ကလောင်အမည်၊ အနုပညာအမည်တွေရဲ့ အဓိပ္ပါယ်

တစ်ခါတလေမှာ ခင်မင်ရင်းနှီးတဲ့ သူငယ်ချင်းတစ်ယောက်ယောက်က သူသိချင်တဲ့ မေးခွန်းတစ်ခုခုကို မေးလိုက်လို့ ပြန်မဖြေနိုင်တဲ့အခါ ကျွန်တော့်ကို မကျေမနပ်နဲ့ ပြောလေ့ရှိကြတဲ့ စကားတစ်ခွန်း ရှိပါတယ်။ "မင်းကလည်းကွာ... စာတွေ ဒီလောက်ဖတ်နေပြီး ဒါလေးတောင် မသိဘူးလား" တဲ့။ အတော်အခံရခက်တဲ့ စကားပါဗျာ။ ပြီးတော့ နားထောင်ရတာ ဘယ်လိုကြီးမှန်းလည်း မသိဘူး။ စာဖတ်တာကို ၀ါသနာပါတဲ့အတွက် လက်လှမ်းမီသလောက် တွေ့သမျှစာကို ဖတ်ပါတယ်။ အချိန်ရသလို စာဖတ်တဲ့အကျင့်ကလည်း စွဲနေပါပြီ။ ဒါပေမယ့်ဗျာ... ဘယ်လောက်ပဲ စာဖတ်သည်ဖြစ်စေ၊ "ကျွန်တော်မသိတာ ဘာမှမရှိဘူးဗျ" ဆိုတာမျိုးတော့ ဘယ်လိုလုပ်ပြီး ဖြစ်နိုင်မှာလဲဗျ။ လောကကြီးမှာ ကျွန်တော်မသိတာတွေ၊ နားမလည်တာတွေ၊ မကြုံဖူး၊ မကြားဖူး၊ မမြင်ဖူးတာတွေမှ အများကြီးမှ တကယ့်အများကြီး။ ကျွန်တော်သိတယ်လို့ ထင်ရတာတွေက နည်းနည်းလေးမှ နည်းနည်းလေးပါဗျာ။ ရှိနေတဲ့ ပညာတွေနဲ့ ကျွန်တော်သိထားတယ်ဆိုတာဟာ မဟာသမုဒ္ဒရာနဲ့ မိုးရေတစ်စက်လောက်ကို ကွာခြားပါတယ်ဗျာ။ နည်းနည်းလေးမှ တကယ့်နည်းနည်းလေးပါ။ အဲဒါကိုလည်း ကျွန်တော်သိပါတယ်၊ ၀န်ခံပါတယ်။ ရှက်စရာမှ မဟုတ်တာပဲဗျာ။ ကျွန်တော်က မသိတာကို မသိဘူးလို့ ပြောပေမယ်လို့ တချို့တချို့တွေက သိပ်မကြိုက်ကြဘူးဗျ။ သူတို့ထင်နေတာက ကျွန်တော်က သိလျက်သားနဲ့ မဖြေချင်လို့ "ဘူး" ခံလိုက်တယ်လို့ကိုး။ မတတ်နိုင်ပါဘူးဗျာ။ ကျွန်တော်မသိတာကို မသိဘူးလို့ ဖြေလိုက်ရတဲ့အတွက် ကျွန်တော်ရတာက လိပ်ပြာသန့်သန့် နေနိုင်ခြင်းပါပဲ။ အဲဒီရလဒ်အတွက် ကျန်တဲ့အရာတွေကို လျစ်လျူရှုထားနိုင်ရမှာပေါ့လေ။

