(က)
ဦးသိန်းစိန်အစိုးရ နှင့် ICRC
သမ္မတဦးသိန်းစိန်ကို အပြည်ပြည်ဆိုင်ရာကြက်ခြေနီကော်မတီ (အိုင်စီအာစီ) ဥက္ကဋ္ဌ နေပြည်တော်မှာ လာတွေ့တဲ့သတင်းနဲ့ ဒီပို့စ်ကို ဖွင့်လိုက်ပါတယ်။ ဦးသိန်းစိန် သမ္မတဖြစ်ပြီးကတည်းက လာလိုက်ကြတဲ့ ဧည့်သည်တွေဆိုတာ နည်းတာမှမဟုတ်တာ။ အဲဒါကိုများ ကျွန်တော်ကိုဉာဏ်က အိုင်စီအာစီနဲ့တွေ့တာကို ရေးကြီးခွင်ကျယ် လုပ်နေရသလဲလို့ မတွေးကြပါနဲ့ဗျာ။ ကျွန်တော့်အတွက်ကဖြင့် ထူးခြားနေတယ်လို့ ထင်မိလို့ပါ။ စာဖတ်သူတို့ သိတဲ့အတိုင်းပဲ အိုင်စီအာစီဆိုတာ ကျွန်တော်တို့တွေအတွက် ထူးခြားလှတဲ့ အဖွဲ့အစည်း မဟုတ်ပါဘူး။ ယခင်အစိုးရလက်ထက်တုန်းက အိုင်စီအာစီဆိုတာ မြန်မာပြည်ကို ချောင်းပေါက်အောင် လာခဲ့သူပေါ့။ အဖွဲ့ရဲ့ ရည်ရွယ်ချက်တွေက ကောင်းပေမယ့် သူလည်း တခြားအဖွဲ့အစည်းတွေလိုပဲ ဒီပုတ်ထဲက ဒီပဲမို့ သိပ်ပြီးတော့ ကြည့်မရတာ အမှန်ပါပဲ။ နိုင်ငံကြီးတွေဆီက အလှူငွေဒေါ်လာတွေ မြိုးမြိုးမြက်မြက်ရအောင် ဘယ်နိုင်ငံမှာ ဘယ်လိုလုပ်ရမယ်ဆိုတာ သိနေတဲ့အဖွဲ့ကြီးလို့ပဲ ကျွန်တော်က မှတ်ထားမိတယ်ဗျာ။ ကျွန်တော့်သူငယ်ချင်းတစ်ယောက် ပြောတဲ့စကားလေးဆိုရင် ဒီနေ့အထိ ကျွန်တော့်နားထဲက မထွက်သေးဘူး။ လွန်ခဲ့တဲ့ ၃ နှစ်လောက်က ပြောခဲ့တဲ့စကားလေးပါ။ "အိုင်စီအာစီဆိုတာ တခြားနိုင်ငံတွေမှာ ဘာလုပ်လဲတော့ ငါမသိဘူး၊ မြန်မာပြည်လာရင်တော့ ထောင်တွေသွားပြီး သူတို့စာရင်းမှတ်လာတဲ့ ထောင်သားတွေကို သွားတွေ့တဲ့ အဖွဲ့အစည်းကွ" တဲ့။ အဲဒီတုန်းက သူငယ်ချင်းပြောတဲ့ အချိန်မှာ ကျွန်တော်အတော်လေးကို ရယ်ခဲ့မိတာ သတိရမိပါတယ်။ ကျွန်တော်မတွေးမိတဲ့ အတွေးကို သူတွေးတတ်တဲ့အတွက် သူ့ကိုလည်း အံ့သြတကြီးနဲ့ ကြည့်မိပါတယ်။ သေချာစဉ်းစားကြည့်တော့လည်း သူပြောတာ ဟုတ်နေတာပါပဲ။ ပြည်ပကနေ လေတိုက်ပွဲ ဆင်နွှဲခဲ့ကြတဲ့ တစ်ခေတ်အခါဆီက သံချပ်တွေထဲမှာတောင် ထည့်ရေးခဲ့၊ ထည့်စပ်ခဲ့ရတဲ့ အိုင်စီအာစီက အခုလည်း