ငွေတွင်းကြီးများ၏အ၀ကို ကျယ်အောင်ချဲ့ပါ
ချစ်စံဝင်း
ချစ်စံဝင်း
လူ့လောကတွင် တရားဝင် သမ္မာအာဇီ၀၀င်ငွေဟူသည် ၀င်ငွေသုံးမျိုးသာရှိ၏။ အခြားဝင်ငွေ များသည် သမ္မာအာဇီဝမဟုတ်သော ၀င်ငွေများ ဖြစ်၏။ ခိုးယူ၍ရသောဝင်ငွေ၊ ဓားပြတိုက်၍ရသောဝင်ငွေ၊ လုယက်ရသောငွေ၊ လာဘ်ယူခြင်း၊ လာဘ်စားခြင်း၊ နိုင်ထက်စီးနင်းပြုလုပ်ခြင်းတို့မှ ရရှိသော ၀င်ငွေများသည် သမ္မာအာဇီဝဖြင့် ရရှိသောဝင်ငွေများ မဟုတ်၍ ထိုဝင်ငွေများအကြောင်း ကျွန်တော်တို့ မစဉ်းစားပါ။ ဓားပြ၊ လူဆိုး၊ သူခိုး၊ နိုင်ထက်စီးနင်း မတရားသိမ်းဆည်းရယူ လာဘ်လာဘယူသူများသည် လူဆိုး၊ လူယုတ်များဖြစ်၍ အကုသိုလ်နှင့် ဆက်စပ်နေသူများ ဖြစ်၏။ ယင်းလူမျိုးများသည် မုချ ပျက်စီး ဆုံးရှုံးမည့်သူများ ဖြစ်၏။ သဘာဝတရား၏ ဒဏ်ခတ်ခြင်းကို ခံရမည့်သူများ၊ အကုသိုလ်တရား၏ သားကောင်များဖြစ်၍ ထိုကဲ့သို့သော ၀င်ငွေများကို ကျွန်တော်တို့သည် ရွံရှာမုန်းတီးကြရမည်၊ ဆန့်ကျင်ရမည်ဖြစ်သည်။ ထိုဝင်ငွေများကို စက်ဆုပ်ရွံရှာကြရမည်ဖြစ်၍ ချမ်းသာကြွယ်ဝရေး နည်းလမ်းများတွင် ထိုဝင်ငွေများကို ကျွန်တော်တို့ လုံးဝ ထည့်သွင်းစဉ်းစားမှု မပြုပါ။
ကျွန်တော်တို့ သူဌေးဖြစ်ရန် အဓိကထားရမည့် ၀င်ငွေမှာ ကန့်သတ်မဲ့ဝင်ငွေ ဖြစ်ပါ၏။ ကျွန်တော်တို့ သူဌေးဖြစ်ရန် အစပျိုးရမည့်ဝင်ငွေမှာ အကန့်အသတ်ရှိသောဝင်ငွေ ဖြစ်၏။ ထို့ကြောင့် ကန့်သတ်မဲ့ဝင်ငွေသည် စိတ်ဝင်စားစရာအကောင်းဆုံး ၀င်ငွေ ဖြစ်သော်လည်း အကန့်အသတ်ဝင်ငွေ ကိုလည်း လက်လွှတ်၍ မရပါ။ ကန့်သတ်မဲ့ငွေသည် အဆုံးအစမရှိသော ငွေစီးကြောင်းကြီး ဖြစ်သည်။ ကန့်သတ်မဲ့ဝင်ငွေ တစ်စုံတစ်ရာ ရရှိထားသူသည် ငွေပုံကြီးပေါ်တွင် ခွထိုင်ထားမိသူလည်း ဖြစ်ပါ၏။
ကျွန်တော်တို့သည်-
(က) ကန့်သတ်မှုဝင်ငွေ (မိမိပိုင်အချိန်ကို ရောင်းချအသုံးပြုပြီး ရရှိသောဝင်ငွေ)
( ခ) ကန့်သတ်မဲ့ဝင်ငွေ (ငွေကြေးကို ရင်းနှီးမြှုပ်နှံပြီး ရရှိသော ၀င်ငွေ)
ဤကိစ္စနှစ်ရပ်ကို ကျွန်တော်တို့ အလေးအနက်ထား စဉ်းစားရမည်ဖြစ်သည်။
