Friday, February 26, 2010

My Life


(၁)
ကျွန်တော်ရေးလိုက်တဲ့ [ကလေးတွေ စာဖတ်ကြပါစေ] ဆိုတဲ့ ဆောင်းပါးအတွက် တုံ့ပြန်မှုတွေကို ရှင်းပြနေရတာ အတော်လေးကို စိတ်ကုန်နေမိတယ်။ ကျွန်တော်ရေးထားတဲ့အထဲမှာ ဘာများအမှားပါသွားသလဲလို့ ပြန်ပြန်ဖတ်နေတာ ၄-၅ ခေါက် ရှိနေပြီ။ မှားနေတယ်လို့ ယူဆမိတဲ့ အကြောင်းအရာ မပါဘူးလို့ ယုံကြည်တယ်။ ဒါပေမယ့် ဘယ်သူတွေက ဘာတွေနာနေကြသလဲ ဆိုတာကိုတော့ ကျွန်တော်မသိဘူး။ ဘာပဲဖြစ်ဖြစ် ကျွန်တော့်စာကိုဖတ်ပြီး တချို့တချို့တွေ စိတ်ညစ်တယ်၊ စိတ်တိုရတယ်ဆိုတဲ့အတွက်တော့ စိတ်မကောင်းဖြစ်မိတာ အမှန်ပါ။
(၂)
အရင်လက ဖွတ်ကလိဒင်္ဂါးအခြေအနေကြောင့် မ၀ယ်ဖြစ်ခဲ့တဲ့ [ဖေမြင့်-စာအုပ်ကမ္ဘာ] ကို ၀ယ်လိုက်ပါပြီ။ မြန်မာကျပ်ငွေ (၄၂၀၀) ပေးရပါတယ်။ စိတ်ထဲမှာ အတော်လေးလည်း ပျော်သွားမိတယ်။ ထွက်ပြီဆိုကတည်းက ဖတ်ချင်နေတဲ့စာအုပ်ကို အခုမှပဲ လက်ဝယ်ပိုင်ပိုင် ကိုင်ရတော့တယ်။ အဖွင့်နှစ်ပုဒ်ဖြစ်တဲ့ [ချစ်စရာ စာကြည့်တိုက်ကလေး] နဲ့ [စာပွဲသဘင်] နှစ်ပုဒ်ဖတ်ပြီးတဲ့အချိန်မှာတင်ကို ပေးခဲ့တဲ့ (၄၂၀၀)ကျပ်အတွက် တန်ပါတယ်လို့ မှတ်ချက်ချလိုက်ပြီ။ ဆရာဖေမြင့်ရဲ့ အရေးအသားပြေပြစ်ကျစ်လျစ်မှုကို အတုမယူဘဲကို မနေနိုင်ဘူး။
စာအုပ်မှတ်တမ်းမှာ အုပ်ရေ - ၁၀၀၀ ဆိုတဲ့အတွက်တော့ တစ်မျိုးကြီးဖြစ်မိတယ်။ တန်ဖိုးဘယ်လောက်ဆိုတာလည်း အချက်အလက် မပါဘူး။
-----------
စာမူခွင့်ပြုချက်အမှတ် - ၄၀၀၅၂၄၁၁၀၉
မျက်နှာဖုံးခွင့်ပြုချက်အမှတ် - ၄၀၀၄၈၂၁၁၀၉
ထုတ်ဝေသူ - ဦးဖေမြင့် (၀၂၂၅၉)၊ ဖေမြင့်စာပေ။
ပုံနှိပ်ခြင်း - ပထမအကြိမ်၊ ၂၀၀၉ ခုနှစ် ဒီဇင်ဘာလ။
အုပ်ရေ - ၁၀၀၀
-----------
(၃)
ကျောင်းသားတွေရဲ့ စာသင်ကြားမှုနဲ့ ပတ်သက်ပြီး သုတေသနတစ်ခုလုပ်ဖို့ ပြင်ဆင်နေရပါတယ်။ စာသင်နေရတဲ့ ကျောင်းဆရာဖြစ်တဲ့အတွက် ကိုယ်တိုင်လည်း စိတ်ပါလို့ ၀င်ရောက်လုပ်ကိုင်ဖို့ သဘောတူလိုက်တာ ဖြစ်ပါတယ်။ လေးလအတွင်း ရလဒ်တစ်ခုခု ပြနိုင်အောင်ကြိုးစားကြမှာပါ။ ပုဂ္ဂိုလ်ခင်လို့ တရားမင်တာလို့ ဆိုချင်လည်းဆိုပါ။ သုတေသနအဖွဲ့ခေါင်းဆောင်က ကျွန်တော့်စာတွေထဲမှာ မကြာခဏထည့်ရေးတတ်တဲ့ သမိုင်းဒေါက်တာဘွဲ့ရ အစ်ကိုကြီးတစ်ယောက် ဖြစ်နေလို့ပါ။ သူ့ရဲ့ စိတ်ထက်သန်မှုနဲ့ လုပ်ချင်တဲ့ရည်ရွယ်ချက်ကို သိနေတာကြောင့် လက်ခံဖြစ်လိုက်တာပါ။
(၄)
နောက်တစ်ပတ်အတွင်း မပြန်ဖြစ်တာကြာပြီဖြစ်တဲ့ မွေးရပ်မြေကို မဖြစ်မနေ ပြန်ဖို့ရှိပါတယ်။ မတွေ့တာကြာပြီဖြစ်တဲ့ ချစ်သူကို ပြန်တွေ့ရမှာမို့ ရင်ခုန်နေပုံမျိုးနဲ့ ကျွန်တော်ရင်တွေ ခုန်နေမိပါတယ်။ ကျွန်တော်ထိတွေ့ဖူးတဲ့ နေရာဒေသတစ်ခု မဟုတ်တော့မှာတော့ အသေအချာပါပဲ။ ဘာတွေတိုးတက်နေသလဲ၊ ဘာတွေဆုတ်ယုတ်သွားပြီလဲဆိုတာကို စိတ်ဝင်စားနေမိပါတယ်။ ကျောင်းအတူတက်ခဲ့တဲ့ သူငယ်ချင်းဟောင်းတွေနဲ့ ပြန်ဆုံခွင့်ရရင်တော့ အတော်လေးကို ပျော်ရွှင်ရမယ်ထင်ပါတယ်။ ဒါပေမယ့်လည်း ကိုယ့်အလုပ်တွေနဲ့ကိုယ် တစ်နယ်တစ်ကျေးတွေမှာ ရောက်နေကြတာမို့ လွယ်မယ်တော့ မထင်ပါဘူး။ ကျွန်တော့်ဒေသလေးမှာ ကဗျာလေးတစ်ပုဒ်တော့ ရေးဖြစ်အောင်ရေးခဲ့မယ်လို့လည်း တေးထားလိုက်ပါတယ်။ အကောင်အထည်ပေါ်ခဲ့ရင်တော့ ဖတ်ကြရဦးမှာပါ။
အမှတ်တရ
ကိုဉာဏ် (ပန်းလောင်မြေ)
၂၀၁၀ ပြည့်နှစ် ဖေဖော်ဝါရီလ ၂၆ ရက်၊ သောကြာနေ့။
နံနက် ၁၀ နာရီ ၁၅ မိနစ်တွင်ပြီး၏။

No comments:

Post a Comment

 
Web Statistics