Saturday, May 29, 2010

ကြည့်ဖြစ်ခဲ့သော မြန်မာဗီဒီယိုဇာတ်ကားများ


(၁)

ဇာတ်ကားအမည် - ရုပ်ပြဇာတ်လမ်း
ဝတ္ထု၊ ဇာတ်ညွှန်း - ဇော်ဇင်
ဒါရိုက်တာ - ဇော်မျိုး
သရုပ်ဆောင်များ - မြင့်မြတ် (နှစ်ကိုယ်ခွဲ)၊ ခိုင်သင်းကြည်၊ အောင်ဇော်၊ ထူးမွန်၊ ၀ါဝါအောင်၊ ခင်လေးဆွေ၊ ငှက်ပျောကြော်၊ ဦးဝင်းမြိုင်
[ကျွန်တော့်အမြင်၊ ကျွန်တော့်မှတ်ချက်]
မဆိုးပါဘူးလို့ ပြောရမယ့်ဇာတ်ကားပါ။ ကြည့်နေတဲ့လူတွေကို စိတ်ဝင်စားအောင်တော့ လုပ်ပြရှာပါတယ်။ ဒါပေမယ့် ရုပ်ပြဇာတ်လမ်းဆိုတော့ ကာတွန်းတွေဘာတွေကို ပြေးမမြင်လိုက်ပါနဲ့။ မျက်နှာ(ရုပ်)လေးပြပြီး လုပ်စားရတဲ့ဇာတ်ကားမို့ ရုပ်ပြဇာတ်လမ်းလို့ အမည်ပေးထားရခြင်းပါ။ အမြွှာညီအစ်ကိုနှစ်ယောက် အကြောင်းအမျိုးမျိုးကြောင့် ကွဲကွာသွားတယ်။ ပြီးတော့ အကြောင်းအမျိုးမျိုးကြောင့် မဖြစ်ဖြစ်အောင် ပြန်ဆုံပေးတဲ့ ဇာတ်လမ်းတွေကို ဒီဘက်ခေတ်မှာ မရှိတော့လောက်ဘူးလို့ ထင်ထားတာပါ။ အခုတော့ မရိုးသေးပါဘူး၊ မဟောင်းသေးပါဘူးလို့တောင် အော်ရမလိုပါပဲ။ မြင့်မြတ်သရုပ်ဆောင်မှုကတော့ လက်ခံလို့ရတဲ့ အတိုင်းအတာမှာ ရှိပါတယ်။ အရင်ဇာတ်ကားတွေမှာလို အိုဗာဖြစ်တာတွေ သိပ်မတွေ့ရတော့ပါဘူး။ အဲဒီအထဲမှာပြထားတဲ့ အဖြစ်အပျက်တစ်ခုကိုတော့ နည်းနည်းဘ၀င်မကျချင်ဘူး။ စာဖတ်လွန်းလို့ ရူးသွား၊ ကြောင်သွားတယ်လို့များ ပြောချင်နေသလားလို့ တွေးနေမိတယ်။ နဂိုကမှ ကျွန်တော်တို့ဆီမှာက စာဖတ်တဲ့လူဆိုရင် ဂေါက်တောက်တောက်၊ ကြောင်တောင်တောင်လို့ ထင်မှတ်ထားတဲ့ အစွဲမှားကြီးက ရှိနေပါဘိသနဲ့၊ ဒီဇာတ်ကားကို သာမန်လူတစ်ယောက်က ကြည့်ပြီးတော့ "တွေ့လား၊ စာဖတ်တဲ့လူတွေ ရူးသွားတာ" ဆိုပြီးများ ပြောလာခဲ့ရင် ဘယ်လိုပြန်ရှင်းပြရမလဲလို့ ကြိုတွေးနေမိတယ်။ အပျင်းပြေကြည့်ပျော်တဲ့ ဇာတ်ကားတစ်ကားပါ။