ကန့်သတ်ဝင်ငွေသည် ငွေပုံကြီးခွထိုင်ထားသလို ရရှိသော ၀င်ငွေ မဟုတ်သော်လည်း ထိုဝင်ငွေသည် သင် အသက်ရှင်ရန်အတွက် သင့်မိသားစု လတ်တလော စားဝတ်နေရေးအတွက်နှင့် စုဆောင်းငွေ ရရှိရေးတို့အတွက် မရှိမဖြစ်သော ၀င်ငွေဖြစ်၏။ သင်သည် သင့်ဘ၀ကို သင်ပိုင်အချိန်အား ရောင်းချ၍ရရှိသော ငွေမှသာ စုဆောင်းရမည်ဖြစ်၏။ သင် ငွေပုံကြီးပေါ် ထိုင်မိရန်အတွက် လိုအပ်သော အရင်းအနှီးကို သင်သည် ကန့်သတ်ဝင်ငွေဖြင့် ရှာဖွေရမည် ဖြစ်ပါ၏။
သင်သည် လူငယ်ဘ၀တွင် မိဘ၏ ပြုစုပျိုးထောင်မှုဖြင့် ပညာသင်ကြားမည်။ သို့မဟုတ် သင့်ထူးသင်ချွန် ပညာရှာရမည်။ သို့မဟုတ် ပညာရှာခြင်း မပြုနိုင်ဘဲလည်း သင့်ကိုယ်၊ သင့်ခန္ဓာမှ သင့်စွမ်းအားကို အသုံးပြု၍ ငွေရှာမည်။
ထိုသို့ ရှာဖွေ၍ ရရှိသော ငွေထဲမှ သင်သည် အချို့ကို စားသုံးပြီး ဆယ်ရာခိုင်နှုန်းကို စုဆောင်းရမည် ဖြစ်ပါ၏။ ထိုစုဆောင်းငွေကို အမြော်အမြင်ရှိရှိနှင့် ကျွမ်းကျင်စွာ ရင်းနှီးမြှုပ်နှံရမည် ဖြစ်သည်။
ဤနေရာတွင် ကျွမ်းကျင်မှု ဟူသော စကားရပ်သည် အလွန်မှ အရေးကြီးပါ၏။ ကျွမ်းကျင်မှုသည် အဆင့်မြင့်ပညာနှင့် သိပ်မဆိုင်ပါ။ အဆင့်မြင့်ပညာတတ်မြောက်မှုသည် စဉ်းစားဝေဖန်မှုကို ပေးစွမ်းနိုင် သော်လည်း ကျွမ်းကျင်မှုအတွက် ဆက်လက်လေ့လာရဦးမည် ဖြစ်၏။
ဥပမာ - ကားအရောင်းအ၀ယ်လုပ်ငန်းတွင် အရောင်းအ၀ယ်ကျွမ်းကျင်သူ ကားပွဲစားတို့ အမြတ်ရ၍ ထိုလုပ်ငန်းကို ပါမောက္ခကြီးများ မစွမ်းဆောင်နိုင်ပါ။ ပါမောက္ခကြီးများ၊ ကထိကကြီးများ၊ ဒေါက်တာဘွဲ့ရရှိသူများစွာတို့ မှာယူတင်သွင်းလာသော ကားများကို ရောင်းဝယ်ကြရာတွင် ကားအရောင်း အ၀ယ် ကျွမ်းကျင်သူ ပွဲစားများက ပါမောက္ခကြီးများထက် ပိုမို အမြတ်အစွန်းရကြသည်ကို သင်ရော ကျွန်တော်ပါ တွေ့ဖူးသောကိစ္စ၊ နေ့စဉ် ဖြစ်ပျက်နေသောကိစ္စ ဖြစ်ပါ၏။
ထို့ကြောင့် ငွေရရှိရေးကိစ္စတွင် အဆင့်မြင့်ပညာထက် ကျွမ်းကျင်မှု အမြော်အမြင်ရှိမှု အရေးကြီးပါ၏။
ကျွမ်းကျင်စွာ ရင်းနှီးမြှုပ်နှံခြင်းမှ သင်သည် အကန့်အသတ်မဲ့ ၀င်ငွေကို ရရှိ၏။ ကျွမ်းကျင်စွာ ရင်းနှီးမြှုပ်နှံမှုမှ သင်သည် အမြဲတမ်းဝင်ငွေ ရရှိနိုင်၏။ ကျွမ်းကျင်စွာ ရင်းနှီးမြှုပ်နှံထားသောငွေသည် သင့်အတွက် လခမပေးရဘဲ အလုပ်လုပ်ပေးနေသော စကားမပြောတတ်သည့် ကျွန်တစ်ယောက် ရရှိနေခြင်းနှင့် တူ၏။ ထိုကျွန်သည် သင့်အား အမြဲအလုပ်လုပ်ပေးနေ၏။ တစ်လပြီးတစ်လ တစ်နှစ်ပြီး တစ်နှစ် ၂၄ နာရီ ကာလပတ်လုံး မအိပ်မနေ သင့် ၀င်ငွေများ တိုးအောင် လုပ်ပေးနေ၏။