မြန်မာပြည်ကိုလာပြီး ဘာတွေလုပ်ဦးမလဲဆိုတာ စောင့်ကြည့်သေးတာပေါ့ဗျာ။ အင်းစိန်ထောင်တို့၊ မန္တလေးထောင်တို့ စတဲ့ ထောင်တွေကိုလည်း ထောင်ပေါင်းစုံလှည့်လည်ရေး လုပ်ဦးမလားဆိုတာ စိတ်ဝင်စားစရာပါ။ စာဖတ်တဲ့လူတွေတော့ မသိဘူး။ ကျွန်တော်ကိုဉာဏ်ကဖြင့် အခုရေးနေရင်းနဲ့ကို ကျွန်တော့်သူငယ်ချင်း ပြောခဲ့တဲ့စကားတွေကို ပြန်တွေးမိပြီး ရယ်နေမိတယ်ဗျာ။ :D
(ခ)
တပ်မတော်ကာကွယ်ရေးဦးစီးချုပ်၏ ခရီးစဉ်များ
ကာချုပ်ကြီး စင်ကာပူနဲ့ မလေးရှားကို သွားတဲ့သတင်းကိုလည်း ပြီးခဲ့တဲ့အပတ်အတွင်း သတိထားမိပါတယ်။ သတင်းစာမှာ ဖတ်ရသလောက်၊ ရုပ်မြင်သံကြားမှာ ကြည့်ရသလောက်ကတော့ အထွေအထူး ဘာကြောင့်သွားရတယ်ဆိုတာ ပြောလို့မရပါဘူး။ ချစ်ကြည်ရေးခရီးသက်သက် သွားတာလို့ပဲ ကောက်ချက်ချရမှာပါပဲ။ ဒီနေရာမှာ ကျွန်တော်တစ်ခု ဘ၀င်မကျတာက ကာချုပ်ခရီးစဉ်နဲ့ပတ်သက်လို့ ကျွန်တော်တို့ပြည်တွင်းမှာကတော့ ထုံးစံအတိုင်း သိုသိုသိပ်သိပ် လျှို့လျှို့ဝှက်ဝှက်မို့ မပြောလိုပါဘူး။ တပ်နဲ့ပတ်သက်တဲ့ သတင်းဆိုတာ မြန်မာပြည်မှာတော့ ဘော်လီဝတ်ပြီး၊ အတွင်းခံဝတ်ထားတာချည်းပါပဲ။ ထူးဆန်းတာက ကာချုပ်သွားခဲ့တဲ့ နိုင်ငံတွေကလည်း ခရီးစဉ်နဲ့ပတ်သက်ပြီး သေသေချာချာ ထုတ်ပြန်ခြင်း မပြုကြတာပါပဲ။ အခုဖြစ်နေတာက သတင်းစာမှာပါသလောက်ကိုပဲ ကျွန်တော်တို့တွေ သိခွင့်ရှိ၊ လေ့လာခွင့် ရှိတာပါပဲ။ ဘယ်ကိုသွားတယ်၊ ဘယ်သူနဲ့တွေ့တယ်၊ ဘာတွေကြည့်တယ်၊ ဒီလောက်ပဲ။ ဘာပဲဖြစ်ဖြစ် အာဆီယံဒေသတွင်း နိုင်ငံတွေက တပ်မတော်အသီးသီးနဲ့ ဆက်ဆံရေးကောင်းတွေ တည်ဆောက်ခြင်းဟာ မလွဲမသွေ လိုအပ်ချက်တစ်ခု ဖြစ်တယ်လို့ အကောင်းဘက်က တွေးမိပါတယ်။ သြော်... ထူးခြားတာ နောက်တစ်ခုကတော့ အခြားနိုင်ငံတွေ ရောက်တဲ့အချိန်မှာ ကာချုပ်ဟာ ဘယ်ရီဦးထုပ် (Beret Cap) ကို ၀တ်ဆင်ခဲ့တာပါပဲ။ ကျွန်တော်တို့ တစ်ခါမျှ မမြင်ဘူးသေးတဲ့ မြန်မာ့တပ်မတော်က ကာချုပ်တစ်ယောက်ရဲ့ ၀တ်စားဆင်ယင်မှုပါ။
