ကျွန်တော်ကိုဉာဏ် အားကြီးစိတ်ဆိုးတယ် (၁)

စာအုပ်တွေ၊ ဂျာနယ်တွေ

ပထမဆုံး အဲဒါကိုမပြောခင် နိဒါန်းပျိုးဦးမှဖြစ်မယ်။ အဲဒါမှ လိပ်ပတ်လည်မှာဗျ။ ဒီလိုဗျ... ဒီလို..။ ကျွန်တော်ကိုဉာဏ်မှာ အပေါဆုံးက ဘာလဲဆိုရင်တော့ စာအုပ်တွေ၊ ဂျာနယ်တွေလို့ပဲ ဖြေရမှာပဲ။ ငယ်ငယ်လေးကတည်းက အင်္ကျီအ၀တ်အစားကို အမေဆင်ပေးတာပဲ ၀တ်တတ်တယ်။ ကိုယ့်ဘာသာကိုယ် ဘယ်ဟာလေး လိုချင်တယ်၊ ၀တ်ချင်တယ်ရယ်လို့ မရှိဘူးဗျ။ အခုအချိန်ထိပဲ ဆိုပါတော့။ အ၀တ်အစား ကောင်းကောင်းမွန်မွန်ကို ကျွန်တော် မမက်တတ်ဘူး။ မက်မက်မောမော ၀တ်တတ်တာဆိုလို့ ဘောလုံးအင်္ကျီတွေပဲ ရှိတယ်။ ဘောလုံးအင်္ကျီတွေကိုတော့ ကြုံရင်ကြုံသလို ၀ယ်ဖြစ်တယ်။ ကျွန်တော့်အ၀တ်အစားတွေထဲမှာ အများဆုံးက ဘောလုံးအင်္ကျီတွေပဲ။ အချို့ကို ဘောလုံးကန်တဲ့အခါ ၀တ်တယ်။ အချို့ကိုတော့ အလှဝတ်တယ်။ အင်္ကျီနဲ့ဘောင်းဘီ အစုံလိုက် ရှိနေတဲ့ ဘောလုံးဝတ်စုံ အရေအတွက်ဟာ အခုလက်ရှိတင်ကို အစုံ (၂၀) ကျော်မယ် ထင်ပါရဲ့။ ဘောလုံးအင်္ကျီကိုတော့ အဲဒီလိုရူးသွပ်တယ်။ မန်ယူဝတ်စုံဆိုရင် အသစ်ပေါ်တိုင်း ၀ယ်တယ်။ ကျွန်တော့်မှာ မန်ယူအသင်းရဲ့ Vodafone တံဆိပ်နဲ့ ၀တ်စုံလောက်ကစပြီး ဒီနေ့အထိ အိမ်ကွင်း၊ အဝေးကွင်းဝတ်စုံတွေ အားလုံးနီးပါးရှိတယ်။

