Thursday, December 31, 2009

၂၀၁၀ ပြည့်နှစ်ကို ကြိုဆိုကြတော့မည်


နှစ်သစ်ကူးပွဲတော်ကာလ (သို့မဟုတ်) ၂၀၀၉ ကို လက်ပြနှုတ်ဆက်တော့မည့်အချိန်
အသစ်ကို လူသားတွေစိတ်ဝင်စားကြသည်။ ပစ္စည်းအသစ်၊ နည်းပညာအသစ်၊ မင်းသားမင်းသမီးအသစ်၊ နေရာအသစ်၊ စနစ်အသစ် စသည်ဖြင့် အသစ်များစွာကို ကျွန်တော်တို့လူသားတွေ ခုံမင်တပ်မက်ကြသည်။ နှစ်သစ်မြတ်နိုးကြသည်။ ဤသည်ကိုက လူသားပီသသည်လား မပြောတတ်ပေ။ ယနေ့ခေတ်ကာလက ပိုဆိုးသည်။ အဟောင်းကို ဖက်တွယ်ထားသူများကို နေရာပေးသည့်ခေတ်မဟုတ်တော့။ သူ့ခေတ်ရေစီးနှင့်အတူ အလိုက်သင့်မျောပါနိုင်သူတွေကသာ နေရာဝင်ဆံ့သည်ဟု ယေဘုယျဆိုနိုင်သည်။ ဒီနေ့နည်းပညာက နောက်နေ့ဆိုလျှင် ဟောင်းသွားပြီ။ သူ့ထက်ကောင်းသော နည်းပညာအသစ်တစ်ခု ပေါ်နေပြီဆိုသည်ကို ယုံမှားသံသယဖြစ်စရာမရှိ။ အဲဒီလိုခေတ်မျိုးမှာ လူသားတွေ အသစ်ကို မက်မောကြတာ အထူးအဆန်းတော့လည်း မဟုတ်ပေ။

ဟော… အခုလည်း နှစ်သစ်ကူးပွဲတော်က လာပြန်ချေပြီ။ ခရစ်သက္ကရာဇ်နှစ်များဖြင့်သာ လုပ်ငန်းဆောင်တာများကို လုပ်ကိုင်ဆောင်ရွက်ကြရသည် ဖြစ်သည့်အတွက် နှစ်သစ်ကူးကာလသည် ကမ္ဘာလုံးဆိုင်ရာ ပွဲတော်တစ်ခုလို့တောင် ပြောလို့ရသည်။ တရုတ်မှာလည်း တရုတ်ရိုးရာနှစ်သစ်ကူးပွဲရှိသည်။ မြန်မာမှာလည်း မြန်မာနှစ်သစ်ကူးပွဲတော် ရှိသည်။ ထို့အတူ အခြားသော နိုင်ငံများတွင် သူ့နိုင်ငံအလိုက် ရိုးရာနှစ်သစ်ကူးပွဲတော်များ ရှိကြပါလိမ့်မည်။ အခုလို ခရစ်နှစ်သစ်ကူးကာလသည်လည်း အားလုံးအတွက် ပျော်ပွဲရွှင်ပွဲတစ်ခုအဖြစ် မြင်ထားကြသည်မှာ နှစ်ပေါင်းပင် မနည်းတော့ချေ။ အကြမ်းဖျဉ်းဆိုရလျှင် ခရစ်နှစ်သစ်ကူးပွဲတော်ဆိုတာထက် ပြက္ခဒိန်တစ်နှစ်ကူးပြောင်းသည့်ပွဲတော်ဟု ဆိုချင်သည်။ ပြက္ခဒိန်ကို ခရစ်သက္ကရာဇ်အရ ရေးသားထားခြင်းဖြစ်၍သာ ယခုလိုအချိန်ကို နှစ်သစ်ကူးပွဲတော်အဖြစ် ကျင်းပကြခြင်းဖြစ်မည်ဟု ကျွန်တော်ထင်သည်။

