(၁)
ပြည်ထောင်စုဝန်ကြီး (၅) ဦးအား ၀န်ကြီးဌာနပြောင်းလဲရန် သတင်းများ ထွက်ပေါ်နေကြောင်း The VOICE ဂျာနယ်၊ အတွဲ (၈)၊ အမှတ် (၃၂) တွင် သတင်းဖော်ပြထားသည်ကို ဖတ်ရှုရသည်။ ပြောင်းရွှေ့ခံရမည်ဟု သတင်းထွက်ပေါ်နေသော ပြည်ထောင်စုဝန်ကြီးများမှာ-
(က) ဦးလှထွန်း
( ခ) ဦးတင်နိုင်သိန်း
( ဂ) ဦးစိုးသိန်း
(ဃ) ဦးအောင်မင်း
( င) ဦးအေးမြင့်ကြူ တို့ ဖြစ်ကြသည်။
ထို့ပြင် လက်ရှိဖွဲ့စည်းထားသည့် ၀န်ကြီးဌာနများကိုလည်း ကျစ်ကျစ်လစ်လစ်ဖြစ်အောင် ပြန်လည်ဖွဲ့စည်းသွားမည်ဟု သတင်းများထွက်ပေါ်နေကြောင်း အဆိုပါ ဂျာနယ်၌ပင် ဖော်ပြထားသည်။
(၂)
အင်တာနက်ပေါ်တွင်လည်းကောင်း၊ ပြည်တွင်းထုတ်ဂျာနယ်များတွင်လည်းကောင်း ပျံ့နှံ့လျက်ရှိသည့် ပြည်သူ့လွှတ်တော် ကိုယ်စားလှယ် ဦးအောင်သိန်းလင်း ၏ တရုတ်နိုင်ငံထုတ် Southern Weekend သတင်းစာနှင့် အင်တာဗျူးပါ စကားရပ်များအပေါ် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီက စုံစမ်းစစ်ဆေးမှုများ ပြုလုပ်လျက်ရှိကြောင်း 7Day News ဂျာနယ်၏ အင်တာနက်စာမျက်နှာတွင် သတင်းဖော်ပြထားပါသည်။ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ ကြေညာချက်တစ်ရပ် ထုတ်ပြန်ပြီး အဆိုပါစကားသာ အမှန်တကယ် ပြောဆိုခဲ့ပါက ၎င်းမှာ ဦးအောင်သိန်းလင်း၏ ပုဂ္ဂလိကမှတ်ချက် စကားသာဖြစ်ပြီး ပြည်ခိုင်ဖြိုးပါတီ၏ သဘောထား မဟုတ်ကြောင်း ပါရှိသည်။ စစ်ဆေးတွေ့ရှိချက်အရ အဆိုပါစကားအား ဦးအောင်သိန်းလင်း အမှန်တကယ် ပြောဆိုခဲ့ပါက ပါတီစည်းကမ်းအရ အရေးယူသွားမည်ဖြစ်ကြောင်း ဖတ်ရှုရပါသည်။
(၃)
၂၀၁၂ ခုနှစ်၊ ဇူလိုင်လ ၂၉ ရက်နေ့ နံနက် ၈ နာရီ ၅၁ မိနစ် အချိန်ခန့်တွင် ဟာခါးမြို့အနီးကို ဗဟိုပြု၍ အင်အား ရစ်(စ်)ချက်တာစကေး ၅.၈ အဆင့်ရှိ အင်အားအသင့်အတင့်ရှိ ငလျင်တစ်ခု လှုပ်ခတ်သွားခဲ့ကြောင်း Eleven Media Group ၏ အင်တာနက်စာမျက်နှာတွင် ဖော်ပြထားသည်။ အဆိုပါ ငလျင်အား ပြင်ဦးလွင်၊ မိုးကုတ်၊ ဟုမ္မလင်း၊ ကလေးဝ၊ ကလေး၊ ရွှေဘို၊ မြင်းမူ မြို့များတွင်လည်း ခံစားသိရှိခဲ့ရသည်ဟု ရေးသားဖော်ပြထားပါသည်။