စကားတွေပျိုးနေလေတော့ နည်းနည်းလေရှည်သွားပါတယ်။ အခြားမဟုတ်ပါဘူး။ တစ်နေ့က သူငယ်ချင်းတစ်ယောက်က နာမည်တစ်ခု လာမေးတာနဲ့ ဆက်စပ်ပြီး ဒီပို့စ်လေးကို ရေးဖြစ်သွားတာပါ။ အခန်းထဲမှာ ဂျာနယ်ဖတ်နေရင်းနဲ့ သူငယ်ချင်းက ကောက်ကာငင်ကာ မေးခွန်းတစ်ခု မေးပါတယ်။ ဂျာနယ်ထဲမှာပါတဲ့ စာရေးဆရာတစ်ယောက်ရဲ့ နာမည်ကိုပါ။ အဲ... အဲလိုလည်း မဟုတ်သေးဘူးဗျ။ ရှင်းအောင်ပြောရရင် နာမည်ဆိုတာထက် အဲဒီနာမည်နောက်က ပါလာတဲ့ ကွင်းစကွင်းပိတ်ထဲက စာလုံးတွေကို မေးတာပါ။ ဥပမာဗျာ... ကျွန်တော့်နာမည်ပဲ ဆိုပါတော့။ ကိုဉာဏ် (ပန်းလောင်မြေ) ဆိုတဲ့နာမည်နဲ့ ကျွန်တော့်ဘလော့ဂ်မှာ ဟိုရေးဒီရေး ရေးတယ်ပေါ့ဗျာ။ ကိုဉာဏ်ဆိုတာကတော့ နာမည်မို့ ထားလိုက်ပါတော့။ နောက်မှာပါတဲ့ ကွင်းစကွင်းပိတ်ထဲက "ပန်းလောင်မြေ" ဆိုတာ ဘာလဲပေါ့။ အဲဒီလိုမျိုး ပြဿနာပါ။ သူမေးတဲ့ဟာကို ကျွန်တော် သေသေချာချာ မဖြေလိုက်နိုင်ဘူးဗျ။ တကယ်လည်း မသိတာပါ။ ဖြစ်နိုင်ချေရှိတာကိုတော့ တွေးတွေးဆဆနဲ့ ပြောလိုက်မိပါတယ်။ ဒါပေမယ့် မသေချာဘူး၊ ထင်တာကိုပြောတာပါလို့တော့ ကြိုတင်ပြောလိုက်ရသေးတယ်။ တော်ကြာနေ... ကျွန်တော်ပြောလိုက်တာက မှားနေတယ်ဆိုရင် အဲဒီကောင်ကိုဉာဏ်က မသိဘဲနဲ့ လျှောက်ပြောလိုက်တယ်လို့ ဖြစ်မှာစိုးလို့ပါ။

အဲဒီတော့မှ ကျွန်တော်လည်း သေသေချာချာ စဉ်းစားမိတယ်။ ဟုတ်ပေသားပဲဗျ။ ကျွန်တော်တို့ဆီက စာရေးဆရာတွေရဲ့ ကလောင်နာမည်တွေမှာ အဲဒီလို အထူးပြု စကားလုံးလေးတွေ အတော်ပါတာကိုးဗျ။ တချို့ကလည်း ဒေသနာမည်၊ တချို့က ကျောင်းနာမည်၊ တချို့က မြို့နာမည်၊ တချို့က အထူးပြုဘာသာရပ်နာမည်၊ စသည် စသည်ဖြင့်ပေါ့လေ။ အများကြီးမှ အများကြီးပါပဲ။ အနောက်နိုင်ငံက စာရေးဆရာတွေကတော့ သူတို့နာမည်ကိုပဲ ကလောင်နာမည်အဖြစ် ရေးကြ၊ သုံးကြတာကို သတိထားမိတယ်။ ကျွန်တော်တို့ မြန်မာတွေကတော့ ကလောင်နာမည်ဆိုပြီး သီးသီးသန့်သန့်ကို ရွေးကြ၊ မှည့်ကြ၊ ပေးကြ၊ ရေးကြတာ တွေ့ရပါတယ်။ နာမည်အရင်းနဲ့ စာရေးတဲ့လူဆိုတာ လက်ချိုးရေလို့ရမယ် ထင်ပါရဲ့။

အထူးပြုစကားလုံးတွေနဲ့ အမည်ပေးထားကြတဲ့ စာရေးဆရာတွေ၊ အနုပညာရှင်တွေကို ကျွန်တော်ပြန်စဉ်းစားကြည့်မိတယ်။ လတ်တလော ခေါင်းထဲမှာ ပေါ်လာသမျှကို ချရေးမိတဲ့အခါ-

