"..... အခြေအနေမှန်တွေကို ငါကသိတယ်.. တို့လူတွေရဲ့ အနေအထားကို...။ အဲဒါနဲ့ ငါက ပွင့်ပွင့်လင်းလင်း ရေးတာကွ...။ ရေးတော့ အဲဒါကို သမ္မတကြီးလည်း ဖတ်တယ်...။ သမ္မတကြီး မဖတ်ခင် သမ္မတကတော်ကြီးက အရင်ဖတ်တယ်...။ သူ့ကို ဂျီတိုက်တယ်တဲ့...။ သမ္မတကြီးက ငါ့ကို ပြောပြတယ်။ ရှင် အဘထွတ် ရေးတဲ့ဟာကို ဖတ်ဦး... သိပ်ကောင်းတာပဲ... ဘာညာလို့ပြောပြီး... ကျွန်တော်ကလည်း အလုပ်တွေများလို့တဲ့ မဖတ်ဖြစ်ဘူးပေါ့...။ နောက်တစ်နေ့ကျတော့ တနင်္ဂနွေနေ့ကြီး ငါ့ကို ခေါ်တယ်... လယ်ကွက်ထဲ သွားရအောင်ဗျာတဲ့...။ သွားကြတယ်.... သွားတော့ ကားပေါ်မှာ သူနဲ့ငါနဲ့ နှစ်ယောက်တည်း ထိုင်တယ်...။ ထိုင်ပြီးတော့မှ သူကပြောပြတယ်... ကျွန်တော် ဒီမနက်ပဲတဲ့ မနက်အိပ်ရာထပြီးတော့မှ မနက်စာ စားရင်းနဲ့ပေါ့.. ဒါလေးဖတ်ကြည့်တာ.. ကောင်းတယ်ပြောတယ်...။ သူတို့ လက်ခံတယ်...။ သမ္မတကြီးက ဥက္ကဋ္ဌကွာ၊ ဦးရွှေမန်းက ဒုဥက္ကဋ္ဌ၊ သူတို့လူကြီးတွေ လက်ခံတယ်...။ ပါတီရဲ့ CEC တွေကလည်း မပြောဘူး။ အဲတော့ ငါကလည်း အဲဒါ ဖြန့်လည်းဖြန့်လိုက်ရော တစ်ခါတည်း သူတို့က မိတ္တူတွေကူးပြီးတော့ တိုင်းနဲ့ပြည်နယ်တွေ သူတို့ကလည်း ပို့တာ။ လွှတ်တော်ကိုယ်စားလှယ်တွေကလည်း လာတောင်းတယ်။ အဘရယ် အဘရေးတဲ့ သုံးသပ်ချက်လေးကောင်းလို့ ပေးပါဦးဆိုပြီးတော့။ သူတို့ကလည်း သူတို့နယ်ပြန်ရင် ငါ့ဟာနဲ့ကိုင်ပြီးတော့ ဟိုကောင်တွေကို တုတ်တယ်။ မင်းတို့တွေ အဘဦးတင်ထွတ် ဝေဖန်ထားတာ။ မတူသလို မတန်သလို မင်းတို့ကွက်တိပဲ ဘာညာနဲ့။ အဲဒီလို ဖြစ်တာကွ။ ပြီးရောပေါ့ကွာ။ မင်းတို့လည်း လက်ခံတယ်မဟုတ်လား...."
