နိဒါန်း
စက္ကန့်ပိုင်းလောက်ပဲဖြစ်ဖြစ် ကွန်ပျူတာကို ပိတ်လိုက်တာနဲ့ သတင်းအချို့ကို သင်လက်လွတ်သွားမှာ သေချာနေပါပြီ။ မနက်ပိုင်းကပဲ အင်တာနက်စာမျက်နှာတွေမှာ သတင်းတွေ လိုက်ဖတ်တုန်းက ဘာမှထွေထွေထူးထူး မတွေ့ခဲ့ရသော်လည်း နေ့လည်ပိုင်း အင်တာနက်ပြန်သုံးတဲ့အချိန်မှာ သတင်းတွေက နည်းတာမဟုတ်ပါဘူး။ ဟူးးးးးးးးးးးးးး အတော်ကြီးကို စိတ်မောသွားတယ်၊ ဒီနေ့ခေတ်ကြီးမှာ သတင်းတွေနောက်ကိုသာ လိုက်နေရရင် လိုက်တဲ့လူသာ မောသွားမယ်။ သတင်းကတော့ ကုန်မယ်မထင်ပါဘူး။ ကိုယ်တွေနဲ့ တိုက်ရိုက်သက်ဆိုင်တဲ့ သတင်းတွေ ရှိသလို၊ တိုက်ရိုက်ပတ်သက်ခြင်း မရှိဘဲ သိသင့်တဲ့ သတင်းတွေလည်း ရှိတာပါပဲ။ ဘယ်လိုပဲဖြစ်ဖြစ် အခုလိုမျိုး သတင်းတွေကို စက္ကန့်ပိုင်းအတွင်း၊ မိနစ်ပိုင်းအတွင်း သိခွင့်ရလာတာကပဲ ကျွန်တော်တို့နိုင်ငံရဲ့ တိုးတက်လာတဲ့ အပြောင်းအလဲတစ်ခု၊ အရွေ့တစ်ခုလို့ ကျွန်တော်ကိုဉာဏ်က မှတ်ချက်ချချင်ပါတယ်။ ကျွန်တော်ဖတ်မိသမျှ သတင်းတွေကို စုစည်းတင်ပေးလိုက်ပါတယ်။ အားလုံးတော့ သတင်းအသစ်တွေ ဖြစ်ချင်မှ ဖြစ်ပါလိမ့်မယ်။ စာဖတ်သူတွေ သိပြီးဖတ်ပြီးသား သတင်းတွေများ ပါနေခဲ့ရင်လည်း နားလည်ပေးကြပါဦး။ အချို့သော ကျွန်တော့်ခံစားချက်များကိုလည်း သည်းခံဖတ်ရှုပေးကြပါဦးခင်ဗျာ။
(က)
ကာကွယ်ရေးဝန်ကြီးဌာန၀န်ကြီးအဖြစ် ဒုတိယဗိုလ်ချုပ်ကြီး ဝေလွင် ကို ပြောင်းလဲခန့်အပ်လိုကြောင်း တပ်မတော်ကာကွယ်ရေးဦးစီးချုပ်က နိုင်ငံတော်သမ္မတထံကို အကြောင်းကြားခဲ့တယ်လို့ သိရပါတယ်။ အဲဒီအတွက် နိုင်ငံတော်သမ္မတက ပြည်ထောင်စုလွှတ်တော် နာယကထံကို သ၀ဏ်လွှာ ပေးပို့ခဲ့တယ်လို့ သတင်းတွေမှာ ဖတ်ရပါတယ်။ လက်ရှိ ကာကွယ်ရေးဝန်ကြီးအဖြစ် တာဝန်ထမ်းဆောင်နေသူ ဒုတိယဗိုလ်ချုပ်ကြီး လှမင်းကိုတော့ တပ်မတော်မှာ စစ်ဘက်ဆိုင်ရာ တာဝန်များကို ပြန်လည်ထမ်းဆောင်စေမှာ ဖြစ်တယ်လို့လည်း သတင်းတွေမှာ ဖတ်ရပါတယ်။
