မချိပြုံးနဲ့သွား
ငါးနှစ်ကာလအတွင်း ကမ္ဘာကို တော်တော်နှံ့သွားပြီ။ ပိုက်ဆံလည်း အသင့်အတင့် စုမိပါတယ်။ မိဘတွေက စုဆောင်းပေးထားတယ်လို့ ပြောပါတယ်။ သူက အိမ်ထောင်မရှိသေးပါဘူး။ တစ်သက်လုံး သင်္ဘောသား လုပ်တော့မှာလားလို့မေးတော့ ဒီအတိုင်းပဲ ဆက်လုပ်ရမှာပေါ့ ဆရာရယ်လို့ မချိပြုံးနဲ့ ဖြေပါတယ်။ နှစ်နာရီလောက်ကြာအောင် စကားတွေပြောပြီးတော့ သူပြန်သွားပါတယ်။ သူပြန်သွားပေမယ့် သူမျက်နှာမှာ တဒင်္ဂမြင်တွေ့လိုက်ရတဲ့ မချိပြုံးလေးက မျက်စိထဲမှာ ကျန်နေရစ်တယ်။ သင်္ဘောတက်ခါနီး သူလာကန်တော့ နှုတ်ဆက်တုန်းကလည်း ဒီမချိပြုံးလေးနဲ့ပါပဲ။
မချိပြုံးနဲ့ပြန်
သူက စက်မှုတက္ကသိုလ်က ဗိသုကာဘွဲ့ရသူပါ။ အပျော်တမ်း ပန်းချီဆရာလည်း ဖြစ်တယ်။ ဒါပေမယ့် အခြေအနေက တွန်းပို့လိုက်တော့ သင်္ဘောတက်သွားရတယ်။ အခုငါးနှစ်ကြာမှ ပြန်ရောက်လာတယ်။ မချိပြုံးနဲ့ သင်္ဘောတက်သွားသူဟာ ပြန်ဆင်းလာတော့လည်း မချိပြုံးနဲ့ပဲ တွေ့ရတော့ စိတ်မကောင်းဖြစ်မိတယ်။ ရေကြောင်းပညာနဲ့ ရေကြောင်းအလုပ်ကို စိတ်ဝင်စားလို့ လုပ်တာဆိုရင် ဘာမှစိတ်မကောင်းဖြစ်စရာ အကြောင်းမရှိပါဘူး။ အတွေ့အကြုံလည်းစုံ ၀င်ငွေကောင်းကောင်းလည်း ရတဲ့အလုပ်ပဲ။ ကောင်းပါတယ်။ ဒါပေမယ့် သူကတော့ဗိသုကာနဲ့ ပန်းချီကို စိတ်ဝင်စားပြီး အနုပညာသမား ဖြစ်ချင်တဲ့သူမို့ စိတ်မကောင်းဖြစ်မိတာပါ။
အတွင်းဦးနှောက်ယိုစီးမှု
သတင်းစာဖတ်တဲ့အခါ ကြော်ငြာတွေကို စေ့စေ့စပ်စပ် ဖတ်သူဆိုတော့ အမြီးအမောက် မတည့်တာမျိုးတွေ တော်တော်များတာကို သတိပြုမိပါတယ်။ ဆရာဝန်က ကျူရှင်ကျောင်းဖွင့်တာ၊ ဆောက်လုပ်ရေး လုပ်ငန်းလုပ်တာ၊ သတ္တုတွင်း အင်ဂျင်နီယာက အရက်ချက်စက်ရုံ မန်နေဂျာဖြစ်နေတာ။ ချည်မျှင်နဲ့ အထည်အလိပ်လုပ်ငန်း အင်ဂျင်နီယာက ရေသန့်စက်ရုံထောင်တာ စတဲ့စတဲ့ ယူခဲ့တဲ့ဘွဲ့နဲ့ လုပ်တဲ့အလုပ် မအပ်စပ်တာမျိုးတွေ နေ့စဉ်လို တွေ့ရတယ်။ ပညာတတ်တွေ နိုင်ငံခြားထွက်သွားကြတာမှ "ဦးနှောက်ယိုစီးမှု" မဟုတ်ဘဲ ဒါမျိုးတွေလည်း ဦးနှောက်ယိုစီးမှုတွေပါလားလို့ တွေးမိတယ်။ ဒီလို "အတွင်းဦးနှောက်ယိုစီးမှု" (internal brain-drain)က ပိုများမယ်ထင်တယ်။ မင်္ဂလာဆောင်ကြော်ငြာတွေကို ဖတ်ကြည့်ရင် သိနိုင်ပါတယ်။