(ဦးတင်ထွတ်၊ ဗဟိုအတွင်းရေးမှူး၊ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ)
ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ
ကြားဖြတ်ရွေးကောက်ပွဲတွင် တွေ့ရှိရသော အားနည်းချက်များမှာ -
(က) ပါတီဝင်များ
ပါတီဝင်များတွင် အာဏာငမ်းဖမ်းနေသူများ၊ နေရာလိုချင်သူများ၊ ထင်ပေါ်လိုသူများ၊ ပြည်သူက အမြင်မကြည်လင်သူများ စသည်တို့ ရောထွေးပါဝင်လာပြီး ယုံကြည်ချက်၊ ခံယူချက် ခိုင်မာမှုမရှိသည်ကို တွေ့ရသည်။ ဥပမာ - မြို့နယ်တစ်မြို့နယ်တွင် ပါတီဝင်အင်အား ၅၀၀၀၀ ကျော် ရှိသော်လည်း မိမိပါတီ ကိုယ်စားလှယ်ကို ဆန္ဒမဲပေးရာတွင် ၄၀၀၀ ကျော်သာရှိပြီး ကျန်ပါတီဝင်များ အခြားပါတီသို့ မဲပေးသည်ကို တွေ့ရသည်။
(ခ) ရပ်/ကျေး စည်းရုံးရေးမှူးများ
မြို့နယ်၊ ခရိုင်၊ ပြည်နယ်၊ တိုင်း ပါတီကော်မတီများတွင် အောက်ပါအားနည်းချက်များ တွေ့ရှိရပါသည် -
- ကွက်ပြည့်နင်း စည်းရုံးရေး အားနည်းခြင်း၊
- ခေါင်းဆောင်မှုနှင့် စည်းရုံးရေး အရည်အချင်း အားနည်းခြင်း၊
- ပါတီကေဒါနှင့် မတူဘဲ လခစားဝန်ထမ်းဆန်ဆန် ပြုမူလုပ်ကိုင်ခြင်း (ထောက်ပံ့ကြေးနှင့် ကုန်ကျစရိတ် မရလျှင် မည်သည့်အလုပ်ကိုမျှ မလုပ်ပါ)
- မူဝါဒအပေါ် ယုံကြည်ချက်အားနည်းခြင်း၊
- စစ်အလေ့အထရောဂါ၊ အာဏာငမ်းရူးရောဂါ၊ အချောင်သမားရောဂါ၊ သူလျှို ဒလံရောဂါ၊ အကျင့်ပျက်ရောဂါ တည်းဟူသော သူငယ်နာ ၅ မျိုး စွဲကပ်နေခြင်း။
(ဂ) ရွေးကောက်ပွဲဆိုင်ရာ အဖွဲ့အစည်းများ
- မဲရုံမှူးဝန်ထမ်းများ။ အချို့ မဲရုံမှူးဝန်ထမ်းများသည် မိမိတို့ပါတီမှအပ အခြားပါတီများသို့ ဘက်လိုက်ပြီး ပယ်မဲဖြစ်စေရန်၊ မှန်ကန်သော အခွင့်အရေး မရစေရန် ဆောင်ရွက်ခြင်း၊
- ရပ်/ကျေး နှင့် မြို့နယ်ကော်မရှင်များ။ NLD လိုလားသူများ၊ ဆွေမျိုးများ ပါဝင်နေပြီး မိမိတို့ပါတီ၏ တင်ပြချက်၊ ကန့်ကွက်ချက်များကို မျက်ကွယ်ပြု၍ ဘက်လိုက်ဆုံးဖြတ်ခြင်း။
- အုပ်ချုပ်ရေးဝန်ထမ်းများ။ အချို့သော ရပ်/ကျေး အုပ်ချုပ်ရေးမှူးများ၊ စာရေးများ၊ မြို့နယ်အဆင့် အုပ်ချုပ်ရေးဝန်ထမ်းများသည် နောက်ကွယ်မှ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီအား ဆန့်ကျင်ဖိနှိပ်၍ တစ်ဖက်ပါတီ အသာစီးရစေရန် လှုံ့ဆော်စည်းရုံးခြင်း။
(ဃ) အုပ်ချုပ်ရေးယန္တရား၏ တန်ပြန်အကျိုးသက်ရောက်မှုများ