အလွန်ထူးခြားသည့် ထိုကျွန်သည် သင့်အား ထာဝစဉ် သစ္စာရှိရုံသာမက သင့်အတွက် ကျွန်မျိုးဆက်သစ်ကိုပါ မွေးဖွားပေးသဖြင့် သင်သည် ခေတ်သစ် ကျွန်ပိုင်ရှင်ကြီး ဖြစ်၏။ ၂၁ ရာစု၌ သင်သည် ကျွန်ပိုင်ရှင်ဖြစ်သော်လည်း သင်ကံကောင်းသည်မှာ ကျွန်ပိုင်ရှင်ဖြစ်သဖြင့် ဘယ်သူ့ကိုမှ သံခြေကျဉ်းသွားခတ်ထားရန် မလိုခြင်းဖြစ်၏။ သင်၏ ကျွန်များကို အစာရေစာ ကျွေးမွေးဖို့လည်း မလို။ ထိုကျွန်များသည် သင့်အား သစ္စာရှိ၍ အမြဲအလုပ်အကျွေးပြုနေ၏။ ထိုကျွန်များဆိုသည်မှာ သင် မှန်ကန်စွာနှင့် အမြော်အမြင်ရှိစွာ ရင်းနှီးမြှုပ်နှံထားသော အရင်းအနှီးများ ဖြစ်ပါ၏။
ထို့ကြောင့် ကျွန်တော်သည် ငွေပုံကြီးပေါ် ထိုင်မိစေရန်-
(က) ရင်းနှီးမြှုပ်နှံရန်ငွေ နှင့်
( ခ) အရည်အသွေး ကျွမ်းကျင်မှု လိုပါ၏။
ထိုအရာနှစ်ခုကို သင်ဘယ်က ရရှိမည်နည်း။
လူ့လောက၌ လူတိုင်းပိုင်ဆိုင်သော အရာသည် အချိန်သာလျှင် ဖြစ်၏။ ထိုအချိန်ကို အသုံးပြု၍ ထိုအချိန်ကို ရောင်းချ၍ သင်သည် ရင်းနှီးရန်ငွေ ရှာဖွေရမည် ဖြစ်၏။
သင်သည် ဆရာဝန်၊ အင်ဂျင်နီယာ၊ ယာဉ်မောင်း၊ ပန်းချီဆရာ၊ လခစား၊ စာရေးဆရာ၊ ရေထမ်းသမား စသည်ဖြင့် သင်တတ်ကျွမ်းသော အလုပ်တစ်ခုခုနှင့် အချိန်ကို ပေါင်းစပ်ကာ ပထမအဆင့်၌ သင်အသက်ရှင်ဖို့အတွက် အလုပ်လုပ်ရပါမည်။ ထိုသို့ အလုပ်လုပ်၍ ရသော ၀င်ငွေထဲမှ သင်တတ်နိုင်သမျှ စုဆောင်းပါ။ စုဆောင်း၍ ရရှိသောငွေကို သင် ရင်းနှီးမြှုပ်နှံရမည် ဖြစ်ပါ၏။
သင့်တွင် စုဆောင်းငွေ တစ်ရာကျပ်ရှိလျှင် တစ်ရာနှင့် ရင်းနှီးမြှုပ်နှံနိုင်သောလုပ်ငန်း၊ ၁၀၀၀ ကျပ် ရှိလျှင် ၁၀၀၀ နှင့် ရင်းနှီးမြှုပ်နှံရန်လုပ်ငန်းများ သူ့အဆင့်နှင့်သူ ရှိပါသည်။ ရသမျှ ၀င်ငွေကို တစ်ပြားတစ်ချပ်မှ မချန်ဘဲ သုံးပစ်ပါလျှင်ကား ရင်းနှီးမြှုပ်နှံရန်ငွေ မရှိဘဲ ဖြစ်၏။
သင်သည် မည်သည့်နည်းနှင့်မဆို ငွေကိုတော့ စုဆောင်းရမည် ဖြစ်သည်။ စုဆောင်းပြီးနောက် စုဆောင်းငွေကို ရင်းနှီးမြှုပ်နှံကာ ရင်းနှီးမြှုပ်နှံငွေမှသာ ငွေဝင်ပေါက်ကြီးကို တွေ့နိုင်၏။
