(၁)
ကျွန်တော်တို့ ရခိုင်ပြည်နယ်မှာ ရာသီဥတုက အရမ်းအေးနေတယ်။ စိမ့်ပြီးတော့ကို အေးတာ။ ပြင်ဦးလွင်မှာ နေဖူးခဲ့တဲ့လူ ဖြစ်ပေမယ့်လည်း မတူတဲ့အအေးဒဏ်ကြောင့် အံ့သြရတယ်။ ပြင်ဦးလွင်မှာက အပြင်မှာသာ စိမ့်နေအောင် အေးတာ၊ အခန်းထဲမှာများ စောင်ခြုံပြီးကွေးနေလိုက်ရင် နွေးနေတတ်တာကိုး။ အခုတော့ ဒီရခိုင်ဆောင်းက စောင်ခြုံထားတာတောင်မှ သိပ်မနွေးချင်ဘူး။ ဟိုနားကစိမ့်ပြီး အေးသလိုလို၊ ဒီနားက စိမ့်ပြီး အေးသလိုလိုနဲ့။ အအေးကြိုက်တဲ့ ကျွန်တော်ကိုဉာဏ်တောင် အတော်လေး ကြောက်နေရတဲ့အထိပဲ။ မနှစ်က ဒီအချိန်တုန်းက ဒီလောက် မအေးဘူးဆိုတာကိုတော့ သတိထားမိတယ်။ ကျွန်တော်ပဲ အမှတ်မှားသလား ဆိုတာကတော့ သေသေချာချာ မှတ်သားထားမိတဲ့လူများရှိရင် ပြင်ပေးတော်မူကြရန် ဖြစ်ကြောင်းပါခင်ဗျား။ အဆိုတော်ကြီး ဒေါ်ခင်ညွန့်ရည် ရဲ့ သီချင်းစာသားလေးကို ပြောင်းဆိုလိုက်ချင်ပါရဲ့ဗျာ။
“ဆောင်းအမီ… ရောက်အောင်သာ ပြန်ခဲ့… မောင့်ဆီ…၊ ဆောင်းအမီ… မေ့ကိုသာ မောင်လွမ်းတော့သည်… မေရေ… ဆောင်းအမီရောက်အောင် မောင့်ဆီ ပြန်ခဲ့စေချင်သည်…” လို့။
(၂)
၃၄ နှစ်မြောက် ရခိုင်ပြည်နယ်နေ့ အခမ်းအနားကို တက်ခွင့်ရခဲ့တယ်။ ရခိုင်ရိုးရာ ကျင်ကိုင်ပွဲ နဲ့ ပြည်နယ်နေ့ အထိမ်းအမှတ် ခရိုင်ပေါင်းစုံ ဘောလုံးပြိုင်ပွဲ၊ ရခိုင်ပြည်နယ်လက်ရွေးစင်အသင်းနဲ့ ရက္ခပူရအသင်းတို့ရဲ့ ချစ်ကြည်ရေး ခြေစမ်းပွဲတွေကြောင့် ဒီနှစ် ရခိုင်ပြည်နယ်နေ့ဟာ စစ်တွေမြို့မှာ အတော်စည်ကားခဲ့တယ်လို့ ဆိုနိုင်ပါတယ်။ လူတွေကလည်း အတော်လေးကို ပျော်ပျော်ပါးပါး ပါဝင်ဆင်နွှဲခဲ့ကြတာ တွေ့ရပါတယ်။ အားလုံးရဲ့ တူညီတဲ့ ခံစားချက်တစ်ခုကတော့ ရခိုင်ပြည်နယ်နေ့ကို စည်စည်ကားကား၊ ခမ်းခမ်းနားနား ပြုလုပ်ပေးခဲ့တဲ့ ရခိုင်ပြည်နယ်အစိုးရကို ကျေးဇူးတင်နေကြတာပါပဲ။ ရခိုင်ရိုးရာ ယဉ်ကျေးမှုတွေ ပျောက်ဆုံးသွားမှာ၊ အခြားသော ယဉ်ကျေးမှုတွေကြောင့် လွှမ်းမိုးခံရမှာကို ရခိုင်လူမျိုးတွေက စိုးရိမ်ကြတာကို တွေ့ရတော့ မြန်မာလူမျိုးဖြစ်ရခြင်းကို အင်မတန်မှ ဂုဏ်ယူမိပါတယ်။ ကျွန်တော်တို့ မြန်မာနိုင်ငံမှာ အခုလိုမျိုး ကိုယ်ပိုင်ယဉ်ကျေးမှုကိုယ်စီ၊ ဘာသာစကားကိုယ်စီ၊ ဓလေ့စရိုက်ကိုယ်စီနဲ့ အသီးသီးသော လူမျိုးတွေရှိနေကြတာ၊ မြန်မာပြည်ရဲ့ တစ်မိုးအောက်မှာ ဥမကွဲ သိုက်မပျက် စုစည်းနေထိုင်ကြတာ ဘယ်လောက်များ ဂုဏ်ယူချင်စရာ ကောင်းသလဲဆိုတာကို စာဖတ်သူကိုယ်တိုင်ပဲ တွေးကြည့်စေလိုပါတယ်။ စေ့စေ့တွေးလေ ကြက်သီးထလေ ဖြစ်ရတဲ့ ယဉ်ကျေးမှုအစဉ်အလာကြီးတဲ့ လူမျိုးပါခင်ဗျ။
(၃)
ဘောက်ဆင်ဒေးလို့ ခေါ်ကြပြီး ဘောလုံးဝါသနာရှင်အများ သိရှိကြတဲ့ အင်္ဂလန်ပရီမီးယားလိဂ်ရဲ့ ပွဲကျပ်ကာလ ပွဲစဉ်တစ်ခုဖြစ်တဲ့ ဖူလ်ဟမ် နဲ့ မန်ယူ ပွဲကို သွားကြည့်ဖြစ်ခဲ့တယ်။ ကျွန်တော်နေတဲ့ နေရာက ည ၉ နာရီနောက်ပိုင်းဆို မီးရောင်မမြင်ရလေတော့ စစ်တွေမြို့ထဲကို သွားကြည့်ဖြစ်ခဲ့တယ်။ ကြည့်ရမယ့်ပွဲစဉ်က မနက်အစောကြီး ၂ နာရီခွဲ ဆိုတော့ မနက် ၁ နာရီလောက်ကတည်းက နှိုးစက်သံနဲ့ အိပ်ရာထပြီး၊ ချမ်းချမ်းစီးစီးထဲမှာ ဆိုင်ကယ်တစ်စီးနဲ့ ထသွားရတယ်။ အိုး… အဲဒီလို သွားကြည့်မိမှပဲ စစ်တွေမြို့ရဲ့ ညအလှကို ခံစားမိပြီး အံ့သြတကြီးဖြစ်ရတော့တယ်။ အရင်တုန်းက ပိန်းပိတ်မှောင်နေတဲ့ စစ်တွေမြို့ရဲ့ လမ်းတွေဟာ ဖန်ချောင်းမီးရောင် ဖြူဖြူဖွေးဖွေးတွေအောက်မှာ စိတ်ကြီးဝင်ပြီး အလှမာန်တွေ တက်နေပါရော့လား။ လမ်းကြားတွေပါမကျန် မီးချောင်းရောင် ဖြူဖြူဖွေးနဲ့ ဘယ်လိုမှကို မှတ်မိစရာမရှိတဲ့ မြို့ကြီးပြကြီးရောက် တောသူမလေးတစ်ယောက်လိုမျိုး လှနေပါရော့လား။ စစ်တွေမြို့ရဲ့ ညအလှကို ခံစားနေရင်းနဲ့ စိတ်ထဲမှာ တစ်ခုခု အလိုမကျသလို ဖြစ်နေမိတာမို့ ဘာပါလိမ့်ဆိုပြီး သေချာသတိထားကြည့်မိတယ်။ ရော်… အဲဒီတော့မှ လမ်းတွေကသာ လင်းပြီး အိမ်တွေအကုန်လုံးက မီးတွေမှောင်ပြီး ပိတ်ပိတ်ပိန်းနေတာကို သတိပြုမိတယ်။ မျက်နှာတစ်ခုလုံး ဖွေးဖွေးဖြူအောင် ချယ်သလိမ်းကျံထားပေမယ့် တစ်ကိုယ်လုံး အနက်ရောင်ဝတ်စုံနဲ့ ဆိုသလို ဖြစ်နေပါလားလို့ တွေးမိတယ်။ မီတာခ တစ်ယူနစ်ကို ၅၀၀ ကျပ် ဆိုတဲ့ ကန့်သတ်ချက်ဟာ ရောင်စုံဝတ်စုံတွေ ၀တ်ဆင်ဖို့ စိတ်ဆန္ဒရှိပေမယ့် မဖြစ်နိုင်တဲ့ အခြေအနေကို တွန်းပို့ထားတာကိုး။ ပြီးတော့ လမ်းပေါ်မှာလည်း အသွားအလာမရှိဘဲ လမ်းမီးတွေသာ ထိန်ထိန်လင်းနေတာမို့ ကြည့်မယ့်သူမရှိဘဲ၊ အပြင်မသွားဘဲ၊ အခမ်းအနားမတက်ဘဲ အိမ်မှာနေရင်း အလှတွေပြင်ထားသလို ဖြစ်နေပါလားလို့လည်း တွေးမိတယ်။ အင်း…. အလှတွေဖူးပွင့်စ၊ ပျိုမျစ်စ၊ အပျိုဘော်ဝင်စ စစ်တွေမလေးကို ရောင်စုံဝတ်စုံလေးတွေ အမြန်ဆုံး ဆင်ယင်နိုင်ကြပါစေလို့ စိတ်ထဲကနေ တိုးတိုးလေး ဆုတောင်းနေမိတယ်။
(၄)
သြော်… ဒါနဲ့ စကားမစပ်၊ အပေါ်မှာပြောခဲ့တဲ့ ဖူလ်ဟမ်နဲ့ မန်ယူပွဲမှာ ကျွန်တော့်အသင်းကြီး မန်ယူက ၅ ဂိုးပြတ်နဲ့ အနိုင်ရသွားတယ်ဗျ။ ၀ဲလ်ဘက်၊ နာနီ၊ ဂစ်၊ ရွန်းနီ၊ ဘာဘာတော့ဗ် တို့ရဲ့ သွင်းဂိုးတွေကလည်း ရင်ခုန်ချင်စရာချည်းပါပဲဗျာ။ ဒီနှစ် ပရီမီးယားလိဂ်ရာသီကို စစ်တွေမြို့မှာ ပထမဆုံးကြည့်တဲ့ပွဲမှာ အခုလိုမျိုး ဂိုးပြတ်အနိုင်ရခဲ့တော့ ကျွန်တော်ကိုဉာဏ်တစ်ယောက် ပါးစပ်ကြီး နားရွက်တက်ချိတ်လုမတတ် အပျော်ကြီး ပျော်နေကြောင်းပါခင်ဗျား။
(၅)
ဒီနှစ် ကျွန်တော်တို့ စပါးအထွက်နှုန်းလေး နည်းနည်းတိုးတော့ ပျော်ရွှင်ပြီး သူငယ်ချင်းတစ်ယောက်ကို သွားကြွားမိတယ်။ ဖြစ်ချင်တော့ အဲဒီသူငယ်ချင်းက ဧရာဝတီတိုင်းမှာနေတဲ့လူ ဖြစ်နေတယ်။ သူက ၀မ်းသာအားရနဲ့ ဘယ်လောက်ထွက်ပြီးလဲလို့ ၀မ်းသာအားရနဲ့ မေးရှာတယ်။ ကျွန်တော်လည်း အလောတကြီး ၀မ်းပန်းတသာနဲ့ ပြန်ဖြေလိုက်တယ်။ ဒီနှစ် တစ်ဧကအထွက်နှုန်း ပျမ်းမျှ ၃၅ တင်းလောက်ရှိတယ်ကွပေါ့။ သူငယ်ချင်းခမြာ ချက်ချင်းစကားပြန်မပြောနိုင်ရှာဘူး။ ခဏကြာတော့မှ နောက်နေတာလားတဲ့။ ကျွန်တော်လည်း ကြောင်သွားတယ်။ ဘာလို့နောက်ရမှာလဲပေါ့။ အဲဒီတော့ သူက ထပ်မေးတယ်။ ၁၃၅ တင်းလားတဲ့။ ဒီတစ်ခါ အေသင်ချိုဆွေ ဖြစ်သွားတာက (တင်းတယ်ကို ပြောတာပါ) ကျွန်တော်ပေါ့။ ဘာလို့ နောက်ရတာလဲပေါ့။ ၁၃၅ တင်း ဖြစ်မလားပေါ့။ အဲဒီတော့ သူက ရှင်းပြရှာတယ်။ သူတို့ ဧရာဝတီတိုင်းမှာ စပါးခင်းထဲကို မျိုးစေ့ကြဲပြီး ဒီအတိုင်းပစ်ထားရင်တောင် ရိတ်တဲ့အချိန်မှာ တင်း ၈၀ တော့ အေးအေးဆေးဆေး ထွက်တယ်တဲ့။ ကျွန်တော် ရင်မောသွားတယ်။ ကျွန်တော်တို့ ရခိုင်ဒေသရဲ့ စိုက်ပျိုးမှုပုံစံတွေ၊ နှစ်စဉ်ထွက်ရှိမှု အခြေအနေတွေကို သူ့ကို ရှင်းပြလိုက်တယ်။ သူနားလည်သွားပါတယ်။ ကျွန်တော်လည်း စိတ်ထဲမှာ ဘာဖြစ်သွားမှန်းမသိဘူး။ နေလို့ထိုင်လို့မကောင်း ဖြစ်သွားရတယ်။ ကျွန်တော့်ရဲ့ အကြီးအကဲတစ်ယောက်က ပြောတာကို ပြန်သတိရမိတယ်။ ရခိုင်ပြည်နယ်ရဲ့ စပါးထွက်ရှိရမယ့် ရည်မှန်းချက်က တစ်ဧကကို ၇၂.၅ တင်း ထွက်ရှိရေးတဲ့။ ပြည်နယ်တစ်ခုလုံးက စပါးခင်းတွေကို ကျွန်တော်မပြောချင်သေးဘူး၊ စစ်တွေမြို့အနီးမှာ စံပြကွက်တွေအနေနဲ့ ဒီနှစ်မှာ စိုက်ပျိုးခဲ့တဲ့ စပါးခင်းတွေ ဘယ်လောက်ထွက်သလဲ ဆိုတာပဲ သိချင်နေမိတယ်။ တစ်ဆက်တည်းမှာပဲ အခြားအတွေးတွေ ၀င်လာမိတယ်။ မနှစ်ကတော့ ကျွန်တော့်စပါးခင်းတွေက တစ်ဧကကို ပျမ်းမျှ ၃၂ တင်းလောက်ပဲ ထွက်ခဲ့ပြီး ဒီနှစ်မှာ ပျမ်းမျှ ၃၅ တင်းထွက်လာတော့ ပျော်ခဲ့မိတယ်။ ကိုယ့်အထွာနဲ့ကိုယ် ပျော်စရာဆိုပေမယ့် အခြားသောဒေသတွေနဲ့ နှိုင်းယှဉ်လိုက်တဲ့အခါ ကိုယ်က ၀မ်းပန်းတသာ ဖြစ်နေတဲ့ကိစ္စဟာ သူတို့အတွက် လူရယ်ချင်စရာကြီး ဖြစ်နေပါပေါ့လားလို့ တွေးမိလိုက်တယ်။ အခြားသော ကဏ္ဍရပ်တွေမှာလည်း အဲဒီလိုမျိုး အခြေအနေတွေ ဖြစ်နေသလားလို့ တစ်ချက်တွေးမိတော့ နိုင်ငံသားတစ်ယောက်အနေနဲ့ နည်းနည်းတော့ စိတ်ပူသွားမိတာ အမှန်ပါ။
(၆)
ဂျာနယ်တွေ အားကြီးဖတ်လို့ကောင်းတယ်။ အစ်ကိုကြီးတစ်ယောက်က ကျွန်တော်စစ်တွေမြို့ထဲမှာ ဂျာနယ်ယူတာကို နှစ်ခါ-သုံးခါလောက် အတူလိုက်လာဖူးတယ်။ သူက အံ့သြတကြီး မေးရှာတယ်။ မင်းက ထွက်သမျှဂျာနယ်ကို နေ့တိုင်း ယူနေတာလားတဲ့။ ပြီးတော့ တစ်ဆက်တည်းမှာပဲ ကျွန်တော်ယူတဲ့ ဂျာနယ်အရေအတွက်နဲ့ တစ်စောင်ချင်းတန်ဖိုးတွေကို မြှောက်ကြည့်ပြီး ဟာ… တစ်လတစ်လကို ဂျာနယ်ဖိုးနဲ့တင် ပိုက်ဆံတွေ အများကြီးကုန်မှာပေါ့ ဆိုပြီး နှမြောသံနဲ့ ပြောရှာတယ်။ အတွေ့အကြုံ များနေပြီဖြစ်တဲ့ ကျွန်တော်ကိုဉာဏ် ဘာမှ ပြန်မပြောလိုက်ပါဘူး။ ပြုံးပြီးတော့ပဲ နားထောင်နေလိုက်ပါတယ်။ တစ်ခုတော့ ပြောလိုက်ပါတယ်။ ကျွန်တော်တို့နိုင်ငံမှာ အပတ်စဉ်ထွက်နေတဲ့ ဂျာနယ်ပေါင်း ၁၀၀ ကျော် ရှိတယ်ဆိုတော့ သူက အံ့သြတကြီး ဖြစ်သွားရှာတယ်။ အဲဒီထဲကမှ ကျွန်တော်က ဂျာနယ်လေး ၁၄ စောင်ကို စားသောက်မယ့်အထဲက အနှမြောမရှိ ဖတ်တာဟာ ဘာမှ မပြောပလောက်ပါဘူးလို့ စိတ်ထဲကနေ ပြောနေမိတယ်။ သူ့သူငယ်ချင်း နှစ်ယောက်နဲ့အတူ စားသောက်ဆိုင်မှာ နေ့လည်စာစားကြ၊ ဘီယာသောက်ကြ၊ အမြည်းစားကြတာကို ကျွန်တော်လည်း ပါသွားတယ်။ ပြီးတဲ့အချိန်မှာ တစ်သောင်းရှစ်ထောင်ကျပ် ကျသင့်တာကို ကျွန်တော့်အစ်ကိုကြီးက မတွန့်မတို လက်မတွန့်ဘဲ ရှင်းပေးလိုက်ပါတယ်။ ဒီတစ်ခါ တွက်ချက်တာက ကျွန်တော်ပေါ့။ ဒီငွေနဲ့ဆိုရင် ဂျာနယ် အစောင် ၃၀ လောက် ၀ယ်ဖတ်လို့ရတယ်ဆိုပြီး နှမြောနေမိတယ်။ သူ့ကို ပြောရင်လည်း အပေါင်းအသင်းကဏ္ဍဆိုတာ ရှိတယ် ကိုယ့်ညီရဲ့လို့ ပြောမယ်ဆိုတာ ကြိုတင်ကြားယောင်နေမိတယ်။
သြော်… တစ်ခါတလေမှာ အနီးကပ်ဆုံးမှာ ရှိနေပေမယ့် အတွေးအခေါ်တွေ၊ အယူအဆတွေ၊ ခံယူချက်တွေဟာ ဟိုဖက်ခြမ်းနဲ့ ဒီဖက်ခြမ်း၊ ဟိုဘက်ကမ္ဘာနဲ့ ဒီဘက်ကမ္ဘာ ဖြစ်နေတတ်ပါလားဆိုတာကို တွေးနေမိတယ်။
(၇)
အထူးကျေးဇူးတင်ရမယ့် မိတ်ဆွေ (၃) ဦးရဲ့ ကူညီစောင်မမှုကြောင့် Laptop လေး တစ်လုံးကို အရစ်ကျ ၀ယ်ခွင့်ရခဲ့တယ်။ ခရီးသွားတိုင်း ကျွန်တော့်ရဲ့ ကွန်ပျူတာနဲ့ မော်နီတာကို သယ်ဆောင်နေရတဲ့ ဒုက္ခက ကင်းလွတ်ခွင့်ရသွားတယ်။ လက်ကိုင်အိတ်ထဲမှာ ဘာမှနေရာမယူလှတဲ့ ဒီ Laptop လေးဟာ ကျွန်တော့်အတွက် ဘယ်လောက်တောင် အကျိုးများစေသလဲဆိုတာ ကျွန်တော်ကိုယ်တိုင်ထက် ဘယ်သူကမှ ပိုမသိနိုင်ပါဘူးဗျာ။ မီးလာတဲ့အချိန် ၃ နာရီနဲ့ မီးပျက်သွားတဲ့အချိန် ၃ နာရီ စုစုပေါင်း တစ်ရက်ကို (၆) နာရီလောက် ကွန်ပျူတာ သုံးခွင့်ရတဲ့ ကျွန်တော်ကတော့ ကိုယ့်ကိုယ်ကိုယ် စကြ၀တေးမင်းလောက် ထင်မှတ်မိသဗျ။ ကျွန်တော့်အလုပ်အတွက်လည်း အသုံးဝင်၊ အမျိုးမျိုးသော ဖတ်မကုန်၊ လေ့လာမကုန်တဲ့ စာအုပ်တွေ ဖတ်ဖို့အတွက်လည်း အဆင်ပြေ၊ စာရေးဖို့အတွက်လည်း မရှိမဖြစ်၊ မှတ်တမ်းဓာတ်ပုံတွေ သိမ်းဆည်းဖို့အတွက်လည်း