ပန်းတိုင်ကို လှမ်းမြင်နေရပြီဖြစ်သော ခရီးကြမ်း - အောင်ထွဋ်

စာရေးသူနှင့် စာရေးသူတို့၏မီဒီယာသည် လွန်ခဲ့သောငါးနှစ်ခန့်မှစ၍ မြန်မာနိုင်ငံအပေါ် ပိတ်ဆို့အရေးယူခြင်းများကို ရပ်ဆိုင်းရေး၊ မြန်မာနိုင်ငံအစိုးရနှင့် ထိတွေ့ဆက်ဆံရေးများ အစဉ်တစိုက် တွန်းအားပေးခဲ့သူဖြစ်ရာ ယခုအခါ ထိုအရေးကိစ္စများကို အဓိကသက်ဆိုင်သူ Key Stakeholder များက သဘောတူသည့် အရိပ်လက္ခဏာများ စတင်တွေ့မြင်လာရသောကြောင့် များစွာကျေနပ်အားရခြင်း ဖြစ်ရပါသည်။ ထိုကိစ္စများကို အစောပိုင်းက သဘောပေါက်ခဲ့ကြလျှင် ယနေ့ ပိုမိုကောင်းမွန်သောရလဒ်များ မြင်တွေ့ရပြီးဖြစ်လိမ့်မည်ဟု တွေးမိသောအခါမူကား များစွာ နှမြောတသခြင်းဖြစ်ရပါသည်။

လွန်ခဲ့သောငါးနှစ်ခန့်ကဆိုလျှင် မြန်မာနိုင်ငံအပေါ် ပိတ်ဆို့အရေးယူခြင်းများကို ရပ်ဆိုင်းရေး၊ မြန်မာနိုင်ငံအစိုးရနှင့် ထိတွေ့ဆက်ဆံရေးများကို အများရှေ့မှောက်တွင် ထုတ်ဖော်ပြောကြားရခြင်းသည် များစွာသတ္တိမွေးရသော သဘောရှိခဲ့ပါသည်။ လွန်ခဲ့သောငါးနှစ်အတွင်း ထိုအယူအဆကို ထုတ်ဖော်ပြောကြားသူ တဖြည်းဖြည်းများပြားလာသည့်အခါတွင်မှ တိုက်ခိုက်မှုများ အနည်းငယ်ခံသာသွားခဲ့ခြင်း ဖြစ်ပါသည်။ သို့တိုင်အောင် အဆိုပါ Antisanction, Proengagement ပြောဆိုသူများကို အုပ်စုတစ်စုအဖြစ် သတ်မှတ်ကာ တတိယအုပ်စုဟု အမည်တပ်၍ တိုက်ခိုက်မှုများစွာ ရှိခဲ့ပါသည်။ အများစုမှာ ဘောလုံးကိုမကန်ဘဲ လူကိုကန်သော ကန်ချက်များဖြစ်သည်ကို တွေ့နိုင်ပါသည်။ စာရေးသူမှာ ပြည်တွင်းမှနေ၍ ဤအယူအဆကို ပြောသူဖြစ်၍ ပုဂ္ဂိုလ်ရေးပြောဆိုစွပ်စွဲမှု များစွာခံခဲ့ရပါသည်။

မည်သို့ပင်ဖြစ်စေ ယခုအခါ အမေရိကန်ပြည်ထောင်စုအစိုးရက မြန်မာနိုင်ငံအစိုးရ၊ တပ်မတော်တို့နှင့် ထိတွေ့ဆက်ဆံရေးကို တရားဝင်ထုတ်ဖော် ပြောဆိုလာခဲ့ပြီး ထိုအပြုသဘောဆောင်သော ကံတရားများ၏ အကျိုးဆက်ကို မြန်မာပြည်သူများ မြင်တွေ့ခံစားကြရတော့မည် ဖြစ်ပေသည်။ အပေါင်းလက္ခဏာဆောင်သော ရလဒ်များအတွက် အပေါင်းလက္ခဏာဆောင်သော ပေးသွင်းမှုများ လိုအပ်သည်ကို အသေအချာယုံကြည်သော Practising Buddhist တစ်ဦးအနေနှင့် (အတိုင်းအဆကို မခန့်မှန်းနိုင်သော်လည်း) ရလဒ်ကောင်းများ ရှိလာမည်ကို အသေအချာယုံကြည် ရင်ခုန်မိပါသည်။

