ကျွန်တော်ကိုဉာဏ် အားကြီးစိတ်ဆိုးတယ် (၄)

ကျွန်တော်တို့ ငယ်ငယ်လေးကတည်းက နားရည်ဝနေတဲ့ ကျင့်ဝတ်တွေထဲက "မိဘ၀တ်" ဆိုတဲ့အထဲမှာ ထိမ်းမြားခြင်းလျှင် ဆိုတဲ့အချက်တစ်ချက် ပါတယ်ဗျ။ အားလုံးလည်း သိပြီးသားပါ။ သိပြီးသားပေမယ့် ကျွန်တော်အခုပြောမယ့် အကြောင်းအရာတွေကို ဆက်စပ်ပြောရမှာဆိုတော့ ထပ်ပြောရဦးမှာပေါ့ခင်ဗျာ။ မြန်မာမိဘတွေများလေ...ကိုယ့်သားသမီးက အသက်အရွယ်လေး ရလာတဲ့အထိ အိမ်ထောင်မကျသေးဘူးဆိုရင် နေမသိ၊ ထိုင်မသာ ဖြစ်ရပြီ။ သူတို့တစ်တွေမှာ မိဘ၀တ်ပဲ မကျေသလိုလို၊ မိဘ၀တ္တရား ပျက်ကွက်မှု ကျူးလွန်ထားသလိုလို ဘာလိုလို ညာလိုလိုပေါ့လေ။ အချို့များဆိုရင် အတော်ဆိုးတာဗျ။ သားသမီးက အိမ်ထောင်ရေးအပူတွေကို ကြောက်တဲ့အတွက် တစ်သက်လုံး ဒီအတိုင်းပဲ နေချင်ပါတယ်ဆိုတာကိုပဲ အဲဒီလိုနေတာဟာ မိဘတွေကို တာဝန်မကျေခဲ့ဘူးဖြစ်အောင် လုပ်သလိုလို ပြောတတ်ကြတယ်ဗျ။ စဉ်းစားတော့ စဉ်းစားစရာပဲဗျ။ သားသမီးတွေ အရွယ်ရောက်လာရင် သင့်တော်သူနဲ့ အိမ်ထောင်ရက်သား ချထားပေးရမယ်ဆိုတဲ့ ယဉ်ကျေးမှုတစ်ရပ်ဟာ ကျွန်တော်တို့ မြန်မာ့လူ့ဘောင်မှာ ခိုင်ခိုင်မာမာ ထုနဲ့ထည်နဲ့ ဖြစ်နေပါပြီ။ နောက်လည်း အဲဒီလိုပဲ ဖြစ်ကြဦးမယ်လို့ ယုံကြည်ပါတယ်။ အင်း... ထားလိုက်ပါဦးဗျာ။

ကျွန်တော်တို့ လူမှုနယ်ပယ်မှာ ပြောတတ်ကြတဲ့ စကားတစ်ခွန်း ရှိသေးတယ်ဗျ။ အင်မတန်လည်း အသုံးများပါတယ်။ အထူးသဖြင့် လူကြီးပိုင်းတွေက သုံးတတ်ပြောတတ်ကြပါတယ်။ အခြားမဟုတ်ပါဘူး။ "သီးချိန်တန်သီး၊ ပွင့်ချိန်တန်ပွင့်" တဲ့။ အဲဒီစကားမှာကိုက ရှင်းနေပြီးသားပါဗျာ။ သစ်ပင်တွေ ပန်းပင်တွေဆိုတာ သူ့အချိန်တန်ရင် ပွင့်ကြ၊ သီးကြတာကို ပြောထားတယ်ဆိုတာ အားလုံးသိပြီးသားပါ။ ဒါပေမယ့် အဲဒီစကားကို လူတွေအတွက် ယူသုံးလိုက်တဲ့အခါကျတော့ အဓိပ္ပါယ်ပြောင်းသွားတယ်လို့ ကျွန်တော်ကမြင်တယ်။ လူတစ်ယောက်ကို "သီးချိန်တန်သီး၊ ပွင့်ချိန်တန်ပွင့်ရမှာပေါ့ကွာ" လို့ ပြောလိုက်ပြီဆိုရင် သေချာတာကတော့ အဲဒီလူကို ချီးကျူးတာထက် ကျီစယ်တဲ့သဘော၊ လှောင်တဲ့သဘော၊ ပြောင်တဲ့သဘော၊ အားမလိုအားမရ ဖြစ်တဲ့သဘောလေးတွေက ပိုကဲနေတယ် ဆိုတာပါပဲ။ အင်း.... ဒါလည်း ထားလိုက်ပါဦးဗျာ။

