နိုင်ငံရေးသမားဆိုတာ လူယုတ်မာလား၊ ဘုရားအလောင်းလား

(ဗိုလ်ချုပ်အောင်ဆန်းနှင့် အိန္ဒိယဘုရင်ခံချုပ် မောင့်ဘက်တန်)

ငါ့အတွက် ဖြစ်လိုရာဖြစ်စေတော့၊ နိုင်ငံရေး ၀ဲဂယက်အတွင်းသို့ ခြေစုံပစ်၍ ဇွတ်ဆင်းကာ ငါ၏နိုင်ငံ လွတ်လပ်ရေးအတွက် မနေမနား စွန့်စားလုံးပမ်းတော့အံ့။
ဤအဓိဋ္ဌာန်ကို သန်သန်ကြီး ပြုလိုက်မိတော့၏။

(မြဟန်၊ ဗိုလ်ချုပ်အောင်ဆန်း၏ စာပေလက်ရာ၊ စာ-၁၁၁ မှ)

ဗိုလ်ချုပ်အောင်ဆန်းဟာ တကယ့်ကို နိုင်ငံရေးသတ္တ၀ါ။ သူ့တစ်ဘ၀လုံး နိုင်ငံရေးထဲမှာ လုံးလုံးမြှုပ်နှံထားခဲ့ကြောင်း ဆရာဒဂုန်တာရာက ရုပ်ပုံလွှာ ရေးဖွဲ့ခဲ့ဖူးပါတယ်။ နိုင်ငံရေးလောကနဲ့ အတိုက်အခိုက် အကွဲအပြဲတွေကို ဇွဲလုံ့လကြီးကြီးနဲ့ ဖြတ်သန်းပြီး လွတ်လပ်ရေးသာလျှင် ပန်းတိုင်အဖြစ် ဦးတည်ချီတက်ခဲ့ပါတယ်။ သို့သော် နိုင်ငံရေးသမားတွေဟာ မညီညွတ်နိုင်ဘဲ ပါတီတိုက်ပွဲတွေ ဖြစ်ပေါ်လာတဲ့အခါ ဗိုလ်ချုပ်ကိုယ်တိုင် စိတ်ပျက်မိတာလည်း ရှိပါတယ်။ ၁၉၄၇ ခုနှစ်၊ မေလ ၃၀ ရက်နေ့ ကိုယ့်မင်းကိုယ့်ချင်းလမ်းရှိ ဖဆပလဌာနချုပ်မှာ ပြုလုပ်တဲ့ သတင်းစာဆရာများ အစည်းအဝေးမှာ -

"လွတ်လပ်ရေး ရတဲ့အချိန်အထိတော့ နိုင်ငံရေးလုပ်ရဦးမှာပဲ။ လွတ်လပ်ရေးရပြီးလို့ ပါတီတိုက်ပွဲတွေ ဖြစ်တဲ့အချိန်မှာ ကျုပ်မပါချင်ပါဘူး။ ဘေးဖယ်နေမယ်၊ သူများတွေလုပ်တာ ထိုင်ကြည့်ပြီး စာအုပ်ရေးမယ်" လို့ အတိအလင်း ထုတ်ဖော်ပြောကြားခဲ့တာက သက်သေခံနေပါတယ်။

အဲဒီအချိန်ကာလဟာ လွတ်လပ်ရေးအတွက်လို့ အသံကောင်းဟစ်ပြီး ကိုယ့်အတွက်ကိုယ် လုပ်နေကြတဲ့ နိုင်ငံရေးသမားတွေများလို့ နိုင်ငံရေးဟာ စိတ်ပျက်စရာ ကောင်းခဲ့ပါတယ်။ နောင်အခါ ပြည်ထောင်စုတရားလွှတ်တော်ချုပ် တရားဝန်ကြီးချုပ်ဖြစ်လာတဲ့ ဦးသိမ်းမောင်က "နိုင်ငံရေးသည် ကုသိုလ်တစ်ပဲ ငရဲတစ်ပိဿာ အလုပ်ဖြစ်သည်" လို့ ပြောခဲ့ဖူးပါတယ်။