ဘူမိနက်သန်ဒေသ
ဒီလို အမြီးအမောက်မတည့်မှုတွေဟာ လူတစ်ဦးချင်းစီအတွက်သာ မကောင်းတာ မဟုတ်ဘူး။ နိုင်ငံတစ်ခုလုံး အတွက်ပါ မကောင်းတာဖြစ်တယ်။ မြန်မာနိုင်ငံဟာ အတော်ထူးခြားတဲ့ "ဘူမိနက်သန်" ဒေသဖြစ်တယ်။ ဘယ်နေရာတူးတူး မြေအောက်သယံဇာတ အမျိုးမျိုးကတော့ ထွက်နေတာပဲ။ ရေနံထွက်တဲ့ နေရာထွက်၊ ရွှေထွက်တဲ့ နေရာထွက်၊ ကျောက်မျက်ရတနာ ထွက်တဲ့နေရာထွက်၊ သတ္တုမျိုးစုံ ထွက်တဲ့နေရာထွက်နဲ့ မြေကြီးကရွှေသီးဆိုတဲ့ စကားအတိုင်း တကယ်ကိုဖြစ်နေတာ။ သတ္တုတွင်းအင်ဂျင်နီယာက သတ္တုတွင်းတွေဆီ ရောက်မလာဘဲ အရက်ချက်စက်ရုံမန်နေဂျာ သွားလုပ်တော့ နိုင်ငံကသင်ပေးလိုက်တဲ့ ပညာတွေ အဟောသိကံ ဖြစ်တော့တာပေါ့။
ပိုက်ဆံကြောင့်လုပ်ရတဲ့အလုပ်မှာ မပျော်နိုင်
အရက်ချက်စက်ရုံမန်နေဂျာလုပ်ရတဲ့ သတ္တုတွင်းအင်ဂျင်နီယာအဖို့လည်း သူ့ပညာတွေ အဟောသိကံ ဖြစ်ရရုံမက၊ သူ့ကိုယ်သူကျေနပ်မှု (self satisfaction)နဲ့ သူ့ကိုယ်သူနဲ့ သူ့အလုပ်ကို တန်ဖိုးထားမြတ်နိုးမှု (self esteem) တို့ပါ ဆုံးရှုံးသွားရပါတော့တယ်။ လူဆိုတာ ကိုယ်ဝါသနာပါရာ၊ ကိုယ်မြတ်နိုးတန်ဖိုးထားတဲ့ အလုပ်အကိုင်မျိုးကို လုပ်ကိုင်နေရမှ ကျေနပ်အားရမှု၊ ပျော်ရွှင်ကြည်နူးမှုတို့ကို ရရှိခံစားနိုင်တာဖြစ်တယ်။ ပိုက်ဆံကြောင့် မလုပ်ချင်ဘဲ လုပ်ရတဲ့အလုပ်မျိုးမှာ ဘယ်သူမှ မပျော်ပိုက်ပါဘူး။
သေမထူး နေမထူးစိတ်
မပျော်ပိုက်ရုံဆို ကိစ္စမရှိဘူး။ လုပ်ချင်တဲ့အလုပ်ကို ပိုက်ဆံကြောင့် လုပ်နေရတာဆိုရင် ကိုယ့်ကိုယ်ကိုယ် ကျေနပ်မှုနဲ့ မြတ်နိုးတန်ဖိုးထားမှုပါ ပျောက်ကွယ်သွားနိုင်ပါတယ်။ ဒါမကောင်းပါဘူး။ အဲဒီကဆက်ပြီး အလိုမကျ မကျေမချမ်းဖြစ်မှု (frustration) နဲ့ သေမထူးနေမထူးဆိုတဲ့ မျှော်လင့်ချက်မဲ့ အခြေအနေ (desperatoin)တွေအထိ ကြီးထွားသွားနိုင်ပါတယ်။ လူတစ်ယောက်ဟာ "မထူးစိတ်" ၀င်တဲ့သူ (desperados) အဆင့်ထိ ရောက်သွားရင် လုံးဝကို အဖတ်ဆယ်လို့ မရနိုင်တော့ပါဘူး။ အင်မတန်ဆိုးပါတယ်။
ဝါသနာနဲ့ ကျွမ်းကျင်ရာလုပ်နိုင်ဖို့
"မထူးစိတ်"၀င်တဲ့ လူရမ်းကားတွေ ပေါ်ပေါက်မလာစေဖို့အတွက် လူတိုင်းလူတိုင်း ကိုယ့်ဘ၀ကိုယ် ကျေနပ်မှုနဲ့ ကိုယ့်ကိုယ်ကိုယ် တန်ဖိုးထား မြတ်နိုးမှုရှိအောင် ဖန်တီးပေးဖို့ လိုပါတယ်။ လူတိုင်းဟာ ကိုယ်ဝါသနာပါပြီး ကိုယ်ကျွမ်းကျင်လိမ္မာတဲ့ အတတ်ပညာနဲ့ အလုပ်လုပ်နိုင်အောင်လည်း ဆောင်ရွက်ပေးကြရပါမယ်။ အလုပ်လုပ်တယ်ဆိုတာ ထမင်းစားဖို့အတွက် ပိုက်ဆံရှာတဲ့ သဘောသက်သက်သာ မဖြစ်စေရပါဘူး။ အလုပ်က ကျေနပ်မှုနဲ့ ပျော်ရွှင်မှုကို ပေးနိုင်ရပါမယ်။ အဲဒါမျိုးကို မပေးနိုင်သရွေ့ ပြင်ပဦးနှောက်ယိုစီးမှုရော အတွင်းဦးနှောက်ယိုစီးမှုပါ တားဆီးနိုင်မှာ မဟုတ်ပါဘူး။
မလွှဲသာလို့ သွားကြတာ
မြန်မာလူမျိုးများဟာ ပင်ကိုဗီဇကိုက မေတ္တာတရားကို အလေးအနက်ထားပြီး သံယောဇဉ် အင်မတန်ကြီးတတ်တဲ့ လူမျိုးဖြစ်တယ်။ ဇာတိရပ်ရွာနဲ့ မိဘသားချင်းများကိုခွဲပြီး တစ်နယ်တစ်ကျေး သွားရောက်နေထိုင်လိုစိတ် နည်းပါတယ်။ မလွှဲသာမှသာ သွားကြရတာပါ။ အဲဒီလို မလွှဲသာတဲ့ အကြောင်းရပ်တွေထဲမှာ တစ်ချက်ကတော့ အထက်မှာပြောခဲ့သလို သတ္တုတွင်းအင်ဂျင်နီယာက အရက်ချက်စက်ရုံမန်နေဂျာ သွားလုပ်နေတာမျိုးဖြစ်တယ်။ တကယ်လို့ သတ္တုတွင်းကသာ သူကျေနပ်မှုရှိပြီး ပျော်အောင် ဆွဲဆောင်ထားနိုင်ရင် သတ္တုတွင်းမှာသာ သူလုပ်ချင်မှာ သေချာတယ်။ သူဝါသနာပါပြီး သူကျွမ်းကျင်လိမ္မာတဲ့ အလုပ်မဟုတ်လား။ သူနဲ့မဆိုင်တဲ့ အရက်ချက်စက်ရုံ အလုပ်ကို သူဘယ်လုပ်ချင်ပါ့မလဲ။
ထမင်းဝဖို့လိုတယ်
အလုပ်လုပ်တယ်ဆိုတာ ပိုက်ဆံရဖို့ တစ်ခုတည်းအတွက် မဟုတ်ဘူးလို့ ဆိုခဲ့တယ်။ ဒါပေမယ့် အလုပ်လုပ်နိုင်ဖို့အတွက် ထမင်းဝအောင် စားရဖို့တော့ လိုပါတယ်။ အလုပ်ရှင်တွေဘက်က ဒီအချက်ကို အရေးကြီးတဲ့ အချက်အဖြစ် စဉ်းစားဖို့ မဖြစ်မနေ လိုအပ်ပါတယ်။ အခုထိတော့ အလုပ်ရှင်တိုင်းလိုလိုဟာ ဒီအချက်ကို သိပ်အလေးမထားကြတာ တွေ့ရတယ်။ အလုပ်သမားလစာ သတ်မှတ်ရာမှာ တူညီတဲ့ အခြေခံစံနှုန်းတစ်ခု မရှိဘဲ အလုပ်ရှင်ရဲ့ သဘောတစ်ခုတည်းနဲ့ပဲ သတ်မှတ်လေ့ရှိတယ်။ ဒီလောက်နဲ့ ကျေနပ်ရင်လုပ်၊ မကျေနပ်ရင် မလုပ်နဲ့ ဆိုတဲ့သဘော။ အလုပ်သမားဘက်ကလည်း မကျေနပ်ပေမယ့် အခြေအနေအရ ၀င်လုပ်တယ်။ လစာပိုရတဲ့ အလုပ်ပေါ်ရင် ပြောင်းလုပ်တယ်။ ဒီလိုနဲ့ သတ္တုတွင်းအင်ဂျင်နီယာက အရက်ချက်စက်ရုံ မန်နေဂျာ ဖြစ်သွားရတာပဲ။
