ကြည့်ဖြစ်ခဲ့သော မြန်မာဗီဒီယိုဇာတ်ကားများ

(၁)

ဇာတ်ကားအမည် - ရွှေမင်းသားလေးရဲ့ ကိုယ်ရံတော်
ဇာတ်လမ်း - လရောင်ကျူးရင့်
ဇာတ်ညွှန်း - မြတ်လှိုင်း (ကဗျာ)
ဒါရိုက်တာ - နေပိုင်
သရုပ်ဆောင်များ - ပြေတီဦး၊ န၀ရတ်၊ ထွန်းထွန်းဝင်း

[ကျွန်တော့်အမြင်၊ ကျွန်တော့်မှတ်ချက်]
ဘာပြောရမှန်းတောင် မသိတော့ဘူး။ ပြေတီဦးဇာတ်ကားတွေထဲမှာ အတော်ချာတဲ့ဇာတ်လမ်းလို့ ပြောနိုင်မယ်ထင်ပါရဲ့။ ဇာတ်လမ်းနာမည်မှာကတည်း ကျွန်တော်သိခဲ့ဖို့ကောင်းတယ်။ န၀ရတ်က ယောက်ျားလေးလို ၀တ်ထားတာနဲ့ပဲ ပြေတီဦးက ယောက်ျားလေးမှန်းမသိ၊ မိန်းကလေးမှန်းမသိ ဖြစ်ရတယ်ဆိုတာကြီးကလည်း ဘယ်နှယ့်ကြီးတုန်း။ အဲဒီလောက်တူတဲ့ ယောက်ျားရှာတော့ အပြင်မှာ အခုထိ မတွေ့ဖူးသေးဘူး။ တွေ့ခဲ့ရင် လက်တို့လိုက်စမ်းပါဦး။ ကျွန်တော်ကိုဉာဏ် ကိုယ့်စရိတ်ကိုယ်စားပြီး လာကြည့်ပါ့မယ်။ "ဖုန်မှုန့်" ဆိုတာကို ဘာမှန်းမသိဘူးဆိုတာကလည်း နည်းနည်းများ လွန်နေသလားလို့ပါ။ ဘာမှန်းမသိ၊ ညာမှန်းမသိတဲ့ ယောက်ျားရှာတစ်ယောက်ကို သူ့ကိုစောင့်ရှောက်ဖို့ အပ်နှံရဲတဲ့ အဲဒီဇာတ်လမ်းထဲက ဇာတ်ကောင်ကိုလည်း အံ့သြမိပါရဲ့။ သြချမိပါရဲ့။ ရပ်ကွက်ထဲမှာ အိမ်တစ်လုံးငှားနေကြတယ်။ သူတို့နှစ်ယောက်ဟာ ညီအစ်ကိုဆိုပြီး သတင်းလွှင့်ထားတယ်။ အားလုံးကလည်း အဲဒီအတိုင်းပဲ ထင်ကြသတဲ့။ တော်တော်လေးကို အသုံးမကျတဲ့ရပ်ကွက်ပဲ။ ပိုဆိုးတာက ပန်းတိမ်ဆိုင်က ညီအစ်မနှစ်ယောက်က သူတို့နှစ်ယောက်ကို မိန်းမနောက်ပိုး ပိုးကြတာပါပဲ။ မြန်မာဇာတ်ကားမှ ဟုတ်ပါလေစဗျာ။ အဲဒါမျိုးတွေကိုကျတော့ ဘာကိစ္စ ဆင်ဆာမဖျက်သလဲလို့ နားမလည်နိုင်ဘူး။ အရက်သမားကိုလည်း ကြည့်တဲ့လူတွေ သဘောကျအောင်၊ လေးစားလာအောင်၊ ပညာရှိယောင်ယောင် မှတ်ထင်လာအောင် ရိုက်ပြနိုင်တဲ့ ဒါရိုက်တာကိုလည်း ချီးကျူးမိပါရဲ့။ မြန်မာလူမျိုးတွေအကုန်လုံး "အရက်သမား အကောင်းစား" လေးတွေဖြစ်အောင်များ တမင်လှုံ့ဆော်နေသလား မသိပါဘူးဗျာ။ တော်တော်အသုံးမကျတဲ့ ဇာတ်လမ်းနဲ့ တော်တော်ကြီးကို မကြည့်သင့်တဲ့ ဇာတ်ကားပါ။

