မယားဆိုးလင် အိမ်မခင် (သို့မဟုတ်) မယားဂျီကျ လင်နေမရ

လျှပ်တစ်ပြက်ဂျာနယ်၊ အတွဲ(၃)၊ အမှတ်(၇)၊ စာမျက်နှာ (၂၀) မှာ ဖတ်လိုက်ရတဲ့ ဆောင်းပါးတစ်ပုဒ်ကို သဘောကျလို့ ပြန်လည်ဝေမျှလိုက်တာပါ။ ခေါင်းစဉ်က "လင်နှင့်မယား အချစ်ပွား ဂျီတိုက်ခြင်းဖယ်ရှား" တဲ့။ ရွတ်လို့ဆိုလို့ကောင်းသလို ခပ်ဆန်းဆန်းလေးခင်ဗျ။ ရေးတဲ့လူက ဦးဟန်ညွန့် (ဥပဒေ) ပါ။ သူကလည်း သူဖတ်ခဲ့ရတဲ့ စာအုပ်တစ်အုပ်ကို ပြန်ညွှန်းထားကြောင်း ရေးထားပါတယ်။ သူပြန်ညွှန်းတဲ့စာအုပ်က ဆရာချစ်စံဝင်း ရဲ့ "တူနှစ်ကိုယ်ချစ်" တဲ့။ ၁၉၉၃ ခုနှစ်က ထုတ်ဝေခဲ့တဲ့ စာအုပ်လို့ ရှင်းပြထားပါတယ်။ အဲဒီအထဲကမှ သူသဘောကျတာလေးတွေကို ထုတ်နုတ်ပြီး ရေးသားတင်ပြထားတာပါ။ ကျွန်တော်ကိုဉာဏ်ကလည်း သူထုတ်နုတ်တင်ပြထားတဲ့အထဲကမှ ထပ်ပြီးတော့ ထုတ်နုတ်ပြီး (ထပ်ဆင့်ထုတ်နုတ်ပြီး) သဘောကျတာလေးတွေကို ဘလော့ဂ်မိတ်ဆွေတွေအတွက် ပြန်လည်ဝေငှလိုက်ခြင်းဖြစ်ကြောင်းပါ။ ပို့စ်ခေါင်းစဉ်ကိုတော့ ကျွန်တော်စိတ်ကူးမိသလို ပေးလိုက်ရခြင်းကို နားလည်ပေးနိုင်ကြမယ်လို့ မျှော်လင့်ပါတယ်။
* * * * * *
(ပို့စ်ခေါင်းစဉ်ကို မယားဆိုးလင် တအင်အင်လို့ ပေးခဲ့ပေမယ့် တစ်ယောက်ပြီးတစ်ယောက် ဘာအဓိပ္ပါယ်လဲလို့ မေးလာကြပါတယ်။ ကျွန်တော်လည်း အမှန်အတိုင်းပဲ ပြန်ဖြေရတာပေါ့။ လင်ဆိုးမယား တဖားဖားတို့၊ သားဆိုးမအေ တပေပေတို့ စတာတွေကို အတုယူပြီး မယားဆိုးလင် တအင်အင်လို့ ရေးလိုက်တာပါ။ အခုတော့ ပို့စ်နဲ့ သက်ဆိုင်မယ်ထင်ပြီး ပိုကောင်းမယ်ထင်တဲ့ ခေါင်းစဉ်တစ်ခု စဉ်းစားမိတာကြောင့် အခု အဲဒီအတိုင်းပဲ ပြောင်းရေးလိုက်ပါတယ်။ ကျေးဇူးတင်ပါတယ်။)

အမှတ်တရ
ကိုဉာဏ် (ပန်းလောင်မြေ)
၂၀၁၀ ပြည့်နှစ်၊ အောက်တိုဘာလ ၁၉ ရက်၊ အင်္ဂါနေ့။

- - - - - - - - - - - - - - - - - - - - - - - - - - - - - - - - - - - - - - - - - - - - - -