(မောင်ထင်၊ မြန်မာ့နိုင်ငံရေးသုခမိန်၊ စာ-၂၂၆)

နိုင်ငံရေးလောကဟာ ဘယ်လောက်ပဲ စိတ်ပျက်စရာကောင်းပါစေ။ ဗိုလ်ချုပ်အောင်ဆန်းဟာ ခြေတစ်လှမ်းနောက်မဆုတ်ဘဲ ရှေ့သို့အစဉ် ချီတက်ခဲ့ပါတယ်။ ဗြိတိသျှအစိုးရနဲ့ပေါင်းပြီး တိုင်းပြည်ငါးပါးမှောက်အောင် လုပ်နေတဲ့ နိုင်ငံရေးသမားတွေကြောင့် နိုင်ငံရေးလောကဆိုတာ လူမသတီစရာ ဖြစ်ခဲ့တယ်လို့ သခင်တင်မောင်က ရေးခဲ့ဖူးပါတယ်။

(အောင်သန်း ၏ အောင်ဆန်း၊ စာ-၃၅၈)

အဲဒီလို နိုင်ငံရေးလောကကြီး မသတီစရာ ကောင်းနေသော်လည်း ဗိုလ်ချုပ်အောင်ဆန်းဟာ နိုင်ငံရေးအပေါ်မှာ စွဲမြဲခဲ့တယ်။ နိုင်ငံရေးလုပ်မှ လွတ်လပ်ရေးရမှာဆိုတော့ နိုင်ငံရေးကို စိတ်ပျက်လို့မဖြစ်ပေဘူး။ ဒါကြောင့် ဗိုလ်ချုပ်ဟာ လွတ်လပ်ရေးမရမချင်း နိုင်ငံရေးအပေါ်မှာ စက္ကန့်မလပ် အားတင်းခဲ့ပါတယ်။ ကိုယ်ကျိုးရှာသူတွေကြောင့် နိုင်ငံရေးဟာ နာမည်ပျက်နေပေမယ့် နိုင်ငံရေးကိုထိရင် ဗိုလ်ချုပ်က နည်းနည်းမှ ငုံ့မခံဘူး။

ဂျပန်အပြေး အင်္ဂလိပ်အစိုးရ ပြန်အုပ်ချုပ်ချိန်၊ ဖဆပလနဲ့ ကက်စ်ဘီအစိုးရတို့ကြား တင်းမာနေချိန် အိန္ဒိယဘုရင်ခံချုပ် လော့ဒ်လူဝီမောင့်ဘက်တန် မြန်မာပြည်ကို ရောက်လာပါတယ်။ ရန်ကုန်မှာရှိတဲ့ မဟာမိတ်တပ်သားတွေ စုဖွဲ့ထားတဲ့ "အိတ်စ်အင်ဝက်စ်ကလပ်" က ကန်တော်မိတ်သဘင် (နောင် အိုရီရင့်ကလပ်) မှာ မောင့်ဘက်တန်ကို ဂုဏ်ပြုညစာစားပွဲတစ်ခု တည်ခင်းပါတယ်။

အဲဒီ ညစာစားပွဲမှာ ကျွန်တော်တို့ ဖဆပလ ခေါင်းဆောင်ပိုင်း လေးငါးဆယ်ယောက်ကို ဖိတ်တယ်ခင်ဗျား။ မလွှဲသာလို့ ဖိတ်ရသလားတော့ မသိပါဘူးဗျာ။ ပေးထားတဲ့ နေရာတွေက ဗိုလ်ချုပ်အောင်ဆန်းကိုတောင်မှ ချောင်ထဲ နောက်ဆုံးတန်းမှာ နေရာပေးထားတယ်။ တိုတိုပြောရမယ်ဆိုရင်ပေါ့ဗျာ။ အဲဒီ ထမင်းစားပွဲအပြီးမှာ အင်္ဂလိပ်ထုံးစံအတိုင်း ဂုဏ်ပြုစကား ထပြီး ပြောကြရတာပေါ့ဗျာ။