( ဂ )
ဆီးဂိမ်းနှင့် Wi Fi
ကျွန်တော်တို့မြန်မာတွေမှာလည်း ခက်တော့လည်း ခက်တယ်ဗျာ။ သနားစရာကောင်းတယ်ပဲ ပြောရမလား၊ သောက်မြင်ကတ်လောက်အောင် တုံးလွန်းတယ်လို့ ပြောရမလား၊ ဘာပြောရမှန်းကို မသိတော့ပါဘူးဗျာ။ သတင်းစာတွေမှာ ဟိုးလေးတကြော် ထည့်သွင်းဖော်ပြနေတဲ့ (ဂုဏ်ယူစွာနဲ့) သတင်းတစ်ပုဒ်ကို ပြောပြပါရစေ။ "(၂၇) ကြိမ်မြောက် အရှေ့တောင်အာရှ အားကစားပြိုင်ပွဲ ကျင်းပချိန်တွင် မြန်မာနိုင်ငံ၌ Wi Fi သုံးစွဲနိုင်ရန် စီစဉ်လျက်ရှိသည်" တဲ့။ အဲဒါ သတင်းစာထဲမှာ ရေးထားတဲ့အတိုင်း ပြန်ရေးပြထားတာပါ။ ကိုယ့်နိုင်ငံမှာ အိမ်ရှင်လုပ်မယ့်ပွဲကို မတတ်သာလို့ လုပ်ပေးရမယ့် ပုံစံမျိုးနဲ့တော့ ဟုတ်နေပြီလို့ပဲ ပြောချင်ပါတယ်။ ကျွန်တော်တို့အစိုးရအတွက် Wi Fi စီစဉ်ပေးရတယ်ဆိုတာ တကယ့်ကို အခက်အခဲကြီးတစ်ရပ် ဖြစ်နေတဲ့ပုံစံပါပဲ။ ကျွန်တော်မြင်မိတာကတော့ အဲဒီအချိန်ကျရင် အခုလို ကွန်နက်ရှင်း ပုံစံမျိုးနဲ့ကတော့ မြန်မာ့သိက္ခာကတော့ အာဆီယံနိုင်ငံတွေကြားမှာ ကောင်းကောင်းကို ကျရဦးမယ်လို့ တွေးမိပါတယ်။ ဓာတ်ပုံပို့လည်းမရ၊ ဗီဒီယိုဖိုင်တင်လည်းမရ ဆိုရင်တော့ဖြင့် အင်း...... ကြိုတင်ပြီးတော့သာ မျက်နှာအုပ်ဖို့အတွက် ကုလားမတွေရဲ့ ပုဝါတွေ ၀ယ်ထားရမလိုပါပဲ။ ကျွန်တော်တို့နိုင်ငံမှာ e-Government, e-Office, e-Visa စတဲ့စကားလုံးတွေကို သတင်းစာတွေထဲမှာ၊ ရုပ်မြင်သံကြားမှာ မကြာခဏ ကြားခဲ့ရဖူးပါတယ်။ အခုတော့ အဲဒီစကားလုံးတွေနဲ့ ပတ်သက်ပြီး သံသယရှိလာပါတယ်။ အစိုးရအဖွဲ့ဝင် ၀န်ကြီးတွေဟာ အဲဒီစနစ်တွေကို တကယ်ရော နားလည်ကြရဲ့လား၊ သိကြရဲ့လား၊ သုံးဖူးကြရဲ့လားဆိုတာကို ကျွန်တော် တကယ်ကို သံသယဖြစ်နေပါပြီ။ သတင်းစာထဲမှာ စိတ်ဝင်စားစရာ အချက်အလက်တစ်ခု ပါသေးတယ်ဗျ။ မြန်မာနိုင်ငံ၌ အင်တာနက်နှင့် မိုဘိုင်းဖုန်းသုံးစွဲသူ လေးသိန်းခန့်ရှိတယ် ဆိုတာပါပဲ။ အဲဒီလေးသိန်းထဲမှာ ကိုဉာဏ်ဆိုတဲ့ကောင် ပါနေတဲ့အတွက် ကိုယ့်ဘာသာကိုယ်တောင် ဂုဏ်ယူမိသေးတော့တယ်။ တစ်လက်စတည်း မြန်မာပြည်လူဦးရေ သန်း ၆၀ နီးပါးနဲ့ တွက်ကြည့်မိတော့ ငါဆိုတဲ့ကောင်က မြန်မာပြည်မှာ အခွင့်ထူးခံများ ဖြစ်နေသလားလို့ တွေးမိပြန်ပါတယ်။ ဟုတ်တယ်လေ ကျွန်တော့်လို အင်တာနက် မသုံးနိုင်တဲ့လူ၊ မိုဘိုင်းဖုန်း မကိုင်နိုင်တဲ့လူက သန်း ၅၀ ကျော် (တော်တော်ကြီးကျော်၊ ပိုးစိုးပက်စက်ကျော်) ရှိနေသေးတယ်ဆိုတော့ ကျွန်တော်ဆိုတဲ့ကောင်ကလည်း အခွင့်ထူးခံပဲပေါ့ဗျာ။ :D ဆီးဂိမ်းနဲ့ ၀ိုင်ဖိုင် ဘာတွေဆက်ဖြစ်မယ်ဆိုတာ ဆက်လက်ရှုစားကြတာပေါ့ခင်ဗျာ။
(ဃ)
နာရေးကြော်ငြာ စာမျက်နှာ
အထူးအထွေတော့ ပြောစရာမရှိပါဘူး။ အရင်က မမြင်မတွေ့တာ ကြာပြီဖြစ်တဲ့ အသုံးအနှုန်းတွေကို ပြန်လည် မြင်တွေ့ဖတ်ရှုရတဲ့အတွက် စိတ်ထဲမှာ တစ်မျိုးဖြစ်ရလို့ပါ။ ပြောချင်တာက တစ်ခုတည်းပါပဲ။ "တာဝန်ထမ်းဆောင်နေစဉ် ရုတ်တရက် ကွယ်လွန်သွားပါသဖြင့်" "တိုင်းပြည်တာဝန်ထမ်းဆောင်ရင်း ကွယ်လွန်သွားပြီဖြစ်ကြောင်း" ဆိုတဲ့ အသုံးအနှုန်းတွေ ပြန်ဖတ်ရတဲ့အကြောင်းပါ။ နောက်ဆိုရင် ဘယ်နေ့၊ ဘယ်ရက်က၊ ဘယ်နေရာအနီးတွင် မော်တော်ယာဉ် မတော်တဆမှုကြောင့် ရုတ်တရက်ကွယ်လွန်သွားပါသဖြင့် ဆိုတဲ့အသုံးအနှုန်းတွေ ပြန်ဖတ်ရတော့မလားလို့ တွေးမိပါတယ်။ ကျွန်တော်တို့မြန်မာတွေ ဘယ်လိုပဲသေသေ အားလုံးကို တစ်ပြေးညီတည်း ကွယ်လွန်သွားပါသဖြင့် ဖြစ်ခဲ့တာ အတော်ကြာခဲ့ပြီရော။
( င )
၂၀၁၃ ခုနှစ် ဇန်န၀ါရီလ ၁၅ ရက်နေ့ထုတ် မြန်မာ့အလင်းသတင်းစာပါ သတင်းဖော်ပြပုံ
သိပ်သဘောကျတယ် :D :D :D
( စ )
ဥပဒေတွေ ရုပ်သိမ်း၊ ပြဋ္ဌာန်းမှု
ဒီဥပဒေတွေ ရုပ်သိမ်းတာ၊ ပြဋ္ဌာန်းတာကို မှတ်သားထားမိတယ်။- နိုင်ငံတော်တာဝန်ကို တည်ငြိမ်အေးချမ်းစွာ စနစ်တကျ လွှဲပြောင်းပေးရေးနှင့် အမျိုးသားညီလာခံလုပ်ငန်းများ အောင်မြင်စွာ ဆောင်ရွက်ရေးတို့ကို နှောင့်ယှက်ဆန့်ကျင်ခြင်းမှ ကာကွယ်သည့်ဥပဒေကို ရုပ်သိမ်းသည့်ဥပဒေ (ပြည်ထောင်စုလွှတ်တော် ဥပဒေအမှတ် ၁/၂၀၁၃၊ ၂၀၁၃ ခုနှစ်၊ ဇန်န၀ါရီလ ၁၅ ရက်)