(၂)
ဇာတ်ကားအမည် - လမင်းကြွေတဲ့ည
ဝတ္ထု - နွေတမာန်
ဇာတ်ညွှန်း - ဇော်ဇင်
ဒါရိုက်တာ - နေပိုင်
သရုပ်ဆောင်များ - ဟိန်းဝေယံ၊ မေသန်းနု၊ စိုးမြတ်သူဇာ၊ မြတ်ကေသီအောင်
[ကျွန်တော့်အမြင်၊ ကျွန်တော့်မှတ်ချက်]
အပျင်းပြေကြည့်မယ်ဆိုရင်တော့ အချိန်ပေးပြီး ကြည့်လိုက်ပါ။ တကယ့်ကို အပျင်းပြေပါတယ်။ ဇာတ်လမ်းလေး လှည့်ထားပုံကလည်း မဆိုးလှပါဘူး။ ဒါပေမယ့် ဇာတ်ကားမှားပါဝင်တဲ့ သရုပ်ဆောင်တွေရဲ့ နာမည်ကို ဇာတ်ကားမစခင်မှာ စာတန်းထိုးထားတာဖြစ်တဲ့အတွက် သူတို့လှည့်တဲ့ဇာတ်ကို ကြိုတွေးလို့ရနေတာကလည်း တစ်ခုခုတော့ စဉ်းစားသင့်ကြပါပြီ။ သာမန်ဇာတ်လမ်းဆိုရင် အကြောင်းမဟုတ်ပေမယ့် လှည့်ကွက်တစ်ခုခုနဲ့ ဖမ်းထားတဲ့ ဇာတ်ကားမျိုးဆိုရင် နာမည်ကြီးမင်းသား၊ မင်းသမီး ဘယ်သူတွေပါနေတယ်ဆိုတာကို သိနေတော့ သူတို့ကဖျောက်ထား၊ လှည့်ထားရင်တောင် သိနေတော့တာပေါ့။ အမေရှာရင်း အစ်မတွေ့တာကတော့ အံ့သြဖွယ်ပါပဲ။ သိချင်ရင် ငှားသာကြည့်လိုက်ကြပါတော့။

(၃)
ဇာတ်ကားအမည် - စွဲလန်းမဆုံးတဲ့ အိပ်မက်
ဇာတ်လမ်း - အင်ကြင်းမေ
ဇာတ်ညွှန်း - မောင်လွင် (မြင်းမူ)
ဒါရိုက်တာ - သိန်းဟန် (ဖီးနစ်)
သရုပ်ဆောင်များ - ဖြိုးငွေစိုး၊ မေကဗျာ၊ ခင်လေးနွယ်
[ကျွန်တော့်အမြင်၊ ကျွန်တော့်မှတ်ချက်]
သောက်တလွဲဇာတ်လမ်း၊ ဘာမှန်းကိုမသိဘူး။ ကြည့်နေရင်းနဲ့ အထဲကလူတွေအကုန်လုံးကို အပြင်ထုတ်ပြီး ရိုက်ချင်လိုက်တာမှ လက်ကိုယားနေတာပဲ။ ဟုတ်မလိုလိုနဲ့ အဖျားရော၊ အရင်းပါ ရှူးနေတဲ့ဇာတ်လမ်း။

(၄)
ဇာတ်ကားအမည် - အမရာ ကိန္နရီ မဒ္ဒီ သမ္ဗူလ....
ဝတ္ထု - ဂျူလိုင်ခင်ခင်သက်
ဇာတ်ညွှန်း - နေစိုးသော်
ဒါရိုက်တာ - ညွန့်မြန်မာညီညီအောင်
သရုပ်ဆောင်များ - နေတိုး၊ စိုးမြတ်နန္ဒာ၊ ချစ်သုဝေ
[ကျွန်တော့်အမြင်၊ ကျွန်တော့်မှတ်ချက်]
ဇာတ်သိမ်းပိုင်းကို စိတ်ထဲမှာ သိပ်မကျေနပ်တာကလွဲရင် သိပ်ကြည့်လို့ကောင်းတဲ့ဇာတ်လမ်းပဲ။ ဘာဖြစ်မှာပါလိမ့်၊ ဘာဖြစ်မှာပါလိမ့်လို့ ပရိသတ်ကတွေးနေရအောင် ဆွဲခေါ်သွားနိုင်တယ်။ အဲဒါကိုက ဒီဇာတ်ကားရဲ့ အသက်ပဲ။ ဘာဆက်ဖြစ်မယ်ဆိုတာကို သိချင်တာကြောင့် ကြည့်နေရင်းနဲ့ပဲ ဇာတ်လမ်းပြီးသွားရမှာ။ အဲဒီထဲမှာပါတဲ့ ဒိုင်ယာလော့ခ်တွေထဲက အမှတ်ထင်ထင်နှစ်ခုကို ထုတ်ပြပါရစေဦး။ ကြားဖူးနေကျဖြစ်ပေမယ့် မှတ်မိသွားအောင်ပါ။ ငှားကြည့်သင့်တဲ့ ဇာတ်ကားတစ်ခုလို့ ညွှန်းပါရစေ။
  • လူဆိုတာ ဆန္ဒနဲ့ မရွေးချယ်ရဘူး၊ အသိတရားနဲ့ ရွေးချယ်တတ်ရတယ်။
  • ----------*----------*----------*----------*----------*----------*----------
  • တစ်ခါတစ်ရံမှာ ဖြစ်ချင်တာတွေကို နောက်ဆုတ်ပြီး၊ ဖြစ်သင့်တာတွေကို ဦးစားပေးရတယ်။