ပြောလက်စနဲ့ ပြောရဦးမယ်။ နောက်ထပ် အသုံးများတဲ့ စကားတစ်ခွန်း ရှိသေးတယ်ဗျ။ "ဆေးပေးမီးယူ" တဲ့။ အဲဒီစကားကိုတော့ ကျွန်တော် သိပ်နားမလည်ဘူးခင်ဗျ။ ဟုတ်တယ်လေ.. ခင်ဗျားပဲ စဉ်းစားကြည့်ပါဦး။ ဆေးပေးတာက ဟုတ်ပါပြီ။ မီးယူတာက ဘာတုန်းဗျ။ ကျွန်တော့်အထင် ပြောရရင်တော့ အသက်ကြီးလာတဲ့အခါ တစ်ဦးဦးက နေထိုင်မကောင်းဖြစ်ရင် ဆေးလေးဘာလေးတိုက်၊ ပြုစုတာကို ပြောချင်တယ် ထင်ပါရဲ့။ မီးယူဆိုတာကတော့ ယောက်ျားလေးတွေအတွက်များ ပြောသလားမသိဘူး။ ရှေးခေတ်အဘိုးကြီးတွေဆိုရင် ဆေးတံသောက်ဖို့အတွက် မီးလေးဘာလေး တို့ခိုင်းဖို့၊ ဒီခေတ်အတွက်ဆိုရင်တော့ ဆေးလိပ်သောက်ဖို့ မီးခြစ်လေးဘာလေး လှမ်းခိုင်းဖို့ အဲလိုများလား မသိဘူးဗျ။ ဘာပဲဖြစ်ဖြစ်ဗျာ အသက်ကြီးလာတဲ့အခါ ဆေးပေးမီးယူ လိုတယ်ကွ ဆိုပြီး အပြောခံရတဲ့သူတွေဟာ အဲဒီလိုများ အပြောခံရရင် သူတို့ကိုယ်သူတို့ အားငယ်သွားကြမလား မဆိုနိုင်ဘူးနော်။ အင်း... ထုံးစံအတိုင်း ဒီအကြောင်းအရာကိုလည်း ထားလိုက်ဦးမယ်ဗျာ။

အပေါ်က အချက်တွေအကုန်လုံးကို ကျော်ဖြတ်ပြီးသွားပြီဆိုရင်တော့ နောက်ထပ် မလွဲမသွေ ကျော်ဖြတ်ရမယ့် အခက်အခဲကြီးတစ်ခု ရှိနေပါသေးသဗျာ။ အပေါ်ကဟာတွေကို ဘယ်လောက်ပဲ လျစ်လျူရှုနိုင်သည်ဖြစ်စေ ဒီအချက်ကတော့ တစ်ချက်ဆိုတစ်ချက်၊ တစ်ခွန်းဆိုတစ်ခွန်း အတော်အထိနာတဲ့ စကားလုံးတွေဗျ။ အခြားဟုတ်ရိုးလားဗျာ၊ "မျိုးဆက်" ဆိုတဲ့ စကားလုံးပေါ့။ "မင်းနှယ်၊ သေသာသွားတယ်... ကမ္ဘာပေါ်မှာ မင်းမျိုးဆက်ရယ်လို့မှ မကျန်ရစ်ခဲ့ဘူးဆိုရင် ဘယ်လောက်ရင်နာဖို့ ကောင်းသလဲကွာ" လို့များ အပြောခံလိုက်ရပြီဆိုရင် ဘယ်လောက်နာကျင်စရာ ကောင်းလိုက်မလဲဗျာ။ ဟုတ်တော့လည်း ဟုတ်တယ်ဗျ။ ကိုယ့်မှာသာ သားသမီး မရှိခဲ့ရင် ကိုယ့်ရဲ့မျိုးဆက်က ကိုယ့်မှာတင် ပြတ်သွားပြီလေ။ အဲဒီလို မပြတ်ဖို့အတွက်ကလည်း တစ်ယောက်တည်းနေလို့ မဖြစ်ပြန်ဘူးကိုးဗျ။ အင်း... ဒီတစ်ခါတော့ မထားတော့ပါဘူး။ ပြောချင်တာကို ဆက်ပါပြီဗျာ။