အမှန်အားဖြင့် အနောက်နိုင်ငံကြီးများတွင် မြန်မာနိုင်ငံအပေါ် ပိတ်ဆို့အရေးယူမှုများကို ရပ်ဆိုင်းရေး၊ မြန်မာနိုင်ငံအစိုးရ၊ တပ်မတော်တို့နှင့် ထိတွေ့ဆက်ဆံရေးများကို ပြောကြားသည့်အခါတိုင်း သက်ဆိုင်ရာ နိုင်ငံများမှ တာဝန်ရှိသူများက အဟန့်အတားအဖြစ် ရည်ညွှန်းပြောကြားလေ့ရှိသော လူပုဂ္ဂိုလ်များ၊ အဖွဲ့အစည်းများမှာ နိုင်ငံခြားသားများ ဖြစ်နေသည်ကို တွေ့ရပေသည်။ မြန်မာနိုင်ငံသားမပါရှိသလောက် ဖြစ်သော နိုင်ငံခြားသားများက ဦးစီးလုပ်ဆောင်နေသည့် Burma Campaign UK ကဲ့သို့ အဖွဲ့အစည်းမျိုး၏ သဘောထားကို မြန်မာနိုင်ငံတွင်းမှ ကာယကံရှင်မြန်မာများထက်ပို၍ အနောက်နိုင်ငံရှိ အစိုးရများစွာတို့က ဂရုစိုက်နေရသည်ကို ကြည့်လျှင် ထိုနိုင်ငံခြားသားများ မည်မျှအစွမ်းထက်သည်ကို တွေ့နိုင်ပါသည်။ စာရေးသူအနေဖြင့် ထိုသို့သော နိုင်ငံခြားသားများက အဘယ်ကြောင့် မြန်မာနိုင်ငံရေးနှင့် မြန်မာနိုင်ငံသားများကို ကိုယ်စားပြုခွင့်ရရှိနေကြသည်ကို နားမလည်နိုင်ပါ။ များစွာသေချာသည်မှာ Burma Campaign UK ကဲ့သို့ အဖွဲ့အစည်းများသည် မြန်မာနိုင်ငံကို ကိုယ်စားပြုခွင့်ရထားပါသည်ဟု အမည်အလွဲသုံးစားပြုနေခြင်းသာ ဖြစ်ပေသည်။ ၎င်းတို့အနေဖြင့် စာရေးသူတို့၏ မြန်မာနိုင်ငံတွင်း ဘ၀အခြေအနေများကို ကိုယ်ချင်းစာနာနိုင်သူများဖြစ်လိမ့်မည်ဟု စာရေးသူ မည်သည့်အခါကမျှ မယူဆပါ။ ထိုနိုင်ငံခြားသားများက မည်သို့ ဆက်လက်ကိုယ်စားပြုမည်ကို စောင့်ကြည့်ရမည်ဖြစ်သည်။ မည်သို့ပင်ဖြစ်စေ အဆိုပါအဖွဲ့မှ နိုင်ငံခြားသား အမျိုးသားတစ်ဦးနှင့် Institute of Democracy for Asia အဖွဲ့အစည်းမှ အမျိုးသမီးတစ်ဦး စုစုပေါင်း နှစ်ဦးခန့်က အနောက်နိုင်ငံများရှိ မြန်မာနိုင်ငံ Lobby ခေါ် ပိတ်ဆို့ရေးကို စီးနင်းထားရာ ၎င်းတို့ကို ကျော်လွှားနိုင်ရန် နှစ်ပေါင်းများစွာ ကြာခဲ့သည်မှာ လက်တွေ့ဖြစ်ပေသည်။ အဆိုပါအမျိုးသမီးသည် မကြာသေးခင်ကာလများအထိ အမေရိကန်သတင်းစာများတွင် မြန်မာအမည်သုံးစွဲ၍ ဆောင်းပါးရေးကာ နောက်ဆုံးခံစစ်ဖြင့် အမေရိကန်အစိုးရ၏ ထိတွေ့ဆက်ဆံရေးမူကို ပိတ်ဆို့ရန် ကြိုးစားခဲ့သေးသည်ကို တွေ့မြင်ခဲ့ရပေသည်။