ဂလိုဘယ်ပွဲတော်ဖြစ်လာတဲ့ နယူးရီးယား
ဂလိုဘယ်လိုက်ဇေးရှင်းခေတ်မှာ ဂလိုဘယ်ပွဲတော်တစ်ခုဖြစ်သော နှစ်သစ်ကူးကာလမှာ လူတွေ ပျော်ကြ၊ ပါးကြ၊ စားကြ၊ သောက်ကြ၊ တီးကြ၊ ဆိုကြ၊ ကကြ၊ ခုန်ကြဖြင့် နည်းလမ်းအမျိုးမျိုးဖြင့် ကြိုဆိုကြသည်မှာလည်း ဂလိုဘယ်ယဉ်ကျေးမှုတစ်ရပ်ပင် ဖြစ်နေချေပြီ။ ၂၀၁၀ ခုနှစ်သို့ ကူးပြောင်းတော့မည့် ဒီဇင်ဘာလ ၃၁ ရက်နေ့ ည ၁၂ နာရီရောက်ရန် စက္ကန့်ပိုင်းအလိုတွင် "၁၀… ၉… ၈… ၇… ၆… ၅… ၄… ၃… ၂… ၁… ဟက်ပီးနယူးရီးယား…" ဟု အော်သည်ကပင် ဂလိုဘယ်အမှတ်အသားတစ်ခု ဖြစ်နေလေပြီ။ တရုတ်ကလေးတွေလည်းအော်သည်၊ အာဖရိကန်လူမည်းလေးတွေလည်း အော်ကြသည်၊ ဥရောပက လူတွေလည်း အော်ကြသည်။ ဘာကြောင့်အော်ကြသည်ဆိုတာကိုတော့ ကျွန်တော်သေချာပြောမပြတတ်ပါ။ သို့သော် သေချာသည်ကတော့ ထိုကဲ့သို့ အော်လိုက်ရုံဖြင့် လာမည့် ၂၀၁၀ ပြည့်နှစ်ကြီးသည် ကောင်းမွန်သောနှစ်တစ်နှစ် ဖြစ်သွားမည်မဟုတ်ဆိုသည်ကိုပင်။ သို့သော် မျှော်လင့်ချက်ကို အဖော်ပြုတတ်သော လူသားတွေအတွက် မျှော်လင့်ချက်ဖြင့် အော်ဟစ်သံတွေဖြစ်မည်ဟု နားလည်ပေးလို့ရပါသည်။ ကမ္ဘာတစ်ခြမ်းတွင် ဟက်ပီနယူးရီးယားဟု အော်ဟစ်နေကြချိန်တွင် အခြားကမ္ဘာတစ်ခြမ်းကလူတွေကတော့ အလုပ်ခွင်များ၊ စတိုးဆိုင်များ၊ လမ်းမများပေါ်၌ သွားလာလှုပ်ရှားလို့ ကောင်းနေဆဲရှိနေဦးမည်။ ဒီဘက်ခြမ်းကလူက ၂၀၁၀ ပြည့်နှစ်ထဲသို့ရောက်နေပြီ၊ ဟိုဖက်ကလူက အခုအချိန်ထိ ၂၀၀၉ ခုနှစ်အတွင်းမှာပဲ ရှိနေသေးသည်။ အံ့သြစရာမကောင်းပေဘူးလား။

၂၀၁၀ ကို အားခဲထားကြသတဲ့လား
ကျွန်တော်တို့မြန်မာတွေအတွက် ၂၀၁၀ ပြည့်နှစ်သည် အလွန်အင်မတန်မှကို အရေးကြီးသော နှစ်တစ်နှစ်ဖြစ်ပါသည်။ အသစ်ပေါင်းများစွာကို ကြုံတွေ့ရမည်ဆိုသည်ကို သေချာပေါက်သိနေသည်။ မြန်မာပြည်သူတွေအားလုံး စိတ်အ၀င်စားဆုံးက ၂၀၁၀ ပြည့်နှစ်တွင် ကျင်းပပြုလုပ်မည့် ရွေးကောက်ပွဲဖြစ်သည်။ အစိုးအသစ်၊ စနစ်အသစ်၊ ဖွဲ့စည်းပုံအခြေခံဥပဒေအသစ်တို့ဖြင့် ခရီးနှင်ကြရတော့မည်။ ကျွဲကူးရေပါဆိုသလို အခြားသော ပြောင်းလဲမှုတွေကလည်း အလိုလိုပါလာဦးမည်မှာ သေချာသည်။ မျှော်လင့်ခြင်းသည် လူသားတို့၏ အလုပ်ဖြစ်သည်။ ထို့အတွက် မျှော်လင့်နိုင်ကြပါသည်။ သို့သော် မျှော်လင့်သည်ဆိုရာ၌ ဖြစ်သင့်ဖြစ်ထိုက်သည်တို့ကိုသာ မျှော်လင့်ကြရန်ဖြစ်ပါသည်။ မဖြစ်နိုင်သည်တို့ကို မျှော်လင့်နေခဲ့ပြီး ဖြစ်မလာကာမှ ကိုယ်သာလျှင် စိတ်မချမ်းမသာဖြစ်ရခြင်းသည် ကောင်းလှသည် မဟုတ်ပါ။ ထို့အတွက် မျှော်လင့်ကြပါ… သို့သော် သိကြားမင်းဖန်ဆင်းပေးမှာပဲဟူသောစိတ်ဖြင့် မမျှော်လင့်ကြရန်တော့ ကြိုတင်သတိပေးလိုပါသည်။

ဆုမွန်ကောင်းတောင်းပေးပါသည်
၂၀၁၀ ပြည့်နှစ်တွင် မြန်မာ့သွေးမိတ်ဆွေများအားလုံး စိတ်ခွန်အားအသစ်များဖြင့် မိမိအကျိုး၊ မိသားစုအကျိုး၊ ပတ်ဝန်းကျင်အကျိုး၊ တိုင်းပြည်နှင့်လူမျိုးအကျိုး၊ လူသားမျိုးနွယ်တစ်ရပ်လုံး၏အကျိုးကို တရားမျှတပြီး မှန်ကန်ဖြောင့်မတ်သည့် နည်းလမ်းကောင်းများဖြင့် အစွမ်းကုန် သယ်ပိုးဆောင်ရွက်နိုင်ကြပါစေဟု ဆုမွန်ခြွေအပ်ပါသည်။ မြန်မာ့သွေး၏လုပ်ငန်းများကို ပိုမိုတိုးတက်ကောင်းမွန်အောင် ကြိုးစားသွားပါမည်ဟု ကတိပြုပါသည်။

ဆုမွန်ဖြင့်
ကိုဉာဏ် (ပန်းလောင်မြေ)
မြန်မာ့သွေးအဖွဲ့
၂၀၀၉ ခုနှစ် ဒီဇင်ဘာလ ၃၁ ရက်၊ ကြာသပတေးနေ့။
ည ၈ နာရီ ၁၇ မိနစ်တွင်ပြီး၏။

No comments:

Post a Comment

 
Web Statistics