စိတ်အေးရ၊ အခြားသော နည်းပညာတွေကိုလည်း စမ်းသပ်ချင်တိုင်း စမ်းသပ်လို့ရတဲ့ ဒီကွန်ပျူတာလေးအတွက် အန်တီစု၊ မကြီးအိနဲ့၊ မမယုတို့ကို ကျေးဇူးတင်မဆုံးရှိကြောင်း မှတ်တမ်းတင်ပါရစေ။ ကျွန်တော်သိခွင့်ရသော အသိပညာများ၊ လေ့လာခွင့်ရသော အတတ်ပညာများ အားလုံးကိုလည်း ကျွန်တော်နဲ့ထပ်တူ သူတို့တွေ ရရှိကြပါစေ၊ ဘ၀သံသရာတွင် အသုံးချနိုင်ကြပါစေလို့ စိတ်ဆန္ဒဖြစ်မိပါတယ်။
(၈)
မြန်မာ့သွေးဘလော့ဂ်အပေါ် ကျွန်တော်ကိုဉာဏ် ဘယ်လောက်သံယောဇဉ် ရှိသလဲဆိုသည်ကို စာဖွဲ့မနေလိုတော့ပါ။ ဘလော့ဂ်အတွက် ကျွန်တော်လုပ်ခဲ့သည်များက သက်သေပင်ဖြစ်သည်ဟု ဆိုချင်ပါသည်။ ထို့ထက်ပို၍ အရေးကြီးသည်မှာ ကျွန်တော့်ဘလော့ဂ်ကို လာဖတ်ခဲ့ကြသည့်၊ ဝေဖန်အကြံပြုခဲ့ကြသည့်၊ ချီးကျူးခဲ့ကြသည့်၊ ကဲ့ရဲ့ခဲ့ကြသည့်၊ ပြစ်တင်ခဲ့ကြသည့် မြန်မာ့သွေးမိတ်ဆွေများ ဖြစ်ကြပါသည်။ ဘယ်သူမှ မဖတ်သည့် ဘလော့ဂ်သည် ဘယ်လောက်ပဲ ကောင်းအောင်လုပ်ထားပါစေ ဘာမျှမဟုတ်ပါ။ မြန်မာ့သွေးဘလော့ဂ်ဆိုသည့် အမည်တစ်ခုကို ရရှိခဲ့ခြင်းမှာ ဘလော့ဂ်ဖတ်သူ မိတ်ဆွေများကြောင့် ဖြစ်ပါသည်။ ထိုထိုသော ကျွန်တော်သိသူ၊ မသိသူ မြန်မာ့သွေးမိတ်ဆွေအားလုံးကို အစဉ်အမြဲ မေတ္တာပို့သလျက်ရှိကြောင်းပါ။ ဤမှန်သော သစ္စာစကားကြောင့် လူသားများအကျိုးကို နည်းများမဟူ သယ်ပိုးဆောင်ရွက်နိုင်သည့် ပုဂ္ဂိုလ်တစ်ဦး ဖြစ်ရပါလို၏ဟု ကျွန်တော်ဆုတောင်းလိုပါသည်။
(၉)
အခြေအနေများကြောင့် ဘလော့ဂ်ပုံမှန် မရေးနိုင်သည်များ၊ ပို့စ်ပုံမှန် မတက်နိုင်သည်များကို အားနာရပါသည်။ ပို့စ်အသစ် တက်သည်ဖြစ်စေ၊ မတက်သည်ဖြစ်စေ၊ လာရောက်လည်ပတ်ကြသူများ၊ ပို့စ်အဟောင်းများကို လာဖတ်ကြသူများအားလုံးကို အမြဲတစေ လက်ကမ်းကြိုဆိုလျက် ရှိပါကြောင်းခင်ဗျား။
ရွှင်လန်းချမ်းမြေ့ကြပါစေ
အမှတ်တရ
ကိုဉာဏ် (ပန်းလောင်မြေ)
၂၀၁၁ ခုနှစ်၊ ဒီဇင်ဘာလ ၂၂ ရက်၊ ကြာသပတေးနေ့။
ညနေ ၄ နာရီ ၄၀ မိနစ်။
အမှတ်တရ
ကိုဉာဏ် (ပန်းလောင်မြေ)
၂၀၁၁ ခုနှစ်၊ ဒီဇင်ဘာလ ၂၂ ရက်၊ ကြာသပတေးနေ့။
ညနေ ၄ နာရီ ၄၀ မိနစ်။
No comments:
Post a Comment