အဲဒီအခါတုန်းက ရေပန်းစားနေတဲ့ ဆာပေါ်ထွန်းတို့ ဘယ်သူဘယ်ဝါတို့ပေါ့ဗျာ။ ကျုပ်တို့ ဗိုလ်ချုပ်ကိုတော့ စကားပြောရမယ့် ပုဂ္ဂိုလ်ကြီးတွေစာရင်းမှာ ထည့်မထားဘူးဗျ။ အဲဒီလို ပြောကြဆိုကြပြီး နောက်ဆုံးအစီအစဉ်အနေနဲ့ မောင့်ဘက်တန်က ပြန်လည်မိန့်ကြားတဲ့ မိန့်ခွန်းတော်ချွေတဲ့အလှည့် ရောက်လာရော၊ မောင့်ဘက်တန်ပြောတဲ့ စကားထဲမှာ -

"Politics is the refuge of the scoundrels"
(နိုင်ငံရေးလောကဆိုတာဟာ လူယုတ်မာတို့ရဲ့ ခိုကိုးရာဒေသဖြစ်တယ်) ဆိုတဲ့ စကားတစ်လုံး ပါလာတယ်။ သူလည်း ပြောချင်ရာပြောပြီး ထိုင်လိုက်ရော ပရိသတ်ကြီးကလည်း လက်ခုပ်တဖြောင်းဖြောင်းနဲ့ သြဘာပေးကြတာပေါ့ဗျာ။ အဲဒီ လက်ခုပ်သံလည်းဆုံးရော.... လား...လား.....။ ကျုပ်တို့ဗိုလ်ချုပ်က ချောင်ကြားထဲက ဗြုန်းဆို မတ်တတ်ရပ်လိုက်တယ်။ မောင့်ဘက်တန် ထိုင်နေတဲ့စားပွဲဆီ လျှောက်လာခဲ့ပြီး အစီအစဉ်မပါဘဲနဲ့ မိန့်ခွန်းပြောပါလေရောဗျာ။

ပရိသတ်တွေရော စီစဉ်တဲ့လူတွေရော အားလုံး မျက်စိမျက်နှာ ပျက်ကုန်ကြတယ်။ လာတဲ့ပရိသတ်ကလည်း အလိုတော်ရိ ပရိသတ်တွေကိုးခင်ဗျ။ အဲဒီမှာ ဗိုလ်ချုပ်က ညစ်ထပ်ထပ် ကာကီဘောင်းဘီအိတ်ကို လက်နှိုက်ပြီး အင်္ဂလိပ်လို မိန့်ခွန်းပြောပါလေရော။ သူပြောပုံကတော့-

"ဂုဏ်သရေရှိ အမျိုးသား၊ အမျိုးသမီးများ ခင်ဗျား။ အစီအစဉ်ထဲမှာ မပါတဲ့လူတစ်ယောက်က အခုလိုထပြီး ပြောလိုက်တော့ ခင်ဗျားတို့ထုံးစံအရ တော်တော်ရိုင်းတယ်လို့ ထင်ကြမှာပဲ။ ရိုင်းတယ်ထင်ရုံမကလို့ လဲသေသေ၊ ကျုပ်ကတော့ ပြောစရာရှိတာ ပြောရမှာပဲ။ ကျုပ်ပြောမှာကတော့ တခြားမဟုတ်ပါဘူး။ ခင်ဗျားတို့ရဲ့ ဂုဏ်ပြုအပ်တဲ့ ဧည့်သည်တော်ကြီးရဲ့ သနားစရာကောင်းတဲ့ အဘိဓမ္မာကို ဝေဖန်ပြမယ့်အချက် ဖြစ်ပါတယ်။" အဲဒီအချိန်မှာ ခန်းမကြီးတစ်ခုလုံး အပ်ကျသံတောင် ကြားရမတတ် ငြိမ်သွားပါတယ်။ နောက်မှ ဗိုလ်ချုပ်က ဆက်ပြီး -