မြို့မ ငြိမ်း
ဘိုကလေး တင့်အောင်
လူထု ဦးလှ
လူထု ဒေါ်အမာ
လူထု စိန်ဝင်း
ဂျာနယ်ကျော် ဦးချစ်မောင်
ဂျာနယ်ကျော် မမလေး
ဒဂုန် ရွှေမျှား
ဒဂုန် ခင်ခင်လေး
ဒဂုန် တာရာ
ထီလာစစ်သူ
ရှုမ၀ ဦးကျော်
ရဝေနွယ် (အင်းမ)
မိုးမိုး (အင်းလျား)
အကော်ဒီယံ အုန်းကျော်
တွံတေး သိန်းတန်
လယ်တွင်းသား စောချစ်
နုနုရည် (အင်းဝ)
ချစ်နိုင် (စိတ်ပညာ)
မောင်လှမျိုး (ချင်းချောင်းခြံ)
မောင်စိန်ဝင်း (ပုတီးကုန်း)
မောင်ခင်မင် (ဓနုဖြူ)
ချစ်မောင် (အ၀ကျွန်း)
ခင်မောင်ထွေး (ပျဉ်းမနား)
ရှင်မိုး (ဆေးတက္ကသိုလ်)
ရာမည ကိုကိုနိုင်
ဆင်ဖြူကျွန်း အောင်သိန်း
မြင်းမူ မောင်နိုင်မိုး
မောင်စိမ်းနီ (လယ်ဝေး)
ခင်မောင်ညို (ဘောဂဗေဒ)
ကလျာ (၀ိဇ္ဇာ/သိပ္ပံ)
ကိုကို (စက်မှု)
တင့်ဆွေ (ဖျာပုံ)
ရွှေကူ မေနှင်း
မောင်သန်းဆွေ (ထားဝယ်)
ယဉ်ယဉ်နု (မန္တလေး)
မောင်ကိုကို (အမရပူရ)
ကိုငြိမ်း (မန္တလေး)
ဝင်းဝင်းမြင့် (နန်းတော်ရှေ့)
အဖျောက်မြေ မောင်ဆွေမွန်
မင်းနန် (မော်ကျွန်း)
မောင်ရင့်မာ (ကျောင်းကုန်း)
မောင်ကောင်းထိုက် (နှီးပဒေါ)

အဲဒါတွေကတော့ ခေါင်းထဲပေါ်လာသမျှ၊ စဉ်းစားလို့ရသမျှတွေထဲက အထူးပြုစကားလုံးတွေနဲ့ နာမည်ပေးထားတဲ့ သူတွေကို ရေးချလိုက်တာပါ။ အများကြီး ကျန်နေနိုင်ပါတယ်။ အခုရေးခဲ့တာတွေဟာ လူကုန်လို့ မယူဆစေလိုပါ။ ပြောချင်တာကတော့ အထက်ပါအတိုင်း အထူးပြုနာမည်တွေနဲ့ အမည်တွေ ပေးကြလေတော့ စာဖတ်သူတွေက ဘာလဲဆိုတာ စိတ်ဝင်စားကြတာ မလွန်ဘူးဟု ထင်ပါသည်။ တကယ်တမ်း ပြောရမည်ဆိုလျှင်တော့ စာရေးသူ၊ သို့မဟုတ် အနုပညာရှင်ရဲ့ နာမည်ထက် သူရေးတဲ့စာ၊ သူလုပ်တဲ့အလုပ်ကသာ ပိုအရေးကြီးတယ်ဆိုတာ မှန်ပါတယ်။ ဒါပေမယ့် သူတို့ရဲ့အလုပ်အတွက် သူတို့ကို မှတ်တမ်းတင်တဲ့အခါ၊ ရင်ထဲမှာ အမှတ်ထင်ထင် စွဲထင်နေတဲ့အခါမှာတော့ နာမည်တွေက အရေးကြီးလာတယ်လို့ ထင်မိပါတယ်။ ဆရာ လယ်တွင်းသား စောချစ်ရဲ့ စာတွေကို သဘောကျတဲ့ လူတစ်ယောက်က လယ်တွင်းသားဆိုတာ ဘာဖြစ်လို့ ထည့်ပေးထားရတာလဲဆိုတာ သိချင်မှာပါပဲ။ ထို့အတူ လူထုစိန်ဝင်းရဲ့ ဆောင်းပါးတွေကို အမြဲတစေ စောင့်ဖတ်ရတဲ့ ပရိသတ်ကလည်း လူထုဆိုတာ ဘာကိုအစွဲပြုပြီး ထည့်ပေးထားတာလဲဆိုတာ သိထားချင်မှာပါပဲ။ ဒေသနာမည်၊ မြို့နာမည်တွေကို သူ့အတိုင်း ထည့်ထားတာဆိုရင်တော့ ပြောစရာမရှိဘူးပေါ့လေ။ ဥပမာ... ခင်မောင်ထွေး (ပျဉ်းမနား)ဆိုရင် သြော်... ဆရာခင်မောင်ထွေးက ပျဉ်းမနားကကိုးလို့ ခန့်မှန်းလို့ရ၊ ပြောလို့ရတာကိုး။ ထို့အတူ မောင်ကိုကို (အမရပူရ) ဆိုတာလည်း အမရပူရမြို့ကို အစွဲပြုပြီး မှည့်ခေါ်ထားမှန်း သိသာပါတယ်။ ဒါပေမယ့် ချင်းချောင်းခြံလို၊ ပုတီးကုန်းလို၊ အင်လျားလို၊ ရာမညလိုမျိုး အထူးပြုစကားလုံးတွေ ဆိုရင်တော့ တော်ရုံစာဖတ်သူတွေက မသိနိုင်ကြဘူးလို့ ထင်ပါတယ်။ ဒါကလည်း ကျွန်တော့်အထင်ပါ။

