ဘယ်သူက ဘယ်သူ့ကို အသုံးချနေကြတာလဲ (မော်ဒယ်ရွှေစင် အင်တာဗျူး နောက်ဆက်တွဲအတွေး)

အစကတော့ ကိုယ့်ထမင်းကိုယ်စားပြီး ခပ်အေးအေး နေမလို့ပါပဲ။ ဒါပေမယ့် မပြောတော့ပါဘူး၊ မရေးတော့ပါဘူးဆိုပြီး အတင်းကျိတ်မှိတ်ပြီး နေရတာဟာ နောက်ဖေးသွားချင်ပါလျက် အတင်းအောင့်ထားရသလိုပဲ အတော်လေးကို အခံရခက်တာကိုးဗျ။ ကျွန်တော်ကိုဉာဏ်က မပြောချင်၊ မဆိုချင်ပါဘူးဆိုမှ လက်ဖက်ရည်ဆိုင်မှာလည်း ဒီအကြောင်း၊ သူငယ်ချင်းတွေ စကားလက်ဆုံကျရင်လည်း ဒီအကြောင်း၊ မကြားချင်တဆုံး ဖြစ်နေတော့တာကိုး။ ဒီကြားထဲ အချို့အချို့တွေက ကျွန်တော့်ကို တကူးတကကို လာမေးကြသေးတယ်။ သူတို့က Bi Weekly Eleven မှာ ဖတ်လိုက်ရတဲ့ သတင်းဆောင်းပါးကိုပဲ ဖတ်မိတာကိုး။ ကိုဉာဏ်ရေ... အဲဒါက ဘယ်လိုဖြစ်တာတုန်းဗျပေါ့။ သူတို့ကလည်း ဟိုလူပြော၊ ဒီလူပြော နည်းနည်းပါးပါးတော့ သိထားကြတာပါပဲ။ ဒါပေမယ့် အကိုးအကားနဲ့ ဖတ်ချင်လို့ ကျွန်တော့်ကို စကားခေါ်နေတယ်ဆိုတာ ကျွန်တော်သိတာပေါ့။ ကျွန်တော့်ဂျာနယ်ပုံထဲက အဲဒီအင်တာဗျူးတွေ၊ ကောက်နုတ်ချက် သတင်းတွေပါတဲ့ ဂျာနယ်တွေကို ချက်ချင်းပဲ ထုတ်ပေးလိုက်ပါတယ်။ တစ်ခါတည်းလည်း ကြိုပြောရသေးတယ်။ ဘေးနားမှာ ဘောလ်ပင်နဲ့ မှတ်ချက်တွေ ရေးထားတာကို ကိုယ့်ဘာသာကိုယ် ဖတ်ချင်ရင်ဖတ်ပါ။ မဝေဖန်ပါနဲ့လို့။ ဟုတ်တယ်ဗျ၊ အဲဒါတွေ ဖတ်မိကတည်းက ကျွန်တော်က စိတ်ထဲက သိပ်ပြီး အစာကြေလှတာ မဟုတ်ဘူး။

7DAY News မှာပါတဲ့ ရွှေစင်နဲ့ အင်တာဗျူးကိုတော့ မဖတ်ဖြစ်ခဲ့တာ အသေအချာပါပဲ။ မင်းသား၊ မင်းသမီးတွေကို အလကားနေရင်း အင်တာဗျူးလုပ်ပြီး ထည့်ပေးတဲ့ကဏ္ဍကို ကျွန်တော်ကတော့ မကြိုက်ဘူးဗျ။ (အဲဒါ ကျွန်တော် မကြိုက်တာကို ပွင့်ပွင့်လင်းလင်း ပြောတာ။) ပရိသတ်ကို သိစေချင်လို့၊ သိစေချင်လို့နဲ့ ခေါင်းစဉ်တပ်ပြီး သူတို့မေးတာတွေက ဘာတွေမှန်းကို မသိဘူးဗျ။ မေးခွန်းတွေက အဆင့်မတန်း မရှိဘူးဗျာ။ ကျွန်တော်ကတော့ အဲလိုပဲ မှတ်ယူထားတယ်။ အဲဒီအတွက် မင်းသား၊ မင်းသမီး အင်တာဗျူးအများစုကို မဖတ်ဖြစ်ဘူး။ တစ်ခါတလေ ပေါ်ပင်ဖြစ်ပြီး တအားကို နာမည်ကြီးနေတဲ့ ကိစ္စတွေနဲ့ ပတ်သက်ပြီး မေးမြန်းထားရင်တော့ သူတို့တွေ ဘယ်လိုမျိုး ပြောင်လိမ်ကြ၊ ပြောင်ညာကြသလဲဆိုတာကို သိချင်လို့ ဖတ်ပါတယ်။ ဥပမာ- မင်္ဂလာဆောင်တော့မယ့် သတင်းမျိုး၊ ကွာရှင်းပြတ်စဲခြင်း သတင်းမျိုး၊ အမွေပြတ် သတင်းမျိုးပေါ့။