ကမ္ဘာကျော် ရုရှားစာရေးဆရာကြီး လီယိုတော်စတွိုင်း ၏ အဖြစ်အပျက်
ဇနီးက မြည်တွန်တောက်တီးနေသဖြင့် အိမ်ကထွက်ပြေးဖို့ ကြံမိသော လင်သားယောက်ျားများ ရှိတတ်ပါ၏။ ဥပမာ - ကမ္ဘာကျော် ရုရှားစာရေးဆရာကြီး လီယိုတော်စတွိုင်း ဖြစ်ပါ၏။

တော်စတွိုင်းနှင့် ဇနီးတို့သည် တစ်ဦးနှင့်တစ်ဥိး ညားခါစ အလွန်ချစ်ခင်စုံမက်၏။ ပစ္စည်းကလည်း ချမ်းသာ၊ ဂုဏ်ဒြပ်ကလည်း ရှိ၊ သူတို့ဇနီးမောင်နှံသည် လိုလေသေးမရှိ ဖြစ်ခဲ့၏။ အလွန်ပျော်ရွှင်ဖွယ်ကောင်းသော အိမ်ထောင်ရေးဖြစ်၏။

တစ်ခါက တော်စတွိုင်းသည် မိမိရေးသားထားသော စာအုပ်များကို အဖိုးအခ မယူဘဲ ပုံနှိပ်ရန် ပေးလိုက်သောအခါ မိန်းမသည် သည်းမခံနိုင်တော့ဘဲ ဆူပူရာမှ တက်သွားခဲ့၏။ အတက်ကျသွားသောအခါ သူသည် ဘိန်းပုလင်းကိုကိုင်၍ သူ့ဟာသူ သတ်သေတော့မည်ဟု ခြိမ်းခြောက်၏။ ထိုနောက်ပိုင်းတွင် မိန်းမသည် တော်စတွိုင်းအား နည်းပေါင်းစုံဖြင့် နားပူနားဆာ လုပ်တော့ရာ အိမ်ထောင်သက် (၄၈)နှစ်တွင် တော်စတွိုင်းသည် သူ့မိန်းမအား မျက်နှာချင်း မဆိုင်ချင်လောက်အောင် စိတ်နာနေတော့၏။ တော်စတွိုင်း အသက် (၈၂) သို့ ရောက်သောအခါ သူသည် ဇနီးမိန်းမ၏ နားပူနားဆာလုပ်မှု၊ ဂျီတိုက်မှုတို့ကို လုံးဝ ခံနိုင်စွမ်းရည် မရှိတော့ဘဲ အိမ်မှ ထွက်ပြေးသွားခဲ့၏။ ထိုညက ဆီးနှင်းများလည်း ပြင်းထန်စွာ ကျလျက်ရှိရာ ခြေဦးတည့်ရာ ထွက်လာခဲ့သော တော်စတွိုင်းသည် အိမ်မှထွက်လာပြီး (၁၁)ရက် အကြာတွင် မီးရထားဘူတာရုံတစ်ခုတွင် အအေးမိကာ သေဆုံးသွားရှာ၏။

တော်စတွိုင်းက သေအံ့ဆဲဆဲတွင် နောက်ဆုံးမေတ္တာရပ်ခံသွားသော စကားတစ်ရပ်မှာ "ကျုပ်မိန်းမကို ဘယ်နည်းနဲ့ပဲဖြစ်ဖြစ် ကျုပ်ဆီကို ခေါ်မလာဖို့ပါပဲ" ဟူ၍ ဖြစ်ပါ၏။

- - - - - - - -

အမေရိကန်သမ္မတကြီး လင်ကွန်း ၏ အဖြစ်အပျက်
ဂျီတိုက်မှုကို ဆရာကြီးတော်စတွိုင်း တစ်ဦးတည်း ခံခဲ့ရသည်မဟုတ်။ လင်ကွန်းဆိုသော အမေရိကန် သမ္မတကြီးသည်လည်း သူ့ဘ၀တွင် ဇနီး၏ အဆိုးဆုံးဂျီတိုက်မှုများကို ခံခဲ့ရသူ ဖြစ်ပါ၏။