အပေါ်မှာရေးခဲ့တဲ့ စကားခြေလှမ်းတွေကို ဖတ်ပြီးတဲ့အချိန်မှာ ကျွန်တော်ကိုဉာဏ် ဘယ်ကိုဦးတည်နေတယ်၊ ဘယ်လိုခြေဦးလှည့်နေတယ်ဆိုတာ စာဖတ်သူတွေ အနည်းအကျဉ်းမဟုတ်ဘဲ အတော်များများကို ရိပ်မိသိရှိနေကြပြီလို့ ထင်ပါရဲ့ဗျာ။ ခင်ဗျားတို့ ထင်တဲ့အတိုင်းပါပဲ။ အဲဒီအကြောင်းကိုပဲ ပြောမလို့ပါဗျ။

ငယ်ငယ်တုန်းက သီတင်းကျွတ်ဆိုတာ ပျော်စရာကြီးဗျ။ ကျောင်းတွေပိတ်တယ်။ သူငယ်ချင်းတွေနဲ့ အားပါးတရ ဆော့ရတယ်။ မီးပုံးပျံလွှတ်တာတွေ ကြည့်ရတယ်။ မီးပုံးကားလေးတွေ၊ မီးပုံးသင်္ဘောလေးတွေ ဆွဲတယ်။ လူငယ်ဘာဝ လူကြီးတွေမသိအောင် ဗျောက်တွေဝယ်ပြီး ခိုးဖောက်တယ်။ သီတင်းကျွတ်ကျောင်းပိတ်ရက် ၁၀ ရက်ဆိုတာ ဘယ်လိုကုန်သွားမှန်းတောင် မသိလိုက်ဘူး။ အဲဒီတော့ ကလေးဘ၀ ကျောင်းနေစဉ်တုန်းက သီတင်းကျွတ် ကျောင်းပိတ်ရက်ကိုပဲ လည်တဆံ့ဆံ့နဲ့ မျှော်ခဲ့ရတယ်။ အခု အရွယ်ကလေးရလာတော့ သီတင်းကျွတ်ဆိုတဲ့ စကားလုံးကိုကြားရင် ဘယ်လိုကြီးဖြစ်မှန်း မသိဘူးဗျ။ ကြောက်ကို ကြောက်နေပြီလို့တောင် ပြောရမယ်ထင်တယ်။ သူ့ဟာသူ သီတင်းကျွတ်တာပဲဗျာ.. ဘာဖြစ်လို့ ကိုယ်တွေကို လာလာပြီးတော့ "သီတင်းကျွတ်ပြီနော်၊ ၀ါကျွတ်ပြီနော်" ဆိုပြီး လာလာစနေ၊ ပြောနေကြတယ် မသိပါဘူးဗျာ။ တစ်ခါတလေ ကိုယ့်ပြဿနာနဲ့ကိုယ် ညစ်နေတဲ့အချိန်မျိုးမှာများ အဲဒီလို လာပြောပြီဆိုရင် "သီတင်းကျွတ်တော့၊ ၀ါကျွတ်တော့ ဘာဖြစ်တုန်းကွ၊ ငါကတော့ ကျွတ်စရာ ပုဆိုးပဲရှိတယ်" ဆိုပြီး ပြန်ပြောလွှတ်လိုက်မှ ဘာပြောတဲ့လူက မျက်နှာပိုးသတ်ပြီး ပြန်သွားတတ်တယ်။ တစ်နှစ်လုံးနေတာ အကောင်းဗျ၊ အဲ... သီတင်းကျွတ်ခါနီးပြီလားဆိုရင် စောစောက မေးခွန်းတွေက ဘက်ပေါင်းစုံက ၀င်လာတော့တာပါပဲဗျာ။ အဲဒီလို အပြောခံရတိုင်း၊ အမေးခံရတိုင်းလည်း ကျွန်တော်ကိုဉာဏ် အားကြီးစိတ်ဆိုးတယ်။