- တိုင်းရင်းဆေးကောင်စီဥပဒေကို ပြင်ဆင်သည့်ဥပဒေ (ပြည်ထောင်စုလွှတ်တော် ဥပဒေအမှတ် ၂/၂၀၁၃၊ ၂၀၁၃ ခုနှစ်၊ ဇန်န၀ါရီလ ၁၅ ရက်)
(ဆ)
ဝန်ကြီး ၂ ဦး ရာထူးမှ နုတ်ထွက်မှု
နုတ်ထွက်သွားတာက ဆက်သွယ်ရေးနဲ့ သတင်းအချက်အလက်နည်းပညာဝန်ကြီး ဦးသိန်းထွန်းနဲ့ သာသနာရေးဝန်ကြီး သူရဦးမြင့်မောင်။ (သမ္မတရုံးအမိန့်အမှတ် ၂/၂၀၁၃၊ ၂၀၁၃ ခုနှစ် ဇန်န၀ါရီလ ၁၆ ရက်)။ ဒီနေ့အထိ ဟိုးလေးတကြော်နဲ့ ပြောမဆုံးပေါင် တောသုံးထောင် ဖြစ်နေသေးတဲ့ အကြောင်းအရာတစ်ခု ဖြစ်ပါတယ်။ ဘာဖြစ်လို့ နုတ်ထွက်တာလဲ၊ သူတို့သဘောနဲ့သူတို့ဆိုတာ တကယ်ပဲလား၊ သမ္မတကြီးရဲ့ အမိန့်ကို မနာခံလို့ဆိုတာ ဟုတ်သလား၊ အကျင့်ပျက်ခြစားမှုတွေ၊ လာဘ်ပေးလာဘ်ယူမှုတွေ ကျူးလွန်ခဲ့တယ်ဆိုတာ မှန်သလား၊ သူတို့ကို အခု အထူးစုံစမ်းစစ်ဆေးရေး (စစစ)က စစ်နေတယ်ဆိုတာ တကယ်ပဲလား၊ ဒေါက်တာစိုင်းမောက်ခမ်းတို့ ကော်မတီက ဒီကိစ္စကို ကိုင်တွယ်ဆောင်ရွက်ခဲ့တယ်ဆိုတာ ဟုတ်သလား၊ တကယ်လို့ လာဘ်ပေးလာဘ်ယူမှုတွေ ကျူးလွန်ခဲ့တယ်ဆိုတာ ပေါ်ပေါက်ခဲ့ရင် ဘယ်လိုဆက်ပြီး ဆောင်ရွက်မှာလဲ၊ ပိုင်ဆိုင်မှုတွေကို သိမ်းဆည်းမှာလား၊ ထောင်ချမှာလား၊ သူတို့နေရာမှာ ဘယ်သူ့ကို အစားထိုးခန့်အပ်မှာလဲ၊ ဆက်သွယ်ရေးဝန်ကြီး ပြောင်းသွားပြီဆိုတော့ ဖုန်းကတ်တွေ အလကားနီးနီး၊ ဒါမှမဟုတ် တစ်သောင်းလောက်နဲ့ ရတော့မလား၊ ဖုန်းပြောခတွေ ဈေးနှုန်းလျှော့ချပေးတော့မလား၊ ..........လား၊ ............လား။ ကဲ... ဒါတောင် ၀န်ကြီး ၂ ဦးပဲ နုတ်ထွက်လို့နော်။ မဟုတ်လို့ကတော့ ဟွန်း... ဘယ်ပြောကောင်းလိုက်မလဲ။ ကျွန်တော်ကိုဉာဏ်မှာ မေးစရာတွေ အများကြီးကျန်သေးတယ်ဗျ။
( ဇ )
Sister Cities
ရန်ကုန်မြို့သည် နိုင်ငံတကာမြို့တော်များနှင့် ချစ်ကြည်ရေး ညီအစ်မမြို့များ ဆောင်ရွက်လျက်ရှိရာ စုစုပေါင်း ပြည်ပနိုင်ငံမြို့တော် ၅ ခုနှင့် ညီအစ်မဖွဲ့ထားကြောင်း ကျွန်တော်ကိုဉာဏ် ဖတ်ရှုလိုက်ရပါတယ်။ ရန်ကုန်ရဲ့ ညီအစ်မတွေကတော့ -