ထားပါတော့လေ။ စောစောက ပြောလက်စ စကားကို ပြန်ဆက်ရရင် အ၀တ်အစားကိုသာ မက်မက်မောမော မရှိတတ်တာ။ စာအုပ်တွေတွေ့ရင်တော့ ကျွန်တော်မနေနိုင်ဘူးဗျ။ အနှမြောမရှိ ၀ယ်ပစ်လိုက်တာပဲ။ အဲဒါကြောင့် ကျွန်တော့်မှာ အပေါဆုံးက စာအုပ်စာတမ်းတွေ ဖြစ်နေတော့တယ်။။ ဂျာနယ်တွေ၊ သတင်းစာတွေ၊ စာအုပ်တွေဟာ ကျွန်တော့်အခန်းမှာ ပြည့်နှက်နေတတ်တယ်။ ငယ်ငယ်တုန်းက စာအုပ်ဖတ်တာကိုပဲ ၀ါသနာပါတယ်။ တက္ကသိုလ်ရောက်ခါမှ စာအုပ်တွေကို ၀ယ်စုတဲ့ရောဂါ ရသွားတော့တာကိုး။ အဲဒါကြောင့် သဘောကျတဲ့၊ ဖတ်ချင်တဲ့ စာအုပ်တွေဆိုရင် အပိုင်ဝယ်ဖတ်ဖြစ်တယ်။ အဲဒီတော့လည်း စာအုပ်တွေက တစ်အုပ်ပြီးတစ်အုပ် တိုးလာ၊ ပွားလာတော့တာပေါ့။ အခုတော့ ဂျာနယ်ရွှေခေတ်ဆိုတော့ စာအုပ်ထက် ဂျာနယ်တွေက ပိုများလာတယ်။ သူ့အမျိုးအစားနဲ့သူ တွဲထားတဲ့ ဂျာနယ်အတွဲတွေက အထပ်လိုက်ဖြစ်ပြီး လူတစ်ရပ်လောက် မကတော့ဘူး။ သတင်းစာတွေကလည်း ထို့နည်းအတူပဲ။ သူငယ်ချင်းအချို့က ကျွန်တော့်အခန်းကို ရောက်လာတိုင်း ပြောတတ်တာက အချိန်နဲ့ ရောင်းစားလိုက်ရရင်တဲ့။ ကျွန်တော် အားကြီးစိတ်ဆိုးတယ်။ သတင်းစာအဟောင်း၊ ဂျာနယ်အဟောင်းဆိုတာ ပိဿာချိန်နဲ့ ရောင်းစားရတဲ့ ပစ္စည်းတွေလို့ သူတို့စိတ်ထဲမှာ ဘာလို့ ထင်မှတ်နေကြရတာလဲ။

စာအုပ်တွေ၊ ဂျာနယ်တွေ အများကြီးရှိတယ်ဆိုတော့လည်း သိတဲ့အတိုင်းပဲ လာရောက်ငှားရမ်း ဖတ်ရှုကြတာပေါ့ဗျာ။ အဲဒါကလည်း စာအုပ်စုဆောင်းသူတိုင်း ကြုံနေကျဖြစ်မယ်ထင်ပါတယ်။ စာဖတ်တာဟာ အင်မတန်တဲ့ ကောင်းတဲ့အလုပ်ပဲဗျာ။ ကျွန်တော်လည်း အားပေးတာပေါ့။ လိုလိုချင်ချင်ကို ငှားရမ်းပေးတတ်ပါတယ်။ တချို့ကောင်းတဲ့ စာအုပ်တွေများဆိုရင် သူတို့မငှားပေမယ့် ဖတ်စေချင်လွန်းလို့တောင် ထည့်ပေးလိုက်တတ်သေးတယ်။

ဒါပေမယ့်... ဒါပေမယ့်ပေါ့ဗျာ.. အချို့အချို့သော စာအုပ်ငှားသူတွေက စာအုပ်တွေသာ တစ်အုပ်ပြီးတစ်အုပ် ငှားဖတ်တတ်ကြတယ်။ စာအုပ်တွေကို ဘယ်လိုတန်ဖိုးထားရမလဲဆိုတာ မသိကြဘူးဗျ။ ဆိုပါတော့ဗျာ... စာအုပ်ငှားပြီဆိုတာနဲ့ ကျွန်တော်က စာအုပ်ကြားမှာ ညှပ်ပြီးဖတ်ရတဲ့ ကတ်ပြားလေးကို ထည့်ပေးတတ်တယ်။ ကိုယ်တိုင်ဖတ်ဖို့ရော၊ သူများတွေစာအုပ်ငှားဖတ်ရင် ထည့်ပေးဖို့အတွက်ရော စာအုပ်ကြားမှာညှပ်ရတဲ့ စာမှတ်ကတ်ပြားလေးတွေကို ကျွန်တော်လုပ်ထားတာ အခု (၂၀)လောက် ရှိတယ်။ စာအုပ်မှာလည်း "ကျေးဇူးပြု၍ စာရွက်များကို မခေါက်ပါနှင့်" ဆိုတဲ့ စာသားကို တံဆိပ်တုံးနဲ့ထုပြီး နှိပ်ပေးထားပါတယ်။ ဒါပေမယ့်လည်း ငှားပေးတိုင်းလည်း မှာဖြစ်အောင်မှာပါတယ်။ စာရွက်တွေကို ခေါက်မဖတ်ပါနဲ့နော်၊ ဆီတွေဘာတွေ မပေပါစေနဲ့လို့ပေါ့။