(၄)
လူ့ဘောင်သစ်ပါတီနှင့် ABSDF ၏ ဥက္ကဋ္ဌဟောင်းဖြစ်သူ မိုးသီးဇွန် အနေဖြင့် ယခုနှစ် သြဂုတ်လကုန်ပိုင်းတွင် မြန်မာနိုင်ငံသို့ လေ့လာရေးခရီး သွားရောက်မည်ဖြစ်ကြောင်း The VOICE ဂျာနယ်၊ အတွဲ (၈)၊ အမှတ် (၃၂)၏ အချပ်ပိုစာမျက်နှာ (D) တွင် ရေးသားဖော်ပြထားသည့် မိုးသီးဇွန်နှင့် အင်တာဗျူးတွင် ဖော်ပြထားပါသည်။ မိုးသီးဇွန်နှင့်အတူ ကိုမူးသာ၊ ကိုထွန်းအောင်ကျော်၊ ကိုကိုလေး၊ ကိုယဉ်အေး၊ ကိုကိုအောင် တို့ ပါဝင်မည်ဖြစ်ကြောင်း ဖော်ပြထားသည်။ ထို့ပြင် မိုးသီးဇွန်၏ အဖြေစကားတွင် "မြန်မာပြည်မှာ ဒီမိုကရေစီရအောင် အဦးဆုံး ကျွန်တော်တို့ တောင်းဆိုခဲ့တယ်" ဟူ၍ လည်းကောင်း၊ "၂၄ နှစ်လုံး တစ်ရက်မှ မနားဘဲ ကျွန်တော်တို့ ကြိုးပမ်းခဲ့တဲ့ ဖြစ်စဉ်ရဲ့ အစိတ်အပိုင်း တစ်ခုမျှသာ ဖြစ်ပါတယ်" ဟူ၍ လည်းကောင်း ဖြေကြားခဲ့သည်ကို တွေ့ရှိရပါသည်။
(၅)
ရခိုင်ပြည်နယ်တွင် ဖြစ်ပွားခဲ့သည့် ပဋိပက္ခများအား ကိုင်တွယ်ဖြေရှင်းရာတွင် ခွဲခြားဆက်ဆံမှုများ ရှိခဲ့ကြောင်းနှင့် ယခုအချိန်အထိ လုံခြုံရေးတပ်ဖွဲ့များ၏ ညှဉ်းပန်းနှိပ်စက်မှုများ ရှိနေကြောင်း၊ သို့ဖြစ်၍ လွတ်လပ်သည့် စုံစမ်းစစ်ဆေးမှုတစ်ရပ် ပြုလုပ်ရန်လိုအပ်ကြောင်း ကုလသမဂ္ဂ လူ့အခွင့်အရေးကောင်စီ မဟာမင်းကြီး Navi Pillay က ပြောဆိုခဲ့ကြောင်း BBC, VOA အင်တာနက် စာမျက်နှာများတွင် ဖော်ပြထားသည်ကို ဖတ်ရှုရပါသည်။ ထို့ပြင် ယခု မြန်မာနိုင်ငံသို့ ရောက်ရှိနေသည့် မစ္စတာ ကင်တားနား၏ ခရီးစဉ်သည် လွတ်လပ်သော စုံစမ်းစစ်ဆေးမှုအတွက် အစားထိုးလဲလှယ်ရန် မဟုတ်ကြောင်း ဖော်ပြပါရှိပါသည်။
အမှတ်တရ
ကိုဉာဏ် (ပန်းလောင်မြေ)
၂၀၁၂ ခုနှစ်၊ ဇူလိုင်လ ၃၀ ရက်၊ တနင်္ဂနွေနေ့။
နံနက် ၀၀ နာရီ ၄၀ မိနစ်တွင်ပြီး၏။
No comments:
Post a Comment