"နိုင်ငံရေးလောကဆိုတာ လူယုတ်မာတွေရဲ့ ခိုကိုးရာဒေသဖြစ်တယ်လို့ ဘုရင်ခံချုပ်ကြီးက ပြောသွားပါတယ်။ ဒါဟာ အနောက်နိုင်ငံမှာတော့ မှန်ကောင်းမှန်မယ်။ ကျုပ်တို့ အရှေ့နိုင်ငံ အယူအဆကတော့ ဘုရင်ခံချုပ်ကြီး ခံယူချက်နဲ့ ဖြောင့်ဖြောင့်ကြီး ဆန့်ကျင်နေပါတယ်။ ကျုပ်တို့ဆီမှာ နိုင်ငံရေးဆိုတာဟာ ပရိဟိတလုပ်ငန်း၊ လောကတ္တစရိယကျင့်တဲ့လုပ်ငန်း၊ ဒါဟာ ဒွိဟိတ်ပုဂ္ဂိုလ်တွေ မလုပ်နိုင်ဘဲ တိဟိတ်ပုဂ္ဂိုလ်များ ဘုရားအလောင်းများမှသာ လုပ်နိုင်တဲ့လုပ်ငန်းလို့ ယူဆထားတယ်။ (အဲဒီအချိန်မှာ ပါဠိတွေဘာတွေ ရွတ်ပြလိုက်သေးတယ်) အဲဒီလို အလွန်မွန်မြတ်တဲ့အထဲမှာ တစ်ခါတစ်ရံ လူယုတ်မာတွေ ပါလာကောင်းပါလာမယ်။ အဲဒါကြောင့် နိုင်ငံရေးအလုပ်ဟာ မကောင်းဘူး ဆိုရတော့မှာလား။

ဥပမာတစ်ခု ပြောပါရစေ။ ဒီအဆောက်အဦကြီးဟာ (အိုရီးယင့်ကလပ်ကို ဆိုလိုသည်) လူအများစုဝေးဖို့ ဆောက်ထားတယ်။ အစောင့်အကြပ် ကင်းမဲ့ချိန်မှာ တစ်ခါတရံ ခွေးတွေ တက်အိပ်နေကြတယ်။ အဲဒီလို ခွေးတွေ တက်အိပ်နေတာကိုကြည့်ပြီး ဒီ အဆောက်အဦကြီးဟာ ခွေးအိပ်ဖို့ ဆောက်ထားတာပါလို့ဆိုရင် မှန်ပါ့မလား။ မမှန်ပါဘူး။ ဒါ့ကြောင့် နိုင်ငံရေးဟာလည်း ဒီလိုပဲ။ အင်မတန် မွန်မြတ်ပါတယ်။ ဒီ အဆောက်အဦကြီးပေါ်မှာ ခွေးတက်အိပ်သလို လူယုတ်မာတွေလည်း အလစ်မှာ နိုင်ငံရေးလောကထဲ ၀င်လာတတ်ပါတယ်။

အဲဒီလို ၀င်လာတဲ့အခါမှာ ကျွန်တော်တို့ နိုင်ငံရေးသမားစစ်စစ်တွေက ဒီလူယုတ်မာတွေကို မျက်ခြည်မပြတ် ဟန့်တားဝိုင်းပယ် နိုင်သည်နှင့်အမျှ နိုင်ငံရေးလောကကြီးဟာ သန့်ရှင်းစင်ကြယ် မွန်မြတ်လာပါလိမ့်မယ်။ ဒါပဲ ကျုပ်ပြောချင်တာ" ဟု ဆိုပြီး သူ့နေရာသူ ခပ်တည်တည် ပြန်လာခဲ့တယ်ခင်ဗျ။

(အောင်သန်း ၏ အောင်ဆန်း၊ စာ-၃၆၀၊ ၃၆၁)