(ခ)
ရာထူးမှ နုတ်ထွက်သွားသဖြင့် လစ်လပ်နေသော ပြည်ထောင်စုစာရင်းစစ်ချုပ် ရာထူးနေရာတွင် လက်ရှိ သတ္တုတွင်းဝန်ကြီးဌာန ပြည်ထောင်စုဝန်ကြီးအဖြစ် တာဝန်ထမ်းဆောင်နေသော ဦးသိန်းထိုက်ကို ခန့်အပ်လိုကြောင်း နိုင်ငံတော်သမ္မတက ပြည်ထောင်စုလွှတ်တော်နာယကထံ သ၀ဏ်လွှာ ပေးပို့ခဲ့တယ်လို့ သိရှိရပါတယ်။ ဦးသိန်းထိုက်သည် ယခင်က တပ်မတော်စစ်ဆေးရေး အရာရှိချုပ်အဖြစ် တာဝန်ထမ်းဆောင်ခဲ့ဖူးသူ ဖြစ်ကြောင်းလည်း သတင်းတွေမှာ ဖတ်ရှုရပါတယ်။
(ဂ)
ယခင်က အမှတ် (၁) လျှပ်စစ်စွမ်းအား ၀န်ကြီးဌာန၊ အမှတ် (၂) လျှပ်စစ်စွမ်းအား ၀န်ကြီးဌာနဟူ၍ ၀န်ကြီးဌာန ၂ ခုခွဲ၍ ဖွဲ့စည်းထားခဲ့သော်လည်း ယခုအခါ အဆိုပါ ၀န်ကြီးဌာန ၂ ခုကို ပေါင်းစည်း၍ လျှပ်စစ်စွမ်းအားဝန်ကြီးဌာနအဖြစ် ပြောင်းလဲဖွဲ့စည်းလိုကြောင်း နိုင်ငံတော်သမ္မတက ပြည်ထောင်စုလွှတ်တော် နာယကထံ သ၀ဏ်လွှာ ပေးပို့ထားတယ်လို့ သိရှိရပါတယ်။
(ဃ)
ဖွဲ့စည်းပုံအခြေခံဥပဒေဆိုင်ရာခုံရုံး ဥက္ကဋ္ဌနဲ့အဖွဲ့ဝင်တွေကို စွပ်စွဲပြစ်တင်ကြောင်း အဆိုအား အမျိုးသားလွှတ်တော်မှာ အတည်ပြုခဲ့တဲ့အတွက် ပြည်သူ့လွှတ်တော်က စုံစမ်းစစ်ဆေးရေးအဖွဲ့ ဖွဲ့စည်းပြီး စုံစမ်းစစ်ဆေးမှုတွေ ပြုလုပ်ရမှာဖြစ်ပါတယ်။ သို့သော် မူလဖွဲ့စည်းထားတဲ့ စုံစမ်းစစ်ဆေးရေးအဖွဲ့မှာ ပါဝင်တဲ့ ဥက္ကဋ္ဌဖြစ်သူ ဦးနန္ဒကျော်စွာနဲ့ အဖွဲ့ဝင်တွေဟာ အမှုမှာ ပါဝင်ပတ်သက်နေသူတွေဖြစ်ခြင်း၊ စွပ်စွဲပြစ်တင်ဖို့ လက်မှတ်ရေးထိုး တောင်းဆိုခဲ့ကြသူများဖြစ်ခြင်း၊ လွှတ်တော်တွေမှာ တက်ကြွစွာ အဆိုတင်သွင်းခြင်း၊ ဆွေးနွေးခြင်း ပြုလုပ်ခဲ့ကြသူများ ဖြစ်ခြင်းတို့ကြောင်း ၎င်းတို့သာ စုံစမ်းစစ်ဆေးပါက တရားမျှတမှုရှိမည်ဟု မယူဆပါသဖြင့် ကန့်ကွက်ပါကြောင်း ခုံရုံးက ကန့်ကွက်စာ ပေးပို့ခဲ့တယ်လို့ သိရှိရပါတယ်။ အဲဒီအတွက် စုံစမ်းစစ်ဆေးရေးအဖွဲ့ ဥက္ကဋ္ဌအဖြစ် ဦးနန္ဒကျော်စွာ အစား အမ်းမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးသိန်းဆွေ ကို ဥက္ကဋ္ဌအဖြစ် ပြောင်းလဲတာဝန်ပေးအပ်လိုက်ပြီး စုံစမ်းစစ်ဆေးမှုများ စတင်ပြုလုပ်နေပြီဖြစ်ကြောင်း သတင်းများမှာ ဖတ်ရှုရပါတယ်။
(င)
မြန်မာနိုင်ငံသို့ ပြန်လည်ရောက်ရှိနေတဲ့ မိုးသီးဇွန်နဲ့ ပြည်တော်ပြန်အချို့ဟာ ယနေ့ ရန်ကုန်မြို့မှာ သတင်းစာရှင်းလင်းပွဲတစ်ခု ပြုလုပ်ခဲ့တယ်လို့ အင်တာနက်သတင်းတွေမှာ ကျယ်ကျယ်ပြန့်ပြန့် ဖော်ပြထားတာကို ဖတ်ရှုရပါတယ်။
(စ)
ရခိုင်ပြည်နယ် အရေးကိစ္စနဲ့ပတ်သက်ပြီး သမ္မတကြီးကို ထောက်ခံကြောင်းနှင့် ကွင်တားနားကို ကန့်ကွက်ကြောင်း ဆန္ဒဖော်ထုတ်ပွဲကို မန္တလေးမြို့မှာ စက်တင်ဘာ ၂ ရက်နေ့မှ ၄ ရက်နေ့အထိ ကျင်းပပြုလုပ်ရန် အရှင်ဝီရသူဆိုသည့် သံဃာတစ်ပါးက လျှောက်ထားခဲ့ရာ သက်ဆိုင်ရာက ခွင့်ပြုပေးခဲ့ပါတယ်။ သို့သော် စက်တင်ဘာ ၂ ရက်နေ့ ဆန္ဒဖော်ထုတ်ပွဲတွင် ခွင့်ပြုထားသည့် ပမာဏထက် အဆမတန် များပြားစွာ ပါဝင်လှုပ်ရှားခဲ့ကြသဖြင့် ဦးဆောင်လျှောက်ထားခဲ့သူ အရှင်ဝီရသူအား တာဝန်ရှိသူများက ခေါ်ယူဆွေးနွေးရာ မိမိသဘောဖြင့်မိမိ လာရောက်ပူးပေါင်းသူများအတွက် တာဝန်မယူနိုင်ကြောင်း ပြန်လည်ဖြေကြားခဲ့သည်ဟု သိရှိရပါသည်။ မလိုလားအပ်သော နောက်ဆက်တွဲ ပြဿနာများ မဖြစ်ပေါ်စေရန်အတွက် သက်ဆိုင်ရာက ခွင့်ပြုပေးထားခဲ့သည့် ငြိမ်းချမ်းစွာ ဆန္ဒဖော်ထုတ်ခွင့်အား ဥပဒေ၊ နည်းဥပဒေများနှင့်အညီ ပြန်လည်ရုပ်သိမ်းခဲ့ကြောင်း သိရှိရပါသည်။ သို့သော် အရှင်ဝီရသူဦးဆောင်သည့် ဆန္ဒဖော်ထုတ်သူများသည် အဆိုပါ တားမြစ်ချက်အား လိုက်နာခြင်းမရှိဘဲ ယနေ့တွင် ဆန္ဒဖော်ထုတ်မှုများ ဆက်လက်ပြုလုပ်ခဲ့ကြောင်း စိတ်မကောင်းစွာဖြင့် သတင်းများ ဖတ်ရှုရပါသည်။ (မြန်မာ့နိုင်ငံရေးကို နောက်ပြန်ဆွဲနေသူများသည် မည်သူတို့ဖြစ်ကြောင်း ပြည်သူတို့က ရှင်းရှင်းလင်းလင်း သိသင့်သည့် အချိန်တစ်ခုသို့ ရောက်ရှိနေပြီဟု ကျွန်တော်က ဖြည့်စွက်ပြောလိုပါသည်။ ယခုအချိန်သည် ဒီမိုကရေစီရရှိရေးအတွက် တိုက်ပွဲဝင်ရမည့် အချိန်မဟုတ်သည်ကတော့ သေချာပါသည်။)