- တပ်မတော်အစိုးရလက်ထက် ဆောင်ရွက်ခဲ့သော ပြည်သူ မကျေနပ်သည့် လုပ်ရပ်များကို ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီအပေါ် တစ်နွယ်ငင်၊ တစ်စင်ပါ အမြင်မကြည်လင်၊ မနှစ်သက်ခြင်းများ တွေ့ရှိရပါသည်။
- ၀န်ကြီးဌာန အကြီးအကဲအများစုသည် တပ်မတော်အရာရှိကြီးများ ဖြစ်သည့်အပြင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီဝင်များ၊ အမှုဆောင်များလည်း ဖြစ်ကြပါသည်။ ထိုတာဝန်ရှိသူ အကြီးအကဲများအပေါ် မကျေနပ်၊ မနှစ်သက်၊ မကြည်ညိုမှုများသည်လည်း ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီအပေါ် မကောင်းသောဆိုးကျိုးများ ကျရောက်စေခဲ့ပါသည်။
- ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီသတင်းအား ဖော်ပြမှု အားနည်းခြင်း၊ မှောင်ချထားမှုများရှိခြင်း။
- ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီနှင့် ပြည်သူကြား အမြင်မကြည်လင်အောင် သွေးထိုးသပ်လျှိုမှုများ ပြုလုပ်ခံရခြင်း။
ကြားဖြတ်ရွေးကောက်ပွဲအပေါ် သုံးသပ်ချက်
NLD ပါတီသည် ဒေါ်စုကြည်၏ ထင်ပေါ်ကျော်ကြားမှု၊ နိုင်ငံတကာ (အထူးသဖြင့် အနောက်နိုင်ငံများ) ၏ အားပေးထောက်ခံမှု၊ နှစ် ၂၀ ခန့် ထိန်းသိမ်းခံရခြင်းအပေါ် သနားကြင်နာမှု၊ ဗိုလ်ချုပ်အောင်ဆန်းအပေါ် ကြည်ညိုလေးစားမှု၊ ဒေါ်စုကြည် အနိုင်ရလျှင် တိုင်းပြည်တိုးတက်မည်ဟူသော မျှော်လင့်အားကိုးမှုတို့ကြောင့် NLD အနိုင်ရခဲ့သည်ဟု ဆိုနိုင်ပါသည်။
NLD သည် ပြည်သူတွေ ခံစားနေရသော ဆင်းရဲနွမ်းပါးမှု၊ အလုပ်အကိုင်အခွင့်အလမ်း ရှားပါးမှု၊ အဆင့်ဆင့်သော အစိုးရ၏ အုပ်ချုပ်ရေးယန္တရားအပေါ် မကျေနပ်မှုများကို အခြေခံ၍ ရွေးကောက်ပွဲ စည်းရုံးလှုံ့ဆော်မှု ပြုလုပ်ခဲ့ကြောင်း တွေ့ရှိရပါသည်။
အချို့သော အစိုးရအုပ်ချုပ်ရေးယန္တရားအဆင့်ဆင့်၏ အကျင့်ပျက် လာဘ်စားမှု၊ အနိုင်ကျင့်မှု၊ ကိုယ်ကျိုးရှာ မသမာမှုများရှိနေခြင်း၊ (Top-Down) အထက်မှအောက်သို့ အမိန့်ပေး၊ အမိန့်ခံ စီးဆင်းသည့် စစ်အလေ့အထရောဂါကို ပြည်သူများရော၊ ၀န်ထမ်းများပါ ကြုံတွေ့ခံစားနေရ၍ ကောင်းမွန်သော အုပ်ချုပ်ရေးစနစ် အပြောင်းအလဲကို တမ်းတမျှော်လင့်နေကြောင်း တွေ့ရှိရပါသည်။