(၂)

ဇာတ်ကားအမည် - နေကို ကျောခိုင်းတဲ့လ
ဝတ္ထု - နွေတမာန်
ဇာတ်ညွှန်း - ဇော်ဇင်
ဒါရိုက်တာ - ဇမ္ဗူထွန်း သက်လွင်
သရုပ်ဆောင်များ - ဟိန်းဝေယံ (နှစ်ကိုယ်ခွဲ)၊ ရန်အောင်၊ စိုးမြတ်သူဇာ

[ကျွန်တော့်အမြင်၊ ကျွန်တော့်မှတ်ချက်]
မြန်မာလူမျိုးတွေဟာ ရှင်းပြတာကို ဘယ်တော့မှ နားမထောင်တတ်တဲ့ လူမျိုးတွေမှန်း ဇာတ်ကားတွေကြည့်ရင်းနဲ့ သိသိလာရတယ်။ အဖြစ်မှန်ကို ရှင်းပြမယ်လုပ်တိုင်း ဘယ်တော့မှ နားမထောင်တတ်ကြဘူး။ ပြောမယ့်လူကလည်း ပါးစပ်ကြီးဟ၊ လက်ဝါးကြီးကာပြီး အမြဲတမ်း ရပ်နေတတ်တယ်။ ကိုယ်ပြောစရာရှိတာကို အောင်မြင်အောင်ပြောမယ် ဘယ်တော့မှ မရှိဘူး။ အေးလေ... အဲဒါမှလည်း ဇာတ်လမ်းက ပေရှည်လို့ရမှာကိုး။ အစကတော့ ရုပ်ရှင်၊ ဗီဒီယိုဇာတ်လမ်းသက်သက်ပါပဲ။ ဒါပေမယ့် ကြာလာတဲ့အခါ အဲဒါမျိုးဟာ အလေ့အကျင့်တစ်ခု ဖြစ်သွားတတ်ပါတယ်။ ပရိသတ်တွေအဖို့ ဒါမျိုးတွေကိုပဲ မြင်တွေ့နေရတာကိုး။ ဆင်ခြင်သင့်ပါတယ်။ မိသားစုတစ်ခုလုံး ပြိုကွဲအောင် ဘေးကနေ မြှောက်ပေးနေတဲ့ လူတစ်ယောက်ကို ပေါင်းသင်းနေတာကိုလည်း နားမလည်နိုင်ပါဘူး။ မဟုတ်တဲ့နေရာကျတော့ အဲဒီလိုမျိုး သည်းခံစိတ်တွေ၊ မေတ္တာတရားတွေ ကြီးနေပြန်ပါရောလား။ ဇာတ်လမ်းအလှည့်လေးတွေ၊ စိုးမြတ်သူဇာရဲ့ ခံစားချက်တွေနဲ့ ကြည့်ချင်စရာတော့ ကောင်းပါတယ်။ အပျင်းပြေဆိုရင်တော့ မဆိုးလှပါဘူး။

(၃)

ဇာတ်ကားအမည် - မှော်
ဇာတ်ညွှန်း - အောင်ကြီး
ဇာတ်လမ်းနှင့် ဒါရိုက်တာ - မောင်မျိုးမင်း (ရင်တွင်းဖြစ်)
သရုပ်ဆောင်များ - ရဲတိုက်၊ ရန်အောင်၊ မင်းဟိဏ်း၊ ရာဇာနေ၀င်း၊ အောင်ခိုင်၊ ဖိုးကျော်၊ တင့်တင့်ထွန်း၊ မိုးဟေကို၊ နွဲ့နွဲ့မူ၊ မျိုးမျိုးခိုင်၊