(၅)
ဇာတ်ကားအမည် - အချစ်စစ်ပြိုင်ပွဲ
ဝတ္ထု - လွန်းထားထား (ဆေးတက္ကသိုလ်)
ဇာတ်ညွှန်း၊ ဒါရိုက်တာ - ကြည်ဖြူသျှင်
အနုပညာအကြံပေး - အကယ်ဒမီ ခင်လေးသိမ့်
သရုပ်ဆောင်များ - အောင်ရဲလင်း (နှစ်ကိုယ်ခွဲ)၊ ခိုင်သင်းကြည်၊ ရတနာပုံ၊ ဒေါ်ခင်လေးဆွေ
[ကျွန်တော့်အမြင်၊ ကျွန်တော့်မှတ်ချက်]
ဇာတ်လမ်းရယ်၊ ကင်မရာအယူအဆလေးတွေရယ်၊ ရှုခင်းလေးတွေရယ်၊ အခြားဇာတ်ကားတွေနဲ့မတူတဲ့ ကာလာပုံစံနဲ့ ကြည့်ရတာတွေဟာ ဒီဇာတ်ကားကို စိတ်ဝင်စားမှု ပိုစေပါတယ်။ အောင်ရဲလင်းကို နှစ်ကိုယ်ခွဲဖြစ်အောင် ရိုက်ပြတာကိုလည်း ချီးကျူးရပါတယ်။ အခြားဇာတ်ကားတွေမှာလို ဟိုဖက်တစ်ခြမ်း၊ ဒီဖက်တစ်ခြမ်း ဆက်ထားတာမျိုးမဟုတ်ဘဲ အောင်ရဲလင်းနဲ့ အနီးစပ်ဆုံးအရပ်အမောင်း၊ အလုံးအထည်တူသူကို ထည့်ရိုက်ထားတာကို တွေ့ရပါတယ်။ အတော်လေးကို အဆင်ပြေတယ်လို့ ပြောရပါမယ်။ ကြည်ဖြူသျှင်ဟာ အောင်ရဲလင်းကို မရ,ရအောင် တင်ပေးနေတာကိုလည်း ချီးကျူးရပါတယ်။ တစ်ခုပဲပြောစရာဖြစ်တာက အောင်ရဲလင်းဟာ စိတ်တို၊ ဒေါသထွက်တတ်ပုံ မရတာပါပဲ။ လူပုံစံက အရမ်းကိုနုနေတော့ ဇာတ်လမ်းအရ ဒေါသထွက်တဲ့အခန်း၊ စိတ်တိုတဲ့အခန်းတွေမှာ ကြည့်ရတာ ဘယ်လိုမှကို အဆင်မပြေပါဘူး။ ဇာတ်လမ်းက တအားကြီးဆွဲတင်နေတဲ့အချိန် သူစိတ်တိုတာကို မြင်လိုက်ရတာနဲ့ ရယ်ချစ်စိတ်ပေါက်ပေါက်သွားတယ်။ ငှားကြည့်သင့်တဲ့ ဇာတ်လမ်းကောင်းတစ်ခုဖြစ်ကြောင်း လက်တို့လိုက်ပါတယ်။