ဝင်ငွေကို မစုဆောင်းဘဲ သုံးပစ်ခြင်းသည် မျိုးစေ့ကို ပြုတ်စားပစ်ခြင်းနှင့် တူ၏။ ပြောင်းဖူးတစ်ဖူးကို ပြုတ်စားမည့်အစား အချိန်ယူ ရင့်မှည့်အောင်ထား၍ စိုက်ပျိုးပါက သင်သည် ပြောင်းတစ်ခင်း ရနိုင်ပါမည်။ ထိုပြောင်းခင်းကြီး ဖြစ်လာမှ သင်လည်းစား၊ ပေးသင့်တာလည်းပေး၊ လှူသင့်တာလည်းလှူ၊ နောက်ထပ် ပြောင်းခင်းဆယ်ခင်းလောက်လည်း ထပ်၍ စိုက်ပါ။
ကျွန်တော်တို့သည် သုံးပစ်လိုက်သောငွေ၏ အဓိပ္ပါယ်ကိုလည်း ဖော်ထုတ်ရန် လိုအပ်ပါ၏။ ကျွန်တော်တို့ နေ့စဉ် သုံးပစ်နေသော ငွေသည် ကျွန်တော်တို့၏ လူနေမှုအဆင့်အတန်းကို ယေဘုယျအားဖြင့် ဖော်ပြနေပါ၏။ ကျွန်တော်တို့ ၀ယ်ယူသော အ၀တ်အစားများ၊ ကျွန်တော်တို့ နေသောအိမ်၊ စီးသောကား၊ နေ့စဉ် ၀ယ်ယူစားသောက်မှုများသည် ကျွန်တော်တို့၏ နေထိုင်မှုအဆင့်ကို ဖော်ပြပါ၏။
ထိုအရာများသည် ကျွန်တော်တို့ ပိုင်ဆိုင်မှုကို မဖော်ပြပါ။ ကျွန်တော်တို့၏ ကြွယ်ဝပိုင်ဆိုင်မှုကို ပြသသော အရာတို့မှာ-
- ဘဏ်တွင် စုထားသောငွေ
- လက်ဝတ်ရတနာပစ္စည်း
- ၀ယ်ထားသော အစုရှယ်ယာများ
- အနာဂတ်တွင် ၀င်ရောက်မည့်ဝင်ငွေ
အစရှိသော အရာများကသာ ကျွန်တော်တို့၏ ပိုင်ဆိုင်မှု ကြွယ်ဝမှုကို ပြဆိုပါ၏။
ထို့ကြောင့် ကျွန်တော်တို့သည်-
(က) အချိန်ကို အသုံးပြု၍ အကန့်အသတ်ရှိသောဝင်ငွေကို ရှာကြရပါမည်။
( ခ) ထိုဝင်ငွေမှ ဆယ်ရာခိုင်နှုန်းမျှကို စုရပါမည်။
( ဂ) စုငွေကို အမြော်အမြင်ရှိစွာ ရင်းနှီးရပါမည်။
(ဃ) ရင်းနှီးငွေမှရလာသော ၀င်ငွေကို ကျွန်တော်တို့ နေ့စဉ် လူနေမှုအဆင့်အတန်းအတွက် သုံး၍
( င) ရင်းနှီးငွေ ထပ်မံစုဆောင်းကာ
( စ) ထပ်မံ ရင်းနှီးမြှုပ်နှံရပါမည်။
ကျွန်တော်တို့သည် ၀င်ငွေ သံသရာကို အထက်ပါအတိုင်း လှည့်ပတ်ရပါမည်။ ထိုသို့ လှည့်ပတ်ခြင်းဖြင့် ထပ်မံ ရင်းနှီးမှုများ ပို၍ ပို၍ များလာနိုင်ပါ၏။ ထပ်မံ ရင်းနှီးမှုများခြင်းသည် သင်၏ ကြွယ်ဝမှုကို ပြဆိုပါသည်။
ဥပဒေသမှာ ၀င်ငွေသံသရာကို ကြီးမားအောင် တိုးချဲ့ပါ။
( ၂၀၀၈ ခုနှစ် ဧပြီလထုတ် “လူငယ်” မဂ္ဂဇင်း၊ အတွဲ ၃၊ အမှတ် ၄ မှ ပြန်လည်ကူးယူဖော်ပြပါသည် )
No comments:
Post a Comment