သီတင်းကျွတ်တဲ့အခါ ကြုံရတဲ့ နောက်ထပ်စိတ်ညစ်စရာ တစ်ခုကတော့ မင်္ဂလာဆောင်တွေ ဖိတ်စာတွေ အများအပြား ရရှိခြင်းပါပဲ။ အရွယ်ရလာတာနဲ့အမျှ၊ လုပ်သက်များလာတာနဲ့အမျှ အပေါင်းအသင်းလည်းများလာ၊ အသိမိတ်ဆွေလည်း တိုးလာတတ်တာကိုး။ အဲဒီတော့ သီတင်းကျွတ်ပြီဆိုတာနဲ့ ဖိတ်စာမရတဲ့ အပတ်ဆိုတာ မရှိသလောက် ဖြစ်နေတော့တာပါပဲ။ တချို့ကတော့ သူတို့ကိုယ်တိုင်၊ တချို့ကတော့ သူတို့သားသမီးတွေ၊ တချို့ကတော့ သူတို့ ညီအစ်ကို မောင်နှမတွေ စသည်ဖြင့်ပေါ့လေ။ လူမှုရေးဆိုတာ ရှိလေတော့လည်း အဲဒီမင်္ဂလာဆောင်တွေကို သွားရတာပါပဲ။ အဲဒီလို သွားရတဲ့အခါတိုင်းလည်း အမြဲလိုလို ကြုံရတာပါပဲ။ အခြားဟုတ်ရိုးလားဗျာ... ဧည့်ခံပွဲကို အတူလာတက်တဲ့ အခြားသူငယ်ချင်း ဇနီးမောင်နှံတွေနဲ့ တွေ့ပြီဆိုရင် "ဘယ်လိုလဲဗျ၊ လူပျိုကြီးရဲ့၊ သူများတွေကိုပဲ ကြည့်ပြီး အားကျမနေနဲ့ဦး၊ ကိုယ်တိုင်လည်း လုပ်ဦးလေဗျာ" တဲ့။ ဒီလောက် ဧည့်သည်တွေအများကြီးကြားမှာ ဘယ်လောက် စိတ်ဆိုးဖို့ ကောင်းသလဲ။ ဘေးနားက ကြားတဲ့လူတွေကလည်း ပြုံးစိစိနဲ့ လှည့်ကြည့်တတ်ကြသေးသဗျ။ ကျွန်တော်ကိုဉာဏ် အားကြီးစိတ်ဆိုးတယ်။

သတို့သား၊ သတို့သမီးက ပရိသတ်တွေကို လိုက်နှုတ်ဆက်တဲ့အခါကျရင်လည်း ကိုယ်က သတို့သားနဲ့ သိနေရင်၊ သို့မဟုတ် သတို့သမီးနဲ့ သိနေရင် မိတ်ဆက်ပေးတတ်တာက ကြည့်ဦးလေဗျာ။ "ဒါ... ကိုယ်တို့ရုံးက၊ ဒါမှမဟုတ် ဒါ သမီးတို့ရုံးက လူပျိုကြီး ကိုဉာဏ်လေ" တဲ့။ ဘာဆိုင်လဲဗျာ။ ကိုယ့်ခင်ပွန်းလောင်း ဒါမှမဟုတ် ကိုယ့်ဇနီးလောင်းကို မိတ်ဆက်ပေးတာပဲဗျာ။ "ဒါ ရုံးက ကိုဉာဏ်ပါ" ဆိုရင် ပြီးတာပေါ့ဗျာ။ ဘာကိစ္စများ လူပျိုကြီးဆိုတဲ့ စကားလုံးကြီးကို ထည့်ပြောကြတယ် မသိပါဘူး။ Sir တို့၊ Lord တို့၊ ၀ဏ္ဏကျော်ထင်တို့၊ သီရိပျံချီတို့ စတဲ့ ဘွဲ့ထူးဂုဏ်ထူးတွေမို့ ထည့်ပြီးတော့ ပြောတယ်ဆိုလည်း ထားပါတော့။ လူပျိုကြီးဆိုတာ ဘွဲ့ထူးဂုဏ်ထူးမှ မဟုတ်တာပဲဗျာ။ ကျွန်တော်ကတော့ အဲဒီလို မိတ်ဆက်ပေးတိုင်း "ကျွန်တော်/ကျွန်မတို့ကတော့ အဖြစ်ရှိလို့ မင်္ဂလာဆောင်နေပြီ၊ ခင်ဗျားက အဖြစ်မရှိဘူးလားဗျ" လို့ တစ်ဖက်လှည့်နဲ့ ကြွားလည်းကြွား၊ မေးလည်းမေးတယ်လို့ ခံစားရတယ်။ အားကြီးစိတ်ဆိုးတယ်ဗျာ။