NLD အနိုင်ရလျှင် ပြည်သူများမှ အစိုးရကို ကြောက်ရွံ့နေရခြင်းမှ ကင်းလွတ်မည်၊ အုပ်ချုပ်ရေးဌာနအဆင့်ဆင့်၏ အနိုင်ကျင့်ခြင်း၊ မတရားပြုမူခြင်းမှ ကင်းလွတ်မည်၊ ၀န်ထမ်းများအတွင်း၌လည်း နှစ်ပေါင်းများစွာ အမြစ်တွယ်နေသည့် စစ်အုပ်ချုပ်ရေးစနစ် ကင်းစင်ပပျောက်မည်ဟု မျှော်လင့်လျက်ရှိကြောင်း တွေ့ရှိရပါသည်။
ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီသည် လက်ရှိအစိုးရအပေါ် မိမိတို့ တင်မြှောက်ထားသည့် မိမိတို့၏ အစိုးရဟုလည်းကောင်း၊ အဖွဲ့ဝင်များကို ရဲဘော်ရဲဘက်များ၊ လုပ်ဖော်ကိုင်ဖက်များဟုလည်းကောင်း သဘောထားပြီး သက်ညှာသော၊ ကြင်နာသော၊ ကူညီပံ့ပိုးလိုသော၊ အစိုးရ၏ ငြိုငြင်မှုခံရမှာကို စိုးရိမ်သောစိတ်ထားဖြင့် အစိုးရအပေါ် ဝေဖန်ခြင်း၊ ထောက်ပြခြင်းပြုလုပ်ရန် တုံ့နှေးလျက်ရှိကြောင်း တွေ့ရှိရပါသည်။ ယင်းလုပ်ရပ်များအပေါ် ပြည်သူများမှ ပါတီအပေါ် အားမလိုအားမရဖြစ်လျက် ရှိပါသည်။
NLD ပါတီ အနိုင်ရလျှင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီထက် အစိုးရအပေါ် ဝေဖန်ထောက်ပြ၊ ပြုပြင်ထိန်းကျောင်းပေးနိုင်လိမ့်မည်ဟု အားထားမျှော်လင့်လျက်ရှိကြောင်း တွေ့ရှိရပါသည်။
ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ၏ ဆောင်ရွက်သင့်သော ရှေ့လုပ်ငန်းစဉ်များ
ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီသည် အစိုးရ၏ အားနည်းချက်ကို ထောက်ပြဝေဖန်ခြင်း၊ ပြည်သူ့ဆန္ဒအမှန်များကို ဖော်ထုတ်ပေးခြင်း၊ ပြည်သူ၏ လိုအပ်ချက်ကို ဖော်ဆောင်ပေးခြင်း ပြုသူများကို သူရဲကောင်းများဟု ပြည်သူများက ယူဆနေသည်ကို သတိပြုရန် လိုအပ်ပါသည်။ နှစ်ပေါင်းများစွာ ကျင့်သုံးခဲ့သော စစ်အငွေ့အသက် မကုန်သေးသော၊ အုပ်ချုပ်ရေးယန္တရားကို ပြည်သူတွေက စိတ်ပျက်ငြီးငွေ့၊ ရိုးအီနေသော အချိန်ကာလတွင် အစိုးရမျက်နှာထက် နိုင်ငံ့အကျိုး၊ ပြည်သူ့အကျိုးကိုသာ ရဲရဲဝံ့ဝံ့ လုပ်ဆောင်ရန် လိုအပ်ပါသည်။
အဆင့်ဆင့်သော ပါတီအတွင်း၌ ပါတီ၏ဦးဆောင်မှုကို ခံယူမှုမရှိသော အားနည်းသော ပါတီဝင်များ၊ အမှုဆောင်များကို ပါတီ၏ စည်းကမ်း၊ လုပ်ထုံးလုပ်နည်းများနှင့်အညီ အရေးယူလျက် ပါတီသန့်စင်ရေးကို ပြုလုပ်ရန် လိုအပ်ပါသည်။