(၆)
ဇာတ်ကားအမည် - လုံးဝအကန်
ဇာတ်လမ်း - ဂေါ်စိန်
ဇာတ်ညွှန်း - ကိုကျော်
ဒါရိုက်တာ - ကျော်ဇောလင်း ၏ အတွေးပုံရိပ်
သရုပ်ဆောင်များ - ကျော်ရဲအောင်၊ စိုးမြတ်သူဇာ၊ ချိုပြုံး၊ အောင်ခိုင်၊ ကိုပေါက်၊ ကေညီဦး၊ တက္ကသိုလ်ဂွမ်းပုံ၊ ယွန်းရွှေရည်၊ အေးသီတာ၊ ကြူကြူသင်း
[ကျွန်တော့်အမြင်၊ ကျွန်တော့်မှတ်ချက်]
တကယ့်ဝါရင့်နှစ်ယောက် တွေ့ကြပြီဆိုမှတော့ ဒီပွဲဟာ သေချာပေါက်လှပြီပေါ့ဗျာ။ စိုးမြတ်သူဇာက ယောက်ျားစိတ်ပေါက်နေတဲ့ကောင်၊ ကျော်ရဲအောင်ကို ငယ်နိုင်၊ ချိုပြုံးက စိုးမြတ်သူဇာရဲ့ အမေ၊ အောင်ခိုင်က ကျော်ရဲအောင်ရဲ့ ဦးလေး၊ အဲဒီလေးယောက်ကို အခြေတည်ပြီး အခြားဇာတ်ပို့တွေက အတင်းအဓမ္မကို ပို့လိုက်ကြတဲ့အခါ လုံးဝအကန်ဇာတ်ကားဟာ ပြီးသွားတဲ့အထိ မပျင်းလိုက်ရဘူး။ "ဟေ့ကောင်၊ အာကြီး" ဆိုတဲ့ စိုးမြတ်သူဇာရဲ့ ခေါ်သံဟာ ဇာတ်လမ်းပြီးတဲ့အထိ ကြည့်တဲ့သူရင်ထဲမှာ ကျန်နေရစ်ခဲ့ဦးမှာ အသေအချာပဲ။ အတော်ကြီးကို ကြည့်လို့ကောင်း၊ ပျော်ဖို့ကောင်းတဲ့ ဇာတ်ကားပါ။ ငှားကြည့်ဖြစ်အောင် ကြည့်လိုက်ကြပါဦး။

(၇)
ဇာတ်ကားအမည် - တိမ်တွေဘာကြောင့် မှိုင်းရတယ်
ဇာတ်လမ်း၊ ဇာတ်ညွှန်း - ကိုလွင် (စနိုးဝှိုက်)
ဒါရိုက်တာ - မောင်မောင်ဦး (စနိုးဝှိုက်)
သရုပ်ဆောင်များ - နိုင်းနိုင်း၊ အိန္ဒြာကျော်ဇင်၊ မိုးဟေမာန်ခင်၊ မြင့်မိုရ်၊ ချိုပြုံး၊ ဦးခိုင်တင်၊ ဒေါ်အိအိစိုး၊ အေးအေးခိုင်
[ကျွန်တော့်အမြင်၊ ကျွန်တော့်မှတ်ချက်]
ဇာတ်လမ်းလေးက ကောင်းသားဟလို့ ချီးကျူးမလို့ပါပဲ။ ဒါပေမယ့် ဇာတ်လမ်းမဖြစ်ဖြစ်အောင် တမင်ဇွတ်ပို့ထားတဲ့ အခန်းတွေကြောင့် ကြည့်နေရင်းနဲ့ ဖီလင်ငုပ်ငုပ်သွားတယ်။ နိုင်ငံခြားပြန် သူဌေးသမီးကြီးက သူ့ဟာသူ လမ်းဘေးမှာ ပူစီဖောင်းရောင်းနေတဲ့လူကို ဇွတ်အတင်းအဓမ္မ သွားနွယ်တာ၊ တမ်းတမ်းစွဲ ကြိုက်သွားတာကလည်း စဉ်းစားစရာပါ။ ဇာတ်လမ်းကို ကြည့်ကောင်းရင်ပြီးရော လုပ်လိုက်လေသလားလို့တောင် တွေးမိတယ်။ နည်းနည်းပါးပါး အစွန်းရောက်အောင်ပို့ရင် တော်ရောပေါ့ဗျာ။ အခုတော့ မဟုတ်သေးပါဘူး။ နိုင်းနိုင်းတို့ကို လူတန်းစေ့ဖြစ်အောင် လုပ်ပေးချင်တော့လည်း ဇာတ်လမ်းကို ရေးပစ်လိုက်တာများ လွယ်လိုက်တာ။ ဇာတ်ကားမရိုက်ဘဲ တက်ကျမ်းရေးသင့်တယ်။ ပီမိုးနင်းစာအုပ်တွေကိုတောင် ဘယ်သူမှဖတ်ကြတော့မှာ မဟုတ်ဘူး။ သူဟာ မွေးစားသားဖြစ်ကြောင်းနဲ့ ပြည့်တန်ဆာခေါင်းလုပ်နေတဲ့ ချိုပြုံးက သူ့အမေဆိုတာ ပတ်ဝန်းကျင်က သူ့သူငယ်ချင်းတွေအပါအ၀င် အခြားလူတွေက သိနေပြီး နိုင်းနိုင်းက မသိဘူးဆိုတာကတော့ လွန်လွန်းတယ် ထင်တာပါပဲ။ အိမ်မှာရှိတဲ့ အစ်ကိုလုပ်သူနဲ့ ယောင်းမတို့ရဲ့ အမွေလုတိုက်ပွဲကို ပြောင်ပြောင်တင်းတင်း ဆင်နွှဲပုံကလည်း အံ့သြစရာပဲ။ မိဘတွေ သက်ရှိထင်ရှား ရှိနေပါလျက်နဲ့ သူတို့ရှေ့မှာပဲ ပြောဆိုရန်ဖြစ်နေကြပုံက မြန်မာတွေမှ ဟုတ်ရဲ့လားလို့တောင် တွေးမိတယ်။ ကျွန်တော်ဘာဆက်ပြောရမလဲ။

