လတ်တလော လူပြောအများဆုံး ဗိုလ်ချုပ်အောင်ဆန်းအကြောင်း စာကဗျာစု

နတ်မောက်...
မင်းဘာမှထပ်မလုပ်နဲ့
ထိန်လင်းကို ငါတို့ဆီ ပေးပြီးကတည်းက
ဆယ်ကမ္ဘာစာလောက် တာဝန်ကျေပြီ။

ခင်ကြည်...
ညည်းယောက်ျားကို သေချာကြည့်ထား
သမီးကလေး ခမည်းပေးဖို့
ရွှေကလေး တစ်ပဲတစ်မူးတောင်
အမေအိုဆီ လက်ဖြန့်တဲ့လူစား
နိုင်ငံ့ခေါင်းဆောင်ငမွဲကို
ညည်း… စိတ်ပျက်ချင်ပျက်
သမိုင်းက စိတ်မပျက်စေနဲ့။

ဗိုလ်ထွန်းလှ...
ခင်ဗျားဆရာကို ကြည့်ပြောဦး
လမ်းဘေးမှာ အကြော်ဝင်ဝင်စားနေတာ
နှောင်းလူတွေသိရင် မျက်နှာမထားတတ်အောင် ရှက်နေရှာဦးမယ်။

ဆရာတော်ဦးသောဘိတ....
နောက်တစ်ခါကြမ်းတမ်းမိလို့
ဒီကလေးကို မရိုက်ပါနဲ့
ရရင်ရ မရရင်ချဆိုတာ
တပည့်တော်တို့အတွက်ပါဘုရား။

ဦးဘ၀င်း..
ခင်ဗျားညီ အငယ်ဆုံးလေးကို ခွင့်လွှတ်လိုက်ပါ။
သူပြောခိုင်းတဲ့ ရည်းစားစကား ပြောပေးလိုက်ပါ။
စစ်သားကြီးအသည်းက ဆေးရုံပေါ်မှာကျန်ခဲ့ရင်
ကျွန်တော်တို့ပဲ နစ်နာကြမှာ။

ရဲဘော်ကျော်စိန်....
ခင်ဗျားကားမောင်းရင် သတိကို ငယ်ထိပ်မှာကပ်ထား
ခင်ဗျား တင်မောင်းလာတာ ကျွန်တော်တို့
အတိတ်ကြီး/ပစ္စုပ္ပန်ကြီး/အနာဂတ်ကြီး။

ဟေ့လူ... ပလေဒီယံရုပ်ရှင်ရုံမန်နေဂျာ..
သူ့ဟာသူ ငါးမူးတန်းကကြည့်ကြည့် ၊ တစ်မတ်တန်းကကြည့်ကြည့်
သွားမတားပါနဲ့။
ဘ၀မှာ အပန်းဖြေနည်း လက်တစ်ဖက်မပြည့်ခဲ့တဲ့သူ
စိတ်လွတ်ကိုယ်လွတ် ခံစားပါစေဗျ။

ဗိုလ်မှူးကြီးဆူဇူကီး....
တွေ့တယ်မလား… ခင်ဗျားကို လက်ဆွဲနှုတ်ဆက်ရင်း
ခင်ဗျားကို တိုက်သင့်ရင်တိုက်ရမှာပဲလို့ ပြောခဲ့တဲ့ အညာသားလေးကို။
အဲ့သတ္တိ အဲ့စကားကို သေချာမှတ်ထား
နှောင်းမြန်မာတွေထဲမှာ အဲဒီလိုပြောရဲတာ တစ်ကောင်မှမရှိဘူး။

အမွိုင်....
မင်းမြေကို သူနင်းလိုက်တော့ တွန့်မသွားဘူးလား
အာရှတိုက်ရဲ့ ကြယ်တစ်လုံးကို
နှစ်လလောက်ထမ်းထားလိုက်ရတာ
အခုထိ ဂုဏ်ယူမဆုံး မဟုတ်လား။