ရွှေစင်နဲ့အင်တာဗျူးကို ဖတ်ပြီးတဲ့အချိန်မှာ အတော်လေးကို စိတ်ဝင်စားစရာကောင်းတာ တွေ့ရတယ်ဗျ။ အဲဒီအင်တာဗျူးကလည်း ဈေးဝယ်လမ်းညွှန် ဂျာနယ်ထဲက စကားတွေကြောင့် နာမည်ထွက်လာပြီးတဲ့ အချိန်ကျမှ လုပ်ထားတာပါ။ ပိုပြီး ဖတ်လို့ကောင်းသွားတာပေါ့။ ကာယကံရှင်မော်ဒယ်နဲ့ မေးမြန်းတဲ့ သတင်းထောက်ရဲ့ အကြောင်းတွေကို အတော်အတန် သိခွင့်ရလိုက်တယ်။

ကဲ.... ကျွန်တော်မြင်တာလေးတွေ၊ တွေးမိတာလေးတွေကို ပြောပြဦးမယ်ဗျာ။ ခင်ဗျားတို့နဲ့ အတွေးတူမယ်၊ ခံယူချက်တူမယ်လို့တော့ တထစ်ချ မပြောပါဘူးဗျာ။ ကျွန်တော်မြင်သမျှကို ပြန်လည်ဝေမျှတာပါ။

ပထမဆုံးအနေနဲ့ အဲဒီမော်ဒယ်ပြောတဲ့ စကားတွေကို အံ့သြမိတာ အမှန်ပဲဗျ။ သူတကယ်သုံးလို့ သုံးတယ်ပြောတယ်လို့ပဲ ကျွန်တော်က ယုံကြည်ပါတယ်။ အဲဒီလို သုံးတာကို မနာလိုလည်း မဖြစ်ရပါဘူး။ သူ့မှာ အဲဒီလိုသုံးနိုင်တဲ့ ကုသိုလ်ကံပါလာလို့ အခုလို သုံးနိုင်တယ်လို့ မုဒိတာ ပွားနိုင်ပါတယ်။ ဒါပေမယ့် သူသုံးတဲ့ပစ္စည်းအမျိုးအစားတွေ၊ တန်ဖိုးတွေ၊ သုံးစွဲမှုတွေကတော့ အံ့သြလောက်ဖွယ်ရာပါပဲခင်ဗျ။

အင်တာဗျူးမှာ သူ့မိဘတွေရဲ့ အလုပ်အကိုင်နဲ့ သူတို့အိမ်ရဲ့ စီးပွားရေးအကြောင်း ပြောထားတာ တွေ့ရပါတယ်။ အငြိမ်းစား တရားရုံးချုပ် ရှေ့နေတစ်ယောက်က အဲလောက် ချမ်းသာနိုင်သလားဆိုတာကို စဉ်းစားဖို့အတွက် ကျွန်တော်ဉာဏ်မမီပါ။ သူ့အစ်ကိုတွေရဲ့ ကားအရောင်းအ၀ယ်ကလည်း တစ်စီးရောင်းရင် ဒေါ်လာတစ်သိန်းလောက် မြတ်နိုင်သလား ကျွန်တော်မသိပါ။ ကားတစ်စီးတန်ဖိုး ဘယ်လောက်ရှိတယ်၊ ကားအမျိုးအစားတွေက ဘာတွေဆိုတာ ကျွန်တော်သေသေချာချာ နားမလည်တာကို ၀န်ခံပါတယ်။

နောက်တစ်ခုက ဒီနေ့ခေတ် မော်ဒယ်တစ်ယောက်ရဲ့ ၀င်ငွေဟာ ဘယ်လောက်ရှိလဲဆိုတာလည်း ကျွန်တော်မသိပါ။ ကျွန်တော်တို့ အမျိုးထဲမှာ မော်ဒယ်၊ ရုပ်ရှင်မင်းသမီး၊ ရုပ်ရှင်မင်းသား စသည်ဖြင့် မရှိသည့်အတွက် ဘယ်သူ့ကို မေးရမှန်းမသိပါ။ နာမည်ကြီး မင်းသားတွေကတော့ ဇာတ်ကားတစ်ကားရိုက်လျှင် သိန်းရာဂဏန်းပေးရသည်ဟု ကြားဖူးပါသည်။ အူဝဲကိုလည်း ရုပ်ရှင်တစ်ကားလျှင် သိန်း ၈၀ ၀န်းကျင် ပေးရသည်ဟု မိတ်ဆွေတစ်ဦးက သူသိသမျှကို ပြောပြဖူးပါသည်။ မှန်မမှန် ကျွန်တော်မသိပါ။