(၁) ယန်ကျိုးမြို့၊ တရုတ်ပြည်သူ့သမ္မတနိုင်ငံ။
(၂) ကူမင်းမြို့၊ တရုတ်ပြည်သူ့သမ္မတနိုင်ငံ။
(၃) နန်နင်းမြို့၊ တရုတ်ပြည်သူ့သမ္မတနိုင်ငံ။
(၄) ဟိုချီမင်းမြို့။ ဗီယက်နမ်နိုင်ငံ။
(၅) ဘူဆန်မြို့၊ ကိုရီးယားသမ္မတနိုင်ငံ။
ညီအစ်မမြို့တော် သတ်မှတ်ဆောင်ရွက်ခြင်းရဲ့ အကျိုးအပြစ်တွေဟာ ဘာတွေလဲဆိုတာ ကျွန်တော် မသိသေးပါဘူး။ လေ့လာရပါဦးမယ်။ အခုလောလောဆယ်တော့ ကိုယ့်နိုင်ငံက ရန်ကုန်ရဲ့ ညီအစ်မတွေကို သိထားသင့်တယ်ထင်လို့ ရေးလိုက်တာပါ။ ကြည့်ရတာတော့ ရန်ကုန်ဟာ ညီအစ်မတွေထဲမှာ အချူချာဆုံးနဲ့ ရုပ်အဆိုးဆုံး ထင်တာပါပဲ။ စာဖတ်သူရော ဘယ်လိုသဘောရသလဲဗျ။ ဘယ်သူအချောဆုံးလဲ ထင်သလဲ။ အစ်မကြီး နံပါတ် (၁) လား၊ နံပါတ် (၄) လား၊ ဒါမှမဟုတ် နံပါတ် (၅) လား။ :D
( စ် )
ဦးသိန်းစိန် နှင့် လားရှိုးသိန်းအောင်
ဇန်န၀ါရီလ ၂၀ ရက်နေ့က နိုင်ငံတော်သမ္မတကြီး ဦးသိန်းစိန်က ရန်ကုန်တိုင်းဒေသကြီးလွှတ်တော်တွင် အရပ်ဘက်လူ့အဖွဲ့အစည်း ၈၀ ကျော်နှင့် တွေ့ဆုံဆွေးနွေးခဲ့သည်။ ထိုနေ့တွင်ပင် လားရှိုးသိန်းအောင်၏ တစ်ကိုယ်တော်ဖျော်ဖြေပွဲကို ရန်ကုန်မြို့၌ ပြုလုပ်ခဲ့သည်။ တွေးနေမိတာက သမ္မတကြီး ဦးသိန်းစိန်လည်း အစိုးရအဖွဲ့တွင် တစ်ကိုယ်တော် ဖျော်ဖြေပွဲတွေပဲ လုပ်နေရသလားဟူသည့် အတွေး။ ပရိသတ်လက်ခုပ်သံတွေကြားမှာ လားရှိုးသိန်းအောင်တစ်ယောက် သီချင်းစုံကို ဘာသာစကားမျိုးစုံနှင့် မမောနိုင်မပန်းနိုင် ဖျော်ဖြေသွားတာ ကျေနပ်စရာပင်။ ဒါပေမယ့် လည်ချောင်းတွေ ဘယ်လောက်နာသွားသလဲ၊ ဘယ်နှရက်လောက် အဲဒီဒဏ်တွေ ခံရမလဲဆိုတာ ပွဲပြီးတဲ့အချိန်မှာ ကျွန်တော်တို့ မတွေးတော့ပေ။ ဒါဆိုရင် သမ္မတကြီးသည်ရော...။
(ည)
မြန်မာပြည်တွင် လွှတ်တော်၏ စုံစမ်းစစ်ဆေးခြင်းခံရမည့် ပထမဆုံးဘလော့ဂ်ဂါကြီး ဒေါက်တာဆိတ်ဖွား