[ကျွန်တော့်အမြင်၊ ကျွန်တော့်မှတ်ချက်]
ဆာတိုရီကထုတ်တဲ့ ရဲတိုက်ရဲ့ ဇာတ်ကားတွေထဲမှာ ရှားရှားပါးပါး အင်္ဂလိပ်စာတန်း မထိုးတဲ့ဇာတ်ကားပါ။ သရုပ်ဆောင်အင်အားကို မြိုင်မြိုင်ဆိုင်ဆိုင်ကြီး သုံးထားတာကြောင့်လည်း ဇာတ်လမ်းကောင်းတစ်ခုကို ပုံဖော်နိုင်ခဲ့တာပါ။ သူ့နေရာနဲ့သူ ကျရာဇာတ်ရုပ်ကို ပီပြင်အောင် သရုပ်ဆောင်သွားကြတဲ့အတွက် ဇာတ်လမ်းဟာ စိတ်ဝင်စားစရာ ကောင်းခဲ့ပါတယ်။ မောင်မျိုးမင်းကတော့ သူလုပ်ပြချင်နေတာတွေကို တဖြည်းဖြည်းနဲ့ ကြိုးစားတင်ဆက်နေပါတယ်။ ဒီဇာတ်ကားမှာလည်း မြန်မာမှုနဲ့ သိပ်မကိုက်ညီလှတဲ့ အိပ်မက်လွှင့်စက်လိုမျိုး အဖြစ်အပျက်ကို စိတ်ဝင်စားအောင် ရိုက်ပြထားပါတယ်။ ရုပ်ရှင်ဇာတ်လမ်းအနေနဲ့ ခံစားရအောင်သက်သက်သာ ရိုက်ပြထားတယ်ဆိုတာကို နားလည်ရပါတယ်။ ဒါပေမယ့် ဇာတ်လမ်းပုံစံတွေက ထိုင်းဇာတ်ကားတွေနဲ့ တူလာတာကိုတော့ သဘောမကျပါဘူး။ ဒီလောက်သရုပ်ဆောင်တွေ အများကြီးသုံးထားပါလျက်နဲ့ ထူးထူးဆန်းဆန်း အမှတ်ထင်ထင် ဖြစ်ရတာက ဖိုးကျော်ရဲ့ ဇာတ်ရုပ်ပါ။ ဖိုးကျော်အတွက် အဲဒီဇာတ်ရုပ်ကို တမင်ရေးပေးထားသလားတောင် ထင်မှတ်ရပါတယ်။ ဖျော်ဖြေရေးအနေနဲ့ ငှားကြည့်သင့်တဲ့ ဇာတ်ကားတစ်ခုပါ။

(၄)

ဇာတ်ကားအမည် - ဖူးစာ လူးလာ ဒူးကာလို့မရ
ဝတ္ထု - မူပိုင်နှင်းဆီ
ဇာတ်ညွှန်း - နေစိုးသော်
ဒါရိုက်တာ - ကိုဇော် (အရုဏ်ဦး)
သရုပ်ဆောင်များ - မင်းမော်ကွန်း၊ ရဲအောင်၊ စိုးမြတ်သူဇာ၊ ခင်လေးနွယ်၊ ခင်လေးဆွေ၊ ဗေလုဝ၊ ခင်လှိုင်၊ ၀ါဝါအောင်၊ မျိုးမျိုးခိုင်