ကျွန်တော်ဒီပို့စ်ကို ရေးရခြင်း ရည်ရွယ်ချက်က အထက်မှာပြောခဲ့သလို ကျွန်တော်တို့ဆီမှာ စာရေးဆရာတွေ၊ ကဗျာဆရာတွေ၊ အနုပညာရှင်ကြီးတွေ အများကြီး ပေါ်ထွန်းခဲ့၊ ပေါ်ထွန်းဆဲ ရှိပါတယ်။ အချို့အချို့သော စာရေးဆရာတွေ၊ အနုပညာရှင်တွေရဲ့ နာမည်တွေမှာ အထူးပြုလေးတွေ ပါနေတတ်ပါတယ်။ တချို့အထူးပြုလေးတွေက နားလည်လွယ်တယ်။ ချက်ချင်းသိနိုင်တယ်။ ဒါပေမယ့် အချို့အချို့လေးတွေကတော့ သူ့အဓိပ္ပါယ်နဲ့သူ၊ သူ့ချိတ်နဲ့သူပါ။ အဲဒီလို စကားလုံးတွေကို လုပ်ချင်စိတ်ရှိကြသူများ၊ လုပ်နိုင်စွမ်းရှိကြသူများက ဦးစီးဦးဆောင်ပြုပြီး မှတ်တမ်းသဘောမျိုး၊ စာတမ်းသဘောမျိုး ပြုစုရေးသားထားကြလျှင်ဖြင့် စာဖတ်သူတွေအတွက် အင်မတန် အကျိုးရှိမှာပဲလို့ တိုက်တွန်းချင်တာပါ။

လူထုဆိုတဲ့ စကားလုံးကို ရှင်းပြတဲ့အခါ ကျွဲကူးရေပါဆိုသလို ဟိုးအရင်က လူထုသတင်းစာအကြောင်း၊ လူထုမောင်နှံအကြောင်း၊ လူထုစာအုပ်တိုက်အကြောင်း စသည်ဖြင့် ပါလာမှာပါပဲ။ ထို့အတူ မြို့မဆိုတဲ့ စကားလုံးကို ရှင်းပြရင်းနဲ့ မြို့မရဲ့ အဓိပ္ပါယ်ကွဲတွေအကြောင်း၊ မြို့မအဖွဲ့ကြီးအကြောင်း၊ ပေါ်ထွန်းခဲ့တဲ့ မြို့မပညာရှင်တွေအကြောင်း သိလာရမယ်လို့ မျှော်လင့်ပါတယ်။

ကျွန်တော်ကိုဉာဏ်ကတော့ လုပ်ချင်စိတ်ရှိပါရဲ့... ဒါပေမယ့် လုပ်နိုင်စွမ်းမရှိဘူး ဖြစ်နေပါတယ်။ အဲဒါကြောင့် လုပ်နိုင်တဲ့လူများကို လုပ်ကြစေချင်ကြောင်း အလေးအနက် တိုက်တွန်းလိုတာပါ။ ကျွန်တော်ရေးတဲ့အထဲမှာ မပါတဲ့ နာမည်တွေနဲ့ အဓိပ္ပါယ်တွေကိုလည်း ပြောပြပေးနိုင်ရင် ပြောပြပေးကြပါဦးလို့....။

အမှတ်တရ
ကိုဉာဏ် (ပန်းလောင်မြေ)
၂၀၁၀ ပြည့်နှစ်၊ သြဂုတ်လ ၃၁ ရက်၊ အင်္ဂါနေ့။
နံနက် ၉ နာရီ ၂၅ မိနစ်တွင်ပြီး၏။