ပြီးခဲ့သည့် အပတ်အတွင်း အင်တာနက်ပေါ်မှာ၊ လက်ဘက်ရည်ဆိုင်မှာ၊ ရုံးဌာနတွေမှာ၊ လွှတ်တော်ထဲမှာ ခေတ်အစားဆုံး၊ လူပြောအများဆုံး၊ ပေါ်ပြူလာအဖြစ်ဆုံး စကားလုံးတစ်လုံး ပေါ်ထွက်လာခဲ့ချေသည်။ အခြားမဟုတ်။ ဒေါက်တာဆိတ်ဖွား ဖြစ်သည်။ ဝေဖန်မှုတွေ သောသောညံခဲ့သည်။ သြဘာသံတွေ ဘ၀ဂ်လျှံခဲ့သည်။ အလုပ်မရှိ ဟိုဟာလုပ်တယ်လို့ ပြောတဲ့လူက ပြောကြသည်။ အချို့ကလည်း အလုပ်မရှိ ကြောင်ရေချိုးလုပ်တာဟု ဆိုကြပြန်သည်။ တချို့ကတော့ ဟိုဟာကို အနာလုပ်တာဟု ပြစ်တင်ကြပြန်သည်။ ဘယ်သူတွေ ဘယ်လိုပဲပြောပြော ဒေါက်တာဆိတ်ဖွားကတော့ မြန်မာကျော်သွားခဲ့သည်။ လက်ရှိအချိန်တွင် ကိုယ်ဝန်ဆောင်ထားကြသည့် မိခင်လောင်းများအနေဖြင့် မွေးလာသည့် သားယောက်ျားလေးကို ဆိတ်ဖွားဟု အမည်ပေးလျှင် ကောင်းလေမည်လားဟု တွေးနေကြမည်လား မပြောတတ်။ ဒေါက်တာဆိတ်ဖွားက နှစ်ဘ၀လုံး အောင်မြင်သည်ဟု ပြောရမည်ထင်သည်။ ပထမဘ၀က မင်းသိင်္ခ၏ ဒေါက်တာဆိတ်ဖွားဘ၀။ ဒုတိယဘ၀က ဘလော့ဂ်ပေါ်က ဒေါက်တာဆိတ်ဖွားဘ၀။ နောက်ထပ် ဘယ်ဘ၀နဲ့ ဒေါက်တာဆိတ်ဖွား ထပ်ပေါ်လာဦးမလဲဆိုတာ စောင့်ကြည့်ချင်သေးသည်။ နိုင်ငံခြားကကောင်တွေလိုသာ အရူးထရဲလျှင် ကျွန်တော်ကိုဉာဏ် လမ်းပေါ်ထွက်ပြီး အော်ပစ်လိုက်ချင်သည်။ "အဲဒါ ငါတို့မြန်မာ့လွှတ်တော်ကွ" လို့။ :D (နှစ်ရှည်လများ ဘလော့ဂ်ရေးလာသည့် ကိုညီလင်းဆက်တို့၊ မနိုင်းနိုင်းစနေတို့ကို မနေ့တစ်နေ့ကမှ ပေါ်လာတဲ့ ဒေါက်တာဆိတ်ဖွားက ကျော်တက်သွားတာကတော့ ကိုညီလင်းဆက်လေသံနဲ့ ပြောရရင်တော့ နာသကွာ :D)
စာကြွင်း။ တစ်ပတ်စာကို တနင်္ဂနွေနေ့တိုင်း ရေးဖြစ်၊ တင်ဖြစ်အောင် တေးထားပေမယ့် အချိန်အခက်အခဲကြောင့် ဒီအပတ်မှာ အဆင်မပြေခဲ့ပါဘူး။ အဲဒါကြောင့် ဒီနေ့မှပဲ တင်ပေးရတာကို နားလည်ပေးကြပါကုန်။
အမှတ်တရ
ကိုဉာဏ် (ပန်းလောင်မြေ)
၂၀၁၃ ခုနှစ်၊ ဇန်န၀ါရီလ ၂၃ ရက်၊ ဗုဒ္ဓဟူးနေ့။
နံနက် ၁ နာရီ ၅၄ မိနစ်တွင်ပြီး၏။
No comments:
Post a Comment