[ကျွန်တော့်အမြင်၊ ကျွန်တော့်မှတ်ချက်]
ပါးပါးနပ်နပ်နဲ့ တင်ပြနိုင်ရင်လည်း ဒီဇာတ်လမ်းပဲ ဖြစ်နိုင်ပေမယ့် အခုလိုမျိုး အတုံးလိုက်အတစ်လိုက် တင်ပြလိုက်တော့ ကျွန်တော်တွေးမိတာ တစ်ခုပဲရှိတယ်။ မြန်မာတွေဟာ အတော်ကြီးကို လင်တရူး၊ မယားတရူး ကြတာပဲလားဆိုတဲ့ အတွေးပါ။ ဇာတ်လမ်းထဲမှာပါတဲ့ ဇာတ်ကောင်တွေရဲ့ အခြေအနေ အဆင့်အတန်းအရ အဲဒီလောက်ကြီး မဖြစ်သင့်ဘူးထင်ပါရဲ့။ ကိုယ့်ဦးလေးနဲ့ ကိုယ့်အဒေါ်ကို တူတွေ၊ တူမတွေက ပြန်ပြီးအောင်သွယ်လုပ်ပေးတာကလည်း မြန်မာ့ယဉ်ကျေးမှုတစ်ရပ် ဖြစ်လာတော့မယ် ထင်ပါရဲ့။ ပရိသတ်ကို မရယ်,ရယ်အောင် ကလိထိုးချင်ရင်လည်း အခြားနည်းလမ်းတွေ ရှိပါရဲ့ဗျာ။ အခုတော့ ဘယ့်နှယ်ပြောရပါလိမ့်။ ၀ါဝါအောင်က ဗေလုဝကို အတင်းကာရော လိုက်ကြိုက်တာမျိုးဆိုရင် ရုပ်ဆိုးလွန်းတယ်။ ဘယ်သူတွေက ရယ်ကြသလဲတော့ မသိဘူး။ ကျွန်တော်ကတော့ အတော်လေးကို စိတ်အချဉ်ပေါက်သွားမိပါတယ်။ သောတနဲ့ သက်တန့် တိုက်ဆိုင်လိုက်တာများဗျာ ဖြစ်ရတာကလည်း စိုင်းစိုင်းခမ်းလှိုင်တောင် ထိုင်ငိုလောက်ပါပေရဲ့။ အချိန်ပိုနေလို့ သူတို့ပေါသမျှကို အပျင်းပြေထိုင်ရယ်ချင်တယ် ဆိုရင်တော့ ငှားကြည့်သင့်တဲ့ဇာတ်ကားပါ။

(၅)

ဇာတ်ကားအမည် - ကံငါးပါးမှောက် ငရဲရောက်
ဝတ္ထု - နန္ဒ၀င်းကျော်ခေါင်
ဇာတ်ညွှန်း - နေစိုးသော်
ဒါရိုက်တာ - မြင့်စိုး (၀/သ)
သရုပ်ဆောင်များ - ခန့်စည်သူ၊ ဟိန်းဝေယံ၊ မြင့်မြတ်၊ အောင်ခိုင်၊ ကိုကိုဦး၊ ကင်းကောင်၊ ထွန်းထွန်းဝင်း၊ သင်ဇာဝင့်ကျော်၊ စိုးပြည့်သဇင်၊ မြင့်မြင့်ခိုင်၊ မေသန်းနု၊ ဖူးစုံ၊ ပပ၀င်းခင်၊ ၀ါဝါအောင်၊ ခင်သန်းနွယ်၊ မေသဉ္ဇာဦး၊ အေးအေးခိုင်၊ မျိုးမျိုးခိုင်