အချို့အချို့သော မင်္ဂလာဆောင်ဖိတ်စာတွေကလည်း အတော်စိတ်ဆိုးစရာတွေ ကြုံရသေးတယ်ဗျ။ မိတ်ဆွေတွေ၊ ရုံးက အပေါင်းအသင်းတွေဆိုရင်တော့ ကိုဉာဏ်ဆိုတဲ့ နာမည်တစ်ခု ရေးပြီးတော့ ပေးကြတာပါပဲ။ အဲဒီအတိုင်း မရေးဘဲ လက်စွမ်းပြတတ်ကြတာက ပြောမနာ၊ ဆိုမနာ၊ ပုခုံးဖက်ပေါင်းလာတဲ့ သူငယ်ချင်းတွေဗျ။ သူတို့ကိုယ်တိုင်ရဲ့ မင်္ဂလာပွဲ၊ ဒါမှမဟုတ် သူတို့တာဝန်ယူလုပ်ပေးတဲ့ မင်္ဂလာဆောင်တွေအတွက်များ ဖိတ်စာဝေရပြီဆိုရင် လက်စွမ်းပြတော့တာပဲ။ နာမည်ချည်းသက်သက် ရေးပေးလိုက်ရင် သူတို့ကို မိုးကြိုးပစ်မှာမို့လား မသိပါဘူး။ ရေးပေးတတ်တာတွေကို ကြည့်ဦးလေ။
"ကိုဉာဏ် နှင့် ဇနီး" တဲ့။
အဲဒါ သက်သက်ရွဲ့တာဗျ။ မပြောချင်ပါဘူးဗျာ။ ပြောရင်လည်း သူတို့ပြန်ပြောတဲ့စကားက ပိုထိတယ်ဗျ။ ဘာတဲ့... "မင်းက တစ်သက်လုံးလည်း အဲဒီလို ရေးရမှာမဟုတ်တော့ ငါတို့က မင်းအတွက် ရသေ့စိတ်ဖြေ ရေးပေးတာပါ" တဲ့။ ကဲ ကြည့်ဦးဗျာ... ဘယ်လောက်များ စိတ်ဆိုးဖို့ ကောင်းလိုက်သလဲ။ နောက်ထပ် ရှိသေးတယ်။
"ကိုဉာဏ် နှင့် မ.......... " တဲ့။
အဲဒါလည်း တမင်သက်သက် ဖဲ့တာပဲဗျ။ သဘောကတော့ ကျွန်တော့်မှာ နောက်ကလိုက်ပြီး ရေးစရာမရှိဘူးပေါ့လေ။ ကြိုက်တဲ့နာမည်ကို ကိုယ့်ဘာသာကိုယ် ထည့်ရေးဆိုတဲ့သဘောပေါ့ဗျာ။ မပြီးသေးဘူး။ ကျန်သေးတယ်။ ဘယ်လိုရေးတတ်သေးလဲဆိုတော့....
"လူပျိုသိုးကြီး ကိုဉာဏ်" တဲ့။
သူတို့ရေးမှပဲ ကိုယ့်ဟာကိုယ် စဉ်းစားမိတယ်။ သိုးရပုပ်ရအောင်လည်း ကျွန်တော်က သစ်သီးဝလံမှ မဟုတ်တာပဲဗျာ။ လူပျိုပဲ သိုးတယ်၊ ပုပ်တယ် မရှိပါဘူးဗျာ။ ထပ်ပြီးတော့ ရေးတတ်ကြတာက...
"ထာဝရလူပျိုကြီး ကိုဉာဏ်" တဲ့။
ကြည့်စမ်းပါဦးဗျာ...။ သူတို့ရေးတဲ့စာလုံးတွေကို ဖတ်ရတာ စာလုံးတွေလို့ မမြင်ဘူးဗျ။ ကျွန်တော့်ကို လျှာထုတ်ပြီး ပြောင်ပြနေတဲ့ မျက်နှာတွေကိုပဲ မြင်နေတော့တယ်။ "မင်းဟာ တစ်သက်လုံးလည်း စွံမယ့်ကောင် မဟုတ်ပါဘူးကွာ၊ အဖြစ်ရှိမယ့်ကောင်လည်း မဟုတ်ပါဘူး" လို့ ပြောနေသလိုပါပဲ။ ရေးစရာလားဗျာ။ ကျွန်တော်ကိုဉာဏ် အားကြီးစိတ်ဆိုးတယ်။

