မြန်မာနိုင်ငံတွင် မျက်မှောက်ကြုံတွေ့နေရသော အခြေအနေအရပ်ရပ်ကို ပြည်တွင်းပြည်ပရှိ မြန်မာနိုင်ငံသားများနှင့် မြန်မာ့အရေး စိတ်ဝင်စားသူများ မိမိတို့ရရှိထားသော သတင်းအချက်အလက်များ၊ လက်တွေ့မြင်ကြား သိတွေ့နေရသည်များ၊ အတိတ်ကာလတစ်လျှောက်လုံး ကြုံတွေ့ရင်ဆိုင်ခဲ့ရသည်များ၊ လတ်တလော ထိတွေ့ဆက်ဆံနေရခြင်းများ၊ မီဒီယာသတင်းများအပေါ် မူတည်ကာ ဝေဖန်သုံးသပ်မှုများ၊ ကောက်ချက်ချမှုများ၊ ကြိုတင်မှန်းဆ ဖော်ထုတ်ချက်များ ကိုယ်စီကိုယ်ငှ ရှိနေကြပါသည်။
အဆိုပါ သုံးသပ်ဝေဖန်မှန်းဆချက် ထုတ်သူများကိုကြည့်လျှင် ယေဘုယျအားဖြင့် အောက်ပါအတိုင်း ခွဲခြားနိုင်ပါသည်။
- အရာရာ အဆိုးမြင်သော ရှုထောင့်မှကြည့်ကာ ရယ်ဒီကာသဘောတရားကိုသာ တွင်တွင်ပြောနေသူများ၊
- ပြင်ပတွင် လက်ရှိအစိုးရအပေါ် အတိုက်အခံပြုနေသော အဖွဲ့အစည်းများနှင့် အခြားအဖွဲ့အစည်းများ၏ အထောက်အပံ့ခံ မီဒီယာများ၊
- ထိုသူများနှင့် ထိုပြင်ပမီဒီယာများ၏ လှုံ့ဆော်မှုကြောင့် ဗဟိုချုပ်ကိုင်စနစ်အောက် ကာလကြာရှည်နေခဲ့၍ ခံစားချက်များစွာရှိနေသော ပြည်သူများ၊
- လက်ရှိအခြေအနေအပေါ် အပြုသဘော လေ့လာသုံးသပ်၍ လက်တွေ့ကျ ဖြစ်နိုင်ချေရှိသော နည်းလမ်းဖြင့် တစ်စုံတစ်ခု မြင်ရစေရန် တစ်စုံတစ်ရာ လုပ်နေသူများ (လက်ရှိ ရွေးကောက်ပွဲဝင်ရန် ပြင်ဆင်နေသူများလည်း ပါသည်)
ဖော်ပြပါ အမျိုးအစားများအနက် ပထမအုပ်စုတွင် ပါဝင်သူများသည် နှစ်ပေါင်းများစွာ အစွန်းရောက်အတွေးအခေါ် အယူအဆတစ်ခုကို ယုံကြည်သက်ဝင်ခဲ့သူများဖြစ်ပြီး မည်သို့ခေတ်စနစ်များ ပြောင်းနေစေကာမူ ထိုအမြင်ဖြင့်သာ အရာရာကို ချဉ်းကပ်ပုံဖော်လေ့ရှိသူများ ဖြစ်သည်။ သြဇာကြီးခဲ့သော ပညာရှင်များ၏ သုံးသပ်ချက်အရ မတူညီမှုများကို ဖယ်ထုတ်တတ်သည့် ဒိုင်ရာလက်တစ် သဘောတရားကိုသာ ယုံကြည်လက်ခံသူများ ဖြစ်သည်။ များသောအားဖြင့် ထိုအုပ်စုသည် "ဘယ်သူမှမကောင်း" ဟူသော အတွေးအခေါ်မျိုး ရှိတတ်ကြသည်။
ဒုတိယအမျိုးအစားတွင် အကြောင်းအမျိုးမျိုးကြောင့် ပြည်ပသို့ ရောက်ရှိနေသော မြန်မာနိုင်ငံသားအများစုပါဝင်ပြီး ရောက်ရှိနေသော နေရာဒေသ၊ လူနေမှုအဆင့်အတန်း၊ အထောက်အပံ့အခွင့်အလမ်း ရရှိမှုတို့အပေါ် မူတည်ကာ အစိုးရကို အတိုက်အခံပြုနေသူများ၊ တည်ဆဲအစိုးရနှင့် ပတ်သက်သည့် နိုင်ငံတကာက သိနေပြီးသော အရေးကိစ္စအခြေအနေများ၊ အခြေအနေဆိုးများကိုသာ အလေးကဲဖော်ပြခြင်း၊ အတိုက်အခံများ၏ ကြေညာချက်လုပ်ငန်းစဉ်များကို လှုံ့ဆော်၊ ၀ါဒဖြန့်ခြင်းတို့ကိုသာ ဦးစားပေးလုပ်ဆောင်နေသော မီဒီယာများဖြစ်သည်။
တတိယအမျိုးအစားတွင် နှစ်ပေါင်းများစွာ ဗဟိုချုပ်ကိုင်မှုစနစ်အောက်တွင်သာ ဖိအားများဖြင့် မလူးသာမလွန့်သာ နေထိုင်ခဲ့ကြသည့်အပြင် ဖော်ပြပါ အကြောင်းအရာများ အလေးကဲဖော်ပြနေခြင်းကို ပုံမှန်လက်ခံရရှိနေကြသည့် ပြည်သူလူထုအများစုဖြစ်သည်။