အချို့က နားလည်တယ်ဗျ။ စိတ်ချပါတဲ့။ အဲ... အချို့အချို့ကတော့ စာရွက်မှတ်တဲ့ကတ်ပြားကို ပေးတယ်ဆိုရင်ပဲ ဘုစကားက စပြောပြီဗျ။ မယူပါဘူးကွာ။ မင်းစာရွက်တွေကို မခေါက်ပါဘူး၊ စိတ်ချပါတဲ့။ ကဲ... ကြည့်ဦး။ ဘယ်လောက်တောင် ငှားချင်စရာကောင်းသလဲ။ အနည်းဆုံးတော့ဗျာ ယူချင်သည်ဖြစ်စေ၊ မယူချင်သည်ဖြစ်စေ ငှားလိုက်ရတဲ့လူ စိတ်ချမ်းသာသွားအောင် ယူသွားလိုက်ပေါ့။ ပြီးတော့မှ သုံးချင်သုံး၊ မသုံးချင်နေပေါ့ဗျာ။ အခုတော့ လုပ်ပေါက်က...။ ကျွန်တော်လည်း ကိုယ့်စာအုပ်ကို ငှားရလို့ ကြီးကျယ်တယ်လို့ ထင်မှာစိုးတဲ့အတွက် ဘာမှမပြောတော့ဘဲ အေးပါကွာဆိုပြီး စာအုပ်ကို ဒီအတိုင်း ပေးလိုက်ပါတယ်။ ခင်ဗျားတို့ ထင်တဲ့အတိုင်းပါပဲ။ စာအုပ်လေးတစ်အုပ်ဖတ်တာ တစ်ပတ်လည်း ပြန်လာမပေး၊ နှစ်ပတ်လည်း ပြန်လာမပေး၊ တစ်လနေလို့လည်း ပေါ်မလာပေါ့။ လမ်းမှာတွေ့လို့ မေးရင်လည်း ဖတ်နေတုန်းမို့ပါလို့ အမြဲတမ်းဖြေတယ်။ စာလုံးပေါင်းဖတ်နေတာလားလို့ မေးတဲ့အခါ မျက်နှာပျက်သွားတတ်သေးတယ်။ ကိုယ့်သားသမီးတစ်ယောက်ကို သူများလက်ထဲမှာ အကြာကြီးခွဲပြီး ဘယ်မိဘက ထားချင်မလဲဗျာ။ အဲဒါကြောင့် သူ့အခန်းကိုလိုက်သွားပြီး တောင်းရတော့တာပေါ့။ လမ်းမှာမေးတုန်းကတော့ ဖတ်နေတုန်းမို့ပါလို့ ဖြေတတ်တဲ့ ကျေးဇူးရှင်လုပ်ပုံကိုကြည့်ဦး။ အခန်းထဲမှာ ငှားသွားတဲ့စာအုပ်က ဘယ်နားထားမိမှန်းမသိဘူး။ ဟိုလိုက်ရှာ၊ ဒီလိုက်ရှာပေါ့။ ပါးစပ်ကလည်း မဆီမဆိုင် သူများတွေကို အပြစ်တင်နေသေးတယ်။ သူဒီနားမှာ ထားပါရဲ့နဲ့ ဘယ်ကောင်က စည်းမရှိကမ်းမရှိ ယူဖတ်သွားလဲ မသိဘူး၊ ဘာညာပေါ့ဗျာ။ ကျွန်တော်လည်း သူ့ကို ကူညီပြီး ရှာပေးရတော့တာပေါ့။ များလှပြီဖြစ်တဲ့ အတွေ့အကြုံအရ ဘယ်နားတွေမှာ ရှာရမယ်ဆိုတာ ကျွန်တော်သိနေတာပေါ့ဗျာ။ ထင်တဲ့အတိုင်း ဖြစ်တာများပါတယ်။ ကုတင်ဘေး နံရံကြားမှာ ကျနေတတ်တာတို့၊ ထောင့်တစ်ထောင့်မှာ အခြားစာရွက်စုတ်တွေနဲ့ ရောနေတတ်တာတို့ပေါ့။ ဖုံတွေလည်းပေ၊ စာအုပ်ထောင့်တွေကလည်း ခေါက်နဲ့ပေါ့။