အထက်ပါဖော်ပြချက်မှာ အောင်သန်း၏ အောင်ဆန်း စာအုပ်နောက်ဆက်တွဲများ အခန်းမှာ ထည့်သွင်းထားတဲ့ သခင်တင်မောင်ရဲ့ နိုင်ငံရေးသမားတွေ ဆောင်းပါးထဲက ကောက်နုတ်ချက် ဖြစ်ပါတယ်။ ဗိုလ်ချုပ်အောင်ဆန်းက နိုင်ငံရေးသမားတွေ ကိုယ်ကျိုးရှာတာ၊ မညီညွတ်နိုင်တာအပေါ်မှာ စိတ်ပျက်မိတာ ရှိကောင်းရှိလိမ့်မယ်။ သို့သော် နိုင်ငံရေးအပေါ်မှာ အလွန်တန်ဖိုးထား ချစ်မြတ်နိုးတယ်ဆိုတာ ပေါ်လွင်လှပါတယ်။

ဗိုလ်ချုပ်မိန့်ခွန်းပြောအပြီးမှာ ဘုရင်ခံချုပ်ကြီး မောင့်ဘက်တန်ခမျာ ချော်လဲရောထိုင် လုပ်လိုက်ရတယ်။ နေရာကရပ်ပြီး ဗိုလ်ချုပ်မိန့်ခွန်းကို လက်ခုပ်တီး သြဘာပေးတယ်။ ပရိသတ်လည်း ရောယောင်ပြီး လက်ခုပ်တီးတယ်။ ဘုရင်ခံချုပ်က "ဒီနေ့ည စကားပြောတဲ့အထဲမှာ အစီအစဉ်ထဲမပါတဲ့ ဗိုလ်ချုပ်အောင်ဆန်းရဲ့ မိန့်ခွန်းဟာ အဖိုးတန်ဆုံးပဲ။ ကျွန်တော်ပြောမိတာကတော့ ရယ်စရာ မောစရာ အနေနဲ့ ခပ်ပေါ့ပေါ့ နိုင်ငံရေးလောကကို ပြက်ရယ်ပြုတဲ့စကားကို ပြောမိပါတယ်။ အလွန်ဝမ်းနည်းမိပါတယ်။ ကျွန်တော်ပြောမိတဲ့ အချက်အလက်တွေကို ရုပ်သိမ်းပါတယ်ခင်ဗျား" တဲ့။

ဗိုလ်ချုပ်က ဘုရင်ခံချုပ်ကို ချက်ချင်းတုံ့ပြန်ပြောဆိုတဲ့ မိန့်ခွန်းထဲမှာ "နိုင်ငံရေးသမားဆိုတာ ပရဟိတသမား၊ လောကတ္တစရိယသမား၊ ဒွိဟိတ်မဟုတ် တိဟိတ်ကြီးတွေ၊ နိုင်ငံရေးဟာ ဘုရားအလောင်းများမှသာ လုပ်နိုင်တဲ့လုပ်ငန်း ဆိုတဲ့အချက်တွေဟာ အလွန်လေးနက် မွန်မြတ်လှပါတယ်။

မောင်သွေးချွန်

ကိုးကား
၁။ ၁၉၆၅၊ ဇူလိုင်လထုတ်၊ အောင်သန်း ၏ အောင်ဆန်း
၂။ ၂၀၁၀၊ ဧပြီလထုတ်၊ မောင်ထင်၊ မြန်မာနိုင်ငံရေးသုခမိန် (ဒု-အကြိမ်)
၃။ ၂၀၁၀၊ ဖေဖော်ဝါရီလထုတ်၊ မြဟန်၊ ဗိုလ်ချုပ်အောင်ဆန်း၏ စာပေလက်ရာ (ဒု-အကြိမ်)

[မော်နီတာ၊ အတွဲ-၁၊ အမှတ်-၆၊ ၂၀၁၀၊ ဇွန် ၁၃၊ စာမျက်နှာ-၄]