ဦးစော...
ခင်ဗျားကို မေ့ထားပါ့မယ်။ ခွင့်လွှတ်လို့တော့ မရသေးဘူး။
ဒါပေမဲ့… မပူပါနဲ့။
ဒီနေ့ခေတ်မှာလည်း ခင်ဗျားလိုလူတွေ အများကြီးရယ်။

မစ္စတာနေရူး...
ခင်ဗျား သူ့ကို လောင်းကုတ်ကြီးပေးလိုက်တာ ကျေးဇူးတင်တယ်ဗျာ
အခု ကျွန်တော်တို့မှာ ဒါကြီးခြုံပြီး နွေးနေရတာ။

ပဲခူးဆောင်...
ခင်ဗျားအခန်းထဲကကြမ်းပိုးတွေ မောင်းမထုတ်လိုက်နဲ့
စာအုပ်ပုံကြီးကို ရှင်းမပစ်လိုက်နဲ့
မခေါက်ရသေးတဲ့အ၀တ်တွေ တန်းပေါ်မချိတ်လိုက်နဲ့
သူ…ဇိမ်နဲ့မနေခဲ့လို့ ကျွန်တော်တို့ ဇိမ်နဲ့နေနေရတာ။

ညိုညိုစိန်....
ညည်းတစ်သက်လုံး မင်းသမီးလုပ်လာတာ အနယ်နယ်အရပ်ရပ်
ရွှေဘိုညချမ်းကလို သူရဲကောင်းမျိုး တွေ့ဖူးခဲ့လား၊ တွေ့ဖူးရဲ့လား
"ကျုပ်မှာ ကာမပိုင်နဲ့ဗျ" တဲ့
မိန်းကလေးတန်မဲ့ လက်ဆွဲကျီစယ်မယ့် ညည်းတောင်
ကြက်သီးဖြန်းဖြန်း ထသွားရဲ့မဟုတ်လား။

ဆြာ စတက်ဖို့ကရစ်ပ်....
သူ ခင်ဗျားအင်္ကျီအိတ်ကြီး ပြဲသွားအောင်
ဖောင်တိန်ကိုဆွဲလုလိုက်တာ မအံ့သြပါနဲ့
၃၂ နှစ်နဲ့ သေခဲ့တာတောင် ကျွန်တော်တို့နှလုံးသားတွေကို
သူအခုထိ ဆွဲလုနေနိုင်တုန်း။

ဦးဋ္ဌေးမြိုင် (သို့) ဒဂုန်တာရာ.....
(ဇွတ်ချစ်မယ်)ဆိုတဲ့ အချစ်သီချင်းအစား
စစ်ချီစစ်တက် သီချင်းတွေပဲ သူကကြားချင်တယ်ဆို
တီးပေးလိုက်ပါဗျ
နှလုံးသားမရှိတာ မဟုတ်ပါဘူး။
နှလုံးသား ရှိလွန်းလို့ပါ။

ဂျူဗလီဟော....
ကျေးဇူးပြုပြီး ရွှေတိဂုံဘုရားလမ်းဘက် လှည့်မထားပါနဲ့
ခင်ဗျားကိုမြင်တိုင်း
မျက်ရည်ဝဲရင်း အလေးပြုမိလို့။

ရဲဘော်ကလေးတွေ....
စိတ်မကောင်းမဖြစ်နဲ့
မင်းတို့ခေါင်းဆောင်ကြီးက
သူ့မင်္ဂလာဆောင်မှာ တိုက်တွေကားတွေလက်မဖွဲ့လို့
စိတ်ဆိုးမယ့်လူစားလား
"ငွေသော်တာရောင်ခြည်" ဆိုတော့
အရိုးသားဆုံးအပြုံးနဲ့ ပျော်နေခဲ့တာလေ။

ပြည်ထဲရေးဝန်ကြီး ဦးမြ...
ခင်ဗျား…. မှားတယ်
သူ့ရုံးခန်းရှေ့က တပ်စိတ်ကို
သူဘာပြောပြော ပေကပ်ထားခဲ့ရမှာ
အခုတော့ ကျွန်တော်တို့မှာ ပြောခွင့်မရှိတော့။