တစ်ခါတလေ ဦးလေးတွေ၊ အဒေါ်တွေနဲ့ တွေ့တဲ့အခါ ဟိုစကားဒီစကားပြောရင်းနဲ့ ဒီပိန္နဲပင်ကို လာတိုက်ကြသေးတာပါပဲ။ "မင်းက အိမ်ထောင်မပြုသေးဘူးလား" တဲ့။ ကျွန်တော့်ကိုတွေ့တိုင်း အဲဒီမေးခွန်းမေးဖို့ပဲ ဘာလို့ စဉ်းစားမိနေကြသလဲ မသိပါဘူးဗျာ။ ပြီးတော့ ဆက်ပြောသေးတယ်... "လူဆိုတာ သီးချိန်တန်သီး၊ ပွင့်ချိန်တန်ပွင့်ရတယ်ကွ" တဲ့။ ဒုက္ခပါပဲဗျာ... ကျွန်တော်က အပင်မှမဟုတ်တာဗျ။ နှင်းဆီပင်ဆိုတာ ဘယ်အချိန်မှာ အဖူးစဖူးတယ်၊ ဘယ်အချိန်မှာ ပွင့်တယ်ဆိုတာ ပုံသေရှိတယ်၊ သရက်ပင်ဆိုတာလည်း ဘယ်အချိန်မှာ အပွင့်ပွင့်မယ်၊ ဘယ်အချိန်မှာ အသီးသီးမယ် ပုံသေရှိတာပါပဲ။ ကျွန်တော်ကိုဉာဏ်က လူလေဗျာ... ဘယ်အချိန်မှာ သီးရပွင့်ရမယ်ဆိုတာ ဘယ်လိုလုပ်ပြီး ပုံသေရှိမှာတုန်းဗျ။ သူတို့အနေနဲ့ "သြော်... ကိုဉာဏ်တစ်ယောက် သီးချိန်မတန်သေးဘူး" လို့ ဘာလို့ မတွေးပေးနိုင်ကြသလဲဆိုတာကို နားမလည်နိုင်ဘူး။ အချိန်တန်ရင်တော့ သီးမှာပေါ့ဗျာ၊ မဟုတ်ဘူးလား။ ပန်းပင်တိုင်းဟာ တစ်ချိန်တည်း ပွင့်ကြတာမှ မဟုတ်တာ၊ သစ်ပင်တိုင်းကလည်း တစ်ချိန်တည်း သီးကြတာမှ မဟုတ်တာပဲ။ သူတို့အချိန်ရောက်ရင်တော့ သီးကြ၊ ပွင့်ကြမှာပါ။ ကျွန်တော်လည်း ထိုနည်း၎င်းပေါ့ဗျာ။