နောက်ဆုံးအမျိုးအစားမှာ လက်ရှိအခြေအနေအရပ်ရပ်အပေါ် စနစ်တကျ လေ့လာသုံးသပ်၍ အပြုသဘောအပြောင်းအလဲများ ဖြစ်ပေါ်လာစေရန် တစ်စုံတစ်ရာ လက်တွေ့လုပ်ဆောင်နေသူများ ဖြစ်သည်။ တစ်နည်းအားဖြင့် မတူညီမှုများ၊ ဆန့်ကျင်ဘက်များကို ညှိနှိုင်းပူးပေါင်း၍ အဖြေရှာသော ထွိုင်ရာလက်တစ်နည်းကို လက်တွေ့ကျင့်သုံးသူများ ဖြစ်သည်။ ဤအမျိုးအစားတွင် ပါဝင်သူများကို အထက်ဖော်ပြပါ နံပါတ် (၁) နှင့် (၂) တို့တွင် ရှိသူများက အစိုးရထောက်ခံသူများအဖြစ် စွပ်စွဲခံရသူများလည်း ဖြစ်သည်။
ပရော်ဖက်ရှင်နယ် မပီသသော ၀ါဒဖြန့်၊ လှုံ့ဆော်မီဒီယာများနှင့် ယင်းတို့ကို အသုံးပြု၍ မိမိတို့၏ တစ်ဦးချင်း ထင်ပေါ်ကျော်ကြားရေး၊ ပြည်သူလူထု၊ အစိုးရ၊ နိုင်ငံရေးပါတီများ၊ အရပ်ဘက်လူ့အဖွဲ့အစည်းများနှင့် နိုင်ငံတကာအစိုးရများ၊ နိုင်ငံတကာအဖွဲ့အစည်းများအကြား အမုန်းမီးပွားသထက်ပွား၊ နားလည်မှု လွဲသထက်လွဲစေရန်၊ ဆုံးဖြတ်ချက်များ တိမ်းစောင်းလွဲချော်သွားစေရန် တိုက်ရိုက်သော်လည်းကောင်း၊ သွယ်ဝိုက်၍သော်လည်းကောင်း တွန်းအားပေးဖန်တီးနေခြင်းသည် နိုင်ငံတည်ဆောက်ရေး လုပ်ငန်းစဉ်များကို အဟန့်အတားပြုခြင်းအဖြစ် သမိုင်းတွင် အမည်မည်းဖြင့် မှတ်တမ်းတင်ခံရမည်သာ ဖြစ်ပါသည်။
ဤနေရာတွင် အထူးဖော်ပြလိုသည်မှာ လောလောဆယ် စံအဖြစ် အများစုလက်ခံကျင့်သုံးနေသော လစ်ဘရယ်ဒီမိုကရေစီ လူ့ဘောင်တစ်ရပ်ဆီသို့ အရောက်သွားရန်ဟူသည့် ဘုံရည်မှန်းချက် အမှန်ရှိကြလျှင် သွားမည့်နည်းလမ်းကိုသာ ယထာဘူတကျကျ ဆန်းစစ်စောကြောကြည့်သင့်ပြီး မည်သူမည်ဝါ၊ မည်သည့်အဖွဲ့အစည်း ဖြစ်နေသောကြောင့်ဟူသော ပုဂ္ဂိုလ်ရေးတိုက်ခိုက်မှုများဖြင့် ချဉ်းကပ်နေကြလျှင် သွားလိုသည့် ပန်းတိုင်နှင့် အလှမ်းကွာနေဦးမည်သာ ဖြစ်သည်ဆိုသော အချက်ဖြစ်ပါသည်။
အခြားတစ်ဖက်တွင်လည်း မည်သို့သော ရပ်တည်ချက်စေတနာကောင်း ရှိနေစကာမူ ပြောသင့်ပြောအပ်သောနေရာ၊ အချိန်ကာလ၊ မဖြစ်မနေပြောရန် လိုအပ်ခြင်းရှိမရှိ၊ မိမိပြောဆိုရေးသားမည့် နေရာဌာန၏ အဆင့်အတန်း ဂုဏ်သိက္ခာ စသည့် အခြေအနေအရပ်ရပ်အပေါ် မူတည်ကာ မပြောမဆိုလျှင်လည်း ရနိုင်ပါလျက် မပြောသင့်မဆိုအပ်သော စကားများ မပြောမဆိုမိရန်လည်း အထူးအရေးကြီးလှပါသည်။ သို့မဟုတ်ပါက မည်မျှ ထောင်တန်သောစကားများ ပြောဆိုရေးသားခဲ့စေကာမူ ဘာမျှမဟုတ်သော အရေးကိစ္စတစ်ခုကြောင့် အရာအားလုံး ပျက်ပြယ်ပေါ့တန် သွားစေနိုင်သည့်အပြင် တစ်လျှောက်လုံး ပရော်ဖက်ရှင်နယ်ပီပီသသ ရည်တည်လာသော သို့မဟုတ် သိက္ခာသမာဓိရှိသော ဥပဓိဂုဏ်သိက္ခာတစ်ရပ် ထိခိုက်သွားနိုင်သည်ကို အထူးသတိချပ်သင့်ပါကြောင်း။
အယ်ဒီတာ (၁၀-၅-၂၀၁၀)
The Voice Weekly Journal
အတွဲ (၆) အမှတ် (၂၇)
အယ်ဒီတာ့အာဘော်
စာမျက်နှာ - ၄
The Voice Weekly Journal
အတွဲ (၆) အမှတ် (၂၇)
အယ်ဒီတာ့အာဘော်
စာမျက်နှာ - ၄
No comments:
Post a Comment