(၈)
ဇာတ်ကားအမည် - ချိုးကူသံ
ဝတ္ထု - မင်းလူ
ဇာတ်ညွှန်း - ဇော်ဇင်
ဒါရိုက်တာ - ဟိန်းစိုး
သရုပ်ဆောင်များ - ဟိန်းဝေယံ၊ ရန်အောင်၊ ရဲအောင်၊ ပုလဲဝင်း၊ မေသဉ္ဇာဦး၊ စိုးမိုးကြည်၊ အုန်းသီး၊ ယွန်းရွှေရည်
[ကျွန်တော့်အမြင်၊ ကျွန်တော့်မှတ်ချက်]
မင်းလူဝတ္ထုကို ပြန်ရိုက်ထားတဲ့ဇာတ်ကားကို ကောင်းတယ်၊ မကောင်းဘူး မညွှန်းတော့ပါဘူး။ ပေါ့ပေါ့ပါးပါး၊ ကြည်ကြည်နူးနူး၊ ပျော်ပျော်ရွှင်ရွှင် ကြည့်ရမယ့်ဇာတ်ကား ဆိုတာကိုတော့ ပြောပါရစေ။ အတော်လေးကို အပျင်းပြေကြည့်ပျော်တဲ့ ဇာတ်လမ်းတစ်ခုပါ။ စိတ်ပြေလက်ပျောက် အနားယူရင်း ကြည့်ချင်တယ်ဆိုရင်တော့ ငှားကြည့်ပါလို့ တိုက်တွန်းလိုပါတယ်။ တ၀ါးဝါးပွဲကျရမယ့် အခန်းတွေလည်း အတော်များများပါတယ်လေ။

(၉)
ဇာတ်ကားအမည် - ချစ်ဖူးတယ်၊ မလွယ်ဘူး ရူးနိုင်တယ်
ဝတ္ထု - ပုညခင်
ဇာတ်ညွှန်း - မိုးကျော် (MKA)
ဒါရိုက်တာ - ကိုဇော် (အရုဏ်ဦး)
သရုပ်ဆောင်များ - ပြေတီဦး၊ တင့်တင့်ထွန်း၊ စိုးမြတ်နန္ဒာ၊ ၀ိုင်းစုခိုင်သိန်း၊ ချောရတနာ၊ ခင်လေးနွယ်
[ကျွန်တော့်အမြင်၊ ကျွန်တော့်မှတ်ချက်]
ပုညခင်နဲ့ ကိုဇော် ခေတ်လိ်ု့တောင် ပြောရမလားမသိတော့ပါဘူး။ မနှေးအမြန်သာ ငှားကြည့်လိုက်ပါတော့ဗျာ။ ဒီလိုဇာတ်ကားလေးတွေ ကြည့်ခွင့်ရနေသေးလို့လည်း မြန်မာဗီဒီယိုတွေကို ကျွန်တော်စိတ်မကုန်နိုင်သေးတာပါ။ ဖျော်ဖြေရေးဆိုတာနဲ့တန်အောင် ကြည့်တဲ့လူကို ဖျော်ဖြေသွားပါတယ်။ ဇာတ်လမ်းကောင်းတစ်ခုပါ။ စိတ်ဝင်စားစရာလည်း ကောင်းပါတယ်။ ခဏခဏ အသည်းကွဲတဲ့လူတွေကတော့ တိုက်ဆိုင်မှုတွေနဲ့ လွမ်းရဦးမယ်ထင်ပါရဲ့။