ကျွန်တော်ဘယ်လောက်စိတ်ဆိုးရ၊ စိတ်တိုရမလဲဆိုတာ စာဖတ်သူပဲ စဉ်းစားကြည့်ပေါ့ဗျာ။ ဒါပေမယ့် သူ့ရှေ့မှာတော့ ဘာမှမပြောတော့ပါဘူး။ စာအုပ်ကို ပြန်တွေ့တာနဲ့တင်ကို ကျေးဇူးတင်နေရပြီလေ။ အဲဒီလို သကောင့်သားတွေကလည်း နည်းနည်းလေးမှကို မျက်နှာပျက်တာ၊ အားနာတာ မရှိဘူးဗျ။ ပြောပုံကကြည့်ဦး၊ စာအုပ်ပဲကွာ... ခေါက်တာပြုတာတော့ ရှိမှာပေါ့တဲ့။ သူငှားသွားတုန်းက ကျွန်တော့်လက်ထဲမှာ ၄-၅ နှစ် ရှိနေပြီဖြစ်တဲ့ စာအုပ်ကလေးက အသစ်အတိုင်း ပါသွားတယ်ဆိုတာကို သူသိသိကြီးနဲ့ အဲဒီစကားကို ပြောထွက်တာ အံ့ရောပဲ။ အဲဒီလိုလူမျိုးကို တစ်ခါတည်းနဲ့ ဆလံသသွားပါတယ်ဗျာ။ နောက်တစ်ခါများ စာအုပ်လာငှားလို့ကတော့ သိတယ်မလား၊ အကြောင်းအမျိုးမျိုးပြပြီး ငြင်းရတော့တာပေါ့။ သူကလည်း သိတယ်မလား၊ စကားလုံးအမျိုးမျိုးနဲ့ ကျွန်တော့်ကို ကွယ်ရာမှာ မကောင်းပြောတော့တာပေါ့။ စာအုပ်ရူးတို့၊ သူသိသလို သူများတွေ သိမှာကြောက်နေတဲ့ကောင်တို့၊ အမျိုးမျိုးပေါ့ဗျာ။ ကျွန်တော်ကိုဉာဏ် အားကြီးစိတ်ဆိုးတာပေါ့ဗျာ။ ဒါပေမယ့် သူဘယ်လို စည်းကမ်းမရှိကြောင်း၊ စာအုပ်ကို မရိုသေကြောင်း ဘာကြောင်းကိုတော့ ဘယ်သူ့ကိုမှ ကျွန်တော်မပြောဖြစ်ပါဘူး။ သူကိုယ်တိုင်သိနေဖို့က အဓိကပဲမဟုတ်လား။ သူများတွေကိုသာ သူပြောနေတာပါ။ သူ့ကိုယ်သူတော့ လိမ်လို့ရမှာ မဟုတ်ပါဘူး။ သူများတွေကိုသာ ပြောနေရတာ၊ သူ့လိပ်ပြာကို သူလုံမယ်လို့ ကျွန်တော်မထင်ဘူး။

