စာကြည့်တိုက်မှာ ကြုံခဲ့တယ်

ဒီနေ့အရင်ငှားထားတဲ့ စာအုပ်တွေကိုအပ်ရင်း စာကြည့်တိုက်မှာ စာအုပ်တွေလိုက်ရှာဖြစ်ပါတယ်။ နောက်ပိုင်းထွက်တဲ့စာအုပ်အများစုကို ဖတ်ဖူး၊ မြည်းစမ်းဖူးတဲ့အတွက် ဟိုးအရင်က စာအုပ်အဟောင်းတွေကို အဓိကရှာဖြစ်ပါတယ်။ ကျွန်တော်မဖတ်ရသေးတာတွေ၊ ပြန်လည်ထုတ်ဝေထားခြင်း မရှိတဲ့ စာအုပ်ကောင်းတွေ အများကြီးတွေ့ပါတယ်။ ဖတ်ချင်တာများနေတဲ့အတွက် ဘာဖတ်မလဲဆိုတာကို သေချာစဉ်းစားရပါတယ်။ နောက်ဆုံးမှာ စိတ်ကြိုက်အဖြစ်ဆုံးနဲ့ လတ်တလော အဖတ်ချင်ဆုံး စာအုပ်နှစ်အုပ်ကို ရွေးလိုက်ပါတယ်။ တွဲဖတ်လို့ အဆင်ပြေမယ့် စာအုပ်နှစ်အုပ်ပါ။ "မြန်မာစကား၊ မြန်မာစာ" ဆိုတဲ့ စာအုပ်ရယ်၊ "အဘယ်ကြောင့် မြန်မာစာ မတိုးတက်သနည်း" ဆိုတဲ့ စာအုပ်ပါ။ စာအုပ်တွေကို လှန်ပြီး အမြီးဖတ်ကြည့်တဲ့အတွက် အတော်လေးလည်း စိတ်ဝင်စားပြီး ဖတ်ချင်နေမိပါတယ်။ ငှားတဲ့နေရာရောက်တော့ တစ်ကြိမ်မှာ တစ်အုပ်ပဲ ငှားခွင့်ပေးတဲ့အကြောင်း ပြောပါတယ်။ ကျွန်တော်ကလည်း သိတဲ့အကြောင်း၊ အခုဟာက ဒီနှစ်အုပ်ကို တွဲပြီးဖတ်မှ အဆင်ပြေမှာဖြစ်တာကြောင့် ချေချေငံငံပဲ ရှင်းပြပါတယ်။ အဲဒါကို စာအုပ်ငှားတဲ့ကောင်တာကလူက စိတ်မ၀င်စားပါဘူး။ သူပြောချင်ရာတွေပြောပြီး ကျွန်တော့်ကို စာကြည့်တိုက်ရဲ့ စာအုပ်ငှားစည်းကမ်းစာအုပ်ကို အတင်းထိုးပြနေပါတယ်။ ကျွန်တော်အတော်လေးကို စိတ်တိုသွားပါတယ်။ အဲဒီကောင်တာကလူကို ကျွန်တော့်ရဲ့ စာအုပ်ငှားမှတ်တမ်းကဒ်ပြားကို လက်ညှိုးထိုးပြပြီး "ငါသိတယ်၊ စာအုပ်ငှားနေတာ အခုမှမဟုတ်ဘူး၊ နှစ်နဲ့ချီနေပြီ၊ ငှားဖတ်ထားတဲ့စာအုပ်တွေ တန်းစီပြီးထပ်ရင်တောင် မင်းအရပ်ထက် အများကြီးမြင့်တယ်၊ အခုဟာက နှစ်အုပ်တွဲဖတ်ရမှာမို့ကွ၊ မင်းတို့စာကြည့်တိုက်တာဝန်ခံဘယ်သူလဲ၊ ငါသူနဲ့တွေ့မယ်" လို့ ပြန်ပြောမိပါတယ်။ သူကလည်း ဟိုဖက်ရုံးခန်းမှာ ရှိတဲ့အကြောင်း ပြောပါတယ်။ ကျွန်တော်လည်း ရုံးခန်းထဲကို ၀င်သွားပါတယ်။ ကောင်တာကလူက လိုချင်တဲ့စာအုပ်ကို မှတ်ပေးတာလောက်ပဲ သိမှာပဲ။ တာဝန်ခံဆိုတဲ့ အရာရှိကတော့ နားလည်မှာပါဆိုတဲ့ စိတ်ကူးနဲ့ ၀င်တွေ့ဖို့သွားတာပါ။ အထဲရောက်တော့ ကွန်ပျူတာရှေ့မှာ ဗီဒီယိုထိုင်ကြည့်နေတဲ့ စာကြည့်တိုက်တာဝန်ခံဆိုသူကို တွေ့ပါတယ်။ နံနက် ၉ နာရီဝန်းကျင်ပဲ ရှိပါသေးတယ်။ အနားယူချိန်လည်း မဟုတ်ပါဘူးလို့ တွေးမိပါတယ်။ သူကြည့်နေတဲ့ ဗီဒီယိုဇာတ်ကားလောက် စိတ်မ၀င်စားတဲ့အတွက်တော့ ကျွန်တော့်ရင်ထဲမှာ ဆစ်ခနဲဖြစ်အောင် တစ်ခုခု ခံစားလိုက်ရပါတယ်။ ဘာမှမပြောတော့ဘဲ ပြန်ထွက်လာခဲ့ပါတယ်။ "မြန်မာစကား၊ မြန်မာစာ" ဆိုတဲ့ စာအုပ်ကို ထားခဲ့လိုက်ပါတယ်။

ကျွန်တော်ငှားလာတဲ့စာအုပ်ကို မိတ်ဆက်ပေးပါ့မယ်။ (စာလုံးပေါင်းတွေကို မူရင်းစာအုပ်ကအတိုင်း ရေးပေးထားပါတယ်)

အဘယ်ကြောင့် မြန်မာစာ မတိုးတက်သနည်း
ဦးထွန်းဖေ ရေး
ထွန်းစာအုပ်တိုက်မှ တာဝန်ယူ၍ တည်းဖြဋ်ပြင်ဆင်ပါသည်။
ပထမနှိပ်ခြင်း
၁၉၅၈ ခု၊ မေလ
ထွန်းစာအုပ်တိုက်၊ ၄၈၁ ပြည်လမ်း၊ ရန်ကုန်။


ကျွန်တော်ဖတ်လိုက်ပါဦးမည်။ စာအုပ်တစ်ခုလုံးကို မိတ္တူကူးယူထားဖို့ စိတ်ကူးရှိပါသည်။ တစ်အုပ်လုံး မဟုတ်လျှင်သော်မှ အချို့သော အပုဒ်များကို ပြန်ရေးပြီးတင်ပေးမည်ဟု စိတ်ကူးထားပါသည်။ စိတ်ပါဝင်စားသူများ စောင့်မျှော်ဖတ်ရှုကြပါရန် ကြော်ငြာမောင်း ခတ်လိုက်ကြောင်းပါ။