ဇာတ်ကားအမည် - ကြာနီတစ်ပွင့် ဖြူတစ်ပွင့်
ဇာတ်လမ်း - ကာတွန်းမြင့်သိန်း
ဇာတ်ညွှန်း - ပိုင်ဆု
ဒါရိုက်တာ - မလိခစိုးထိုက်အောင်
သရုပ်ဆောင်များ - ခန့်စည်သူ၊ ခိုင်သင်းကြည်၊ မေကဗျာ၊ ဘုန်းလျှံ၊ စိုးရတနာ၊ ဇော်ဦး၊ ရူပ၊ သန်းသန်းစိုး၊ ခင်စိုးပိုင်
ဇာတ်လမ်းအကျဉ်း
လမ်းမှာမူးလဲသွားတဲ့ အမျိုးသမီးတစ်ဦးကို ကူညီလိုက်ရာက မွေးစကတည်းက ကွဲကွာနေရတဲ့ မိခင်ဖြစ်သူနဲ့ မအေတူ ဖအေကွဲ ညီမလေးကို ပြန်တွေ့ရတဲ့ လူငယ်တစ်ဦး။ ကားပေါ်မှာ ကြာဖြူပန်းလေးတွေ ခိုးပြီးလာလာထားတတ်တဲ့ ကောင်လေးကို တိတ်တခိုးစွဲလန်းနေမိတဲ့ မိန်းကလေးတစ်ဦး။ မိဘတွေသဘောတူထားတဲ့ ကောင်လေးရဲ့ သူငယ်ချင်းဟာ သူတိတ်တခိုးစွဲလန်းချစ်ခင်နေတဲ့ ကြာဖြူပန်းပိုင်ရှင် ဖြစ်နေတဲ့အခါ။ မျိုးရိုးကို အလေးအနက်ထားတတ်တဲ့ တစ်ဖက်သတ်တစ်ယူသန် မိခင်ဖြစ်သူကြောင့် ချစ်သူနှစ်ဦး ကွဲကွာလုမတတ် ဖြစ်ခဲ့ရပုံကို ဇာတ်လမ်းဆင်ထားတာပါ။
ဝေဖန်သုံးသပ်ချက်
- ပထမဆုံးအနေနဲ့ ပြောချင်တာက သရုပ်ဆောင်နာမည်တွေကို စာတန်းထိုးတဲ့အချိန်မှာ ခန့်စည်သူနဲ့ ကွဲကွာနေပြီးကာမှ ပြန်လည်ဆုံတွေ့ခဲ့ရတဲ့ မိခင်ဇာတ်ကောင်အဖြစ် သရုပ်ဆောင်ခဲ့တဲ့ သန်းသန်းစိုး ကို နာမည်လုံးဝမထည့်ခဲ့တာ တွေ့ရတယ်။ မေ့ကျန်ခဲ့ရအောင်လည်း ဒီဇာတ်ကားမှာ အဓိကမြှုပ်ကွက်ဟာ သန်းသန်းစိုး ဖြစ်နေတာပဲ။ ဖြစ်စရာအကြောင်း မရှိဘူးလို့ မြင်ပါတယ်။
- ခန့်စည်သူရဲ့ သူငယ်ချင်းအဖြစ် သရုပ်ဆောင်တဲ့ ဘုန်းလျှံကလည်း ဘာတွေလုပ်ပြနေမှန်းကို မသိဘူး။ သူသရုပ်ဆောင်တာက မပီပြင်တဲ့အတွက် ဇာတ်ကငုပ်သွားတယ်။ ဘေးကနေ မင်းသားနဲ့အပြိုင်သရုပ်ဆောင်ရမယ့်ဟာ သူ့ပုံစံနဲ့ ဘယ်လိုမှကို မအပ်စပ်ဘူး။
- ကာတွန်းမဖတ်ဖူးတဲ့အတွက် ကောင်းမကောင်း မသိဘူး။ ဒီဇာတ်ကားကတော့ ဇာတ်ကွက်တွေက ဟိုရောက်သွားလိုက်၊ ဒီရောက်သွားလိုက်၊ မလိုအပ်တဲ့အခန်းတွေကို ရိုက်ပြလိုက်နဲ့ အတော်လေးကို ဇာတ်ညွှန်းညံ့တဲ့ကားပါ။
- ဒီဇာတ်ကားတစ်ခုလုံးရဲ့ အသက်က နောက်ဆုံးအခန်း တစ်ခုပဲရှိပါတယ်။ အဲဒီအခန်းမှာ ဇော်ဦးကြီးက သူ့မိန်းမ ခင်စိုးပိုင်ကို ပြောဆိုနားချဆုံးမတဲ့အခန်းဟာ ဒီဇာတ်ကားမှာ ပေးချင်တဲ့ တစ်ခုတည်းသော message လို့ ကျွန်တော်နားလည်ပါတယ်။
ကြည့်မယ်ဆိုရင်လည်း ကြည့်ပျော်ပါတယ်။ တအားကြီးတော့ မမျှော်လင့်ထားပါနဲ့။ အပျင်းပြေကြည့်မယ်ဆိုရင်တော့ ကြည့်လို့ဖြစ်ပါတယ်။
ကိုဉာဏ် (ပန်းလောင်မြေ)
၂၀၀၉ ခုနှစ် နိုဝင်ဘာလ ၂၇ ရက်၊ သောကြာနေ့။
နံနက် ၇ နာရီ ၁၅ မိနစ်တွင် ပြီး၏။
၂၀၀၉ ခုနှစ် နိုဝင်ဘာလ ၂၇ ရက်၊ သောကြာနေ့။
နံနက် ၇ နာရီ ၁၅ မိနစ်တွင် ပြီး၏။
No comments:
Post a Comment