အစကတော့ ယခုတင်ပြမည့် အကြောင်းအရာများကို ကျွန်တော်တင်ပေးမည့် ပို့စ်များ၏ ထိပ်ဆုံးတွင်သာ ရှင်းလင်းချက်အနေဖြင့် နိဒါန်းပျိုး ရေးသားရန် ရည်ရွယ်ခဲ့သော်လည်း ထိုကဲ့သို့ ရေးသားခြင်းဖြင့် ကျွန်တော်တင်ပြလိုသည့်၊ ပြန်လည်ဝေငှလိုသည့် သမိုင်းမှတ်တမ်းများတွင် ဆွမ်းဆန်ထဲ ကြွက်ချေးရော ဆိုသကဲ့သို့ ဖြစ်သွားမည်ကို စိုးရိမ်မိသဖြင့် သီးသန့်ပင် အမှာစာဟု ရေးသားလိုက်ရခြင်း ဖြစ်ပါကြောင်း ဦးစွာရှင်းပြလိုပါသည်။
မြန်မာ့သွေးမိတ်ဆွေများ သိကြသည့်အတိုင်း ကျွန်တော်တို့နိုင်ငံအနေဖြင့် ပြည်သူလူထု၏ လိုအင်ဆန္ဒဖြစ်သည့် ဒီမိုကရေစီနိုင်ငံစနစ်သို့ ကူးပြောင်းခဲ့ပြီ ဖြစ်ပါသည်။ ကူးပြောင်းစကာလ ဖြစ်သည့်အားလျော်စွာ လိုအပ်ချက်များ၊ လစ်ဟာမှုများ၊ အမြင်မတော်သည်များ ရှိနေသေးသည် ဆိုသည်ကိုလည်း နိုင်ငံတော်သမ္မတကြီးမှစ၍ ပြည်ထောင်စုဝန်ကြီးများအဆုံး အားလုံးက မကြာခဏဆိုသလို ၀န်ခံပြောကြား နေကြသည်ကို အားလုံးအသိ ဖြစ်ပါသည်။
ကျွန်တော်၏ မြန်မာ့သွေးဘလော့ဂ်ကို ဖတ်သူအများစုသည် ပြည်ပနိုင်ငံများမှ မိတ်ဆွေများ အများစု ဖြစ်ကြပါသည်။ ဤနေရာတွင် ယခုလို စကားပျိုးနေရခြင်းမှာ ဥပမာတစ်ရပ်အနေဖြင့် တင်ပြလိုသောကြောင့် ဖြစ်ပါသည်။ ကျွန်တော်တို့အနေဖြင့် လက်ရှိနေထိုင်ရာ နေရာတစ်ခုမှ အခြားအရပ်ဒေသ သော်လည်းကောင်း၊ အခြားနိုင်ငံသို့သော်လည်းကောင်း ပြောင်းလဲနေထိုင်ခဲ့ပါလျှင် မည်သူပင် ဖြစ်စေကာမူ အစပထမတွင် အဆင်မပြေမှုများ၊ အသားမကျမှုများ ကြုံတွေ့ရမည်မှာ မလွဲဧကန်ပင် ဖြစ်ပါသည်။ ဘယ်လောက်ပင် ပြည့်စုံသူ ဖြစ်ပါစေဦးတော့ နေရာသစ်တွင် ရောက်သည်နှင့် တစ်ပြိုင်နက် အသားမကျနိုင်သည်ကို မည်သူကမျှ ငြင်းချက်ထုတ်နေမည် မဟုတ်ဟု ယုံကြည်ပါသည်။
ဤသည်ကား နေထိုင်ရာနေရာ အပြောင်းအလဲ တစ်ခုအတွက်ပင် သာဓက ဆောင်ပြခြင်း ဖြစ်ပါသည်။ မိမိ၏ တစ်ကိုယ်ရည်တစ်ကာယ၊ သို့တည်းမဟုတ် မိသားစုအတွက်ပင် နေထိုင်ရာ အပြောင်းအလဲသည် မည်မျှ အသားကျအောင်၊ အဆင်ပြေအောင် ကြိုးစားရသည်ကို စဉ်းစားကြည့်နိုင်၊ ပြန်တွေးကြည့်နိုင်ပါသည်။ ယခု ကျွန်တော်တို့နိုင်ငံ၏ အပြောင်းအလဲက မိသားစု အိမ်ပြောင်းခြင်း မဟုတ်သလို၊ တစ်နေရာမှ တစ်နေရာသို့ ခေတ္တမျှ ခရီးထွက်ခွာခြင်းလည်း မဟုတ်ပါ။ စနစ်တစ်ခုမှ အခြားစနစ်တစ်ခုသို့ ကူးပြောင်းခြင်း ဖြစ်ပါသည်။ နိုင်ငံတစ်ခုလုံး၏ စနစ်တစ်ခုကို အသားကျအောင်၊ အဆင်ပြေအောင်၊ ကောင်းမွန်ပြည့်စုံအောင် ကြိုးစားရခြင်းသည် မည်မျှခက်ခဲမည်ကို တွေးကြည့်နိုင်ပါသည်။ အထူးသဖြင့် ကျွန်တော်တို့ နိုင်ငံကဲ့သို့ အခြားသော စနစ်များဖြင့် နှစ်ပေါင်းများစွာ ကျင်လည်ခဲ့ရသည့် နိုင်ငံတစ်ခုအတွက် ပိုလို့ပင် ခက်ခဲလှပါသည်။
