Tuesday, April 12, 2011

ပျော်ရွှင်ဖွယ်ရာ နှစ်သစ်အခါသမယ ဖြစ်ကြပါစေ


မြန်မာ့ရိုးရာနှစ်သစ်ကူး အတာသင်္ကြန်ပွဲတော်တွင် ပျော်ရွှင်စွာဆင်နွှဲနိုင်ကြပါစေကြောင်း၊
မြန်မာနှစ်သစ်ကူး အခါသမယတွင် ကောင်းခြင်းမင်္ဂလာများဖြင့် ပြည့်ဝကြပါစေကြောင်း၊
နှစ်ဟောင်းများ အညစ်အကြေးများကို ရေသွန်းလောင်း၍ ဆေးကြောသကဲ့သို့ မိမိတို့၏ မကောင်းသောအကျင့်စရိုက်များ၊ မကောင်းသော စိတ်ဓာတ်များကို ပြုပြင်ပြောင်းလဲနိုင်ကြ၍ လောကအကျိုး၊ လူသားအကျိုးကို သယ်ပိုးထမ်းဆောင်နိုင်သူများ ဖြစ်ကြပါစေကြောင်း၊
အေးချမ်းသာယာသော နှစ်သစ်ကူးအခါသမယတွင် မြန်မာ့သွေးမိတ်ဆွေများအားလုံး စိတ်ဝမ်းနှလုံးရွှင်ပြုံးစွာဖြင့် ကျန်းမာချမ်းသာကြပါစေကြောင်း ဆုမွန်ကောင်း တောင်းအပ်ပါသည်။

ကိုဉာဏ် (ပန်းလောင်မြေ)
မြန်မာ့သွေးအဖွဲ့

ကျွန်တော်သိသော အပြောင်းအလဲများ - ကိုဉာဏ် (ပန်းလောင်မြေ)


  • စက္ကန့်တွေက မိနစ်၊ မိနစ်တွေက နာရီ၊ နာရီတွေက ရက်၊ ရက်တွေက လ၊ လတွေက နှစ်၊ နှစ်တွေက အချိန်တွေအဖြစ် ပြောင်းလဲနေကြတယ်။
  • ကလေးက လူငယ်၊ လူငယ်က လူလတ်၊ လူလတ်က လူကြီး၊ လူကြီးက မြေကြီးအဖြစ် ပြောင်းလဲနေကြတယ်။
  • နွေက မိုး၊ မိုးက ဆောင်း၊ ဆောင်းက နွေ၊ ရာသီအလီလီ ပြောင်းလဲနေကြတယ်။
  • ဖူးရာက ငုံ၊ ငုံရာက ပွင့်၊ ပွင့်ရာက အာ၊ အာရာက ကြွေ အဆင့်ဆင့် ပြောင်းလဲနေကြတယ်။
  • သေချာစဉ်းစားကြည့်တော့ အပြောင်းအလဲဆိုတာ သဘာဝတရားတစ်ခု။ ဘယ်သူကမှ လုပ်စရာမလိုဘူး၊ ဘယ်သူကမှ ခိုင်းစရာမလိုဘူး။
  • သိပ်အံ့သြဖို့ကောင်းတာပဲ၊ တချို့လူတွေက အပြောင်းအလဲကို ဖန်တီးရမယ်တဲ့၊ အပြောင်းအလဲဖြစ်အောင် လုပ်ရမယ်တဲ့။
  • ရယ်ချင်မိတယ်၊ ဒါပေမယ့် မရယ်မိဘူး။ ဘာကြောင့်လဲဆိုတော့ ရယ်ပြီးရင် မဲ့၊ မဲ့ပြီးရင် ငို၊ ငိုပြီးရင် ပြုံး ပြောင်းလဲကြရဦးမှာကိုး။
  • ဒီမယ်မိတ်ဆွေ.... အပြောင်းအလဲဆိုတဲ့ စကားလုံးကို ခဏခဏ မပြောစမ်းပါနဲ့။ နောင်ဆိုရင် အဲဒီစကားလုံးကိုတောင် အခြားစကားလုံးတစ်ခုနဲ့ ပြောင်းလဲချင် ပြောင်းလဲသွားနိုင်တယ်ဗျ။
  • အပြောင်းအလဲဆိုတာ သဘာဝတရားပဲ။ အဲဒါ အမှန်တရား။ (တချို့ဟာတွေက ကိုယ်လိုချင်သလို လုပ်ယူပါမှ လိုချင်တဲ့အတိုင်း ရတယ်ဗျလို့ ပြောမယ့်လူတွေကိုလည်း မငြင်းလိုကြောင်းပါ။)
  • အခုဒီစာကို ရေးနေတဲ့ ကျွန်တော်၊ ဖတ်နေတဲ့ ခင်ဗျားတောင် တစ်နေ့မှာ မြေကြီးထဲမှာ မြေဆွေးအဖြစ်၊ ဒါမှမဟုတ် လေထဲမှာ အငွေ့အဖြစ်၊ ပြာအဖြစ် ပြောင်းလဲရဦးမှာ မဟုတ်လား။
  • ကျေးဇူးပြုပြီး ကျွန်တော့်ကို အပြောင်းအလဲတွေအကြောင်း လာမမေးပါနဲ့၊ လာမပြောပါနဲ့။ ကိုယ်တိုင်ပြောင်းလဲနေတာကိုတောင် သတိမထားမိတဲ့ ကျွန်တော်က အခြားအရာတွေကို ဘာသိမှာမို့လဲဗျာ။
အမှတ်တရ
ကိုဉာဏ် (ပန်းလောင်မြေ)
၂၀၁၁ ခုနှစ်၊ ဧပြီလ ၁၂ ရက်၊ အင်္ဂါနေ့။
နေ့လည် ၁ နာရီ ၂၅ မိနစ်တွင်ပြီး၏။

 
Web Statistics