လွန်ခဲ့တဲ့ ၉၉ နှစ်၊ ဒီနေ့လို ဖေဖော်ဝါရီလ ၁၃ ရက်နေ့၊ အညာဒေသ နတ်မောက်ဆိုတဲ့ မြို့ကလေးမှာ ကလေးငယ်တစ်ဦးကို ဖွားမြင်ခဲ့တယ်။ အဲဒီကလေးဟာ နောင်တစ်ချိန်မှာ မြန်မာနိုင်ငံကြီးကို သူ့ကျွန်ဘ၀က လွတ်မြောက်အောင် ကြံဆောင်ကြိုးပမ်း ဦးဆောင်သွားမယ့် အနာဂတ်ခေါင်းဆောင် တစ်ဦးရယ်လို့ ဘယ်သူက သိခဲ့မှာလဲ။ သာမန်သူလိုကိုယ်လို လူသားတစ်ဦးအဖြစ် မွေးဖွားခဲ့တာပါပဲ။ သူ့လိုပဲ အခြားဒေသ၊ အခြားမြို့တွေမှာလည်း ဖေဖော်ဝါရီလ ၁၃ ရက်နေ့ဖွားတွေ ရှိကြမှာပါ။ ဒါပေမယ့် အောင်ဆန်းဆိုတဲ့ ဖေဖော်ဝါရီ ၁၃ ရက်နေ့ မွေးဖွားခဲ့တဲ့ သားရတနာကတော့ မိသားစုဂုဏ်ကိုတင်မဟုတ်၊ မြန်မာ့ဂုဏ်၊ အာရှဂုဏ်ကိုပါ တင်နိုင်ခဲ့သူတစ်ဦး ဖြစ်ခဲ့ပါတယ်။
ကိုယ့်ဘ၀ရပ်တည်ရေး၊ ကိုယ့်မိသားစု အဆင်ပြေရေးအတွက်တောင် ကျွန်တော်တို့တွေ ဘယ်လောက် ကြိုးပမ်းရုန်းကန်ရသလဲဆိုတာ အားလုံးအသိပါ။ တစ်နိုင်ငံလုံး၊ တစ်မျိုးသားလုံး သူ့ကျွန်ဘ၀က လွတ်မြောက်ပြီး ကမ္ဘာ့အလယ်မှာ လွတ်လပ်တဲ့ နိုင်ငံအဖြစ် ထည်ထည်ဝါ၀ါ ရပ်တည်နိုင်အောင် ကြံစည်ကြိုးပမ်းဖို့ဆိုတာ စဉ်းစားသာကြည့်ပါလေ။ လွတ်လပ်ရေးရဖို့ ဗိုလ်ချုပ်အောင်ဆန်း ဘယ်လို ကြိုးပမ်းခဲ့တယ်၊ ဘယ်လိုစွန့်လွှတ်ခဲ့တယ်၊ ဘယ်လိုအနစ်နာခံခဲ့တယ်၊ ဘယ်လိုပင်ပန်းဆင်းရဲခဲ့တယ်၊ ဘယ်လို.....၊ ဘယ်လို.....၊ စတာတွေကို ပြောမနေတော့ပါဘူး။ လုပ်ကြံခံရလို့ ကွယ်လွန်တဲ့အချိန်မှာ ဗိုလ်ချုပ်အောင်ဆန်းဆိုတာ အသက် ၃၂ နှစ်အရွယ်ပဲ ရှိသေးတဲ့ လူငယ်တစ်ဦးဆိုတာကို နှလုံးသွင်း ဆင်ခြင်မိရုံနဲ့တင် သူဘယ်လောက် ပေးဆပ်ခဲ့ရတယ်ဆိုတာကို သိနိုင်ပါတယ်။ ဖေဖော်ဝါရီလ ၁၃ ရက်နေ့မှာ မွေးဖွားခဲ့ပြီး လူ့လောကကြီးထဲမှာ ၃၂ နှစ်သာ နေခွင့်ရခဲ့တဲ့ လူငယ်တစ်ဦးက ကျွန်တော်တို့တွေရဲ့ နှလုံးသားတွေကို ဒီနေ့အထိ ကိုင်လှုပ်နေဆဲ၊ ဒီနေ့အထိ တမ်းတနေဆဲဖြစ်အောင် လုပ်ပြသွားခဲ့တယ်။
ပြက္ခဒိန်တွေ၊ အချိန်နာရီတွေဆိုတာ မရပ်မနား သွားနေ၊ ပြောင်းနေဦးမှာပါပဲ။ ဒါပေမယ့် ဖေဖော်ဝါရီလ ၁၃ ရက် ဆိုတဲ့ ရက်စွဲတစ်ခုကဖြင့် မြန်မာနိုင်ငံအတွက်၊ မြန်မာတစ်မျိုးသားလုံးအတွက် ဘယ်တော့မျှ မမေ့သင့်တဲ့ အမှတ်တရ ရက်စွဲတစ်ခုပါ။ တစ်ခုသော ဖေဖော်ဝါရီလ ၁၃ ရက်နေ့မှာ ကျွန်တော်တို့တွေ လောကကြီးရဲ့ လက်ဆောင်၊ ဘုရားသခင်ရဲ့ လက်ဆောင်အဖြစ် အောင်ဆန်းဆိုတဲ့ လူတစ်ဦးကို ရရှိခဲ့ဖူးတယ်။ ဟုတ်တယ်... အဲဒီရက်ကို ကျွန်တော်တို့တွေ မေ့လို့ မဖြစ်ဘူး။
"" ဖေဖော်ဝါရီ ၁၃ ""
အမှတ်တရ
ကိုဉာဏ် (ပန်းလောင်မြေ)
၂၀၁၄ ဖေဖော်ဝါရီလ ၁၃ ရက်၊ ကြာသပတေးနေ့။
(၉၉) နှစ်မြောက် ဗိုလ်ချုပ်အောင်ဆန်း မွေးနေ့တွင် ရေးသားခဲ့သည်။
No comments:
Post a Comment