ကိုကျော့မောင်....
သူ့မင်္ဂလာဆောင်မှာ ရွှေကြိုးသွားတားတော့
ဆွဲယူလွှင့်ပစ်လိုက်တာ စိတ်မကောင်းမဖြစ်ပါနဲ့
သူအပင်ပန်းခံ သင်ယူခဲ့တဲ့ ပညာတွေထဲမှာ
အဲ့လို အပိုဆားဒါးတွေ မပါဘူး။

မေမြို့....
ဝမ်းနည်းစိတ်ကို ကျိတ်မှိတ်ထားတော့
နိုင်ငံရေးလောက,က ထွက်ရင်
ခြံစိုက်မယ်၊ စာရေးမယ်ဆိုတဲ့သူ
ကျည်ဆံ ၁၃ တောင့် စိုက်သွားပြီ
ရေးလို့မကုန်အောင် ကျွန်တော်တို့ရေးနေရပြီ။

မှတ်ချက်

အထက်ပါစာစုများသည် ယခုလောလောဆယ် Facebook စာမျက်နှာများနှင့် အခြားသော ဘလော့ဂ်များတွင် အပြန်အလှန်ဝေမျှနေကြသည့် စာစုများဖြစ်ပါသည်။ ပြန်လည်ဝေမျှသူများက ကဗျာဟု သတ်မှတ်ဝေမျှနေကြခြင်း ဖြစ်သော်လည်း မူလရေးသားသူကမူ သူ၏ Facebook စာမျက်နှာတွင် အတွေးများကို ဆစ်ပိုင်းဆစ်ပိုင်း ရေးသားခဲ့ခြင်းသာ ဖြစ်ပါသည်။ ယခုအပေါ်တွင် ဖော်ပြထားသည့်အတိုင်း ကဗျာတစ်ပုဒ်အဖြစ် စုစည်းရေးသားခဲ့ခြင်း မဟုတ်ဘဲ တစ်ပိုင်းစီ ရေးသားခဲ့သည်များကို စုစည်းလိုက်ခြင်း ဖြစ်ကြောင်း တွေ့ရပါသည်။ မည်သို့ပင်ဖြစ်စေ မူလရေးသားသူက ရည်ရွယ်ရေးသည်ဖြစ်စေ၊ မရည်ရွယ်သည်ဖြစ်စေ၊ ကာရန်ပါသည်ဖြစ်စေ၊ ကာရန်မပါသည်ဖြစ်စေ၊ ကဗျာဟုတ်သည်ဖြစ်စေ၊ ကဗျာမဟုတ်သည်ဖြစ်စေ၊ သေချာသည်ကတော့ အဆိုပါစာစုများကို ဖတ်ပြီးချိန်တွင် ရင်ထဲ၌ တစ်ခုခု ကျန်ခဲ့ခြင်းဖြစ်ပါသည်။ လွမ်းဆွတ်မှု ဖြစ်ကောင်းဖြစ်မည်၊ တမ်းတမှုဖြစ်ကောင်းဖြစ်မည်၊ ဇာတိသွေးဇာတိမာန် ဖြစ်ကောင်းဖြစ်မည်၊ ပျော်ရွှင်ကျေနပ်မှု ဖြစ်ကောင်းဖြစ်မည်၊ စိတ်ပျက်ဝမ်းနည်းမှု ဖြစ်ကောင်းဖြစ်မည်၊ ဂုဏ်ယူဝံ့ကြွားမှု ဖြစ်ကောင်းဖြစ်မည်၊ သေချာသည်ကတော့ တစ်ခုခု ခံစားရသည် ဆိုခြင်းပင်။ ထို့အတွက် မူလရေးသားသူအား ချီးကျူးမိပါကြောင်းနှင့် ယခုစာစုများအတွက် ဂုဏ်ယူဝမ်းမြောက်ရပါကြောင်း ဤနေရာမှ မှတ်တမ်းတင်အပ်ပါသည်။

မူလရေးသားသူ၏ Facebook စာမျက်နှာမှာ - http://www.facebook.com/heinn.fivestrings ဖြစ်ပါသည်။