနီရဲ့ ထောင့်ကန်ဘော ပေးပို့မှုကို ကားရစ်ရဲ့ အပိုင်ပိတ်သွင်းမှု ဂိုးပေါ်ကျော်သွားတာနဲ့ ဖလက်ချာရဲ့ ဂိုးထောင့်ကို အပိုင်ကန်သွင်းမှု လွဲချော်သွားခဲ့တာ၊ နာနီရဲ့ တစ်ကိုယ်တော်ထိုးဖောက် ဂိုးသွင်းမှုကို ဘိုင်ယန်ဂိုးသမား လက်တစ်ဖက်နဲ့ ပုတ်မိသွားတာတွေဟာ မန်ယူအသင်းအတွက် နစ်နာလှပါတယ်။ အဲဒါကြောင့်လည်း ရီဘာရီရဲ့ ထောင့်ကန်ဘောပေးပို့မှုကို ရော်ဘင်က မြေမကျ volley ကန်သွင်းပြီး ဒုတိယချေပဂိုး ရယူသွားခဲ့ပါတယ်။ အဲဒီဂိုးရပြီးနောက်မှာတော့ ရော်ဘင်ကိုထုတ်ပြီး ဘိုင်ယန်တို့က ဘောလုံးကိုင်ကစားကာ ပွဲအရှိန်ကို ထိန်းသွားခဲ့ပါတယ်။

အိမ်ကွင်းမှာ ၃ ဂိုး ၂ ဂိုးနဲ့ အနိုင်ရခဲ့ပြီး၊ နှစ်ကျော့ပေါင်းရလဒ် ၄ ဂိုးစီသရေကျခဲ့ပေမယ့် အဝေးဂိုးစည်းမျဉ်းအရ မန်ယူတို့ ချန်ပီယံလိဂ်ကို လက်ပြခဲ့ရပါတယ်။ ဘိုင်ယန်မြူးနစ်တို့ကတော့ ဆီမီးဖိုင်နယ်ကို တက်ရောက်သွားခဲ့ပြီ ဖြစ်ပါတယ်။

(ပထမအကျော့အပြီးမှာ ကျွန်တော့်ခန့်မှန်းထားချက် - ကျွန်တော့်ရဲ့ ခန့်မှန်းချက်ကတော့ မန်ယူအသင်းရဲ့ အိမ်ကွင်းမှာ မန်ယူပဲ အနိုင်ရပါလိမ့်မယ်။ ဒါပေမယ့် ဂိုးတွေအပြန်အလှန်သွင်းပြီး မန်ယူအသင်း နှစ်ဂိုးမပြတ်မှာကိုပဲ စိုးရိမ်မိတာပါ။ တစ်ဂိုး-ဂိုးမရှိဆိုတဲ့ ရလဒ်ကိုတော့ ကျွန်တော်လုံးဝ မမျှော်လင့်ထားပါဘူး။)

ချန်ပီယံလိဂ်ကွာတားဖိုင်နယ်လ် - ၄ (ဒုတိယအကျော့)

ဘော်ဒိုး ၁ - ၀ လိုင်ယွန်

ပထမအကျော့တုန်းက အိမ်ကွင်းမှာ ၃ ဂိုး ၁ ဂိုးနဲ့ နိုင်ထားခဲ့တာမို့ အဝေးကွင်းမှာ လိုချင်တဲ့ရလဒ်ကို ရအောင်ထိန်းပြီး လိုင်ယွန်တို့ ကစားသွားခဲ့ပါတယ်။ အိမ်ရှင်အနေနဲ့ ပရိသတ်တွေကို အနိုင်ဂိုးတစ်ဂိုးသွင်းပြီး နှစ်သိမ့်နိုင်ခဲ့ပေမယ့် ဆီမီးဖိုင်နယ်လ်ကို တက်ရောက်ဖို့အထိတော့ မစွမ်းဆောင်နိုင်ခဲ့ပါဘူး။ အဲဒါကြောင့်လည်း နာမည်ကြီးရီးရဲလ်မက်ဒရစ်ကို ရှုံးထွက်အဆင့်မှာတင် ဖြုတ်ချထားခဲ့တဲ့ လိုင်ယွန်တို့ ဆီမီးဖိုင်နယ်ကို တက်ရောက်ခွင့်ရသွားခဲ့ပါပြီ။

(ပထမအကျော့အပြီးမှာ ကျွန်တော့်ခန့်မှန်းထားချက် - ဒါကြောင့် ဒုတိယအကျော့ ပွဲစဉ်မှာလည်း လိုင်ယွန်ကပဲ လိုချင်တဲ့ရလဒ်ကို ထိန်းကစားသွားပြီး ဆီမီးဖိုင်နယ်ကို တက်လာလိမ့်မယ်လို့ ခန့်မှန်းမိပါတယ်။)

ချန်ပီယံလိဂ် ဆီမီးဖိုင်နယ်လ်

ဘိုင်ယန်မြူးနစ်နဲ့ လိုင်ယွန်တို့ ထိပ်တိုက်တွေ့မယ့် ပွဲစဉ်ဟာ စိတ်ဝင်စားဖို့တော့ ကောင်းနေဦးမှာပါ။ အထူးသဖြင့် ပထမဆုံးအကြိမ် ဆီမီးဖိုင်နယ်လ်ကို တက်ရောက်လာနို်င်ခဲ့တဲ့ ပြင်သစ်ကလပ်အတွက် စိန်ခေါ်မှုတစ်ရပ်ပါပဲ။ ရီးရဲလ်လိုအသင်းမျိုးကိုတောင် ဖြုတ်ချထားနိုင်ခဲ့တဲ့ လိုင်ယွန်အသင်းနဲ့ မန်ယူလို့ ရေးပန်းစားနေတဲ့အသင်းကို ဖြုတ်ချခဲ့တဲ့ ဘိုင်ယန်မြူးနစ်တို့ ဘယ်အသင်းက ပိုခြေစွမ်းထက်သလဲဆိုတာကို စောင့်ကြည့်ကြရအောင်ပါ။ အင်္ဂလန်ကလပ်တွေ မပါတော့တဲ့ ဆီမီးဖိုင်နယ်လ်ပွဲစဉ်တွေဟာ ပရိသတ်တွေကို ဖမ်းစားနိုင်ဦးမလား ဆိုတာကတော့ စိတ်ဝင်စားစရာပါ။

အမှတ်တရ
ကိုဉာဏ် (ပန်းလောင်မြေ)
၂၀၁၀ ပြည့်နှစ်၊ ဧပြီလ ၈ ရက်၊ ကြာသပတေးနေ့။
ညနေ ၄ နာရီ ၁၂ မိနစ်တွင်ပြီး၏။