အထက်ပါ အချက်များအရ အင်တာဗျူးတွင်ဖြေသည့် ၀င်ငွေနှင့်ထွက်ငွေအပေါ် အိတ်စိုက်လုနီးပါးပဲ ဖြစ်ခဲ့ဖူးသည် ဆိုခြင်းမှာ ဘာကိုဆိုလိုမှန်း ကျွန်တော် တကယ်မသိပါ။ သူသုံးတဲ့ပစ္စည်း အမျိုးအစားတွေ၊ တန်ဖိုးတွေနှင့် သူရတဲ့ အနုပညာကြေးက လုံလောက်တယ်ဆိုတာ ဘယ်လိုများလဲလို့ ကျွန်တော်ကိုဉာဏ် ဉာဏ်မမီစွာဘဲ စဉ်းစားနေမိပါတယ်။

နောက်တစ်ခုက အင်တာဗျူးမှာ အဲဒီမော်ဒယ်က သူ့ကိုယ်သူ "မီး" ဟု သုံးနှုန်းထားခြင်းကို သဘောမတွေ့လှပါ။ ဂျာနယ်ကလည်း အဲဒီလိုပြောတာကို ဘာလို့ထည့်ပေးသလဲ မစဉ်းစားတတ်ပါ။ ဖြည့်ပြီး တွေးကြည့်မိတာက မော်ဒယ်က သူဖြေတဲ့အခါ "သမီးက... သမီးက..." ဟု အမြန်ပြောသည်ကို မေးမြန်းသူက "မီးက... မီးက..." ဟုပဲ ကြားပြီး အဲဒီလိုများ ပြန်ရေးထားသလား မသိဘူးဟူ၍ပင်။ တကယ်ဆိုရင် "သမီးက..." ဟုသာ သုံးသင့်သည်ဟု ထင်မြင်မိပါသည်။ သူ့ဟာသူ "မီးက..." လို့ ပြောပြော၊ "ရေက..." လို့ ပြောပြော သိပ်တော့ အရေးမကြီးပါ။ သို့သော် ဖတ်ရတာ တစ်မျိုးဖြစ်ရပါသည်။ ချစ်သည့်စိတ်မပေါ်ပေါက်ဘဲ အန်ချင်စိတ်သာ ပေါက်လာပါသည်။

ဥပဒေအထူးပြုဖြင့် မာစတာဘွဲ့ရထားသော ခေတ်ပညာတတ် တစ်ယောက်၏ အဆင့်အတန်းသည် မည်မျှရှိသည်ကို စဉ်းစားကြည့်စေလိုပါသည်။ မာစတာရပြီးသား အမျိုးသမီးတစ်ယောက်က "မီးက..." ဆိုတော့ ကျွန်တော်ကတော့ နားဝင်မချိုပါခင်ဗျား။ ပြီးတော့ ပြောသေးတယ်ဗျ... ဘာတဲ့ "တချို့မေးခွန်းလေးတွေကို မီးရဲ့ ဉာဏ်ရည်လေးနဲ့၊ အသက်အရွယ်အရ ကိုယ်ဖြေတတ်သလိုလေး...." တဲ့။ ကောင်းပါလေ့ဗျာ။ သူ့အသက်အရွယ်၊ သူ့ဉာဏ်ရည်လေးနဲ့တဲ့။ ရိုင်းချင်လည်း ရိုင်းပါစေတော့ဗျာ။ ကျွန်တော်ကတော့ "သေလိုက်ပါ့လား" လို့ပဲ ပြောလိုက်ချင်တယ်။ သူ့အသက်ဟာ အနည်းဆုံးတော့ ၂၅ နှစ် ကျော်လောက်ပြီ ထင်ပါတယ်။ အဲဒီအသက်အရွယ်ဟာ ကလေးမဟုတ်ဘူးဗျ။ ပြီးတော့ ဥပဒေမာစတာကို ယူထားတဲ့ လူတစ်ယောက်ရဲ့ ဉာဏ်ရည်ဟာ ဘယ်လောက်ရှိမလဲဆိုတာ ကျွန်တော်တို့က သူငယ်နှပ်စား ကလေးတွေမှ မဟုတ်တာဗျာ။ တွေးကြည့်လို့ ရပါတယ်ဗျ။ အဲ... ဒါပေမယ့် အင်တာဗျူးမေးသူကတော့ သူငယ်နှပ်စား ဖြစ်ပုံရတယ်ဗျ။ အဲဒါတွေကို နားလည်ပုံမရဘူး။ ထည့်ပေးတဲ့ ဂျာနယ်အယ်ဒီတာက ပိုဆိုးသပေါ့ဗျာ။