[ကျွန်တော့်အမြင်၊ ကျွန်တော့်မှတ်ချက်]
ဆိုင်ကိုရောက်လို့ မေးလိုက်တိုင်း အဲဒီအခွေက ရှိနေတာချည်းပဲ။ အသစ်ထွက်ပေမယ့် အငှားမသွက်တာ စဉ်းစားစရာပါ။ တကယ်ဆိုရင် ဒီဇာတ်ကားဟာ လူတိုင်းကြည့်သင့်တဲ့ ဇာတ်ကားပါ။ ဇာတ်လမ်းရည်ရွယ်ချက် ကောင်းမွန်လှပေမယ့် တင်ပြပုံဇာတ်ညွှန်း လိုနေတဲ့အတွက် အခုလိုဖြစ်သွားရတယ် ထင်ပါရဲ့။ အထူးသဖြင့် ဒုတိယပိုင်းတစ်ချပ်လုံးကို ကံငါးပါးမှောက် ငရဲရောက်ဆိုတဲ့ တရားတစ်ပုဒ်လုံးနဲ့ အဆုံးသတ်လိုက်တာကို ပရိသတ်တွေက စိတ်ညစ်သွားကြတယ် ထင်ပါရဲ့။ အဓိပ္ပါယ်ရှိတာ၊ တန်ဖိုးရှိတာမှန်ပေမယ့် အတုံးလိုက်၊ အတစ်လိုက်ကြီး ပေးလိုက်တဲ့အတွက် ဇာတ်ကားကောင်းတစ်ခုကို လူတိုင်းကြည့်ဖြစ်ကြပါ့မလားလို့ တွေးပူနေမိတယ်။ ဇာတ်ကားထဲမှာပါတဲ့ ခန့်စည်သူလို ဈေးဥက္ကဋ္ဌမျိုး အပြင်မှာ လိုက်ရှာပါဦးမယ်။ မရှိဘဲနဲ့တော့ ရိုက်ပြမယ် မထင်ပါဘူးနော်။ ကိုယ်တိုင်ကြည့်သင့်သလို၊ ကလေးတွေကိုလည်း ပြသင့်တဲ့ဇာတ်ကားပါ။

(၆)

ဇာတ်ကားအမည် - ခင်ကြီးကျယ်
ဝတ္ထု - သျှင်မ
ဇာတ်ညွှန်း - နေစိုးသော်
ဒါရိုက်တာ - ညွန့်မြန်မာညီညီအောင်
သရုပ်ဆောင်များ - လူမင်း၊ ထက်ထက်မိုးဦး၊ ဇော်ဦး၊ ၀ါဝါအောင်၊ နေဆန်း၊ ဟိန်းမင်း၊ မျိုးမျိုးခိုင်၊ ခင်လေးဆွေ

[ကျွန်တော့်အမြင်၊ ကျွန်တော့်မှတ်ချက်]
ဇာတ်ကားရဲ့ရည်ရွယ်ချက်နဲ့ ပေးချင်တဲ့ message က အရမ်းကောင်းတယ်။ ဒါပေမယ့် ထက်ထက်မိုးဦးကို အိမ်ပေါ်ကနှင်ချပြီး လူမင်းနောက်ကို ထည့်လိုက်တာမျိုးကတော့ ဇာတ်လမ်းသဘောအရ ဆိုပေမယ့် အပြင်မှာ မဖြစ်နိုင်တာမျိုးကြီးပါ။ စီးပွားရေးလုပ်ငန်းတွေကို ဦးစီးပြီးလုပ်နေတဲ့ မိန်းမတစ်ယောက်ကလည်း မိဘက အိမ်ပေါ်က နှင်ချလိုက်တာနဲ့ပဲ ဘာမှမပြောတော့ဘဲ ပူစီပေါင်းလည်ရောင်းတဲ့ လူမင်းနောက်ကို လိုက်လာတယ်ဆိုတာ နည်းနည်းတော့ သဘာဝမကျဘူးထင်မိပါရဲ့။ ဘာပဲဖြစ်ဖြစ် ကြည့်ဖြစ်အောင် ကြည့်သင့်တဲ့ ဇာတ်လမ်းကောင်းလေးတစ်ခုပါ။

(၇)

ဇာတ်ကားအမည် - အပျိုဗိုက်
ဇာတ်လမ်း - ဂေါ်စိန်
ဇာတ်ညွှန်း - ကိုကျော်
ဒါရိုက်တာ - ကျော်ဇောလင်း ၏ အတွေးပုံရိပ်
သရုပ်ဆောင်များ - လူမင်း၊ စည်သူမောင်၊ သက်မွန်မြင့်၊ တက္ကသိုလ် ဂွမ်းပုံ၊ ယွန်းရွှေရည်