၂၀၁၂ ခုနှစ် ကြားဖြတ်ရွေးကောက်ပွဲသည် ၁၉၉၀ ပြည့်နှစ် ရွေးကောက်ပွဲဖြစ်စဉ်နှင့် တူညီပါသည်။ ထိုစဉ်အခါက တိုင်းရင်းသားစည်းလုံးညီညွတ်ရေးပါတီ (တစည) သည် မူဝါဒ၊ လမ်းစဉ်၊ ဖွဲ့စည်းမှု ကောင်းမွန်ပြီး ပါတီဝင်အင်အားနှင့် ပါတီရန်ပုံငွေလည်း တောင့်တင်းခိုင်မာပါသည်။ သို့ရာတွင် မြန်မာ့ဆိုရှယ်လစ်လမ်းစဉ်ပါတီ အစိုးရ၏ ၂၆ နှစ်တာ ကာလအတွင်း တွေ့ကြုံရသော အထွေထွေ အကြပ်အတည်းများ၊ ပြည်သူတို့၏ အစိုးရအပေါ် မကျေနပ်မှုများ၊ အကျင့်ပျက်ခြစားမှုများ၊ အာဏာအလွဲသုံးစားလုပ်မှုများ၊ တာဝန်ရှိသူများ၏ အခွင့်ထူးခံမှုများကြောင့် ၁၉၉၀ ပြည့်နှစ် ရွေးကောက်ပွဲတွင် တိုင်းရင်းသားစည်းလုံးညီညွတ်ရေးပါတီ (တစည) အနိုင်မရလျှင်ပြီးရော၊ မည်သို့သော NLD လွှတ်တော်ကိုယ်စားလှယ်ပင်ဖြစ်စေ အရည်အချင်း ရှိသည်-မရှိသည်၊ မစဉ်းစားမဆင်ခြင်ဘဲ မဲပေးခဲ့ကြသည်။ တစည ပါတီသည် အတိတ်၏ အရိပ်မည်း ဖုံးအုပ်ခြင်းကို ခံခဲ့ရပြီး ယနေ့တိုင် နာလန်မထူသည့်ဘ၀သို့ ရောက်ခဲ့ရသည်ကို သင်ခန်းစာ ယူသင့်ပေသည်။ ပြည်သူများသည် အပြောင်းအလဲ (Change) ကို လိုချင်နေသည်မှာ ပို၍ပို၍ သိသာထင်ရှားလာသည်ကို တွေ့ရပါသည်။ ယခု ကြားဖြတ်ရွေးကောက်ပွဲတွင်လည်း သမိုင်းဘီး တစ်ပတ်ပြန်လည်လာသည်ဟု ဆိုရပါမည်။ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီသည် မူဝါဒ၊ လမ်းစဉ်ကလည်း ကောင်းသည်။ ပါတီဝင်အင်အားနှင့် ရန်ပုံငွေလည်း တောင့်တင်းသည်။ သို့ရာတွင် ပြည်သူများ လိုလားတောင့်တသည့် (Change) အပြောင်းအလဲကို ဖော်ဆောင်ပေးနိုင်ခြင်း မရှိသည့်အပြင် ပြည်သူ့ဆန္ဒများကိုလည်း ဖြည့်ဆည်းဆောင်ရွက်ပေးနိုင်ခြင်း မရှိ၍ ပြည်သူတို့၏ ယုံကြည်မှုနှင့် ထောက်ခံမှု ကျဆင်းလာပေသည်။
သို့ဖြစ်ရာ ကောင်းမွန်သော အုပ်ချုပ်ရေးစနစ်နှင့် သန့်ရှင်းသောအစိုးရ ဖြစ်ပေါ်ရေးကို ပါတီမှ ဦးဆောင်၍ ပြုပြင်ပေးမှသာလျှင် ပါတီ၏ အနာဂတ်အရေး ကောင်းမွန်လှပမည် ဖြစ်သည်။ ထို့ကြောင့် ပုဂ္ဂိုလ်ရေးသံယောဇဉ်၊ အဖွဲ့အစည်းသံယောဇဉ်များကို ဖြတ်တောက်လျက် တိုင်းပြည်နှင့်လူမျိုးအကျိုး တစ်ခုတည်းကိုသာ ကြည့်ရှုထောက်ထားပြီး ရဲရဲဝံ့ဝံ့ သတ္တိရှိရှိ ဆောင်ရွက်သွားရန်မှတစ်ပါး အခြားနည်းလမ်း မရှိကြောင်း ထင်မြင်ယူဆပါသည်။ မမှန်မကန်လုပ်နေသော လူနည်းစု၏ အမုန်းခံမလား၊ ပါတီကို အဆုံးခံမလား၊ ရွေးချယ်ရတော့မည့် အချိန်အခါဖြစ်ကြောင်း တင်ပြအပ်ပါသည်။
[မြန်မာသံတော်ဆင့်ဂျာနယ်၊ အတွဲ ၁၊ အမှတ် ၂၆၊ စာမျက်နှာ ၁၉၊ ၂၀၊ ၂၁ တို့မှ ပြန်လည်ကူးယူဖော်ပြပါသည်။]
No comments:
Post a Comment