ကျွန်တော်မြင်တဲ့အတိုင်း ပြောရရင်တော့ အဲဒီမော်ဒယ်လေးဟာ အသက်အရွယ်လေးနဲ့မလိုက် သိပ်ဉာဏ်ပြေးတယ်ဗျ။ အဲဒါကို ခံလိုက်ရတာက အင်တာဗျူးမေးတဲ့လူရယ်၊ ဂျာနယ်တွေရယ်ဗျ။ အခုနောက်ဆုံး ကျွန်တော်တို့ပါ ပါသွားတာပေါ့ဗျာ။ တကူးတက ပြောနေရ၊ ဖတ်နေရ၊ ရေးနေရပြီလေ။ သေချာတာကတော့ သူ့ဇာတ်ကား တစ်ကားမှသာ ကျွန်တော်မကြည့်ဘူးတယ်၊ သူ့ရှိုးပွဲ တစ်ပွဲမှသာ ကျွန်တော်မကြည့်ဘူးတယ်၊ သူ့ကြော်ငြာ တစ်ခုမှသာ ကျွန်တော်မကြည့်ဘူးတယ်၊ မော်ဒယ်ရွှေစင်ဆိုတဲ့ နာမည်တစ်ခုကိုတော့ ကျွန်တော်မှတ်မိသွားတယ်ဗျ။ အဲဒါဟာ သူ့အတွက် အမြတ်ပဲလေ။ အရင်တုန်းက သူ့ကို ဘယ်သူကမှ အဲလောက် သိတာမဟုတ်ဘဲ အခုတော့ အတော်များများ သိသွားကြပြီ။ ဒါကလည်း အကွက်ဆန်းထင်ပါရဲ့။ အခု တအားကို အောင်မြင်နေတဲ့ ဟိုမင်းသမီးလေးကိုတောင် သနားသွားမိသေးတော့တယ်။ သူရင်းလိုက်ရတာက နည်းနည်းတန်ဖိုးကြီးတယ်ဗျ။ ရွှေစင်ကတော့ ပိုပြီး ပညာတတ်ဆန်တယ်၊ ဉာဏ်ပိုပြေးတယ်ဗျ။ ဟုတ်တယ်မလား။ စကားလုံးလေးတွေပဲ ရင်းလိုက်ရတာ။ ပြန်ရတဲ့ ကျော်ကြားမှုကတော့ အံ့မခန်းပဲဗျို့။

အင်း... ကောက်ချက်ချမိတာကတော့ ဂျာနယ်နဲ့ အင်တာဗျူးမမက အပိုင်ပဲဆိုပြီး ဗျူးခဲ့တာ၊ ထည့်ခဲ့တာ ဖြစ်ပါလိမ့်မယ်။ ဒါပေမယ့် ရွှေစင်ကလည်း အပိုင်ပဲဆိုပြီး သူပြောချင်တာတွေ ပြောချသွားလိုက်တာများ... ကျွန်တော်ကိုဉာဏ်မှာဖြင့် ဖတ်ရင်း၊ ဖတ်ရင်းနဲ့ လေးစားလို့မဆုံး၊ အံ့သြလို့ကို မဆုံးနိုင်ဘူး။

ဘယ်သူက ဘယ်သူ့ကို အသုံးချနေတာလဲ ဆိုတာကတော့ ကာယကံရှင်တွေ ကိုယ်တိုင်မှပဲ သိမှာပါပဲလေ။

သြော်... ဒါနဲ့ စကားမစပ်...။ ဟိုကကြား၊ ဒီကကြားတဲ့ အတွင်းရေးသတင်းတွေ၊ အညှီအဟောက်တွေကိုတော့ မပြောတော့ပါဘူးဗျာ။ လူတိုင်း သိနေကြတာပဲကိုး။ မသိဘူးလို့ မပြောနဲ့ဗျ။ ကျွန်တော်ကိုဉာဏ်တောင် သိတယ်ဆိုရင် တလောကလုံး သိပြီးသားဆိုတာ သေချာပေါက် ပြောရဲတယ်။ ကျွန်တော်က အဲဒီလို ခပ်ထုံထုံကောင်ဗျ။ အဲဒါကြောင့်လည်း ဒီပို့စ်ကို အခုမှ ရေးနိုင်တာပေါ့ဗျာ။

အမှတ်တရ
ကိုဉာဏ် (ပန်းလောင်မြေ)
၂၀၁၀ ပြည့်နှစ်၊ သြဂုတ်လ ၃၀ ရက်၊ တနင်္လာနေ့။
ညနေ ၃ နာရီ ၁၅ မိနစ်တွင်ပြီး၏။