အမှန်အားဖြင့် မြန်မာနိုင်ငံကို စနစ်တကျ Isolate လုပ်ထားသူများမှာ အနောက်နိုင်ငံအစိုးရများမဟုတ်ဘဲ ၎င်းနိုင်ငံများအား မြန်မာနိုင်ငံသားများကို ကိုယ်စားပြုပါသည်ဆိုကာ အလိုရှိရာပုံဖော်နေသူ အဆိုပါနိုင်ငံခြားသားများ ဖြစ်ပေသည်။ မြန်မာနိုင်ငံနှင့်ပတ်သက်၍ နားလည်မှုအလွဲ အတော်များများမှာ ၎င်းထံတွင် မြစ်ဖျားခံသည်ကို တွေ့ရသည်။ တစ်နည်းအားဖြင့်ပြောရလျှင် အဆိုပါနိုင်ငံခြားသားများ၏ "Feel Good" အတွက် မြန်မာနိုင်ငံနှင့်ပတ်သက်၍ Make Good များ ပေးဆပ်ခဲ့ရခြင်း ဖြစ်ပါသည်။ စာရေးသူအနေဖြင့် ယခုကဲ့သို့ ပုဂ္ဂလိကသဘောပါသည့် ဝေဖန်ချက်မျိုးကို ရေးသားရန် စိတ်ကူးမရှိသော်လည်း မြန်မာနိုင်ငံသားများအနေဖြင့် မိမိတို့နိုင်ငံသား သန်းပေါင်းများစွာ၏ ကံကြမ္မာကို လူတစ်ဦးစ နှစ်ဦးစက ခြယ်လှယ်ခဲ့ကြောင်း သိသာစေလိုသည့်အတွက် ရေးသားဖော်ပြရခြင်းဖြစ်ပါသည်။

အခြားတစ်ဖက်တွင်လည်း ယခုကဲ့သို့ ပြောင်းလဲလာနေသည့် အပြုသဘောဆောင်သည့် သဘောထားများ စိတ်မရှည်ဖြစ်ကာ Key Stakeholder များ မူလသဘောထားသို့ နောက်ကြောင်းပြန်သွားကြမည်ကိုလည်း များစွာစိတ်ပူရပြန်ပါသည်။ နှစ်ပေါင်းများစွာ အသားကျနေသော စနစ်တစ်ခုနှင့် ထိုစနစ်နှင့် ယဉ်ပါးနေခဲ့သူများ စနစ်အသစ်ထံကို ပြောင်းရွှေ့ကြရမည်ဖြစ်၍ အပြောင်းအလဲများနှင့် ပတ်သက်၍ စိတ်ရှည်သည်းခံကြပါမည့်အကြောင်း ကြားဝင်၍ မေတ္တာရပ်ခံလိုပါသည်။ Democratic believes and Political Culture ခေါ် ဒီမိုကရေစီရေခံမြေခံနှင့် တပ်မတော်နှင့် အရပ်ဘက်လူ့အဖွဲ့အစည်းအကြား Trust ခေါ်သည့် ဒီမိုကရေစီရေခံမြေခံများသည် စိတ်ရှည်လက်ရှည် တည်ဆောက်ယူရမည် ဖြစ်ပေသည်။

( The Voice Weekly ဂျာနယ် အတွဲ ၅၊ အမှတ် ၄၈ မှ ပြန်လည်ကူးယူဖော်ပြပါသည် )