(ဆ)
မြန်မာ့ရုပ်ရှင်ထူးချွန်ဆုများကို ယခင်ကကဲ့သို့ ပြန်ကြားရေးဝန်ကြီးဌာနက စိစစ်ရွေးချယ် ဆုချီးမြှင့်မည် မဟုတ်တော့ဘဲ မြန်မာနိုင်ငံရုပ်ရှင်အစည်းအရုံးက ရွေးချယ်ချီးမြှင့်သွားမည်ဖြစ်ကြောင်း သတင်းများ ဖတ်ရှုရပါသည်။ အတော်ကြီးကို ပွဲဆူဦးမည့် အနေအထားဟု သုံးသပ်မိပါသည်။ လူလိုနတ်လို ဖြစ်ကြပါစေဟုသာ ဆုတောင်းပါသည်။ ၂၀၁၃ ခုနှစ်ရောက်လျှင်တော့ တတ်သိပညာရှင်များဖြင့် ဘုတ်အဖွဲ့ ဖွဲ့စည်းကာ ရွေးချယ်သွားမည်ဟု နောက်ဆက်တွဲ ဖတ်ရှုရသည့်အတွက်တော့ သက်ပြင်းတစ်ဝက် ချလိုက်မိပါသည်။
(ဇ)
ဆက်သွယ်ရေး၊ စာတိုက်နှင့် ကြေးနန်းဝန်ကြီးဌာန ဒုတိယ၀န်ကြီးအဖြစ် ဦးသောင်းတင် ကို ခန့်အပ်လိုက်ကြောင်း သမ္မတရုံးစာမျက်နှာတွင် ဖတ်ရှုခဲ့ရပါသည်။ ဦးသောင်းတင်သည် ဒုတိယ၀န်ကြီးအဖြစ် ခန့်အပ်ခြင်းမခံရမီ ရက်ပိုင်းအတွင်းကပင် အလုပ်ရုံဆွေးနွေးပွဲတစ်ခု၌ ဖုံးကတ်တွေကို ဈေးလျှော့ရမှာမဟုတ်ကြောင်း၊ အလကားပေးရမှာဖြစ်ကြောင်း၊ အခြားနိုင်ငံများကဲ့သို့ ဖုန်းကတ်ပေးချိန်တွင် အချိန်တစ်ခုအထိ အခမဲ့ပြောဆိုနိုင်သည်အထိ ဆောင်ရွက်ပေးရမည်ဖြစ်ကြောင်း ပြောဆိုခဲ့ပါသေးသည်။ ထို့ကြောင့် သာမန်လက်လုပ်လက်စားများနှင့် လစာနည်း ၀န်ထမ်းများအနေဖြင့် ဒုတိယ၀န်ကြီးသစ် ဦးသောင်းတင်အား မျှော်လင့်တကြီးဖြင့် စောင့်ကြည့်နေကြကြောင်း သိရှိရပါသည်။
(စ်)
အမျိုးသားဒီမိုကရေစီအဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည် ပုသိမ်မြို့သို့ ရေဘေးကယ်ဆယ်ရေး ကူညီမှုအတွက် ခရီးသွားရောက်ခဲ့ကြောင်း သတင်းစာမျက်နှာများတွင် ဓာတ်ပုံများ ဝေေ၀ဆာဆာဖြင့် အကျယ်တ၀င့် တခမ်းတနား ဖော်ပြကြတာကို ဖတ်ရှုတွေ့မြင်ရပါသည်။ ဒုက္ခရောက်နေသူများကို တတ်နိုင်သလောက် ကူညီသည်ကို သာဓုခေါ်မိပါသည်။ သို့သော် ဒေါ်အောင်ဆန်းစုကြည်၏ ပုသိမ်ခရီးစဉ် အဓိကရည်ရွယ်ချက်နှင့် ပါတီတွင်း ပြဿနာများ သွားရောက်ဖြေရှင်းသည့် သတင်းကိုမူ သတင်းမီဒီယာများ အားလုံးက တညီတညွတ်တည်း နှာစေးနေကြသည်မှာ အဘယ်ကြောင့်နည်း ဆိုသည်ကိုမူ ကျွန်တော်ကိုဉာဏ် နားလည်နိုင်ခြင်း မရှိပါ။ စတုတ္ထမဏ္ဍိုင်သည် စတုတ္ထမဏ္ဍိုင် ပီသသင့်သည်ဟုတော့ ကျွန်တော်မြင်မိပါသည်။ ယခုကဲ့သို့ သတင်းဖော်ပြရန် ပျက်ကွက်ခြင်းသည် ပြည်သူကို အမှောင်ချခြင်းတစ်မျိုးဟုသာ ကျွန်တော်ကိုဉာဏ် မြင်မိပါသည်။ မီဒီယာများ သတိပြုစေနိုင်ဖို့ စေတနာဖြင့် ထောက်ပြဝေဖန်ခြင်းရယ်ပါ။ အနာပေါ်တုတ်ကျ၍ ခပ်စပ်စပ်လေး ဖြစ်သွားခဲ့ပါလျှင် တောင်းပန်လိုက်ပါသည်။
(ည)
ပြည်ထောင်စုဝန်ကြီးဌာနတစ်ခုလျှင် ပြည်ထောင်စုဝန်ကြီး တစ်ဦးစီဖြင့် ခန့်အပ်တာဝန်ပေးအပ်သွားရန် နိုင်ငံတော်သမ္မတက သ၀ဏ်လွှာပေးပို့ခဲ့သည်ဟု သိရသည့်အတွက် ၀မ်းမြောက်ဝမ်းသာ ဖြစ်မိပါသည်။ ဟုတ်ကဲ့၊ ကျွန်တော်တို့ ၀န်ကြီးများသည် စူပါမင်းများ မဟုတ်ကြသည်ကို သမ္မတကြီး ကောင်းစွာ သိရှိသွားပြီဟု ယုံကြည်မိပါသည်။ လူတစ်ယောက်၏ ဦးနှောက်သည် အလုပ်ဘယ်နှခုကို တစ်ပြိုင်နက်တည်း အကောင်းဆုံးဖြစ်အောင် စဉ်းစားနိုင်မလဲဟူသည့် မေးခွန်းကို သမ္မတကြီး ဖြေနိုင်ခဲ့ပြီဟု ကျွန်တော်နားလည်လိုက်ပါသည်။
ဒီမျှနှင့် နားဦးမည်။ သတင်းတွေက မကုန်သေး။ ရှိသမျှသတင်းများ ရေးသားလျှင်လည်း ကျွန်တော်ကိုဉာဏ် ထမင်းပင် စားရမည်မဟုတ်ချေ။ မြန်မာ့သွေးမိတ်ဆွေများ ရွှင်လန်းချမ်းမြေ့ကြပါစေ။
အမှတ်တရ
ကိုဉာဏ် (ပန်းလောင်မြေ)
၂၀၁၂ ခုနှစ်၊ စက်တင်ဘာလ ၃ ရက်၊ တနင်္လာနေ့။
ညနေ ၆ နာရီ ၁၇ မိနစ်တွင်ပြီး၏။
No comments:
Post a Comment