ဂျာနယ်တွေဆိုရင် ပိုဆိုးသေးတယ်။ စာအုပ်က နည်းနည်းတော်သေးတယ်ဗျာ။ ဂျာနယ်တွေက သိပ်ပြီးတော့ အပေအတေ၊ အကြမ်းအတမ်း မခံဘူးဗျ။ ပြီးစလွယ်ဖတ်တတ်တဲ့ လူနှစ်ယောက်လောက် ဖတ်လိုက်ပြီဆိုရင် အဲဒီဂျာနယ်က ဘာမှရစရာ မရှိတော့ဘူး။ လက်ဖက်ရည်ဆိုင်တွေ၊ ဘဏ်တွေ၊ ဆေးခန်းတွေ၊ ဆံပင်ညှပ်ဆိုင်တွေမှာ ထားပေးတတ်တဲ့ ဂျာနယ်တွေကို ခင်ဗျားတို့လည်း မြင်ဖူးမှာပါဗျာ။ တွန့်ကြေပြီး ဂျာနယ်ရုပ်တောင် မပေါက်တော့ဘူးလေ။ ဂျာနယ်တွေကို တယုတယသိမ်းတတ်တဲ့ ကျွန်တော့်အတွက်က အဲဒီလိုဖြစ်လို့ ဘယ်ရမှာတုန်းဗျ။ အဲဒီတော့ ဂျာနယ်တွေကိုဆိုရင် ဘယ်သူ့ကိုမှ မငှားဖြစ်ဘူး။ အခန်းထဲမှာ လာဖတ်ပါလို့ ပြောရတယ်။ ကျွန်တော့်အခန်းမှာ လာဖတ်ရလို့ သူတို့မှာ မျက်နှာငယ်ရတာ၊ အနေကျုံ့ရတာ ဘာမှမရှိပါဘူးဗျာ။ ထိုင်ခုံမှာဖတ်ချင်ဖတ်၊ ဒါမှမဟုတ် ကျွန်တော့်အိပ်ရာပေါ်မှာ လှဲအိပ်ရင်းနဲ့ ဖတ်ချင်လည်း ဖတ်လို့ရတယ်။ ကော်ဖီတစ်ခွက်တောင် တိုက်ဖြစ်အောင် တိုက်ပါသေးတယ်ဗျာ။ ကျွန်တော့်အခန်းထဲမှာဆိုတော့ ဂျာနယ်တွေကို ကျွန်တော်ဘယ်လို စနစ်တကျ တွဲထားတတ်တယ်၊ စနစ်တကျ သိမ်းထားတတ်တယ်ဆိုတာကို သူတို့မြင်ပြီး ပါးစပ်က ပြောစရာမလိုတော့ဘူးပေါ့ဗျာ။ သူတို့အလိုလို နားလည်နိုင်တာကိုး။ ကျွန်တော်လည်း စိတ်ချမ်းသာရတယ်။ ဂျာနယ်တွေကို ခေါက်မှာ၊ ပေကျံမှာကို စိတ်မပူရတော့ဘူး။ တစ်ခုတော့ ရှိတာပေါ့ဗျာ။ ဂျာနယ်လာဖတ်တဲ့လူတွေ ရှိတဲ့အခါ ကျွန်တော် အလုပ်တော့ပျက်တယ်ဗျ။ စာရေးနေတာမျိုး ဆက်ရေးလို့ မရဘူး။ အဲဒီတော့ ကျွန်တော်က ဂျာနယ်ဖတ်တဲ့လူတွေလာရင် စာဖတ်နေလိုက်တယ်။ အဲဒီတော့ အလုပ်မပျက်တော့ဘူးပေါ့။ စာဖတ်ချိန်လို ဖြစ်သွားတယ်။ ဖတ်နေရင်းက သူတို့က သိချင်တာတွေ မေးမြန်းတာရှိရင်လည်း ဖြေရသေးတယ်ဗျ။ အဲ... တစ်ခါတလေ ကျွန်တော်သိချင်တာကို မေးရတဲ့လူတွေလည်း ရောက်လာတတ်တယ်။ အဲဒီအခါကျရင် သူတို့တွေ စာဖတ်ပျက်တာပေါ့။ ကျွန်တော်က မေးခွန်းတွေ မေးနေတော့တာကိုး။