လင်ကွန်း၏ ဇနီး မေရီတော့သည် ဂျီတိုက်ရာတွင် ပထမတန်းစားထဲ၌ ပါဝင်သော သမ္မတကတော်တစ်ယောက် ဖြစ်၏။ မေရီတော့က သမ္မတကြီးလင်ကွန်းအား ဘာမှ ဂျီတိုက်စရာမရှိလျှင် "ရှင်ဟာ… နားရွက်ကလည်း ကြီးနေသေးရဲ့၊ နှာခေါင်းကလည်း ကောက်၊ အောက်နှုတ်ခမ်းကြီးကလည်း တွဲကျပြီး ကိုယ်လုံးကိုယ်ပေါက်ဟာ ရှူနာရှိုက်ကုန်းသည်နဲ့ တူတယ်။ လက်တွေ၊ ခြေတွေက သိပ်ကြီးပြီး ခေါင်းကလည်း သိပ်သေးတာပဲ" စသည့် စကားများဖြင့် ဂျီတိုက်နေတတ်၏။

မေရီတော့သည် လင်ကွန်းနှင့် ညားပြီး၍ မကြာမီကာလ၌ လူအများ၏ရှေ့တွင် ကော်ဖီပူပူနှင့် မျက်နှာကို ပက်ဖူး၏။ မစ္စက်လင်ကွန်းသည် အစဉ်သဖြင့် ကျယ်လောင်သောအသံဖြင့် ဒေါသတကြီး အမြဲတမ်း ကြိမ်းမောင်းနေတတ်၏။ မစ္စက်လင်ကွန်းသည် ဒေါသထွက်လာပါက အော်ဟစ်ဆူပူရုံသာမက မကြာခဏ ကိုယ်ထိလက်ရောက် ကျူးလွန်တတ်၏။ ထို့ကြောင့်လည်း လင်ကွန်းသည် ရှေ့နေလိုက်ရာ၌ တစ်နှစ်တွင် ခြောက်လလောက် အိမ်သို့ပြန်မလာဘဲ ဟိုတယ်များတွင် ဖြစ်သလိုတည်းကာ နေတတ်၏။ လင်ကွန်းသည် အလွန်ဝေးလံသော မြို့များမှ ရှေ့နေငှားသူတို့၏ အမှုများကို ၀မ်းမြောက်ဝမ်းသာ လက်ခံ၍ လိုက်တတ်၏။ မိန်းမနှင့် ဝေးဝေးနေရလေ လင်ကွန်းအဖို့ သက်သာရာသက်သာကြောင်း ဖြစ်လေ့ရှိ၏။ ထိုခေတ်က ဟိုတယ်များသည် တည်းခိုချင်စရာ မကောင်းလောက်အောင် အခြေအနေဆိုး၏။ လူများကလည်း မလွှဲသာမှ တည်းခိုတတ်ကြရာ လင်ကွန်းသည်လည်း မလွှဲသာသော လူတစ်ယောက်ဖြစ်ခဲ့၏။ လင်ကွန်းက "နားပူနားဆာ လုပ်ခြင်းသည် အမျိုးသမီးတို့အတွက် သူတို့အား အသည်းကွဲလောက်အောင် ချစ်ပါသည်ဟု ကတိပေးထားသော ယောက်ျားများက ထိုကတိကို ရုပ်သိမ်းကာ ယင်းတို့အနီးမှ ဝေးသည်ထက်ဝေးအောင် ထွက်ပြေးကြ၍ မိမိအား မရှုချင်၊ မမြင်ချင်လောက်အောင် ဖြစ်ရသည်မှလွဲ၍ နားပူနားဆာလုပ်ခြင်းသည် အခြားအကျိုးကျေးဇူး ကြီးကြီးမားမား သိပ်မရှိလှပါ" ဟု ဆိုလေ၏။