နေရာတိုင်းမှာ နိုင်ငံတကာစံချိန်
ဒီနေ့ခေတ် လုပ်ငန်းခွင်တိုင်းမှာ ခေတ်မီစက်ကိရိယာတွေ၊ ခေတ်မီ နည်းပညာတွေ၊ ခေတ်မီစီမံခန့်ခွဲမှု ပညာတွေနဲ့ နေရာတိုင်း နိုင်ငံတကာ စံချိန်မီဖြစ်အောင် ကြိုးစားနေကြတာ တွေ့ရတယ်။ ဒါပေမယ့် လုပ်ခလစာကျတော့ နိုင်ငံတကာစံချိန်မီအောင် မပြုပြင်ဘဲ မြန်မာစံချိန်နဲ့ပဲ ပေးမြဲပေးနေကြတယ်။ အဲဒါကြောင့် ဦးနှောက်ယိုစီးမှုတွေကို မတားဆီးနိုင်တာဖြစ်တယ်။ မကြာမီက ကြယ်ငါးပွင့် သင်္ဘောလုပ်ငန်းကို ပုဂ္ဂလိကလက်ထဲ လွှဲပြောင်းပေးလိုက် ပြီးတဲ့နောက်မှာ ကြယ်ငါးပွင့်သင်္ဘောတွေက သင်္ဘောသားတွေ အားလုံးကို နိုင်ငံတကာ သင်္ဘောလိုင်းများကပေးတဲ့ လစာနှုန်းထားအတိုင်း ပေးသွားမယ်ဆိုတဲ့သတင်း ဂျာနယ်တွေမှာ ဖတ်လိုက်ရတယ်။ ဒါဟာ နမူနာကောင်းတစ်ခု ဖြစ်တယ်လို့ ယူဆပါတယ်။ တခြားလုပ်ငန်းခွင်တွေ အတုယူကြရင် အင်မတန် ကောင်းပါလိမ့်မယ်။
ပညာရှင်တွေ အများကြီးလို
ဒီလိုအတုယူတာဟာ စီးပွားရေးလုပ်ငန်းရှင်များရဲ့ အကျိုးစီးပွားလည်း ဖြစ်ပါတယ်။ စီးပွားရေးလုပ်ငန်းတွေ တိုးတက်ဖို့အတွက် စက်ကိရိယာသစ်တွေ ၀ယ်နိုင်ရုံနဲ့ မပြီးသေးပါဘူး။ စက်သစ်၊ နည်းပညာသစ်တွေကို သင်ယူတတ်ကျွမ်းတဲ့ ပညာရှင်တွေ မရှိမဖြစ် လိုအပ်ပါတယ်။ ရှေးက ဆန်စက်ဟောင်းကြီးတွေက (မေဆရာ) စက်ဆရာအိုကြီးကို ခေတ်ပေါ်ကွန်ပျူတာထိန်းချုပ် ဆန်စက်သစ်ကြီးမှာ အင်ဂျင်နီယာခန့်လို့ မဖြစ်နိုင်တာ လူတိုင်းသဘောပေါက်ပါတယ်။ ရပ်ကွက်ထဲက ရေပိုက်ပြင်တဲ့လူကို ဓာတ်ငွေ့ပိုက် သွယ်တန်းတဲ့နေရာမှာ သုံးလို့မရပါဘူး။ စက်မှုလုပ်ငန်းကြီးတွေ ထူထောင်ဖို့အတွက် စက်မှုပညာရှင်တွေ အများကြီး လိုအပ်ပါတယ်။ ဒီပညာရှင်တွေရဲ့ ပညာတွေ အဟောသိကံ မဖြစ်စေဖို့အတွက် သူတို့ရဲ့ စားဝတ်နေရေးကို အာမခံချက်ပေးတဲ့ လုပ်ငန်းခွင်တွေဖြစ်ဖို့ လိုပါတယ်။ အရက်ချက်စက်ရုံက သတ္တုတွင်းအင်ဂျင်နီယာကို သတ္တုတွင်းထဲ ပြန်ရောက်အောင် လုပ်ရပါလိမ့်မယ်။ ကျွန်တော်တို့နိုင်ငံဟာ "ဘူမိနက်သန်" ဒေသကြီးပါ။ ဘယ်နေရာတူးတူး ရတနာတွေ ထွက်နေပါတယ်။ အဲဒီအတွက် ပညာရှင်တွေမရှိလို့ မဖြစ်ပါဘူး။
No comments:
Post a Comment