(၁၀)
ဇာတ်ကားအမည် - စကားပြောတတ်သူ
ဇာတ်လမ်း၊ ဇာတ်ညွှန်း၊ ဒါရိုက်တာ - ဝေမှိုင်းညို
သရုပ်ဆောင်များ - ရဲအောင်၊ ထွန်းထွန်း၊ မေသန်းနု၊ ဇူးဇူးမောင်၊ စိုးမိုးကြည်၊ ဒေါ်နွဲ့နွဲ့စန်း
[ကျွန်တော့်အမြင်၊ ကျွန်တော့်မှတ်ချက်]
ဇာတ်ကားတစ်ခုလုံးကို အလှုပ်ဇာတ်ကောင်ဖြစ်တဲ့ ဒေါ်နွဲ့နွဲ့စန်းက ဆွဲခေါ်သွားတာ အံ့သြစရာပါ။ ဒါရိုက်တာကို ချီးကျူးပါတယ်။ ဇူးဇူးမောင်ရဲ့ သရုပ်ဆောင်မှုကြောင့် ဇာတ်ကားက ကောင်းသင့်သလောက် မကောင်းတာလို့ အားနာစွာနဲ့ ပြောပါရစေ။ စကားပြောတာကလည်း ဘာလိုနေမှန်းမသိ၊ မျက်နှာအမူအရာကလည်း မပီပြင်၊ အတော်ကြည့်ရဆိုးတယ်။ ဒီဇာတ်ကားရဲ့ ထူးခြားချက်ကတော့ ဇာတ်ကားအမည်ပေးထားတဲ့အတိုင်း သရုပ်ဆောင်အားလုံးရဲ့ ဒိုင်ယာလော့ခ်တွေဟာ လန်ထွက်နေတာပါပဲ။ ဝေမှိုင်းညိုရယ် လုပ်တတ်ပါပေ့ကွယ်လို့ပဲ အော်လိုက်ချင်ပါတယ်။ စကားပြောခန်းတွေကိုပဲ စိတ်ဝင်တစားနဲ့ စောင့်ကြည့်ရတာ ဒီဇာတ်ကားတစ်ခုပဲ ရှိမယ်ထင်ပါတယ်။ ဘီအီးဒီအောင်သိုက်ရဲ့ ကက်ဆက်ဇာတ်လမ်း နားထောင်ရတာနဲ့တောင် ဆင်တူနေသေးရဲ့။

(၁၁)
ဇာတ်ကားအမည် - ဘယ်ပန်းချီရေးလို့မမီ
ဇာတ်လမ်း - သိန်းသန်းထွန်း
ဇာတ်ညွှန်း - ကိုချင်း
ဒါရိုက်တာ - အောင်ဆွေမြန်မာ
သရုပ်ဆောင်များ - မိုးအောင်ရင်၊ ရန်အောင်၊ ဇင်ဝိုင်း၊ ပုလဲဝင်း၊ မေသက်ခိုင်
[ကျွန်တော့်အမြင်၊ ကျွန်တော့်မှတ်ချက်]
ကျွန်တော့်အမြင်ပြောရရင် ပေးချင်တဲ့ message ကို ကြည့်တဲ့ပရိသတ်တိုင်း ရနိုင်မယ်မထင်ဘူး။ တင်ပြပုံက မြင့်လွန်းတဲ့အတွက် လိုက်မမီတာမျိုးလည်း မဟုတ်ဘူး။ ပေးချင်တဲ့ message က ကောင်းပါလျက်နဲ့ အခြားအကြောင်းအရာတွေ အပေါ်မှာသွားပြီး ဇောင်းပေးလိုက်တော့ မူလရည်ရွယ်ချက်ကို ပျောက်သွားစေတယ်။ သာမန်ကြည့်တဲ့ပရိသတ်ကတော့ မိုးအောင်ရင်က အဖေလုပ်သူ ရန်အောင်အတွက် အသေခံလိုက်တယ်လို့ပဲ နားလည်ကြမယ်ထင်ပါရဲ့။ အဓိကပေးချင်တဲ့ message ကို မရောက်တော့ဘဲ အဲဒီမှာတင် ရပ်သွားတယ်လို့ မြင်မိတယ်။ ဇာတ်ညွှန်းရေးသူနဲ့ ဒါရိုက်တာရဲ့ လိုအပ်ချက်လို့ မြင်တာပါပဲ။ မဆိုးဘူးလို့ ပြောလို့ရမယ့်ဇာတ်ကားပါ။ မဖြစ်နိုင်တဲ့ဇာတ်ကွက်တွေ ပါတာကလွဲရင်ပေါ့လေ။