[ကျွန်တော့်အမြင်၊ ကျွန်တော့်မှတ်ချက်]
မြန်မာကားတွေကလည်းဗျာ၊ အခြားဇာတ်လမ်းလေးတွေ ရှာကြံရေးကြစမ်းပါဦး။ ဒီပုတ်ထဲက ဒီပဲဇာတ်လမ်းတွေချည်းပဲ ကြည့်နေရတာ စိတ်ညစ်လာပြီ။ အခုလည်း ကြည့်ပါဦး။ လုပ်ငန်းရှင် သူငယ်ချင်းသူဋ္ဌေးနှစ်ယောက်က ကိုယ့်ရုံးမှာအလုပ်လုပ်နေသော ယောက်ျားမရှိတော့တဲ့ ဗိုက်ကြီးသည် ကွန်ပျူတာစာရေးမကို အပြိုင်ကြိုက်ပြီး လိုက်ပိုးတဲ့အကြောင်း ဇာတ်လမ်းဆင်ထားပြန်ပါရောလား။ အံ့သြမိပါရဲ့ဗျာ။ ဂွမ်းပုံနဲ့ ယွန်းရွှေရည်ရဲ့ အပို့၊ အထောင်တွေသာမပါရင် ဒီဇာတ်ကားကိုကြည့်ရတာ အဆင်ပြေမယ်မထင်ဘူး။ ပြောကိုမပြောချင်တော့ပါဘူးဆိုတဲ့ ဇာတ်လမ်းပါပဲ။ (တကယ်မပြောချင်တာပါ) :)

(၈)

ဇာတ်ကားအမည် - ပန်းသုံးပွင့်
ဝတ္ထု - ဆုသင်္ချေ
ဇာတ်ညွှန်း - မိုးစက်
ဒါရိုက်တာ - မောင်မောင်ဦး (စနိုးဝှိုက်)
သရုပ်ဆောင်များ - နိုင်းနိုင်း၊ ပုလဲဝင်း၊ ချောရတနာ၊ မိုးဟေမာန်ခင်၊ ကင်းကောင်၊ ကျော်ထူး၊ ဦးခိုင်တင်၊ ဟိန်းမင်း

[ကျွန်တော့်အမြင်၊ ကျွန်တော့်မှတ်ချက်]
ဟိန်းမင်းကလွဲရင် ကျန်တဲ့သရုပ်ဆောင်တွေအားလုံးကို ဘယ်လိုမှ ကြည့်လို့မရတဲ့ ဇာတ်ကားပါ။ ကင်မရာရိုက်ထားတာကလည်း မင်္ဂလာဆောင်မှာ မှတ်တမ်းတင်တာလောက်အောင် မကြည်လင်ဘူး။ မှုန်ဝါးဝါးနဲ့။ ဘာကွာလတီမှ မရှိဘူး။ ဇာတ်လမ်းကလည်း တကယ့်ကို အူတိအူကြောင်။ သပွတ်အူကမှ နည်းနည်းရှင်းဦးမယ်။ တိုက်ဆိုင်ချင်ပြန်တော့လည်း ကိုရီးယားကားတွေတောင် လက်မြှောက်ရမယ်။ မင်းမဲ့စရိုက်ဆန်ဆန် အပြုအမူတွေက ပါလိုက်သေးတယ်။ တမင်များ ဖရိန်ချပေးနေသလား အောက်မေ့ရတယ်။ လုံးဝအသုံးမကျတဲ့ ခပ်ညံ့ညံ့ ဇာတ်ကားတစ်ခုပါပဲ။

(၉)

ဇာတ်ကားအမည် - ဖေချစ်
ဇာတ်လမ်း၊ ဇာတ်ညွှန်း၊ ဒါရိုက်တာ - မောင်အောင် (ရူပဗေဒ)
သရုပ်ဆောင်များ - လူမင်း၊ မေသဉ္ဇာဦး၊ ၀တ်မှုန်ရွှေရည်