ကျွန်တော့်အခန်းနံရံမှာ A4 စာရွက်လေးနဲ့ ပရင့်ထုတ်ပြီး ကပ်ထားတဲ့ သတိပေးစာရွက်လေးတစ်ရွက် ရှိတယ်ဗျ။ "ဂျာနယ်များကို ပြင်ပသို့ ငှားရမ်းခြင်းမပြုပါ။ အခန်းတွင်း၌သာ ဖတ်ရှုကြပါရန်" ဆိုတဲ့ စာတန်းလေးပါ။ တစ်ခါတလေ အခန်းတွင်းမှာ ကျွန်တော်မရှိတုန်း ၀င်ဖတ်ပြီး ဂျာနယ်တွေကို သူတို့အခန်းတွေ ယူသွားမှာစိုးရိမ်လို့ပါ။ အဆင်ပြေပါတယ်။ ဘယ်သူကမှ ဘာမှမပြောကြဘူး။ ဒါပေမယ့် တစ်နေ့သားတော့ ကျွန်တော့်မှာ စိတ်တိုလိုက်ရတာဗျာ။ စောစောက ကျွန်တော်ကပ်ထားတဲ့ စာရွက်ပေါ်မှာ သကောင့်သားတစ်ယောက်က ဘောလ်ပင်နဲ့ စာလုံးခပ်ကြီးကြီးနဲ့ စာရေးသွားတာကိုး။ ရေးပုံကကြည့်ဦး။ "သိဒယ်" တဲ့။ ကျွန်တော်ကိုဉာဏ် အားကြီးစိတ်ဆိုးတယ်ဗျ။

ကျွန်တော်စဉ်းစားနေမိတယ်။ ကိုယ့်ဘာသာကိုယ် ပိုက်ဆံအကုန်ခံပြီး စာအုပ်တွေ၊ ဂျာနယ်တွေ ၀ယ်ရတယ်။ ဟော... အဲဒီစာအုပ်တွေကြောင့်ပဲ စိတ်ညစ်ရတယ်၊ စိတ်ဆိုးရတယ်၊ စိတ်တိုရတယ်။ တစ်ခါတလေများ မိတ်ဆွေတွေအချင်းချင်း စကားတောင်များရသေးသဗျ။ ကျွန်တော်ကလည်း ကျွန်တော့်ကို စကားနဲ့ကြိုက်သလောက်ပြော၊ နာအောင်ဆဲ ဂရုကိုမစိုက်ဘူး။ အဲ.. စာအုပ်တွေ၊ ဂျာနယ်တွေနဲ့ ပတ်သက်လာရင်တော့ နည်းနည်းလေးမှကို ဆတ်ဆတ်ထိမခံဗျ။ အဲဒီတော့ ဒီစာအုပ်တွေ၊ ဂျာနယ်တွေဟာ ငါ့ကို အသိပညာတွေတော့ ပေးပါရဲ့။ တစ်ဆက်တည်းမှာပဲ မကောင်းတာတွေလည်း ဒွန်တွဲပြီး ရနေပါလားလို့ တွေးနေမိသဗျ။ ရှိတာလည်း ဒုက္ခ၊ မရှိတာလည်း ဒုက္ခ လို့ ဆိုကြသကိုးဗျ။

အင်း... အဲဒါတွေလည်း သိနေပါရဲ့ဗျာ။ ဒါပေမယ့်လည်း စာအုပ်တွေငှားတိုင်း၊ ဂျာနယ်တွေငှားတိုင်း ဖန်တစ်ရာတေနေတဲ့ ဒီအဖြစ်အပျက်တွေ၊ ဒီအကြောင်းအရာတွေက ကြုံနေရတာပါပဲ။ အဲဒီအခါတိုင်းလည်း သိတယ်မလား... ကျွန်တော်ကိုဉာဏ် အားကြီးစိတ်ဆိုးတုန်းပေါ့ဗျာ။

အမှတ်တရ
ကိုဉာဏ် (ပန်းလောင်မြေ)
၂၀၁၀ ပြည့်နှစ်၊ သြဂုတ်လ ၁၈ ရက်၊ အင်္ဂါနေ့။
နံနက် ၁၀ နာရီ ၄၁ မိနစ်တွင်ပြီး၏။