(၁၂)
ဇာတ်ကားအမည် - အိပ်မက်ကြွေ
ဇာတ်လမ်း၊ ဇာတ်ညွှန်း - လင်္ကာ
ဒါရိုက်တာ - အာယု
သရုပ်ဆောင်များ - သူထူးစံ၊ နန္ဒာလှိုင်၊ အေးဝတ်ရည်သောင်း၊ ထွန်းထွန်းဝင်း၊ ရူပ၊ ဟိန်းစိုး
[ကျွန်တော့်အမြင်၊ ကျွန်တော့်မှတ်ချက်]
သူထူးစံကို ဘယ်လိုဖြစ်ပြီး ထွန်းထွန်းဝင်းက အိမ်ခေါ်ထားသလဲဆိုတဲ့ အကြောင်းအရာ၊ အဖေလုပ်တဲ့ ရူပက သူ့သားကို ဘာကိစ္စ အခြားတစ်ယောက်လက်မှာ စိတ်ချလက်ချ အပ်ထားရသလဲ၊ ပြောသမျှယုံရသလဲဆိုတဲ့ အကြောင်းအရာ၊ အိမ်မှာ ဒီလောက်လူတွေများတာ သူထူးစံကို နန္ဒာလှိုင်က ဘယ်သူမှမသိအောင် အပြင်ကို ခေါ်ခေါ်သွားနိုင်တယ်ဆိုတဲ့ အကြောင်းအရာ၊ ရူပက ရောဂါသည် သူ့သားကို လိုက်ခေါ်တာပါဆိုမှ နန္ဒာလှိုင်တို့က တားတဲ့အတွက် သူတို့တွေအလိုကျ စီမံတာကို နာခံတယ်ဆိုတဲ့ အကြောင်းအရာ၊ ထွန်းထွန်းဝင်းက ဇာတ်သိမ်းမှာ ဘာဖြစ်သွားတာလဲဆိုတဲ့ အကြောင်းအရာတွေအတွက် ဘယ်သူ့ဆီကမှ အဖြေမရလိုက်ဘူး။ တော်တော်ကို သပွတ်အူကျတဲ့ ဇာတ်လမ်းပါပဲ။ အပျိုးကလည်း မခိုင်ဘူး၊ နောက်ဆုံးအဆုံးသတ်ကလည်း ဘာမှန်းမသိဘူး။ သေချင်တော့လည်း လွယ်လိုက်တာ။ ငေါက်ကနဲပဲ။ ဇာတ်လမ်းက ပြစရာမရှိတဲ့အတွက် မလိုအပ်ဘဲ နောက်ခံတီးလုံးတွေထည့်ပြီး လမ်းလျှောက်တာတွေ၊ မြင်းစီးတာတွေ၊ ကားမောင်းတာတွေကို အသားလွတ်ကြီး ထည့်ထားတာကတော့ ပရိသတ်အပေါ်မှာ လုပ်စားလွန်းတယ်လို့ မြင်တာပဲ။ အာယုရိုက်တာဆိုလို့ အားခဲလိုက်ရတာ၊ ခဲလေသမျှ သဲရေကျပဲ။

အမှတ်တရ
ကိုဉာဏ် (ပန်းလောင်မြေ)
၂၀၁၀ ပြည့်နှစ်၊ မေလ ၂၉ ရက်၊ စနေနေ့။
ည ၁၁ နာရီ ၀၄ မိနစ်တွင်ပြီး၏။

No comments:

Post a Comment

 
Web Statistics