ကျွန်တော်ကြိုက်သော ပုံပြင်များ (၉)

ဂရိ နတ်မင်းကြီးဇူးစ်ဟာ လောကကြီးကို ဖန်ဆင်းလိုက်တယ်။ ကြယ်တွေကို ဖန်ဆင်းလိုက်တယ်။ နေတွေ လတွေကို ဖန်ဆင်းလိုက်တယ်။ ကမ္ဘာမြေကြီးကို ဖန်ဆင်းလိုက်တယ်။ တောတောင်တွေကို ဖန်ဆင်းလိုက်တယ်။ ပင်လယ် သမုဒ္ဒရာတွေကို ဖန်ဆင်းလိုက်တယ်။ တိရစ္ဆာန်တွေကို ဖန်ဆင်းလိုက်တယ်။ နောက်တော့ ယောက်ျားးမိန်းမတွေကို ဖန်ဆင်းလိုက်တယ်။ နောက်ဆုံးမှာ အလှအပနဲ့ အမှန်တရားကို ဖန်ဆင်းလိုက်တယ်။

"အလှအပနဲ့ အမှန်တရား" ကို ဖန်ဆင်းပြီးတဲ့နောက် နတ်သဘင် အစည်းအဝေးခေါ်လိုက်တယ်။ အစည်းအဝေးမှာ ဇူးစ်နတ်မင်းကြီးက ပြောတယ်။

"အလှအပနဲ့ အမှန်တရား" ကို ငါဖန်ဆင်းလိုက်ပြီ။ ဒါပေမယ့် ဒီ "အလှအပနဲ့ အမှန်တရား"ကို လူတွေ လွယ်လွယ်နဲ့ ရှာမတွေအောင် လုံခြုံတဲ့နေရာမှာ ဖွက်ထားရမယ်။ ဘယ်နေရာမှာ ဖွက်ရရင် ကောင်းမှာလဲ ဆိုတာကို နတ်မင်းများ ပြောကြပါ" လို့ပြောတယ်။

နတ်မင်းတစ်ပါးက "ပင်လယ် သမုဒ္ဒရာ အောက်မှာ ဖွက်ရရင် တော်တော်နဲ့ ရှာလို့တွေ့နိုင်မှာ မဟုတ်ဘူး နတ်မင်းကြီး" လို့လျှောက်တယ်။

တခြားနတ်တွေက "လူတွေဟာ အင်မတန် စူးစမ်းတတ်တဲ့ သတ္တ၀ါ ဖြစ်တယ်။ ပင်လယ် သမုဒ္ဒရာအောက်ကို လွယ်လွယ်နဲ့ ရောက်အောင် သွားကြည့်နိုင်မှာပဲ၊ ဒီလိုဆိုရင် လွယ်လွယ်နဲ့ပဲ တွေ့သွားနိုင်တယ်" လို့ပြောတယ်။

နောက်နတ်မင်း တစ်ပါးက "အမြင့်ဆုံး တောင်ထိပ်မှာ တင်ထားရရင် ကောင်းမယ်" လို့ ပြောတယ်။

တခြားနတ်တွေက "လူတွေဟာ အင်မတန် စူးစမ်းတတ်တဲ့ သတ္တ၀ါဖြစ်တယ်။ တောင်ထိပ် ကိုလည်း လွယ်လွယ်နဲ့ပဲ ရောက်အောင် သွားကြည့်နိုင်မှာပဲ။ အဲဒီလိုဆိုရင် လွယ်လွယ်နဲ့ပဲ တွေ့သွားနိုင်တယ်" လို့ပြောတယ်။

ပညာရှိ နတ်သားတစ်ပါးက လက်ထောင်ပြီးတော့ "ရှာရအခက်ဆုံးနေရာကို ကျွန်တော် သိပါတယ်"လို့ ပြောတယ်။

ဇူးစ်နတ်မင်းကြီးက "ပြောပါ" လို့ဆိုတော့မှ ပညာရှိနတ်သားက "အလှအပနဲ့ အမှန်တရားကို လူတွေရဲ့ နှလုံးသားထဲမှာဖွက်ထားလိုက်ပါ။ လူတွေဟာ အပြင်မှာပဲ ရှာလိမ့်မယ်။ ဒါကြောင့် နှလုံးသားထဲမှာ ဖွက်ထားတဲ့ အလှအပနဲ့ အမှန်တရားကို တော်တော်တန်တန်လူ တွေ့မှာမဟုတ်ဘူး။ အင်မတန် ဉာဏ်ကြီးတဲ့သူ၊ အင်မတန် လုံ့လ၀ီရိယ ကြီးတဲ့သူမှသာတွေ့နိုင်မယ်" လို့ ပြောတော့ နတ်မင်းကြီးနဲ့ တခြားနတ်တွေအကုန်လုံးက သဘောကျတယ်။ လက်ခံကြတယ်။

အဲဒီမှာ လွယ်လွယ်နဲ့ လိုချင်တဲ့သူတွေဟာ အပြင်မှာရှာကြမယ်။ စာအုပ်ထဲမှာရှာကြမယ်။ အစစ်ကိုတွေ့မှာ မဟုတ်ဘူး။ အရိပ်ကိုပဲ တွေ့မယ်။

အဲဒါနဲ့ နတ်မင်းကြီးဟာ အလှအပနဲ့ အမှန်တရားကို လူတွေရဲ့ နှလုံးသားထဲမှာ ဖွက်ထားလိုက်တယ်။