[ကျွန်တော့်အမြင်၊ ကျွန်တော့်မှတ်ချက်]
တော်ပါသေးရဲ့ ဒီလိုဇာတ်ကားမျိုးလေးတွေလည်း ကြည့်ခွင့်ရနေပေသေးလို့။ သားသမီးနဲ့ မိဘကြားက ချစ်ခြင်းမေတ္တာ (ဒီဇာတ်ကားမှာတော့ ဖခင်နဲ့ သမီးကြားက မေတ္တာတရား) ကို ပုံပေါ်အောင် ဖော်ကျူးပြသွားနိုင်တယ်။ အိုဗာဖြစ်လွန်းတယ်လို့ ထင်ရပေမယ့် ကျွန်တော့်အတွေ့အကြုံအရ ဖြစ်နိုင်တဲ့ အနေအထားတွေပါ။ အဲဒီလို သည်းသည်းလှုပ်တွေကို အပြင်မှာလည်း ကျွန်တော်တွေ့ဖူးပါတယ်။ ဇာတ်ကားရဲ့ ပေးချင်တဲ့ message ကို ကြည့်တဲ့လူမြင်အောင် ပြပေးနိုင်ခဲ့တဲ့အတွက် ဒါရိုက်တာကို ကျေးဇူးတင်ပါတယ်။ ဖအေကို အရမ်းချစ်တဲ့ သမီးတွေနဲ့ သမီးတွေကို အရမ်းချစ်တဲ့ ဖအေတွေ ကြည့်ဖြစ်အောင်ကို ကြည့်သင့်တဲ့ဇာတ်ကားပါ။ မေတ္တာဖွဲ့ဆိုပေမယ့် ရယ်စရာ၊ မောစရာလေးတွေနဲ့ မျှမျှတတ ပုံဖော်ထားတာ ချီးကျူးစရာပါ။ ကြည့်ရင်းနဲ့ ပျင်းစရာမရှိအောင်ကို စွဲဆောင်ထားပါလိမ့်မယ်။ လူမင်းရဲ့ သရုပ်ဆောင်မှုကလည်း ဒီဇာတ်ကားမှာ အထင်ကြီးစရာပါ။ ပြောစရာမရှိပါဘူး။ ၀တ်မှုန်ရွှေရည်ကတော့ သူ့ပုံစံကလေးနဲ့ ကွက်တိဝင်နေတာဆိုတော့ တကယ့်ကို အပြစ်ကင်းတဲ့ ကလေးတစ်ယောက်အတိုင်းပါပဲ။ ဖေချစ်ဆိုတဲ့ သမီးတစ်ယောက် စရိုက်ကို အပီပြင်ဆုံး သရုပ်ဆောင်ပြသွားနိုင်ပါတယ်။ ကြည့်နေရင်းနဲ့ မျက်ရည်တွေများ ၀ဲလာခဲ့ရင် သုတ်မပစ်လိုက်ပါနဲ့။ မိဘတွေကိုဖြစ်စေ၊ သားသမီးတွေကိုဖြစ်စေ သတိရပြီး ကိုယ်တိုင်ဝင်ခံစားမိလို့ ဖြစ်ပါလိမ့်မယ်။ ဇာတ်သိမ်းခန်းမှာ လူမင်းပြောလိုက်တဲ့ စကားတစ်ခွန်းကတော့ တွေးစရာတွေ တသီကြီးဖြစ်ပြီး ရင်ထဲမှာနင့်ကနဲ ကျန်ရစ်ခဲ့စေပါတယ်။
"အဖေတွေကသာ သမီးတွေကို မခွဲနိုင်တာ၊ သမီးတွေကတော့ အဖေတွေကို ခွဲနိုင်တယ်" တဲ့။

အမှတ်တရ
ကိုဉာဏ် (ပန်းလောင်မြေ)
၂၀၁၀ ပြည့်နှစ်၊ ဇွန်လ ၁၅ ရက်၊ အင်္ဂါနေ့။
နံနက် ၁၀ နာရီ ၃၇ မိနစ်တွင်ပြီး၏။