ပြောသာပြောနေရတာပါ...။ အခုဆိုရင် ကျွန်တော့်မှာ ရန်သူတွေက ပတ်လည်ဝိုင်းနေပြီဆိုသလို ဖြစ်နေပါပြီ။ အဖေနဲ့ အမေကလည်း "ငါ့သား၊ မင်းအသက်မငယ်တော့ဘူးနော်" တဲ့။ အင်း... သူတို့လည်း မိဘ၀တ် ကျေချင်ပြီထင်ပါရဲ့။ လူကြီးသူမတွေကလည်း "သီးချိန်တန်သီး၊ ပွင့်ချိန်တန်ပွင့်" တဲ့။ သူတို့မျက်စိထဲမှာ ကျွန်တော်ဟာ နှစ်ချို့သက်တမ်းလွန် အပင်ကြီးများ ဖြစ်နေသလား မသိပါဘူးဗျာ။ ကျွန်တော်ကတော့ ကိုယ့်ကိုယ်ကိုယ် မနေ့တစ်နေ့ကမှ သစ်စေ့ထဲက တိုးထွက်လာတဲ့ ပျိုးပင်ပေါက်လေးတစ်ပင်လို့ပဲ ခံစားရတယ်။ သူငယ်ချင်းတွေကတော့ သြဘာပေးပါတယ်... "ငါတို့က သားတွေ၊ သမီးတွေ ရှိနေပြီကွ၊ ဒီအချိန်သေမယ်ဆိုရင်တောင် မျိုးဆက်ကျန်ခဲ့ပြီ၊ မင်းကတော့ အခုအချိန် သေသွားရင် မျိုးဆက်တောင် ကျန်ခဲ့မှာ မဟုတ်ဘူး" တဲ့။ ပြောရက်လိုက်ကြတာဗျာ။ အားကြီးစ်ိတ်ဆိုးတယ်။ သူတို့ပြောခါမှ ကိုယ်တွေပဲ ပူချင်လာသလိုလို၊ ခေါင်းတွေပဲ ကိုက်ချင်လာသလိုလို၊ ခြေလက်တွေပဲ နာကျင်လာသလိုလို ဖြစ်လာမိသလားပဲဗျ။ အင်း... မဆီမဆိုင် "2012" ဆိုတဲ့ ကိန်းဂဏန်းတွေက အတွေးထဲကို ၀င်လာလိုက်သေးတယ်။ အင်း... မဖြစ်သေးပါဘူး။

ပြောမယ့်သာ ပြောရတာပါ။ ကျွန်တော်ကိုဉာဏ် သီးချိန်တန်လို့ သီးပြီဆိုတော့လည်း ပြောကြဦးမှာပါ။ "မင်းက သေခါနီးမှ ရိက္ခာယူတယ်" တို့၊ "အပူရှာတာကိုးကွ" တို့၊ "မင်းတော့ (အိမ်)ထောင် ကျသွားပြီ" တို့၊ "မင်းတော့ သားကျွေးမှု၊ မယားကျွေးမှုနဲ့ ရှိသမျှအမွှေး အကုန်ပြောင်မှာပဲ" တို့၊ "သံယောဇဉ်ဆိုတာ သံသရာရှည်စေတဲ့ အကြောင်းတွေကွ" တို့၊ အို... စသဖြင့် စသဖြင့်ပေါ့လေ။ အင်း... လူသားဆိုတဲ့အတိုင်း လူသားပီသကြပါပေတယ်ဗျာ။ ကြိုတွေးပြီးတော့လေ... ကျွန်တော်ကိုဉာဏ် အားကြီးစိတ်ဆိုးနေမိသေးသဗျာ။

ကဲ... စာဖတ်သူ၊ မကြာခင် သီတင်းကျွတ်တော့မယ်ဗျ။ "ဘယ်လိုလဲ ကိုဉာဏ်ရဲ့... ၀ါကျွတ်တော့မယ်နော်" လို့ ယောင်လို့များတောင် မမေးမိပါစေနဲ့ဗျာ။ ကျွန်တော်ကိုဉာဏ် အားကြီးစိတ်ဆိုးတယ်ဗျ။

အမှတ်တရ
ကိုဉာဏ် (ပန်းလောင်မြေ)
၂၀၁၀ ပြည့်နှစ်၊ သြဂုတ်လ ၂၇ ရက်၊ သောကြာနေ့။
နံနက် ၁၁ နာရီ ၃၃ မိနစ်တွင်ပြီး၏။