ထိုသို့ ခက်ခဲသော်လည်း ယခုလက်ရှိ နိုင်ငံတော်၏ အကြီးအကဲ တာဝန်ကို ထမ်းဆောင်နေရသည့် သမ္မတကြီး ကိုယ်တိုင်က ကောင်းမွန်သော အုပ်ချုပ်မှုစနစ်၊ သန့်ရှင်းသော အစိုးရ ဖြစ်အောင် ကြိုးပမ်းဆောင်ရွက်မည်ဟု အကြိမ်ကြိမ်အခါခါ ကတိပေးပြောကြား နေသည်ကိုလည်း အားလုံးအသိ ဖြစ်ပါသည်။ ဆောင်ရွက်မှုပမာဏ နည်းသည်၊ များသည်ကို မပြောလိုသော်လည်း ပေးထားသော ကတိကို အကောင်အထည် ပေါ်စေရန်အတွက်မူ ကောင်းမွန်သော အပြောင်းအလဲများ ဆောင်ရွက်နေသည်ကိုတော့ အသိအမှတ် ပြုရပါမည်။ ချီးကျူးရပါမည်။ ၀ိုင်းဝန်းအားပေး ကူညီကြရပါမည်။
စကားရှည်ရင်း အခြားအကြောင်းအရာများသို့ လမ်းကြောင်းသွေသွားသည်ဟု ထင်ပါသည်။ ဟုတ်ကဲ့ လိုရင်းကို ပြန်ဆက်ပါမည်။ ကျွန်တော်တို့နိုင်ငံ၏ ဒီမိုကရေစီနိုင်ငံရေး ခရီးလမ်းကတော့ စတင်ခဲ့ပြီ ဖြစ်ပါသည်။ ခုရေတွင်းတူး ခုရေကြည်သောက် ဆိုသကဲ့သို့ အသွင်ကူးပြောင်းစ မြန်မာနိုင်ငံအား ဒီမိုကရေစီ အရိုးရင့်နေပြီဖြစ်သည့် အမေရိကန်၊ ဗြိတိန်၊ အိန္ဒိယ စသည့် နိုင်ငံများ၏ စနစ်များနှင့်တော့ နှိုင်းယှဉ်ထောက်ပြကာ ဝေဖန်ပြောဆိုမှုများတော့ဖြင့် မပြုလုပ်သင့်ပါဟု တောင်းပန်လိုပါသည်။ နှိုင်းသင့်နှိုင်းအပ်သော အရာမဟုတ်ဟုလည်း ထင်မြင်ပါသည်။ အဆိုပါ နိုင်ငံများအနေဖြင့် ယခုကဲ့သို့ အခြေအနေမျိုးသို့ ရောက်ရှိလာအောင် နှစ်ပေါင်းမည်မျှကြာအောင် ကြိုးပမ်းခဲ့ရသည်၊ ပေးဆပ်ခဲ့ရသည်ကို မေ့မထားကြစေလိုပါ။
မြန်မာ့သွေးမိတ်ဆွေများခင်ဗျား၊ မြန်မာ့ဒီမိုကရေစီလမ်းကြောင်း၏ သမိုင်းမှတ်တိုင်များကို မှတ်တမ်းတင်အံ့ဟု အကြံဖြစ်မိသည်မှာ ကာလအတော်ကြာပြီ ဖြစ်ပါသည်။ မည်သို့မည်ပုံ မှတ်တမ်းရေးထိုးသင့်သည်ကို စဉ်းစားရင်း၊ ကြံဆရင်းဖြင့် အချိန်ပင် အတော်ဖင့်ခဲ့ရပြီ ဖြစ်ပါသည်။ နိုင်ငံတော်သမ္မတနှင့် အစိုးရအဖွဲ့ပင် တစ်နှစ်သက်တမ်း ပြည့်မြောက်တော့မည် ဖြစ်ပါသည်။
ဘယ်တော့မှ မဖြစ်တာထက်စာရင် နောက်ကျတာက ပိုကောင်းတယ်ဟူသည့် စကားအတိုင်းပင် နောက်ကျပင် နောက်ကျငြားသော်လည်း စာဖတ်သူများအတွက်၊ မြန်မာ့သွေးမိတ်ဆွေများအတွက် အတိုင်းအတာ တစ်ရပ်အထိ အဖိုးတန်မည်၊ အသုံးဝင်မည်၊ အကျိုးများမည်ဟု ယုံကြည်သည့်အလျောက် ကျွန်တော်ကိုဉာဏ် တင်ပြလိုသည်များကို တင်ပြလိုက်ရပါသည်။ ပိုမိုကောင်းမွန်သော အကြံဉာဏ်များ ရှိပါကလည်း ကူညီကြပါရန် တစ်ဆက်တည်း တောင်းပန်လိုပါသည်။
"မနေ့ကသည် သမိုင်း" ဟူသော ဆိုရိုးစကားတစ်ခုကို ကျွန်တော်ကြားဖူးပါသည်။ ဟုတ်ကဲ့ မြန်မာ့ဒီမိုကရေစီသမိုင်း စာမျက်နှာသစ်များကို လေ့လာမှတ်သား မှတ်တမ်းတင်ကြပါစို့ခင်ဗျား။
အမှတ်တရ
ကိုဉာဏ် (ပန်းလောင်မြေ)
၂၀၁၂ ခုနှစ် မတ်လ ၁၀ ရက်၊ စနေနေ့။
နံနက် ၀၀ နာရီ ၄၃ မိနစ်။
အခုမှ ဒီဘလော့ဂ် ကို ကြည့်ဖူးပါတယ်။ ကျွန်တော်နဲ့တော့ သဘောထားချင်း မတိုက်ဆိုင်တာများပါတယ်။ ဘာပဲဖြစ်ဖြစ် ကိုယ့်ယုံကြည်ချက်နဲ့ ကိုယ်ပေါ့။ လိပ်ပြာသန့်ဖို့တော့ လိုပါတယ်။ နှုတ်ဆက်ပါတယ်ဗျာ......
ReplyDelete